1 စီၤပၤအဘံယၤသံဝဲဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ် သွၣ်ခိၣ်လၢစီၤဒၤဝံးအဝ့ၢ်ပူၤန့ၣ်လီၤ. အဝဲအဖိခွါစီၤအၤစါကဲထီၣ်စီၤပၤလၢအလီၢ်, ဒီးလၢစီၤအၤစါအတၢ်ပၢအဖီလာ်န့ၣ်ထံကီၢ်အိၣ်ဘၣ်ဝဲမုာ်မုာ် ခုၣ်ခုၣ်လၢဆံဆဲၣ်နံၣ်အတီၢ်ပူၤန့ၣ်လီၤ. 2 စီၤအၤစါမၤမုာ်တ့ၢ်ယွၤ, အကစၢ်ယွၤအသးခီဖျိမၤတၢ်လၢအဘၣ် ဒီးဂ့ၤဝဲအဃိန့ၣ်လီၤ. 3 အဝဲသုးကွံာ်ပှၤတခီဘီမုၢ်ဖိအတၢ်လုၢ်လီၢ်တဖၣ်ဒီးပှၤဘါတၢ် ဂီၤတၢ်ဖီၣ်အတၢ်ဘူၣ်ထီၣ်ဘါထီၣ်အလီၢ်တဖၣ်, မၤလီၤကလဲကွံာ်ပှၤဘါတၢ်ဂီၤတၢ်ဖီၣ်အလၢၢ်ထူၣ်စီၤဆှံတဖၣ်, ဒီးကူာ်လီၤကွံာ်ကစၢ်မုၣ်အၡ့ရၤအတၢ်ပနီၣ်တဖၣ်န့ၣ်လီၤ. 4 အဝဲဟ့ၣ်လီၤအကလုၢ်လၢကီၢ်ယူဒၤအပှၤဂီၢ်မုၢ်ကဘၣ်မၤဒ်ယွၤ, မိၢ်ပၢ်ဖံဖုလၢပျၢၤတဖၣ်အကစၢ်ယွၤအတၢ်ဘၣ်အသး, ဒီးကဘၣ်စူၢ်အဝဲအတၢ်သိၣ်လိတဖၣ်ဒီးအတၢ်မၤလိာ်တဖၣ်န့ၣ်လီၤ. 5 မ့ၢ်လၢအဝဲမၤဟးဂီၤလၢာ်ကွံာ်ပှၤဘါတၢ်ဂီၤတၢ်ဖီၣ်အတၢ်ဘူၣ်တၢ် ဘါထီၣ်ယွၤအလီၢ်တဖၣ်ဒီးတၢ်ဆူးကဲၤတၢ်နၢမူအတၢ်လုၢ်လီၢ်တ ဖၣ်, လၢကယဲၢ်ကီၢ်ယူဒၤအဝ့ၢ်ခဲလၢာ်အပူၤအဃိအဘီမုၢ်အိၣ်မုာ်အိၣ် ခုၣ်ဝဲလၢအဝဲအတၢ်ပၢအဖီလာ်န့ၣ်လီၤ. 6 လၢဆၢကတီၢ်တဖၣ်အံၤအပူၤန့ၣ်အဝဲသူၣ်ထီၣ်ဘှီထီၣ်တိာ်ဧိၤတာ် ဧိၤတဖၣ်လၢကီၢ်ယူဒၤအဝ့ၢ်တဖၣ်အဂီၢ်ဒီးလၢတဘျုးနံၣ်အတီၢ်ပူၤ န့ၣ်, တၢ်ဒုးတၢ်ယၤတအိၣ်ဝဲဘၣ်မ့ၢ်လၢယွၤဟ့ၣ်အီၤတၢ်ဃူတၢ်မုာ်အဃိ န့ၣ်လီၤ. 7 အဝဲတဲဘၣ်ကီၢ်ယူဒၤအပှၤဂီၢ်မုၢ်, “မ်ပမၤဂၢၢ်ထီၣ်ကျၢၤထီၣ် ပဝ့ၢ်တဖၣ်ခီဖျိတၢ်သူၣ်ထီၣ်တၢ်ဒူၣ်တဖၣ်ဒီးတၢးခီခၢၣ်သနၢၣ်တ ဖၣ်, တြဲၤဖးဒိၣ်တဖၣ်လၢဘၣ်တၢ်ကးတံၢ်အီၤဒီးဂိာ်တံၢ်ဃာ်အီၤလၢထး ဖျၢၣ်သ့ဝဲန့ၣ်တက့ၢ်. ပမၤန့ၢ်လံထံဧိၤကီၢ်ဧိၤမ့ၢ်လၢပမၤတ့ၢ်ယွၤ, ပကစၢ်ယွၤအတၢ်ဘၣ်အသးအဃိန့ၣ်လီၤ. အဝဲဒီဒၣ်အိၣ်ပှိၤပှၤဒီး ဟ့ၣ်ပှၤတၢ်ဘံၣ်တၢ်ဘၢလၢတၢ်ကိးကပၤဒဲးအပူၤန့ၣ်လီၤ.” ဒီးလၢတၢ်န့ၣ်အဃိအဝဲသ့ၣ်သူၣ်ထီၣ်ဘှီထီၣ်တၢ်ဒီးဘီၣ်ထီၣ်ညီ ထီၣ်ဝဲဒၣ်န့ၣ်လီၤ. 8 စီၤပၤအၤစါအိၣ်ဒီးသုးမုၢ်တဖုလၢအပှၤသုးဖိအိၣ်ဝဲ သၢကလီၢ် ဂၤလၢယူဒၤအဒူၣ်, အိၣ်ကံာ်တူာ်ထီၣ်အသးဒီးကတီၤဒီး ဘီတဖၣ်ဒီး, ပှၤ ခံကလီၢ်ဃိးကလးဂၤလၢဘံၣ်ယၤမံၣ်အဒူၣ်, အိၣ်ကံာ်တူာ်အသးဒီးကတီၤဒီးချံၣ်တဖၣ်န့ၣ်လီၤ. အဝဲသ့ၣ်ခဲလၢာ်မ့ၢ်ပှၤဒူပှၤဃိၤဒီးဘၣ်တၢ်သိၣ်လိတ့ၢ်အီၤဂ့ၤ ဂ့ၤဘၣ်ဘၣ်န့ၣ်လီၤ.

