22
(၂ စီၤပၤ ၈:၂၅-၂၉, ၉:၂၁-၂၈)
1 ပှၤဂုာ်ဆူၣ်ပျိဆူၣ်တၢ်တဖုလၢအဟဲဃုာ်ဒီးပှၤဧ့ရ့းဖိတနီၤ န့ၣ်နုာ်လီၤဒုးတၢ်, ဒီးမၤသံကွံာ်စီၤပၤစီၤယဟိရၣ်အဖိခွါခဲလၢာ်, အိၣ်လီၤတဲာ်ဒၣ်ထဲအဖိခွါသဒါစီၤအဃၤစယၤတဂၤဧိၤန့ၣ်လီၤ. လၢတၢ်န့ၣ်အဃိဝ့ၢ်ယရူၤၡလ့ၣ်အပှၤဂီၢ်မုၢ်ဒုးကဲထီၣ်စီၤအဃၤ စယၤလၢစီၤပၤ, လၢအပၢ်အလီၢ်န့ၣ်လီၤ.
2 စီၤအဃၤစယၤကဲထီၣ်စီၤပၤဖဲအသးအိၣ်ခံဆံခံနံၣ်ဒီးပၢတ့ၢ် တၢ်လၢဝ့ၢ်ယရူၤၡလ့ၣ်အပူၤတနံၣ်န့ၣ်လီၤ. စီၤအဃၤစယၤပိာ်ထွဲ စ့ၢ်ကီးစီၤပၤအၤဃာ်အဒူၣ်ဖိထၢဖိအဒိအတဲာ်အခံန့ၣ်လီၤ.
3 အဝဲအမိၢ်နီၢ်ဧသၤလယၤ, ကီၢ်အံၣ်စရ့လးအစီၤပၤဧိၣ်ရံၤအလံၤ မုၣ်ဒီးစီၤပၤအၤဃာ်အဖိမုၣ်, ဟ့ၣ်တ့ၢ်အီၤတၢ်ဟ့ၣ်ကူၣ်လၢအဆှၢဃီၤအီၤဆူတၢ်အၢတၢ်သီအပူၤ န့ၣ်လီၤ.
4 အဝဲမၤတ့ၢ်တၢ်ဒဲးဘးထီဒါယွၤ, မ့ၢ်လၢဖဲအပၢ်သံဝံၤအလီၢ်ခံ န့ၣ်, စီၤပၤအၤဃာ်အဒူၣ်ဖိထၢဖိအဂၤတဖၣ်ကဲထီၣ်အဝဲအပှၤဟ့ၣ်ကူၣ် ဟ့ၣ်ဖးတၢ်တဖၣ်, ဒီးအဝဲသ့ၣ်ဆှၢဃီၤအီၤဆူအတၢ်ဟးဂီၤအပူၤအဃိန့ၣ်လီၤ.
5 ပိာ်ထွဲထီၣ်အဝဲသ့ၣ်အတၢ်ဟ့ၣ်ကူၣ်အခံန့ၣ်, အဝဲမၤသကိးတၢ်ဒီးကီၢ်အံၣ်စရ့လးအစီၤပၤစီၤယဟိရၣ်လၢတၢ် ဒုးတၢ်ယၤတဘျီထီဒါကီၢ်စူၤရံအစီၤပၤစီၤဃစ့လးန့ၣ်လီၤ. သုးမုၢ်တဖၣ်ဒုးလိာ်အသးဖဲဝ့ၢ်ရၤမိးလၢကီၢ်ကံးလဧးအပူၤ ဒီးစီၤယဟိရၣ်ဘၣ်ဒိဝဲလၢတၢ်ဒုးတၢ်ယၤအပူၤန့ၣ်လီၤ.
6 အဝဲဟဲက့ၤကဒါက့ၤဆူဝ့ၢ်ယံးစရ့လးလၢကမၤဘျါက့ၤအတၢ်ပူၤ လီၢ်ပူၤကျဲအဂီၢ်, ဒီးစီၤအဃၤစရၤလဲၤဖဲန့ၣ်လၢကအိၣ်သကိးအီၤအဂီၢ်န့ၣ်လီၤ.
7 ကစၢ်ယွၤသူတၢ်လဲၤအိၣ်သကိးစီၤယဟိရၣ်အံၤဒ်ကျဲလၢကကဲထီၣ် စီၤအဃၤစယၤအတၢ်ဟးဂီၤအဂီၢ်န့ၣ်လီၤ. ဖဲစီၤအဃၤစယၤအိၣ်ဝဲဖဲန့ၣ်အခါန့ၣ်, အဝဲဒီးစီၤယဟိရၣ်ဘၣ် ကွၢ်ဆၢၣ်မဲာ်လိာ်အသးဒီးပှၤတဂၤလၢအမံၤမ့ၢ်ဝဲစီၤယ့ၤဟူ, လၢအမ့ၢ်စီၤနံၣ်ၡံၤအဖိခွါ, ပှၤတဂၤလၢယွၤဃုထၢတ့ၢ်အီၤလၢ ကမၤဟးဂီၤကွံာ်စီၤအၤဃာ်အစၢၤအသွဲၣ်အတၢ်ပၢအစိၤန့ၣ်လီၤ.
