15
1 ကစၢ်ယွၤအသးလီၤဘၣ်လၢစီၤဧိၤဒ့းအဖိခွါစီၤဧစၤရယၤအလိၤ,
2 ဒီးအဝဲဟးထီၣ်ဒ်သိးကလဲၤထံၣ်စီၤပၤအၤစါအဂီၢ်န့ၣ်လီၤ. ဒီးအဝဲကိးထီၣ်ဝဲ, “စီၤပၤအၤစါဒီးကယဲၢ်ပှၤဂီၢ်မုၢ်လၢ ယူဒၤဒီးဘံၣ်ယၤမံၣ်သ့ၣ်ဧၢ, ဒိကနၣ်ယၤတက့ၢ်. တုၤသုအိၣ်ဒီးယွၤန့ၣ်, ယွၤအိၣ်ဒီးသုန့ၣ်လီၤ. သုမ့ၢ်ဃုထံၣ်န့ၢ်အီၤဒီးအဝဲကပျဲသုထံၣ်န့ၢ်အီၤ, မ့မ့ၢ်, သုမ့ၢ်ဃၣ်ကွံာ်သုသးဒီးအဝဲကပာ်လီၤတဲာ်ကွံာ်သုန့ၣ်လီၤ.
3 လၢအါနံၣ်အါလါအပူၤန့ၣ်, ကီၢ်အံၣ်စရ့လးအိၣ်မူဝဲ, တအိၣ်ဘၣ်ဒီးကစၢ်ယွၤအမ့ၢ်အတီ, တအိၣ်ဘၣ်ဒီးပှၤလုၢ်တၢ်အခိၣ် တဖၣ်လၢကသိၣ်လိအဝဲသ့ၣ်ဒီးတအိၣ်ဘၣ်ဒီးတၢ်စူၢ်တၢ်နာ်အတၢ်သိၣ် တၢ်သီတမံၤဘၣ်န့ၣ်လီၤ.
4 ဘၣ်ဆၣ်တုၤတၢ်ကိၢ်တၢ်ဂီၤဟဲဝဲန့ၣ်, အဝဲသ့ၣ်ဃၣ်က့ၤအသးဆူ ယွၤ, အံၣ်စရ့လးအကစၢ်ယွၤအအိၣ်န့ၣ်လီၤ. အဝဲသ့ၣ်ဃုအီၤဒီးထံၣ်န့ၢ်အီၤလီၤ.
5 လၢမုၢ်နံၤတဖၣ်အပူၤန့ၣ်, ပှၤဟဲနုာ်ဟးထီၣ်လၢတၢ်ဘံၣ်တၢ်ဘၢ အပူၤသ့, တအိၣ်ဘၣ်နီတဂၤဘၣ်. အဂ့ၢ်ဒ်အံၤ, တၢ်မၤကိၢ်မၤဂီၤဒီးတၢ်တဘၣ်လိာ်ဘၣ်စးအိၣ်ဝဲဒၣ် လၢထံကီၢ်ကိးဘ့ၣ်ဒဲးအပူၤအဃိန့ၣ်လီၤ.
6 ပှၤတကလုာ်မၤနးမၤဖှီၣ်ပှၤအဂၤတကလုာ်, ဒီးဝ့ၢ်တဝ့ၢ်မၤနးမၤ ဖှီၣ်ဝ့ၢ်အဂၤတဝ့ၢ်, မ့ၢ်လၢကစၢ်ယွၤဟဲစိာ်တၢ်ကိၢ်တၢ်ဂီၤဒီးတၢ်သူၣ်အုးသးအုးလၢ အဝဲသ့ၣ်အဖီခိၣ်အဃိန့ၣ်လီၤ.
7 မ့မ့ၢ်, သုဂံၢ်သုဘါကဘၣ်ဆူၣ်ဒီးသုတဘၣ်သးဟးဂီၤဘၣ်. တၢ်မၤလၢသုမၤန့ၣ်ကအိၣ်ဒီးအဘူးအလဲန့ၣ်လီၤ.”
