11
(၁စီၤပၤ ၁၂:၂၁-၂၄)
1 တုၤစီၤပၤရဃၤဘၣ်လဲၤတုၤဝဲဆူဝ့ၢ်ယရူၤၡလ့ၣ်န့ၣ်, အဝဲကိးဖှိၣ်ပှၤသုးဖိအဂ့ၤကတၢၢ်တကလီၤဃိးကလးဂၤလၢပှၤဘံၣ် ယၤမံၣ်ဒီးပှၤယူဒၤဖိအဒူၣ်တဖၣ်အပူၤန့ၣ်လီၤ. အဝဲတိာ်ပာ်လဲၢဆူတၢ်ဒုးအပူၤဒီးမၤန့ၢ်က့ၤအတၢ်စိတၢ်ကမီၤ လၢအံၣ်စရ့လးကလံၤစိးအဒူၣ်တဖၣ်အဖီခိၣ်န့ၣ်လီၤ.
2 ဘၣ်ဆၣ်, ယွၤတဲဘၣ်ဝံၡမါယၤ,
3 လၢကတဲဘၣ်တၢ်ကစီၣ်အံၤဆူစီၤပၤရဃၤဘၣ်ဒီးဆူကယဲၢ်ဒူၣ်တဖၣ် လၢဘံၣ်ယၤမံၣ်ဒီးယူဒၤအပူၤ, အပှၤဂီၢ်မုၢ်တဖၣ်အအိၣ်န့ၣ်လီၤ.
4 “ဒုးတၢ်ဒီးသုပှၤအံၣ်စရ့လးဖိသကိးသကိးဒီးသုန့ၣ်တ ဂ့ၤ. က့ၤကဒါက့ၤဆူသုဟံၣ်ကိးဂၤန့ၣ်တက့ၢ်. တၢ်လၢအမၤတ့ၢ်အသးအံၤ, မ့ၢ်ယတၢ်ဘၣ်ယသးန့ၣ်လီၤ.” အဝဲသ့ၣ်စူၢ်တ့ၢ်ယွၤအတၢ်မၤလိာ်ဒီးတလဲၤထီၣ်ဒုးစီၤယၤရၤဘၣ် န့ၣ်ဘၣ်.
5 စီၤရဃၤဘၣ်အိၣ်ဆိးဝဲလၢဝ့ၢ်ယရူၤၡလ့ၣ်ဒီးဘှီထီၣ်က့ၤယူဒၤ ဒီးဘံၣ်ယၤမံၣ်အဝ့ၢ်လၢလာ်တဖၣ်အံၤအတိာ်ဧိၤတာ်ဧိၤန့ၣ်လီၤ.
6 ဝ့ၢ်ဘ့ၤသလ့ဃ့ၣ်, ဝ့ၢ်ဧ့ၤတၣ်, ဝ့ၢ်တကိၤ,
7 ဝ့ၢ်ဘ့ၤသစူၢ်, ဝ့ၢ်ၡိၤကိၤ, ဝ့ၢ်ဧးဒူးလၣ်,
8 ဝ့ၢ်ကၤသး, ဝ့ၢ်မရ့ၡၤ, ဝ့ၢ်စံဖး,
9 ဝ့ၢ်အဒိရဲၣ်, ဝ့ၢ်လၤကံၣ်, ဝ့ၢ်ဧစ့ကၤ,
10 ဝ့ၢ်စိးရၤ, ဝ့ၢ်အးယၤလိၣ်ဒီးဝ့ၢ်ဃ့ဘြိၣ်သ့ၣ်တဖၣ်န့ၣ်လီၤ.
