17
(၂ မူၤ.၇:၁-၁၇)
1 ခဲအံၤစီၤပၤဒၤဝံးအိၣ်ဝဲဆိးဝဲလၢအနီပူၤန့ၣ်လီၤ. ဘၣ်မုၢ်တနံၤ, အဝဲမၤလိာ်ဝံနၤသၣ်ဒီးစံးဘၣ်အီၤ “ကွၢ်ကွၢ်ယဲ ယအိၣ်ယဆိးဖဲအံၤလၢဟံၣ်လၢတၢ်ဘှီအီၤလၢသ့ၣ်ဆှိအ့ရ့းအပူၤ လီၤ. မ့မ့ၢ်ယွၤအတၢ်အၢၣ်လီၤအီလီၤအတလါစီဆှံန့ၣ်ဘၣ်တၢ်ပာ်အီၤ လၢဒဲတဖျၢၣ်အပူၤန့ၣ်လီၤ.”
2 စီၤနၤသၣ်စံးဆၢအီၤ, “မၤတၢ်လၢအအိၣ်လၢနသးပူၤန့ၣ်တက့ၢ်. အဂ့ၢ်ဒ်အံၤ, ကစၢ်ယွၤအိၣ်ဒီးနၤလီၤ.”
3 ဘၣ်ဆၣ်လၢမုၢ်နၤအဝဲန့ၣ်, ကစၢ်ယွၤစံးဘၣ်စီၤနၤသၣ်,
4 “လဲၤဒီးတဲဘၣ်ယခ့ယပှၤစီၤဒၤဝံးလၢယစံးဘၣ်အီၤလၢ, အဝဲတမ့ၢ်ပှၤတဂၤလၢကသူၣ်ထီၣ်တၢ်လုၢ်ဟံၣ်တဖျၢၣ်လၢယဂီၢ်လၢ ယကအိၣ်ကဆိးလၢအပူၤန့ၣ်ဘၣ်.
5 စးထီၣ်လၢယမၤပူၤမၤဖျဲးအံၣ်စရ့လးအပှၤဂီၢ်မုၢ်လၢကီၢ်အဲၤ ကူပတူး, တုၤခဲအံၤန့ၣ်, ယတအိၣ်ဆိးတ့ၢ်လၢတၢ်လုၢ်ဟံၣ်တဖျၢၣ် အပူၤနီတစုဘၣ်. ထီဘိယအိၣ်ဆိးဒၣ်လၢဒဲတဖၣ်အပူၤဒီးသုးယလီၢ်လၢတၢ်လီၢ်တပူၤ ဘၣ်တပူၤန့ၣ်လီၤ.
6 လၢယတၢ်လဲၤသကိးတၢ်ဒီးအံၣ်စရ့လးအပှၤဂီၢ်မုၢ်ဒီကတီၢ်အပူၤ န့ၣ်, ခိၣ်နၢ်လၢယဃုထၢပာ်လီၤတ့ၢ်အီၤတဖၣ်ယတသံ ကွၢ်တ့ၢ်အီၤလၢဘၣ်မနုၤအဝဲသ့ၣ်တဘှီထီၣ်န့ၢ်ယၤတၢ်လုၢ်ဟံၣ် တဖျၢၣ်လၢသ့ၣ်ဆှိးအ့ရ့းလဲၣ်န့ၣ်, နီတဂၤနီတစုဘၣ်.
7 လၢတၢ်န့ၣ်အဃိတဲဘၣ်ယခ့ယပှၤစီၤဒၤဝံးလၢ, ယၤ, သ့တၢ်လၢာ်ကစၢ်ယွၤစံးဘၣ်အီၤလၢယကိးထီၣ်အီၤလၢတၢ်ကွၢ်ထွဲ သိလၢပျီတဖၣ်အပူၤဒီးဒုးကဲထီၣ်အီၤလၢပှၤပၢဘၣ်ယပှၤဂီၢ် မုၢ်အံၣ်စရ့လးန့ၣ်လီၤ.
8 ယအိၣ်တ့ၢ်ဒီးအီၤဖဲအလဲၤတ့ၢ်တၢ်တပူၤလၢ်လၢ်ဒီးယမၤနၢၤန့ၢ် တ့ၢ်ကယဲၢ်အဒုၣ်အဒါခဲလၢာ်လၢအမဲာ်ညါန့ၣ်လီၤ. ယကဒုးဟူထီၣ်သါလီၤအမံၤထဲသိးခိၣ်နၢ်အဒိၣ်အထီတဖၣ်လၢဟီၣ် ခိၣ်ချၢအံၤန့ၣ်လီၤ.
9 ယဃုထၢပာ်တ့ၢ်တၢ်လီၢ်တပူၤလၢယပှၤဂီၢ်မုၢ်အံၣ်စရ့လးဖိ အဂီၢ်ဒီးဒုးအိၣ်ဒုးဆိးအီၤဖဲန့ၣ်, ဖဲကအိၣ်ကဆိးဘၣ်ဝဲတအိၣ် လၢၤဘၣ်ဒီးတၢ်မၤနၢၤမၤပ့ၤအီၤန့ၣ်လီၤ. စးထီၣ်လၢအဝဲသ့ၣ်ဟဲနုာ်တ့ၢ်ဆူကီၢ်အံၤအပူၤန့ၣ်အဝဲသ့ၣ်ဘၣ် တၢ်ဒုးတ့ၢ်အီၤလၢပှၤမၤဆူၣ်မၤစိးတၢ်တဖၣ်, ဘၣ်ဆၣ်, တၢ်ဒ်သိးအံၤတမၤဘၣ်လၢၤကဒီးအသးဘၣ်.
