13
(၁စီၤပၤ ၁၅:၁-၈)
1 ဖဲအံၣ်စရ့လးအစီၤပၤယၤရၤဘၣ်ပၢတၢ်တဆံဃိးနံၣ်တနံၣ်အပူၤန့ၣ်, စီၤအဘံယၤကဲထီၣ်ကီၢ်ယူဒၤအစီၤပၤ,
2 ဒီးအဝဲပၢတ့ၢ်တၢ်ဖဲဝ့ၢ်ယရူၤၡလ့ၣ်အပူၤသၢနံၣ်န့ၣ်လီၤ. အဝဲအမိၢ်မ့ၢ်နီၢ်မံၤကါယၤ, ပှၤလၢဝ့ၢ်ကံဘဧၤ, စီၤအူရံၤအ့လးအဖိမုၣ်န့ၣ်လီၤ. တၢ်ဒုးတၢ်ယၤမၤအသးလၢ စီၤအဘံယၤဒီးစီၤယၤရၤဘၣ်အဘၢၣ်စၢၤန့ၣ်လီၤ.
3 စီၤအဘံယၤပာ်ဖှိၣ်ထီၣ်သုးမုၢ်တဖုလၢအအိၣ်ဒီးပှၤသုးဖိ လွံၢ်ကလီၢ် ဂၤဒီးစီၤယၤရၤဘၣ်ခီၣ်ဆၢအီၤဒီးသုးမုၢ်တဖုလၢ အအိၣ်ဒီးသုးဖိဃိးကလီၢ် ဂၤန့ၣ်လီၤ.
4 သုးမုၢ်တဖၣ်ကွၢ်ဆၢၣ်မဲာ်လိာ်အသးလၢကီၢ်အ့ဖရဲၣ်ကစၢၢ်ကလိအကျါ န့ၣ်လီၤ. စီၤပၤအဘံယၤလဲၤထီၣ်ဆူကစၢၢ်စမၤရဲၣ်အလိၤဒီးကိးထီၣ်ဆူ စီၤယၤရၤဘၣ်ဒီးပှၤအံၣ်စရ့လးဖိသ့ၣ်တဖၣ်အအိၣ်, ဒီးစံးဝဲဒၣ် “ဒိကနၣ်ယၤတက့ၢ်.
5 မ့ၢ်သုတသ့ၣ်ညါလၢယွၤ, အံၣ်စရ့လးအကစၢ်ယွၤ, မၤတ့ၢ်တၢ်အၢၣ်လီၤအီလီၤလၢတၢ်မၤဟးဂီၤအီၤတန့ၢ်ဘၣ်တမံၤဒီးစီၤဒၤဝံး, ဒီးဟ့ၣ်လီၤအီၤဒီးအစၢၤအသွဲၣ်တဖၣ်လၢစီၤပၤအလီၢ်အလၤ, လၢအံၣ်စရ့လးအဖီခိၣ်လီၤစိၤလီၤထီန့ၣ်ဘၣ်ဧါ.
6 စီၤနဘးအဖိခွါစီၤယၤရၤဘၣ်ပူထီၣ်ထီဒါတ့ၢ်စီၤၡလိၤမိၤ, လၢအမ့ၢ်အဝဲအစီၤပၤန့ၣ်လီၤ.
7 လၢခံ, အဝဲပာ်ဖှိၣ်ထီၣ်ပှၤအၢပှၤသီဖိလၢတဂိာ်တသီၣ်တၢ်တဖု ဒီးအဝဲသ့ၣ်မၤဆူၣ်စီၤၡလိၤမိၤအဖိခွါစီၤရဃၤဘၣ်လၢကမၤ ထွဲအဝဲသ့ၣ်အတၢ်ဘၣ်အသးအခံန့ၣ်လီၤ. စီၤရဃၤဘၣ်အသးစၢ်ဒံးဒိၣ်မးဒီးအတၢ်လဲၤခီဖျိစှၤဒံးဒိၣ် မးလၢကထီဒါဆၢအဝဲသ့ၣ်န့ၣ်ဘၣ်.
8 ခဲကနံၣ်အံၤ, သုကူၣ်ထီၣ်လၢသုကဒုးတၢ်ထီဒါစီၤပၤအတၢ်စိ တၢ်ကမီၤ, လၢယွၤဟ့ၣ်တ့ၢ်စီၤဒၤဝံးအစၢၤအသွဲၣ်တဖၣ်န့ၣ်လီၤ. သုအိၣ်ဒီးသုသုးမုၢ်ဖးဒိၣ်တဖုဒီးသုအိၣ်ဒီးဂီၤဖံးဖါ ထူအဂီၤတဖၣ်လၢစီၤယၤရၤဘၣ်တ့န့ၢ်တ့ၢ်သုဒ်သိးကမ့ၢ်သုကစၢ် တဖၣ်န့ၣ်လီၤ.