11 အဝဲမၤကျၢၤဝ့ၢ်တဖၣ်န့ၣ်အတိာ်ဧိၤတာ်ဧိၤကျၢၤကျၢၤ, ဒီးဃုထၢပာ်လီၤပဒိၣ်ဖးဒိၣ်တဂၤ, လၢဝ့ၢ်တဖျၢၣ်စုာ်စုာ်အ ဂီၢ်, ဒီးလၢဝ့ၢ်တဖျၢၣ်စုာ်စုာ်အပူၤန့ၣ်, အဝဲပာ်ဖှိၣ်တၢ်တဖၣ်လၢ အမ့ၢ်ဝဲ, တၢ်အီၣ်တၢ်အီ, သ့ၣ်စၤယံးအသိဒီးစပံးထံ, ဒီးကတီၤတဖၣ်ဒီးနးတဖၣ်စ့ၢ်ကီးန့ၣ်လီၤ.
12 လၢကျဲဒ်သိးအံၤန့ၣ်, အဝဲဟံးဃာ်ကျၢၤ, ယူဒၤဒီးဘံၣ်ယၤမံၣ် လၢအဝဲအတၢ်ပၢဆှၢအဖီလာ်န့ၣ်လီၤ.
13 ပှၤလုၢ်တၢ်အခိၣ်တဖၣ်ဒီးပှၤလ့ၤဝံဖိတဖၣ်လၢကယဲၢ်အံၣ်စရ့လး အလီၢ်ကဝီၤပူၤန့ၣ်ဟဲဝဲဆူကလံၤထံး, ဆူကီၢ်ယူဒၤန့ၣ်လီၤ.
14 ပှၤလ့ၤဝံဖိတဖၣ်ပာ်တ့ၢ်ကွံာ်အဝဲသ့ၣ်တၢ်အီၣ်ဆၣ်အလီၢ်လါဟ့တ ဖၣ်, ဒီးအတၢ်အိၣ်ဆိးတၢ်လီၢ်အဂၤတဖၣ်, ဒီးဟဲသုးဆူကီၢ်ယူဒၤဒီး ဝ့ၢ်ယရူၤၡလ့ၣ်န့ၣ်လီၤ. အဂ့ၢ်ဒ်အံၤ, အံၣ်စရ့လးအစီၤပၤယၤရၤဘၣ်ဒီးပှၤလၢအထီၣ်အလီၢ် တဖၣ်တပျဲဘၣ်အဝဲသ့ၣ်မၤတၢ်ဒ်ယွၤအပှၤလုၢ်တၢ်အခိၣ်တဖၣ်အသိးအဃိ န့ၣ်လီၤ.
15 စီၤယၤရၤဘၣ်ဃုထၢပာ်လီၤအကစၢ်ဒၣ်ဝဲအပှၤလုၢ်တၢ်အခိၣ်တဖၣ်လၢ ကမၤတၢ်ဖဲလၢပှၤဘါတၢ်ဂီၤတၢ်ဖီၣ်တဖၣ်ဘါတၢ်အလီၢ်, ဒီးလၢကဘူၣ်ထီၣ်ဘါထီၣ်တၢ်ဝံတၢ်နါတဖၣ်ဒီးတၢ်ဂီၤတၢ်ဖီၣ်တဖၣ် လၢအဝဲသိဝဲ, ဒ်ဂီၤဖံးဖါအဂီၤတဖၣ်န့ၣ်လီၤ.
16 ပှၤဂီၢ်မုၢ်လၢကယဲၢ်အံၣ်စရ့လးအဒူၣ်တဖၣ်အပူၤ, လၢအသးအိၣ်နီၢ်နီၢ်လၢကဘူၣ်ထီၣ်ဘါထီၣ်ယွၤ, အံၣ်စရ့လးအကစၢ်ယွၤန့ၣ်, ပိာ်ထီၣ်ပှၤလ့ၤဝံဖိတဖၣ်အခံဆူ ဝ့ၢ်ယရူၤၡလ့ၣ်, ဒ်သိးကလုၢ်ထီၣ်ဘၣ်တၢ်လုၢ်တၢ်ပာ်တဖၣ်ဆူယွၤ, အဝဲသ့ၣ်အမိၢ်ပၢ်ဖံဖုလၢပျၢၤတဖၣ်အကစၢ်ယွၤအအိၣ်န့ၣ်လီၤ.
