26
1 အအံၤမ့ၢ်တၢ်မၤတဖၣ်လၢတၢ်ဟ့ၣ်လီၤပှၤလ့ၤဝံဖိတဖၣ်လၢအမၤတၢ် ဒ်ပှၤပၢၤတၢ်လုၢ်ဟံၣ်ဖိတဖၣ်အသိးန့ၣ်လီၤ. လၢပှၤကိရးဖိအဒူၣ်ထၢန့ၣ်စီၤကိရးအဖိခွါစီၤမၡ့လ့ၤမယၤ လၢစီၤအၤစာ်အဟံၣ်ဒူၣ်ဃီထၢအပူၤန့ၣ်လီၤ.
2 အဝဲအိၣ်ဒီးအဖိခွါနွံဂၤလၢအဘၣ်တၢ်ကွဲးနီၣ်အီၤဒ်အသးအနံၣ် အလါအပှၢ်အစၢ်အသိးမ့ၢ်ဝဲစီၤစကၤရယၤ, စီၤယဒံၤဧ့လး, စီၤစဘၤဒယၤ, စီၤယၤသနံၤအ့လး,
3 စီၤဧ့ၤလၣ်, စီၤယိဃၤနၣ်, ဒီးစီၤအ့လံၤဧ့နံၤန့ၣ်လီၤ.
4 စီၤဧိၤဘ့းအ့ဒိၣ်လၢကစၢ်ယွၤဆိၣ်ဂ့ၤအီၤခီဖျိဟ့ၣ်လီၤအီၤ လၢအဖိခွါဃိးဂၤအိၣ်စ့ၢ်ကီးဝဲန့ၣ်လီၤ. အဖိခွါတဖၣ်ဒ်အသးအနံၣ်အလါအပှၢ်အစၢ်အသိးမ့ၢ်ဝဲ စီၤၡမါယၤ, စီၤယဟိစဘး, စီၤယိအၤ, စီၤစၤကၢ်, စီၤနၤသန့လး,
5 စီၤဧးမံအ့လး, စီၤယံးစၣ်ကၢ်, ဒီးစီၤပဧူလသဲၤန့ၣ်လီၤ.
6 စီၤဧိၤဘ့းအ့ဒိၣ်အဖိခွါဝဲၢ်ကိစီၤၡမါယၤအိၣ်ဒီးအဖိ ခွါဃုဂၤလၢအမ့ၢ်ပှၤမံၤဟူသၣ်ဖျါတဖၣ်လၢအဒူၣ်ထၢတဖၣ်အပူၤ, မ့ၢ်လၢအဝဲသ့ၣ်အတၢ်သ့တၢ်ဘၣ်ဖးဒိၣ်အဃိန့ၣ်လီၤ.
7 အဝဲသ့ၣ်တဖၣ်မ့ၢ်ဝဲ, စီၤဧိၤသနံ, စီၤရဖၤအ့လး, စီၤဧိၤဘ့း, စီၤအ့လစၤဘး, စီၤအလံဟူၤဒီးစီၤစမၤကယၤန့ၣ်လီၤ. ပှၤအမံၤလၢခံကတၢၢ်ခံဂၤန့ၣ်မ့ၢ်ပှၤအိၣ်ဒီးတၤလၣ်လီၤဆီတဖၣ် န့ၣ်လီၤ.
8 စီၤဧိၤဘ့းအ့ဒိၣ်အဟံၣ်ဖိဃီဖိဟ့ၣ်ထီၣ်ပှၤလၢအကြၢးဝဲဘၣ် ဝဲကတၢၢ်ဒီးတၢ်မၤအံၤ, ပှၤခဲလၢာ်ဃုဆံခံဂၤန့ၣ်လီၤ.
9 စီၤမၡ့လ့ၤမယၤအဟံၣ်ဖိဃီဖိဟ့ၣ်ထီၣ်ပှၤကြၢးဝဲဘၣ်ဝဲဒီး တၢ်မၤအံၤတဆံဃိးဂၤန့ၣ်လီၤ.
