16
(၁စီၤပၤ ၁၅:၁၇-၂၂)
1 လၢကီၢ်ယူဒၤအစီၤပၤအၤစါပၢတၢ်သၢဆံဃုနံၣ်တနံၣ်အပူၤန့ၣ်, ကီၢ်အံၣ်စရ့လးအစီၤပၤဘါၡၤဟဲနုာ်လီၤဒုးကီၢ်ယူဒၤဒီးစး ထီၣ်မၤဂၢၢ်မၤကျၢၤဝ့ၢ်ရၤမါအတိာ်အတာ်တဖၣ်ဒ်သိးအကတြီကွံာ် တၢ်ဟဲနုာ်ဟးထီၣ်လၢကီၢ်ယူဒၤအပူၤန့ၣ်လီၤ.
2 လၢတၢ်န့ၣ်အဃိစီၤအၤစါဟံးထီၣ်ကွံာ်စ့ဒီးထူလၢယွၤအတၢ် လုၢ်ဟံၣ်ဒီးနီအတၢ်ပာ်ဖှိၣ်အလီၢ်တဖၣ်ဒီးဆှၢလီၤဝဲဆူဝ့ၢ်ဒၤ မ့ၤစ့းဆူကီၢ်စူၤရံအစီၤပၤဘ့ၣ်ဟဒးအအိၣ်ဃုာ်ဒီးတၢ်ကစီၣ်အံၤန့ၣ်လီၤ.
3 “မ်ပကဲထီၣ်ပှၤဒီသိၣ်ဒီမှံၤတဖၣ်ဒ်ပပၢ်တဖၣ်မၤတ့ၢ်ဝဲအသိး တက့ၢ်. စ့ဒီးထူအံၤမ့ၢ်တၢ်ဟ့ၣ်ကနၢၤလၢနဂီၢ်လီၤ. ခဲကနံၣ်အံၤမၤဟးဂီၤကွံာ်နတၢ်ဒီသိၣ်ဒီမှံၤဒီးကီၢ်အံၣ် စရ့လးအစီၤပၤဘါၡၤ, ဒ်သိးအဝဲကဘၣ်ထုးကွံာ်အပှၤသုးဖိတဖၣ်လၢယလီၢ်ကဝီၤအပူၤန့ၣ် တက့ၢ်.”
4 စီၤဘ့ၣ်ဟဒးဘၣ်သူၣ်ဘၣ်သးတ့ၢ်လၢစီၤအၤစါအတၢ်ဃ့, ဒီးအဝဲဆှၢလီၤအပှၤသုးမုၢ်အခိၣ်တဖၣ်ဃုာ်ဒီးအဝဲသ့ၣ်အသုး မုၢ်တဖၣ်ဒ်သိးအကလဲၤဒုးကီၢ်အံၣ်စရ့လးအဝ့ၢ်တဖၣ်န့ၣ်လီၤ. အဝဲသ့ၣ်မၤန့ၢ်ကွံာ်ဝ့ၢ်ဧံၤယိၣ်, ဝ့ၢ်ဒၣ်, ဝ့ၢ်အၤဘ့ၤလးဘ့ၤ သမၤကၤဒီးကယဲၢ်ဝ့ၢ်ခဲလၢာ်လၢနးသၤလံအကီၢ်ပူၤဖဲတၢ်လၢတၢ် လိၣ်ဘၣ်တဖၣ်ဘၣ်တၢ်ပိာ်ဖှိၣ်အီၤအလီၢ်န့ၣ်လီၤ.
5 တုၤစီၤပၤဘါၡၤနၢ်ဟူတ့ၢ်တၢ်လၢအမၤအသးန့ၣ်, အဝဲဆိကတီၢ်ကွံာ်အတၢ်မၤဂၢၢ်မၤကျၢၤဝ့ၢ်ရၤမါအတိာ်အတာ်တဖၣ် ဒီးပာ်တီၢ်ကွံာ်တၢ်မၤန့ၣ်လီၤ.
6 အန့ၣ်ဒီးစီၤပၤအၤစါကိးဖှိၣ်ပှၤတဖၣ်လၢကီၢ်ယူဒၤဒီတဘ့ၣ် ညါ, ဒီးမၢအစိာ်ထီၣ်ကွံာ်လၢၢ်တဖၣ်ဒီးသ့ၣ်တဖၣ်လၢစီၤဘါၡၤသူတ့ၢ် ဝဲဖဲဝ့ၢ်ရၤမါ, ဒီးအဝဲသ့ၣ်သူက့ၤဝဲလၢတၢ်မၤဂၢၢ်မၤကျၢၤက့ၤ ဝ့ၢ်က့ဘၢ်ဒီးဝ့ၢ်မံးစပၤအတိာ်ဧိၤတာ်ဧိၤအဂီၢ်န့ၣ်လီၤ.