9 ပှၤကူၤၡးဖိလၢအမံၤမ့ၢ်စီၤစ့ရၤဟဲနုာ်လီၤဒုးကီၢ်ယူဒၤ လၢသုးမုၢ်တဖုလၢအပှၤသုးဖိအိၣ်ဝဲ အကလီၢ်တကယၤ ဂၤဒီးအလ့ၣ်ကဟၣ်ဒုးသုးအိၣ်ဝဲအဆိ သၢကယၤ ဒီးလဲၤထီၣ်ဝဲယံၤတုၤဆူဝ့ၢ်မရ့ၡၤန့ၣ်လီၤ. 10 စီၤအၤစါဟးထီၣ်လၢကလဲၤဒုးအီၤအဂီၢ်, ဒီးပှၤခံခီလိာ်ဟံး န့ၢ်အတၢ်လီၢ်ဖဲကစၢၢ်ကဆူးစဖၤသး, ဘူးဒီးဝ့ၢ်မရ့ၡၤန့ၣ်လီၤ. 11 စီၤအၤစါဃ့ဘါထုကဖၣ်ဆူယွၤ, အကစၢ်ယွၤအအိၣ်စံးဝဲ, “ယွၤဧၢ, နမၤစၢၤသုးမုၢ်လၢအဂံၢ်အဘါစၢ်ဝဲတဖုသ့ဝဲ ညီကဒၣ်ဒ်ပှၤတဖုလၢအဂံၢ်ဆူၣ်ဘါဆူၣ်အသိးန့ၣ်လီၤ. ယွၤ, ပကစၢ်ယွၤဧၢ, မၤစၢၤပှၤခဲအံၤန့ၣ်တက့ၢ်. အဂ့ၢ်ဒ်အံၤ, ပသန့ၤပသးလၢနၤဒီးလၢနမံၤအပူၤန့ၣ်, ပဟဲထီၣ်လၢပကဒုးတၢ်ထီဒါသုးမုၢ်ဖးဒိၣ်အံၤန့ၣ်လီၤ. ယွၤဧၢ, နမ့ၢ်ပကစၢ်ယွၤလီၤ. ပှၤမုၢ်လၢ်လၢအကမၤနၢၤကွံာ်နၤ တသ့နီတဂၤဘၣ်.”

12 ယွၤမၤနၢၤကွံာ်ပှၤကူၤၡးဖိအသုးမုၢ်, ဖဲစီၤအၤစါဒီးပှၤ ယူဒၤသုးမုၢ်ဟဲထီၣ်ဒုးအဝဲသ့ၣ်န့ၣ်လီၤ. အဝဲသ့ၣ်ထွးထီၣ်ဃ့ၢ်ကွံာ်ဝဲ, 13 ဒီးစီၤအၤစါဒီးအဝဲအသုးဖိတဖၣ်လူၤထွဲအဝဲသ့ၣ်ယံၤတုၤလၢ ဝ့ၢ်ကရၢ်န့ၣ်လီၤ. ပှၤကူၤၡးဖိအါအါဂီၢ်ဂီၢ်ဘၣ်တၢ်မၤသံကွံာ်အီၤတုၤဒၣ်လဲာ် သုးမုၢ်ကရၢကရိထီၣ်က့ၤအသးဒီးဒုးတၢ်တသ့လၢၤဘၣ်န့ၣ်လီၤ. အဝဲသ့ၣ်ဘၣ်တၢ်မၤနၢၤကွံာ်အီၤလၢယွၤဒီးအသုးမုၢ်, ဒီးသုးမုၢ်ဟံးထီၣ်ကွံာ်တၢ်ဂုာ်န့ၢ်အါအါကလဲာ်န့ၣ်လီၤ. 14 တုၤနုၤတစု, အဝဲသ့ၣ်မၤဟးဂီၤကွံာ်ဝ့ၢ်တဖၣ်လၢအအိၣ်ဝးတရံး ဝ့ၢ်ကရၢ်သ့ဝဲ, မ့ၢ်လၢပှၤဂီၢ်မုၢ်ဖဲန့ၣ်တဖၣ်ဘၣ်တၢ်မၤပျံၤမၤဖုးအီၤလၢယွၤ အဃိန့ၣ်လီၤ. သုးမုၢ်ဂုာ်ဆူၣ်ပျိဆူၣ်ကွံာ်ကယဲၢ်ဝ့ၢ်ဒီးမၤန့ၢ်ဘၣ်တၢ်ဂုာ် န့ၢ်အါအါကလဲာ်န့ၣ်လီၤ. 15 အဝဲသ့ၣ်လဲၤထီၣ်ဒုးစ့ၢ်ကီးပှၤကွၢ်သိတနီၤအသူၣ်ဒဲအလီၢ်တ ဖၣ်, မၤန့ၢ်သိဒီးကီၤလၤအူးအါအါဂီၢ်ဂီၢ်န့ၣ်လီၤ. ဝံၤဒီးအဝဲသ့ၣ်က့ၤကဒါက့ၤဆူဝ့ၢ်ယရူၤၡလ့ၣ်န့ၣ်လီၤ.