10 လၢပှၤမရၤရံအဒူၣ်ထၢပူၤန့ၣ်, စီၤဃိစၤလၢအအိၣ်ဒီးအဖိခွါ လွံၢ်ဂၤအိၣ်စ့ၢ်ကီးဝဲလီၤ. အဖိခွါတဖၣ်မ့ၢ်ဝဲ, စီၤၡံမရံ (အဝဲတမ့ၢ်ဖိဝဲၢ်ကိသနာ်က့, အပၢ်ပာ်အီၤလၢပှၤအခိၣ်အလီၢ်န့ၣ်လီၤ),
11 စီၤဃံးလကံယၤ, စီၤတဘၤလယၤဒီးစီၤစကၤရယၤန့ၣ်လီၤ. ပှၤခဲလၢာ်အနီၣ်ဂံၢ်အိၣ်ဝဲတဆံသၢဂၤလၢစီၤဃိစၤအဟံၣ်ဖိ ဃီဖိအပူၤလၢအမ့ၢ်ပှၤပၢၤတၢ်လုၢ်ဟံၣ်ဖိတဖၣ်န့ၣ်လီၤ.
12 ပှၤခိးပၢၤတၢ်လုၢ်ဟံၣ်ဖိတဖၣ်, ဘၣ်တၢ်နီၤဖးလီၤအီၤဆူ ကရူၢ်သ့ၣ်တဖၣ်, ဒ်အဟံၣ်ဖိဃီဖိဒၣ်ဝဲအသိး, ဒီးဘၣ်တၢ်ဟ့ၣ်မူဟ့ၣ်ဒါအီၤတၢ်မၤတဖၣ်လၢတၢ်လုၢ်ဟံၣ်အပူၤဒ် ပှၤလ့ၤဝံဖိအဂၤတဖၣ်ဘၣ်မၤဝဲအသိးန့ၣ်လီၤ.
13 ဟံၣ်ဖိဃီဖိတဒူၣ်ဘၣ်တဒူၣ်, ဒိၣ်မ့ၢ်ဂ့ၤ, ဆံးမ့ၢ်ဂ့ၤဘၣ်ဖီၣ် တၢ်ဖးဒ်သိးကသ့ၣ်ညါဘၣ်အမူအဒါလီၤဘၣ်လၢတြဲၤဖဲလဲၣ်တဘ့ၣ် လဲၣ်အဂီၢ်န့ၣ်လီၤ.
14 စီၤၡ့ၤလ့မယၤဖီၣ်တၢ်ဖးလီၤလၢမုၢ်ထီၣ်တြဲၤအဂီၢ်ဒီးအဝဲ အဖိခွါစီၤစကၤရယၤ, ပှၤတဂၤလၢထီဘိဟ့ၣ်တၢ်ဟ့ၣ်ကူၣ်ဟ့ၣ်ဖး လၢအဂ့ၤ, ဖီၣ်တၢ်ဖးလီၤလၢကလံၤစိးတြဲၤတခီန့ၣ်လီၤ.
15 စီၤဧိၤဘ့းအ့ဒိၣ်ဖီၣ်တၢ်ဖးလီၤလၢကလံၤထံးတြဲၤဒီးအဝဲ အဖိခွါတဖၣ်ဖီၣ်တၢ်ဖးလီၤလၢကဘၣ်ပၢၤတၢ်ပာ်ဖှိၣ်အဒၢးတဖၣ်န့ၣ် လီၤ.
16 စီၤၡူပံၣ်ဒီးစီၤဃိစၤဖီၣ်တၢ်ဖးလီၤလၢမုၢ်နုာ်တြဲၤဒီး တြဲၤၡးလ့က့လၤကျဲထးခီတကပၤန့ၣ်လီၤ. တၢ်ပၢၤတြဲၤအမူအဒါဘၣ်တၢ်နီၤဖးလီၤအီၤဆူအဆၢကတီၢ်သ့ၣ်တဖၣ် တကတီၢ်ဝံၤတကတီၢ်န့ၣ်လီၤ.