17 တၢ်အံၤမ့ၢ်တၢ်လၢအမၤဆူၣ်ထီၣ်ယူဒၤအဘီအမုၢ်အဂံၢ်အဘါ, ဒီးအဝဲသ့ၣ်မၤစၢၤဆီၣ်ထွဲစီၤၡလိၤမိၤအဖိခွါစီၤရဃၤဘၣ် လၢသၢနံၣ်အတီၢ်ပူၤ, ဒီးအိၣ်ဆိးဝဲဒ်အဝဲသ့ၣ်မၤတ့ၢ်ဝဲလၢစီၤပၤဒၤဝံးစီၤပၤ ၡလိၤမိၤအတၢ်ပၢအဖီလာ်အသိးန့ၣ်လီၤ.
18 စီၤရဃၤဘၣ်ဟံးန့ၢ်အမါလၢစီၤဒၤဝံးအဖိခွါစီၤယရံမိးအဖိ မုၣ်နီၢ်မၤဃလ့း, လၢအမိၢ်န့ၣ်မ့ၢ်စီၤယံးၡဲအဖိခွါစီၤအလံအာ်အဖိမုၣ်နီၢ် အဘံဃယ့းလးန့ၣ်လီၤ.
19 အဝဲသ့ၣ်အိၣ်ဒီးအဖိခွါသၢဂၤလၢအမ့ၢ်စီၤယဧူၤၡး, စီၤၡမၤရယၤဒီးစီၤစၤဟၣ်န့ၣ်လီၤ.
20 လၢအလီၢ်ခံန့ၣ်ဟံးန့ၢ်အမါလၢစီၤအးဘၡါလိၣ်အဖိမုၣ်နီၢ်မၤ ကၤ, ဒီးအဝဲသ့ၣ်အိၣ်ဒီးအဖိခွါလွံၢ်ဂၤလၢအမ့ၢ်, စီၤဘံယၤ, စီၤဧၤတဲ, စီၤစံစၤဒီးစီၤၡလိမံးန့ၣ်လီၤ.
21 စီၤရဃၤဘၣ်အိၣ်ဒီးအမါခဲလၢာ်တဆံဃိးဂၤ, ဒီးအသံၣ်မါဃုဆံဂၤန့ၣ်လီၤ. အဖိခွါအိၣ်ဝဲခံဆံဃိးဂၤ ဒီးအဖိမုၣ်အိၣ်ဝဲအဂၤဃုဆံန့ၣ်လီၤ. လၢအမါဒီးအသံၣ်မါတဖၣ်ခဲလၢာ်အကျါန့ၣ်အဲၣ်အမါနီၢ်မၤကၤ အဒိၣ်ကတၢၢ်လီၤ.
22 အဝဲသ့ၣ်ဘၣ်သူၣ်ဘၣ်သးဒီးကွၢ်မဲာ်အဖိခွါစီၤအဘံယၤ, လၢကယဲၢ်အဖိခဲလၢာ်အကျါဒီးဃုထၢအီၤဒ်ပှၤတဂၤလၢကကဲ ထီၣ်စီၤပၤလၢအလီၢ်န့ၣ်လီၤ.
23 လၢတၢ်ကူၣ်သ့အပူၤန့ၣ်, စီၤရဃၤဘၣ်ဟ့ၣ်မူဟ့ၣ်ဒါလီၤအဖိခွါ တဖၣ်ဒီးပာ်လီၤအဝဲသ့ၣ်သကုၤလၢယူဒၤဒီးဘံၣ်ယၤမံၣ်အဝ့ၢ်အိၣ် ဒီးတိာ်ဧိၤတာ်ဧိၤတဖၣ်အပူၤန့ၣ်လီၤ. အဝဲဟ့ၣ်လီၤဆီၣ်ထွဲအဝဲသ့ၣ်ဒိၣ်ဒိၣ်အါအါဒီးဃုန့ၢ်အဝဲသ့ၣ် လၢအမါတဖၣ်အါဂၤန့ၣ်လီၤ.