7 ဖဲအကတီၢ်အဝဲန့ၣ်, ဝံဃနၤနံလဲၤဆူစီၤပၤအၤစါအအိၣ်ဒီးစံး ဘၣ်အီၤ, “လၢနကသန့ၤနသးလၢယွၤ, နကစၢ်ယွၤအလီၢ်န့ၣ်, မ့ၢ်လၢနသန့ၤနသးလၢကီၢ်စူၤရံအစီၤပၤအဃိ စူၤရံအစီၤပၤအသုးမုၢ်ဃ့ၢ်ပူၤဖျဲးကွံာ်လၢနအိၣ်န့ၣ်လီၤ.
8 ပှၤကူၤၡးဖိဒီးပှၤလူဘးဖိတဖၣ်အိၣ်ဒီးအသုးမုၢ်ဖးဒိၣ်တဖၣ် ဃုာ်ဒီးလ့ၣ်ကဟၣ်သုးဒီးပှၤဒိးကသ့ၣ်သုးဖိအါအါဂီၢ်ဂီၢ် တမ့ၢ်ဘၣ်ဧါ. ဘၣ်ဆၣ်မ့ၢ်လၢနသန့ၤနသးလၢယွၤအဃိ, အဝဲဟ့ၣ်နၤတၢ်မၤနၢၤလၢအဝဲသ့ၣ်အဖီခိၣ်န့ၣ်လီၤ.
9 ယွၤကွၢ်ထံကွၢ်ဆးတၢ်လၢဟီၣ်ခိၣ်ဒီဘ့ၣ်ညါအဖီခိၣ်, ဒ်သိးအကဟ့ၣ်ဂံၢ်ဟ့ၣ်ဘါပှၤတဖၣ်လၢအအိၣ်ဒီးတၢ်သးတီဒီးအီၤ န့ၣ်လီၤ. နမၤတ့ၢ်လံတၢ်ဒ်ပှၤအမၢးတဂၤဒီးစးထီၣ်ခဲအံၤန့ၣ်နကဘၣ်ဒုး တၢ်ယၤတၢ်ထီဘိန့ၣ်လီၤ.”
10 တၢ်အံၤမ့ၢ်တၢ်လၢအဒုးသးထီၣ်ဘၣ်စီၤအၤစါလၢဝံဃနၤနံ ဒိၣ်ဒိၣ်မုၢ်မုၢ်အဃိ, အဝဲမၢပှၤတ့ၢ်နုာ်အီၤဆူဃိာ်ပူၤန့ၣ် လီၤ. တၢ်န့ၣ်မ့ၢ်တၢ်ဆၢကတီၢ်တကတီၢ်ဃီဖဲစီၤအၤစါစးထီၣ်မၤအၢမၤ နးပှၤဂီၢ်မုၢ်တနီၤနီၤအၢအၢသီသီန့ၣ်လီၤ.
(၁စီၤပၤ ၁၅:၂၃-၂၄)
11 ကယဲၢ်တၢ်မၤအသးခဲလၢာ်ဘၣ်ထွဲဒီးစီၤပၤအၤစါအတၢ်ပၢစးထီၣ် လၢအခီၣ်ထံးတုၤအကတၢၢ်န့ၣ်, ဘၣ်တၢ်ကွဲးနီၣ်ကွဲးဃါအီၤလၢကီၢ်ယူဒၤဒီးကီၢ်အံၣ်စရ့လး အစီၤပၤတဖၣ်အလံာ်တၢ်စံၣ်စိၤတဲစိၤအပူၤန့ၣ်လီၤ.
12 လၢစီၤပၤအၤစါပၢတၢ်သၢဆံခွံနံၣ်တနံၣ်အပူၤန့ၣ်, အဝဲအခီၣ်ဟးဂီၤကွံာ်ဝဲလၢခီၣ်အတၢ်ဆါနးနးကလဲာ်တမံၤအဃိ န့ၣ်လီၤ. ဘၣ်ဆၣ်, အန့ၣ်ဒၣ်လဲာ်အဝဲတဃၣ်ဘၣ်အသးဆူ ယွၤအအိၣ်လၢတၢ်မၤစၢၤအဂီၢ်ဘၣ်. မ့မ့ၢ်ဃၣ်အသးဆူ ကသံၣ်သရၣ်တဖၣ်အအိၣ်တခီန့ၣ်လီၤ.
13 ခံနံၣ်ပူၤကွံာ်အလီၢ်ခံ, အဝဲသံဝဲ,
14 ဒီးဘၣ်တၢ်ခူၣ်လီၤကွံာ်အီၤလၢတၢ်သွၣ်ခိၣ်လၢၢ်အပူၤလၢစိးပျၤ ဝဲလၢအဂီၢ်ဒၣ်ဝဲလၢစီၤဒၤဝံးအဝ့ၢ်ပူၤန့ၣ်လီၤ. အဝဲသ့ၣ်သူဝဲတၢ်နၢမူတဖၣ်ဒီးသိနၢမူတဖၣ်လၢကကတဲာ်ကတီၤ အစိၣ်လၢတၢ်ကခူၣ်လီၤကွံာ်အီၤအဂီၢ်, ဒီးအဝဲသ့ၣ်မၤထီၣ်တၢ်ဆူးကဲၤမ့ၣ်အူဖးဒိၣ်တခါဒ်သိးကသူၣ် အုးသးအုးလၢအဝဲအတၢ်သံအဃိန့ၣ်လီၤ.