17 လၢမုၢ်ထီၣ်န့ၣ်ပှၤပၢၤတၢ်ဖိဃုဂၤဘၣ်ခိးတၢ်ကိးမုၢ်နံၤဒဲး, လၢကလံၤစိးန့ၣ်ပှၤလွံၢ်ဂၤ, ဒီးလၢကလံၤထံးန့ၣ်ပှၤလွံၢ်ဂၤ န့ၣ်လီၤ. ပှၤပၢၤတၢ်ဖိလွံၢ်ဂၤဘၣ်တၢ်ပာ်လီၤအီၤဖဲတၢ်ပာ်ဖှိၣ်အဒၢးတဖၣ် ကိးမုၢ်နံၤဒဲး, ခံဂၤ, ခံဂၤလၢတၢ်ပာ်ဖှိၣ်အဒၢးတဖျၢၣ်စုာ်စုာ်အဂီၢ်န့ၣ်လီၤ.
18 ဘူးဒီးဘျီၣ်အိၣ်လၢမုၢ်နုာ်တခီန့ၣ်, ပှၤပၢၤတၢ်ဖိအိၣ်လွံၢ် ဂၤလၢကျဲကပၤဒီးအိၣ်ခံဂၤဖဲဘျီၣ်န့ၣ်လီၤ.
19 အအံၤမ့ၢ်မူဒါလၢအဘၣ်တၢ်ပာ်လီၤအီၤလၢပၢၤတၢ်အဂီၢ်လၢစီၤကိ ရၤအဒူၣ်ထၢဒီးစီၤမရၤရံၤအဒူၣ်အဂီၢ်န့ၣ်လီၤ.
20 အဝဲသ့ၣ်အပှၤလ့ၤဝံဖိကဒဲကဒဲအဂၤတဖၣ်ဘၣ်ကဲခိၣ်ကဲနၢ်လၢတၢ် လုၢ်ဟံၣ်အစ့ပာ်ဖှိၣ်အလီၢ်အဂီၢ်ဒီးလၢတၢ်ပာ်ဖှိၣ်အဒၢးတဖၣ်ဖဲ တၢ်ဟ့ၣ်တဖၣ်လၢဘၣ်တၢ်ပာ်စီဆှံတ့ၢ်အီၤလၢကစၢ်ယွၤအဂီၢ် အိၣ်ဝဲအလီၢ်န့ၣ်လီၤ.
21 စီၤလၤဒၣ်, စီၤက့ရၡိၣ်အဖိခွါအကျါတဂၤ, မ့ၢ်တ့ၢ်ပၢ်ဖးဒိၣ်တဂၤလၢဟံၣ်ဖိဃီဖိအါဒူၣ်ဟဲလီၤစၢၤလီၤ သွဲၣ်လၢအီၤ, ဃုာ်ဒီးအဖိခွါစီၤယဃံအ့လးအဟံၣ်ဖိဃီဖိန့ၣ်လီၤ.
22 စီၤလၤဒၣ်အဖိခွါအဂၤခံဂၤလၢအမ့ၢ်, စီၤစ့ၤသၣ်ဒီးစီၤယိၤ အ့လးန့ၣ်မ့ၢ်ပှၤကဲခိၣ်ကဲနၢ်လၢတၢ်လုၢ်ဟံၣ်အစ့ပာ်ဖှိၣ်အလီၢ် ဒီးတၢ်ပာ်ဖှိၣ်အဒၢးတဖၣ်အဂီၢ်န့ၣ်လီၤ.
23 မူဒါတဖၣ်ဘၣ်တၢ်ဟ့ၣ်လီၤစ့ၢ်ကီးအီၤဆူစီၤဧၤမရၣ်, စီၤယံးစဟၢ်, စီၤဃ့ဘြိၣ်ဒီးစီၤဧူးစံၤအ့လးအစၢၤအသွဲၣ်တဖၣ်အအိၣ်န့ၣ် လီၤ.
