12
(၁စီၤပၤ ၁၄:၂၅-၂၈)
1 တဘျီဖဲစီၤရဃၤဘၣ်မၤဂၢၢ်ထီၣ်မၤကျၢၤထီၣ်ဝဲအဝဲအတၢ်စိ တၢ်ကမီၤဒ်စီၤပၤအသိးဝံၤအလီၢ်ခံန့ၣ်, အဝဲဒီးကယဲၢ်ပှၤဂီၢ်မုၢ်ခဲလၢာ်လဲၤသဒၣ်ကွံာ်ယူဒၤအတၢ်သိၣ်တၢ် သီလၢယွၤဟ့ၣ်လီၤဝဲန့ၣ်လီၤ.
2 လၢစီၤရဃၤဘၣ်ပၢတၢ်ယဲၢ်နံၣ်တနံၣ်အပူၤန့ၣ်, အဝဲသ့ၣ်အတၢ်သးတတီဒီးယွၤဘၣ်တၢ်စံၣ်ညီၣ်အီၤန့ၣ်လီၤ. ကီၢ်အဲၤကူပတူးအစီၤပၤၡံၡးဟဲဒုးဝ့ၢ်ယရူၤၡလ့ၣ်,
3 ဒီးသုးမုၢ်တဖုလၢအအိၣ်ဝဲဒီးလ့ၣ်ကဟၣ်အဆိ တကထိခံကယၤ, ပှၤဒိးကသ့ၣ်သုးဖိ ဃုကလး ဂၤ, ဒီးသုးဖိအါအါဂီၢ်ဂီၢ်လၢတၢ်ဂံၢ်အီၤတသ့ဘၣ်, လၢအကျါအိၣ်ဃုာ်ဝဲဒီးပှၤလူဘးဖိ, ပှၤစူၤကံၤဖိဒီးပှၤကူၤၡးအသုးဖိတဖၣ်န့ၣ်လီၤ.
4 အဝဲမၤန့ၢ်ကွံာ်, ယူဒၤအဝ့ၢ်တဖၣ်လၢအအိၣ်ဒီးတိာ်ဧိၤတာ်ဧိၤ, ဒီးလဲၤထီၣ်ဝဲယံၤတုၤလၢဝ့ၢ်ယရူၤၡလ့ၣ်န့ၣ်လီၤ.
5 ဝံၡမါယၤလဲၤဃီၤဆူစီၤပၤရဃၤဘၣ်ဒီးယူဒၤဖိအခိၣ်အနၢ်တဖၣ် အအိၣ်န့ၣ်လီၤ. အဝဲသ့ၣ်ဟဲပာ်ဖှိၣ်အသးလၢဝ့ၢ်ယရူၤၡလ့ၣ်အပူၤဒ်သိးကဃ့ၢ်ပူၤ ဖျဲးအသးလၢစီၤပၤၡံၡးအဂီၢ်န့ၣ်လီၤ. ဝံစံးဘၣ်အဝဲသ့ၣ်, “အဝဲအံၤမ့ၢ်ယွၤအတၢ်ကစီၣ်လၢသုဂီၢ်န့ၣ်လီၤ. သုလဲၤသဒၣ်ကွံာ်တ့ၢ်လံယၤအဃိဒီး, ခဲအံၤယလဲၤသဒၣ်သု ဒီးဟ့ၣ်လီၤကွံာ်သုဆူစီၤၡံၡးအစုပူၤန့ၣ်လီၤ.”
6 စီၤပၤဒီးပှၤခိၣ်ပှၤနၢ်တဖၣ်အၢၣ်လီၤဝဲလၢအဝဲသ့ၣ်မၤတ့ၢ်တၢ် ဒဲးဘးဒီးအဝဲသ့ၣ်စံးဝဲ, “တၢ်လၢယွၤမၤဝဲန့ၣ်, တီဝဲလိၤဝဲလီၤ.”
7 တုၤယွၤထံၣ်တၢ်အံၤန့ၣ်, အဝဲကတိၤကဒီးတၢ်ဒီးဝံၡမါယၤဒီး စံးဘၣ်အီၤ, “မ့ၢ်လၢအဝဲသ့ၣ်အၢၣ်လီၤအတၢ်ဒဲးဘးအဃိယတမၤဟးဂီၤအဝဲသ့ၣ် ဘၣ်. မ့မ့ၢ်ဖဲစီၤပၤၡံၡးဟဲဒုးတၢ်န့ၣ်, ယကမၤပူၤဖျဲးအဝဲသ့ၣ်ယူာ်ယူာ်ဖိလီၤ. ဝ့ၢ်ယရူၤၡလ့ၣ်တကလၢၢ်ဘၣ်ယတၢ်သးဒိၣ်ထီၣ်လၢာ်အခၢးဒံးဘၣ်,
8 မ့မ့ၢ်စီၤပၤၡံၡးကမၤနၢၤအဝဲသ့ၣ်, ဒီးအဝဲသ့ၣ်ကမၤလိန့ၢ် တၢ်လီၤဆီလၢတၢ်မၤယတၢ်မၤဒီးတၢ်မၤဟီၣ်ခိၣ်အပှၤပၢတၢ်တဖၣ် အတၢ်မၤအဘၢၣ်စၢၤန့ၣ်လီၤ.”