8 ဖဲစီၤယ့ၤဟူမၤထွဲကစၢ်ယွၤအတၢ်စံၣ်ညီၣ်လၢစီၤအၤဃာ်အစၢၤ အသွဲၣ်အတၢ်ပၢအစိၤအဂီၢ်န့ၣ်, အဝဲဘၣ်သဃိာ်လိာ်အသးဒီးပှၤတဖုလၢအမ့ၢ်ဝဲ, ပှၤယူဒၤဖိအခိၣ်အနၢ်တဖၣ်ဒီးစီၤအဃၤစယၤအဖိဒိၣ်ခွါတဖၣ်လၢ အဟဲပိာ်ထွဲစီၤအဃၤစယၤအခံလၢတၢ်လဲၤအိၣ်သကိးအပူၤန့ၣ်လီၤ. စီၤယ့ၤဟူမၤသံကွံာ်အဝဲသ့ၣ်ခဲလၢာ်န့ၣ်လီၤ.
9 တၢ်ဃုထံၣ်န့ၢ်စီၤအဃၤစယၤ, ဒီးအဝဲဘၣ်တၢ်ထံၣ်န့ၢ်အီၤလၢ အအိၣ်ခူသူၣ်ဝဲဖဲကီၢ်ၡၤမရံအပူၤန့ၣ်လီၤ. အဝဲသ့ၣ်လဲၤစိာ်အီၤဆူ စီၤယ့ၤဟူအအိၣ်ဒီးအဝဲဒၣ်မၤသံကွံာ်အီၤန့ၣ်လီၤ. ဘၣ်ဆၣ်အဝဲသ့ၣ်ခူၣ်လီၤကွံာ်အစိၣ်လၢတၢ်ပာ်ကဲအဝဲအဖုစီၤပၤ ယဟိၡၤဖးအဃိန့ၣ်လီၤ. စီၤယဟိၡၤဖးမၤတ့ၢ်ကယဲၢ်တၢ်ခဲလၢာ်ဒ်အသ့ဝဲအသိးလၢကမၤယွၤ အတၢ်အဂီၢ်န့ၣ်လီၤ. စီၤအဃၤစယၤအဟံၣ်ဖိဃီဖိတအိၣ်လီၤတဲာ်တ့ၢ်ဘၣ်နီတဂၤလၢပၢ က့ၤဘီမုၢ်ကသ့ဝဲန့ၣ်ဘၣ်.
(၂စီၤပၤ ၁၁:၁-၃)
10 တုၤစီၤပၤအဃၤစယၤအမိၢ်နီၢ်ဧသၤလယၤသ့ၣ်ညါဝဲလၢအဖိခွါဘၣ် တၢ်မၤသံကွံာ်အီၤတဘျီဃီန့ၣ်အဝဲဟ့ၣ်လီၤအကလုၢ်လၢကယဲၢ်ကီၢ် ယူဒၤအစီၤပၤအပှၤဟံၣ်ဖိဃီဖိခဲလၢာ်ကဘၣ်တၢ်မၤသံကွံာ်အီၤန့ၣ်လီၤ.
11 စီၤအဃၤစယၤအိၣ်ဒီးအဒီပုၢ်ဝဲၢ်မုၣ်တဂၤလၢအမိၢ်တမ့ၢ်တဂၤဃီ ဘၣ်လၢအမံၤမ့ၢ်နီၢ်ယဟိၡဘၤလၢအဒိးတ့ဒိးဖျီအသးဒီးပှၤလုၢ် တၢ်အခိၣ်တဂၤလၢအမ့ၢ်ဝဲစီၤယဟိယဒါန့ၣ်လီၤ. လၢတၢ်ခူသူၣ်အပူၤ, အဝဲမၤပူၤဖျဲးစီၤအဃၤစယၤအဖိခွါတဖၣ် အကျါတဂၤလၢအမ့ၢ်စီၤယိၤအၣ်န့ၣ်လီၤ. အဝဲစိာ်ကွံာ်အီၤလၢစီၤပၤဖိခွါအဂၤလၢတၢ်ကမၤသံအီၤတဖၣ် အကျါဒီးပာ်ခူသူၣ်အီၤဃုာ်ဒီးပိာ်မုၣ်လၢအကွၢ်အီၤတဂၤလၢ ယွၤအတၢ်လုၢ်ဟံၣ်အဒၢးတဖျၢၣ်အပူၤန့ၣ်လီၤ. လၢအဝဲအတၢ်ပာ်ခူသူၣ်အံၤအဃိ, အဝဲမၤပူၤမၤဖျဲးအီၤလၢနီၢ်ဧသၤလယၤအတၢ်မၤသံအီၤန့ၣ်လီၤ.
12 လၢဃုနံၣ်အတီၢ်ပူၤ, ဖဲနီၢ်ဧသၤလယၤပၢတၢ်ဒ်နီၢ်ပၤမုၣ်အခါ န့ၣ်အဝဲအိၣ်ခူသူၣ်တ့ၢ်ဝဲဖဲန့ၣ်လီၤ.