24 စီၤၡဘူၤအ့လးလၢအမ့ၢ်ပှၤလၢစီၤမိၤၡ့အဖိခွါစီၤက့ရၡိၣ် အဒူၣ်ထၢပူၤန့ၣ်မ့ၢ်ပဒိၣ်အဒိၣ်ကတၢၢ်လၢအိၣ်မူအိၣ်ဒါလၢတၢ် လုၢ်ဟံၣ်အစ့ပာ်ဖှိၣ်အလီၢ်အဂီၢ်န့ၣ်လီၤ.
25 အဝဲဒီဘူးဒီတံၢ်ဒီးစီၤၡလိမံးခီဖျိစီၤက့ရၡိၣ်အဒီပုၢ် ဝဲၢ်ခွါစီၤအလၤဧစၢ်န့ၣ်လီၤ. ဒီးစီၤအလၤဧစၢ်မ့ၢ်စီၤရဃါဘယၤအပၢ်, ဒီးစီၤရဃါဘယၤမ့ၢ်စီၤယၡၤယါအပၢ်, ဒီးစီၤယၡၤယါမ့ၢ်စီၤ ယိၤရၣ်အပၢ်, စီၤယိၤရၣ်မ့ၢ်စီၤစံးကရံးအပၢ်ဒီးစီၤစံးကရံးမ့ၢ်စီၤၡလိ မံးအပၢ်န့ၣ်လီၤ.
26 စီၤၡလိမံးအဘူးအတံၢ်တဖၣ်မ့ၢ်ပှၤဘၣ်ကဲခိၣ်ကဲနၢ်လၢတၢ်ပၢၤ ဃာ်တၢ်ဟ့ၣ်တဖၣ်လၢဘၣ်တၢ်ပာ်စီဆှံတ့ၢ်အီၤဆူကစၢ်ယွၤလၢစီၤ ပၤဒၤဝံး, ဒ်ဟံၣ်ဖိဃီဖိတဖၣ်အခိၣ်, ဒူၣ်ထၢကရူၢ်တဖၣ်အခိၣ်ဒီးသုးခိၣ် သုးနၢ်တဖၣ်န့ၣ်လီၤ.
27 အဝဲသ့ၣ်ဟံးထီၣ်တ့ၢ်တၢ်ဘၣ်ဂုာ်န့ၢ်တနီၤလၢအမၤန့ၢ်တ့ၢ်ဝဲ လၢတၢ်ဒုးအပူၤဒီးပာ်စီဆှံတ့ၢ်ဝဲဒ်သိးတၢ်ကသူအီၤလၢယွၤ အတၢ်လုၢ်ဟံၣ်အပူၤအဂီၢ်န့ၣ်လီၤ.
28 စီၤၡလိမံးဒီးအဘူးအတံၢ်တဖၣ်, မ့ၢ်တ့ၢ်ပှၤဘၣ်ကဲခိၣ်ကဲနၢ် လၢကယဲၢ်တၢ်လၢအဘၣ်တၢ်ပာ်စီဆှံတ့ၢ်အီၤဒ်သိးတၢ်ကသူအီၤလၢ ယွၤအတၢ်လုၢ်ဟံၣ်အပူၤအဂီၢ်, ဃုာ်ဒီးတၢ်ဟ့ၣ်တဖၣ်လၢအဘၣ်တၢ်ဟဲစိာ်အီၤလၢဝံၡမူၤအ့လး, လၢစီၤပၤစီၤစီလူး, လၢစီၤန့ၢ်အဖိခွါစီၤအဘံန့ၢ်ဒီးလၢ နီၢ်စရူၤယၤအဖိခွါစီၤယိၤအာ်သ့ၣ်တဖၣ်န့ၣ်လီၤ.