8 တုၤစီၤပၤအၤစါနၢ်ဟူဝံအတၢ်စံးပာ်လၢစီၤဧိၤဒ့းအဖိခွါ စီၤဧစၤရယၤစံးဝဲန့ၣ်, အဝဲအဂံၢ်အဘါဘၣ်တၢ်ဒုးဆူၣ်ထီၣ်အီၤန့ၣ်လီၤ. အဝဲသုးကွံာ်ကယဲၢ်တၢ်ဂီၤတၢ်ဖီၣ်တဖၣ်လၢယူဒၤဒီးဘံၣ်ယၤမံၣ် အကီၢ်ပူၤ, ဒီးကယဲၢ်တၢ်ဂီၤတၢ်ဖီၣ်ခဲလၢာ်လၢဝ့ၢ်တဖၣ်လၢအဝဲမၤန့ၢ်တ့ၢ် ဝဲ, လၢအ့ဖရဲၣ်အကစၢၢ်ကလိတဖၣ်အလိၤန့ၣ်လီၤ. အဝဲဘှီဂ့ၤထီၣ်က့ၤစ့ၢ်ကီးယွၤအတၢ်လုၢ် လီၢ်လၢအအိၣ်ဆၢထၢၣ်ဖဲယွၤအတၢ်လုၢ်ဟံၣ်အဂၢၤပူၤန့ၣ်လီၤ.
9 ပှၤဂီၢ်မုၢ်အါမးလၢအ့ဖရဲၣ်, မနၤၡ့ၤဒီးစူးမ့းအိၣ်, ဟဲခီဃီၤဆူစီၤအၤစါအအိၣ်တကပၤဒီးအိၣ်ဝဲဆိးဝဲလၢအဘီအမုၢ်အပူၤ, မ့ၢ်လၢအဝဲသ့ၣ်ထံၣ်တ့ၢ်ဝဲလၢယွၤအိၣ်ဒီးအီၤအဃိန့ၣ်လီၤ. စီၤအၤစါကိးဖှိၣ်အဝဲသ့ၣ်ခဲလၢာ်ဃုာ်ဒီးပှၤဂီၢ်မုၢ်လၢယူ ဒၤဒီးဘံၣ်ယၤမံၣ်တဖၣ်န့ၣ်လီၤ.
10 အဝဲသ့ၣ်အိၣ်ဖှိၣ်ရိဖှိၣ်ဝဲလၢဝ့ၢ်ယရူၤၡလ့ၣ်အပူၤဖဲစီၤအၤ စါကဲစီၤပၤတဆံယဲၢ်နံၣ်တနံၣ်လါသၢလါတလါအပူၤန့ၣ်လီၤ.
11 လၢမုၢ်နံၤအဝဲအံၤန့ၣ်, အဝဲသ့ၣ်လုၢ်ထီၣ်တၢ်လုၢ်တၢ်ပာ်တဖၣ်ဆူ ယွၤအအိၣ်လၢတၢ်ဂုာ်န့ၢ်လၢအဝဲသ့ၣ်ဟဲက့ၤစိာ်ဝဲတဖၣ်အပူၤလၢ အမ့ၢ်, ဂီၤဖံးအဒုနွံကယၤဒီးသိအဒုနွံကထိန့ၣ်လီၤ.
12 အဝဲသ့ၣ်မၤတ့ၢ်တၢ်အၢၣ်လီၤအီလီၤတမံၤလၢအဝဲသ့ၣ်အၢၣ်လီၤဝဲ လၢအဝဲသ့ၣ်ကဘူၣ်ထီၣ်ဘါထီၣ်ယွၤအဝဲသ့ၣ်အမိၢ်ပၢ်ဖံဖုလၢပျၢၤ တဖၣ်အကစၢ်ယွၤ, လၢအသူၣ်ကံၢ်သးလဲဒီးအသးဒီဖျၢၣ်ညါန့ၣ်လီၤ.
13 ပှၤတဂၤလၢ်လၢ်, အသးစၢ်မ့ၢ်ဂ့ၤအသးပှၢ်မ့ၢ်ဂ့ၤ, ပိာ်ခွါမ့ၢ်ဂ့ၤ, ပိာ်မုၣ်မ့ၢ်ဂ့ၤလၢအတဘူၣ်ထီၣ်ဘါထီၣ်ယွၤ န့ၣ်, ကဘၣ်တၢ်မၤသံကွံာ်အီၤန့ၣ်လီၤ.