9 သုဟီထီၣ်ကွံာ်တ့ၢ်ယွၤအပှၤလုၢ်တၢ်အခိၣ်တဖၣ်လၢအမ့ၢ်စီၤအၤ ဟရိၣ်အစၢၤအသွဲၣ်တဖၣ်, ဒီးသုဟီထီၣ်ကွံာ်တ့ၢ်ပှၤလ့ၤဝံ ဖိတဖၣ်န့ၣ်လီၤ. လၢအဝဲသ့ၣ်အလီၢ်န့ၣ်သုဃုထၢပာ်လီၤပှၤလုၢ် တၢ်အခိၣ်တဖၣ်ဒ်ပှၤကလုာ်ဂၤတဖၣ်မၤဝဲအသိးန့ၣ်လီၤ. ပှၤတဂၤလၢ်လၢ်လၢအဟဲစိာ်ဂီၤဖံးဖါတဒုမ့ၢ်ဂ့ၤ, သိနွံဒုမ့ၢ်ဂ့ၤန့ၣ်, ပာ်စီဆှံထီၣ်အသး, ဒ်ပှၤလုၢ်တၢ်အခိၣ်တဂၤသ့ဝဲလၢတၢ်တဖၣ်လၢသုကိးအီၤလၢသုကစၢ် တဖၣ်, အဂီၢ်န့ၣ်လီၤ.
10 မ့မ့ၢ်, ပဝဲပမၤဒံးယွၤ, ပကစၢ်ယွၤအတၢ်မၤဒီးတလဲၤသဒၣ်ဘၣ်အီၤ ဘၣ်. ပှၤလုၢ်တၢ်အခိၣ်တဖၣ်လၢအဟဲလီၤစၢၤလၢစီၤအၤဟရိၣ်, မၤဝဲအတၢ်မူအဒါတဖၣ်, ဒီးပှၤလ့ၤဝံဖိတဖၣ်မၤစၢၤအဝဲသ့ၣ် န့ၣ်လီၤ.
11 ကိးမုၢ်ဂီၤဒဲးဒီးကိးမုၢ်ဟါဒဲးန့ၣ်, ပှၤလုၢ်တၢ်အခိၣ်တဖၣ်, လုၢ်ထီၣ်ယွၤလၢတၢ်နၢမူဒီးဆၣ်ဖိကီၢ်ဖိဒ်တၢ်လုၢ်ဆူးကဲၤဒီ ဒုအတၢ်လုၢ်တၢ်ပာ်တဖၣ်န့ၣ်လီၤ. အဝဲသ့ၣ်လုၢ်ထီၣ်တၢ်လုၢ်တၢ်ပာ်အကိၣ်လၢစီၢ်နီၤခိၣ်တဖျၢၣ်လၢတၢ် မၤကဆှီအီၤဒ်တၢ်အလုၢ်အလၢ်အိၣ်ဝဲအသိး, ဒီးကိးမုၢ်ဟါဒဲးန့ၣ်, အဝဲသ့ၣ်ဒွဲၣ်ထီၣ်မ့ၣ်အူဒၢတဖၣ်လၢတၢ် ပာ်မ့ၣ်အူဒၢအလီၢ်လၢတၢ်မၤအီၤဒီးထူတဖၣ်အဖီခိၣ်န့ၣ်လီၤ. ပမၤတၢ်လၢယွၤမၤလိာ်တ့ၢ်ပှၤ, ဘၣ်ဆၣ်သုဝဲသုလဲၤသဒၣ်ကွံာ်အီၤလီၤ.
12 ကစၢ်ယွၤ, အကစၢ်ဒၣ်ဝဲ, မ့ၢ်ပခိၣ်ပနၢ်ဒီးအဝဲအပှၤလုၢ်တၢ်အခိၣ် တဖၣ်အိၣ်ဖဲအံၤ, ဒီးအကွဲၤတဖၣ်, ကတဲာ်ကတီၤအသးလၢကအူ ထီၣ်ဝဲဒီးကိးဃီၤပှၤဆူတၢ်ဒုးထီဒါသုန့ၣ်လီၤ. အံၣ်စရ့လးအပှၤဂီၢ်မုၢ်သ့ၣ်ဧၢ, ဒုးတၢ်ထီဒါယွၤ, သုမိၢ်ပၢ်ဖံဖုလၢပျၢၤတဖၣ်အကစၢ်ယွၤတဂ့ၤ. သုမၤနၢၤတၢ်တသ့ဘၣ်.”
13 အခါဖဲန့ၣ်, စီၤယၤရၤဘၣ်ဆှၢလီၤတ့ၢ်အပှၤသုးဖိတနီၤလၢကခိး ခူသူၣ်ဒီးဒုးယူဒၤအသုးမုၢ်လၢတၢ်လီၢ်ခံတခီ, ဖဲပှၤအဂၤတဖၣ်ကွၢ်ဆၢၣ်မဲာ်အဝဲသ့ၣ်လၢတၢ်မဲာ်ညါန့ၣ်လီၤ.