9 စီၤပၤၡံၡးဟဲဃီၤဆူဝ့ၢ်ယရူၤၡလ့ၣ်ဒီးဟံးန့ၢ်ကွံာ်တၢ်ပာ် ဖှိၣ်လုၢ်ဒိၣ်ပှ့ၤဒိၣ်တဖၣ်လၢယွၤအတၢ်လုၢ်ဟံၣ်ဒီးလၢစီၤပၤ အနီပူၤန့ၣ်လီၤ. အဝဲဟံးန့ၢ်ကွံာ်တၢ်ခဲလၢာ်ပၣ်ဃုာ်ဒီးကတီၤထူတဖၣ်လၢစီၤပၤ ၡလိၤမိၤမၤတ့ၢ်ဝဲန့ၣ်လီၤ.
10 လၢတၢ်မၤပှဲၤတၢ်တဖၣ်န့ၣ်အလီၢ်အဂီၢ်, စီၤရဃၤဘၣ်မၤကတီၤတိၢ် ဘီတဖၣ်ဒီးအးလီၤဝဲဆူပှၤပၢၤတၢ်ဖိအခိၣ်တဖၣ်လၢအအိၣ်မူအိၣ် ဒါလၢတၢ်ပၢၤစီၤပၤအနီအတြဲၤဖးဒိၣ်တဖၣ်အဂီၢ်အအိၣ်န့ၣ်လီၤ.
11 တဘျီလၢ်လၢ်ဖဲစီၤပၤလဲၤဃီၤဆူယွၤအတၢ်လုၢ်ဟံၣ်န့ၣ်, ပှၤခိးတၢ်ဖိတဖၣ်စိာ်ထီၣ်ကတီၤတဖၣ်, ဝံၤဒီးက့ၤပာ်ကဒါက့ၤ ဝဲလၢပှၤခိးတၢ်ဖိအဒၢးပူၤန့ၣ်လီၤ.
12 မ့ၢ်လၢအဝဲဆီၣ်လီၤအသးလၢယွၤအဖီလာ်အဃိ, ယွၤအတၢ်သးဒိၣ်ထီၣ်တမၤဟးဂီၤကွံာ်အီၤလၢာ်လၢာ်ဆ့ဆ့ဘၣ်. ဒီးတၢ်ခဲလၢာ်လဲၤအသးဂ့ၤဂ့ၤဘၣ်ဘၣ်လၢယူဒၤအဂီၢ်န့ၣ်လီၤ.
13 စီၤရဃၤဘၣ်ပၢတ့ၢ်တၢ်လၢဝ့ၢ်ယရူၤၡလ့ၣ်အပူၤဒီးမၤဆူၣ်ထီၣ် အစိကမီၤဒ်စီၤပၤအသိးန့ၣ်လီၤ. ဖဲအဝဲကဲထီၣ်စီၤပၤန့ၣ်အသးအိၣ်ဝဲလွံၢ်ဆံတနံၣ်, ဒီးပၢတၢ်တဆံနွံနံၣ်လၢဝ့ၢ်ယရူၤၡလ့ၣ်, ဝ့ၢ်လၢယွၤဃုထၢတ့ၢ်ဝဲလၢကယဲၢ်အံၣ်စရ့လးအလီၢ်ကဝီၤအပူၤဒ် တၢ်လီၢ်တတီၤလၢအဝဲကဘၣ်တၢ်ဘူၣ်ထီၣ်ဘါထီၣ်အီၤအဂီၢ်န့ၣ်လီၤ. စီၤရဃၤဘၣ်အမိၢ်န့ၣ်မ့ၢ်နီၢ်နၤဧမၤ, ပှၤလၢကီၢ်ဧၣ်မိၣ်န့ၣ်လီၤ.
14 အဝဲမၤတ့ၢ်တၢ်လၢအအၢအသီ, မ့ၢ်လၢအဝဲတကျဲးစၢးဃုထံၣ်ယွၤ အတၢ်ဘၣ်အသးအဃိလီၤ.
15 စီၤရဃၤဘၣ်အတၢ်မၤတဖၣ်စးထီၣ်လၢအခီၣ်ထံးတုၤလၢအကတၢၢ်ဒီး အဝဲအဟံၣ်ဖိဃီဖိအတၢ်ကွဲးနီၣ်ကွဲးဃါတဖၣ်, ဘၣ်တၢ်ထံၣ်န့ၢ်အီၤလၢ, ဝံၡမါယၤအလံာ်တၢ်စံၣ်စိၤတဲစိၤအပူၤ, ဒီးဝံယံးဒိၤအတၢ်စံၣ်စိၤတဲစိၤအပူၤန့ၣ်လီၤ. စီၤရဃၤဘၣ်ဒီးစီၤယၤရၤဘၣ်အိၣ်ဒီးအတၢ်ဒုးလိာ်အသးတဂၤဒီး တဂၤတထံၣ်ဃီန့ၣ်လီၤ.
16 စီၤရဃၤဘၣ်သံဒီးဘၣ်တၢ်ခူၣ်လီၤကွံာ်အီၤလၢစီၤပၤအတၢ်သွၣ် ခိၣ်တဖၣ်လၢစီၤဒၤဝံးအဝ့ၢ်ပူၤ, ဒီးအဖိခွါစီၤအဘံယၤကဲထီၣ်စီၤပၤလၢအလီၢ်န့ၣ်လီၤ.