29 လၢစီၤယံးစဟၢ်အစၢၤအသွဲၣ်တဖၣ်အကျါစီၤကနၤနယၤဒီးအဖိခွါ တဖၣ်ဘၣ်တၢ်ဟ့ၣ်မူဟ့ၣ်ဒါအီၤလၢတၢ်ပၢတၢ်ပြးအမူ အဒါတဖၣ်, ဒ်ပှၤအခိၣ်လၢတၢ်ပာ်ဒီးပၢၤတၢ်ကွဲးနီၣ်တဖၣ်ဒီးဒ် စံၣ်ညီၣ်ကွီၢ်တဖၣ်အသိးန့ၣ်လီၤ.
30 လၢစီၤဃ့ဘြိၣ်အစၢၤအသွဲၣ်အကျါစီၤဃၡၤဘယၤဒီးအ ဘူးအတံၢ်တကထိနွံကယၤဂၤ, ပှၤသ့ပှၤဘၣ်လီၤဆီခဲလၢာ်, ဘၣ်တၢ်ပာ်အီၤဒ်ပှၤကဲခိၣ်ကဲနၢ်လၢတၢ်ပၢတၢ်ဆှၢကယဲၢ်တၢ်ဘူၣ် တၢ်ဘါဒီးတၢ်မၤဘၣ်ထွဲဒီးထံကီၢ်အတၢ်ဂ့ၢ်တၢ်ကျိၤတဖၣ်အဂီၢ်, လၢထံကျိယၢ်ဒ့ၣ်အမုၢ်နုာ်ကီၢ်အံၣ်စရ့လးအပူၤန့ၣ်လီၤ.
31 စီၤယရံယၤမ့ၢ်ပှၤအခိၣ်လၢစီၤဃ့ဘြိၣ်အစၢၤအသွဲၣ်တဖၣ်အကျါ န့ၣ်လီၤ. ဖဲစီၤပၤစီၤဒၤဝံးပၢတၢ်လွံၢ်ဆံနံၣ်တနံၣ်န့ၣ်တၢ်ဃုသ့ၣ်ညါ တမံၤဘၣ်တၢ်မၤအီၤလၢပှၤဟဲလီၤစၢၤလီၤသွဲၣ်တဖၣ်လၢစီၤဃ့ ဘြိၣ်အဟံၣ်ဖိဃီဖိအကျါ, ဒီးပှၤသုးဖိအသ့အဘၣ်လီၤဆီဘၣ်ထွဲဒီးဟံၣ်ဖိဃီဖိအံၤဘၣ် တၢ်ထံၣ်န့ၢ်အီၤလၢအအိၣ်ဝဲဆိးဝဲဖဲဝ့ၢ်ယၤစ့ၢ်လၢကီၢ်ကံး လဧးအလီၢ်ကဝီၤအပူၤန့ၣ်လီၤ.
32 စီၤပၤစီၤဒၤဝံးဃုထၢဟံၣ်ဖိဃီဖိအခိၣ်အနၢ်လၢအသ့အဘၣ်လီၤ ဆီ, ခံကထိနွံကယၤဂၤလၢစီၤယရံယၤအဘူးအတံၢ်တဖၣ်အကျါဒီးပာ် အီၤလၢကကဲခိၣ်ကဲနၢ်လၢတၢ်ပၢတၢ်ဆှၢကယဲၢ်တၢ်ဘူၣ်တၢ်ဘါဒီး တၢ်မၤဘၣ်ထွဲဒီးထံကီၢ်အတၢ်ဂ့ၢ်တၢ်ကျိၤတဖၣ်လၢထံကျိယၢ်ဒ့ၣ် အမုၢ်ထီၣ်ကီၢ်အံၣ်စရ့လးအပူၤ, လၢလီၢ်ကဝီၤတဖၣ်ဖဲပှၤရူၤဘ့ၣ်ဖိ, ပှၤကးဖိဒီးပှၤမနၤၡ့ၤမုၢ်ထီၣ်ဖိအိၣ်ဆိးဝဲန့ၣ်လီၤ.