14 ပှၤယူဒၤဖိတဖၣ်ကွၢ်တရံးတၢ်ဒီးထံၣ်ဝဲလၢအဘၣ်တၢ်ကဝီၤဃာ်အီၤ န့ၣ်လီၤ. အဝဲသ့ၣ်ကိးထီၣ်ယွၤလၢတၢ်မၤစၢၤအဂီၢ်, ဒီးပှၤလုၢ်တၢ်အခိၣ်သ့ၣ်တဖၣ်အူထီၣ်ကွဲၤန့ၣ်လီၤ.
15 ပှၤယူဒၤဖိတဖၣ်ကိးထီၣ်လၢအကလုၢ်ဖးဒိၣ်, ဒီးလဲၤထီၣ်ဒုးတၢ် လၢစီၤအဘံယၤအတၢ်ဆှၢအီၤန့ၣ်လီၤ. ကစၢ်ယွၤမၤနၢၤကွံာ်စီၤယၤရၤဘၣ်, ဒီးအံၣ်စရ့လးအသုးမုၢ်န့ၣ်လီၤ.
16 ပှၤအံၣ်စရ့လးဖိတဖၣ်ထွးထီၣ်ဃ့ၢ်ကွံာ်လၢပှၤယူဒၤဖိတဖၣ် အအိၣ်ဒီးကစၢ်ယွၤပျဲပှၤယူဒၤဖိတဖၣ်မၤနၢၤအဝဲသ့ၣ်န့ၣ်လီၤ.
17 စီၤအဘံယၤဒီးအသုးမုၢ်ဒုးနၢၤဒီးမၤဃၣ်ကွံာ်ပှၤအံၣ်စရ့လး ဖိတဖၣ်ဒိၣ်ဒိၣ်မုၢ်မုၢ်, တုၤအံၣ်စရ့လးအပှၤသုးဖိအဂ့ၤကတၢၢ် ယဲၢ်ကလီၢ်ဂၤဘၣ်တၢ်မၤသံကွံာ်အီၤန့ၣ်လီၤ.
18 လၢတၢ်န့ၣ်အဃိယူဒၤအပှၤဂီၢ်မုၢ်အိၣ်ဒီးတၢ်မၤနၢၤတၢ်လၢပှၤ အံၣ်စရ့လးဖိတဖၣ်အဖီခိၣ်, မ့ၢ်လၢအဝဲသ့ၣ်သန့ၤအသးလၢယွၤ, အမိၢ်ပၢ်ဖံဖုလၢပျၢၤတဖၣ်အကစၢ်ယွၤအဃိန့ၣ်လီၤ.
19 စီၤအဘံယၤလူၤထွဲစီၤယၤရၤဘၣ်အသုးမုၢ်အခံဒီးမၤန့ၢ်အဝဲ သ့ၣ်အဝ့ၢ်တနီၤလၢအမ့ၢ်, ဝ့ၢ်ဘ့ၤသ့လး, ဝ့ၢ်ယၡၤနၤ, ဝ့ၢ်အ့ဖရိၣ်ဒီးဒူသဝီတဖၣ်လၢအအိၣ်ဘူးဒီးဝ့ၢ်တဖၣ်အံၤတဖျၢၣ် စုာ်စုာ်န့ၣ်လီၤ.
20 စီၤယၤရၤဘၣ်တဒိးန့ၢ်ကဒါက့ၤကဒီးအစိအကမီၤဖဲစီၤအဘံယၤ ပၢတၢ်အကတီၢ်နီတစုလၢၤဘၣ်. လၢခံကတၢၢ်ယွၤတီၢ်လီၤအီၤဒီးသံကွံာ်ဝဲဒၣ်န့ၣ်လီၤ.
21 မ့မ့ၢ်, စီၤအဘံယၤအစိအကမီၤဒိၣ်ထီၣ်ဝဲအါန့ၢ်ဒံးအလီၢ်န့ၣ် လီၤ. အဝဲအမါအိၣ်တဆံလွံၢ်ဂၤ, ဒီးအဖိခွါအိၣ်, ခံဆံခံဂၤဒီးအဖိမုၣ်အိၣ်ဝဲတဆံဃုဂၤန့ၣ်လီၤ.
22 တၢ်စံၣ်စိၤတဲစိၤဘၣ်ဃးဒီးစီၤအဘံယၤလၢအအိၣ်လီၤတဲာ်, တၢ်လၢအဝဲစံးတ့ၢ်ဒီးတၢ်လၢအဝဲမၤတ့ၢ်န့ၣ်, အိၣ်ကွဲးလၢဝံဧံးဒိၤအတၢ်စံၣ်စိၤတဲစိၤအလံာ်ပူၤန့ၣ်လီၤ.