14 လၢအကလုၢ်သီၣ်ဖးဒိၣ်အပူၤန့ၣ်, အဝဲသ့ၣ်မၤတၢ်ဆိၣ်တမံၤလၢယွၤ အမံၤအပူၤ, လၢအဝဲသ့ၣ်ကတိၢ်န့ၢ်တၢ်အၢၣ်လီၤအီလီၤဝံၤဒီးအဝဲသ့ၣ်ကိးသ တြီထီၣ်ဝဲဒီးအူထီၣ်ကွဲၤတဖၣ်န့ၣ်လီၤ.
15 ကယဲၢ်ပှၤဂီၢ်မုၢ်လၢကီၢ်ယူဒၤအပူၤသူၣ်ဖှံသးညီဝဲမ့ၢ်လၢ အဝဲသ့ၣ်မၤတ့ၢ်တၢ်အၢၣ်လီၤအီလီၤအံၤလၢအသူၣ်ဒီဖျၢၣ်သးဒီ ဖျၢၣ်အဃိန့ၣ်လီၤ. အဝဲအိၣ်ဒီးတၢ်သူၣ်မုာ်သးမုာ်လၢတၢ်ဘူၣ်ထီၣ်ဘါထီၣ်ယွၤအပူၤ, ဒီးယွၤတူာ်လိာ်အဝဲသ့ၣ်ဒီးဟ့ၣ်လီၤအဝဲသ့ၣ်လၢတၢ်ဃူတၢ်ဖိး လၢတၢ်ကိးကပၤဒဲးအပူၤန့ၣ်လီၤ.
16 စီၤပၤအၤစါသုးကွံာ်အဖံနီၢ်မၤကၤလၢနီၢ်ပၤမုၣ်အမိၢ်အ လီၢ်, မ့ၢ်လၢအဝဲတ့ထီၣ်ဟီၣ်ခိၣ်ညၣ်ထ့ၣ်အကစၢ်မုၣ်အၡ့ရၤအဂီၤတခါလၢ ကမၤကတၢသူၣ်ကတၢသးတၢ်အဃိန့ၣ်လီၤ. စီၤအၤစါကူာ်လီၤကွံာ်တၢ်ဂီၤန့ၣ်ဒီးမၤလီၤကလဲကွံာ်ဝဲဒီး ဆူးကဲၤထီၣ်ကွံာ်တၢ်လီၤကလဲတဖၣ်န့ၣ်လၢကံဒြိၣ်အကစၢၢ်ကဆူး အပူၤန့ၣ်လီၤ.
17 စီၤအၤစါမ့ၢ်တမၤဟးဂီၤကွံာ်ပှၤတစူၢ်တနာ်ကစၢ်ယွၤအတၢ်ဘူၣ် ထီၣ်ဘါထီၣ်အလီၢ်တဖၣ်လၢထံလီၢ်ကီၢ်ပူၤဒၣ်လဲာ်, အဝဲအိၣ်ဒံးဒီးတၢ်သးတီဒီးယွၤလၢအသးသမူဒီတကတီၢ်ညါအပူၤ န့ၣ်လီၤ.
18 ကယဲၢ်တၢ်အဃၢၤအဃိာ်ခဲလၢာ်လၢအပၢ်စီၤအဘံယၤပာ်စီဆှံ တ့ၢ်ဝဲဆူကစၢ်ယွၤအအိၣ်န့ၣ်, အဝဲပာ်ဝဲလၢယွၤအတၢ်လုၢ်ဟံၣ်အ ပူၤ, ဃုာ်ဒီးတၢ်အဃၢၤအဃိၢ်ထူဒီးစ့တဖၣ်လၢအဝဲအကစၢ်ဒၣ်ဝဲ ပာ်စီဆှံတ့ၢ်အီၤန့ၣ်လီၤ.
19 တၢ်ဒုးတၢ်ယၤတအိၣ်လၢၤဘၣ်နီတစုတုၤလီၤလၢအဝဲပၢတၢ်ပှဲၤထီၣ် သၢဆံယဲၢ်နံၣ်တနံၣ်အပူၤန့ၣ်လီၤ.