10 ဒ်ယဆီၣ်လီၤကွံာ်တ့ၢ်အဒုၣ်အဒါတဖၣ်ခဲလၢာ်, လၢစံၣ်ညီၣ်ကွီၢ်တဖၣ်လၢယဃုထၢအီၤလၢအဝဲသ့ၣ်အဖီခိၣ်အစိၤ အသိးန့ၣ်, ယအၢၣ်လီၤလၢယကမၤနၢၤကွံာ်အဝဲသ့ၣ်အဒုၣ်အဒါ ခဲလၢာ်ဒီးဟ့ၣ်ထံကီၢ်န့ၣ်ဆူအစၢၤအသွဲၣ်တဖၣ်လီၤ.
11 တုၤအသံဒီးဘၣ်တၢ်ခူၣ်လီၤကွံာ်အီၤဃုာ်ဒီးအမိၢ်ပၢ်ဖံဖုလၢ ပျၢၤတဖၣ်န့ၣ်, ယကဒုးကဲထီၣ်အဖိခွါအကျါတဂၤလၢစီၤပၤဒီးဒုးအိၣ်ဂၢၢ်ဆိး ကျၢၤအဘီအမုၢ်န့ၣ်လီၤ.
12 အဝဲကမ့ၢ်ပှၤတဂၤလၢကသူၣ်ထီၣ်ဘၣ်တၢ်လုၢ်ဟံၣ်တဖျၢၣ်လၢယဂီၢ်လီၤ. ဒီးသပှၢ်ကတၢၢ်ယကဒုးပၢထွဲအစၢၤအသွဲၣ်တဖၣ်လၢဘီမုၢ်န့ၣ်လီၤ စိၤလီၤထီလီၤ.
13 ယကမ့ၢ်အပၢ်ဒီးအဝဲကမ့ၢ်ယဖိခွါန့ၣ်လီၤ. ယတထုးကွံာ်ဘၣ်ယတၢ်မၤစၢၤအီၤဒ်ယထုးကွံာ်ယတၢ်မၤစၢၤလၢစီၤ စီလူးအအိၣ်အသိး, ဒီးသုးကွံာ်တ့ၢ်အီၤဒ်သိးအဝဲကဲထီၣ်စီၤပၤကသ့န့ၣ်ဘၣ်.
14 ယကပာ်အီၤလၢယပှၤဂီၢ်မုၢ်ဒီးယဘီယမုၢ်အခိၣ်လီၤစိၤလီၤထီ န့ၣ်လီၤ. အဝဲအလီၢ်ပစိာ်အကတၢၢ်တအိၣ်နီတဘျီဘၣ်န့ၣ်လီၤ.”
15 စီၤနၤသၣ်တဲဘၣ်စီၤဒၤဝံး, တၢ်ခဲလၢာ်လၢကစၢ်ယွၤပာ်ဖျါထီၣ် န့ၢ်တ့ၢ်အီၤန့ၣ်လီၤ.
(၂ မူၤ.၇:၁၈-၂၉)
16 တုၤနုၤတစုစီၤပၤစီၤဒၤဝံးလဲၤနုာ်ဆူဒဲစီဆှံလၢယွၤ အိၣ်ဝဲအပူၤ, ဆ့ၣ်နီၤဝဲဒီးဘါထုကဖၣ်တၢ်, “ယွၤ, ကစၢ်ယွၤဧၢ, ယၤမ့ၢ်ဂ့ၤ, ယပှၤဟံၣ်ဖိဃီဖိမ့ၢ်ဂ့ၤပတကြၢးဘၣ်ဒီးတၢ်လၢနမၤဘၣ်တ့ၢ်ပှၤန့ၣ်ဘၣ်.
17 အန့ၣ်ဒၣ်လဲာ်, ခဲအံၤနမၤတၢ်အါန့ၢ်အန့ၣ်, နမၤတၢ်အၢၣ်လီၤအီလီၤတဖၣ်ဘၣ်ထွဲဒီးယစၢၤယသွဲၣ်တဖၣ်လၢနံၣ် လၢအကဟဲတဖၣ်အပူၤ, ဒီးနၤ, ယွၤ, ကစၢ်ယွၤဧၢ, နမၤဘၣ်တ့ၢ်ယၤဒ်ပှၤဖးဒိၣ်တဂၤအသိးန့ၣ်လီၤ.
18 ယစံးအါထီၣ်နၤတၢ်မနုၤကသ့န့ၣ်လဲၣ်. နသ့ၣ်ညါယၤဂ့ၤဂ့ၤဘၣ်ဘၣ်, ဒီးအန့ၣ်ဒၣ်လဲာ်နမၤလၤမၤကပီၤယၤ, နခ့နပှၤန့ၣ်လီၤ.
19 တၢ်န့ၣ်မ့ၢ်နတၢ်ဘၣ်နသးဒီးနတၢ်တိာ်လၢနကမၤတၢ်အံၤလၢယဂီၢ်ဒီး နကဒုးထံၣ်ယၤယခါဆူညါအတၢ်ဒိၣ်တၢ်မုၢ်န့ၣ်လီၤ.
20 ယွၤဧၢ, ပှၤဒ်သိးနၤတအိၣ်နီတဂၤဘၣ်. ပသ့ၣ်ညါထီဘိလၢထဲနၤတဂၤဧိၤနမ့ၢ်ကစၢ်ယွၤန့ၣ်လီၤ.
21 လၢဟီၣ်ခိၣ်ချၢအံၤပှၤဒ်သိးအံၣ်စရ့လးလၢနမၤပူၤဖျဲးအီၤ လၢတၢ်ကဲကုၢ်အပူၤဒ်သိးနကဒုးကဲထီၣ်အီၤလၢနပှၤဂီၢ်မုၢ်ဒၣ် နဲန့ၣ်တအိၣ်နီတကလုာ်ဘၣ်. တၢ်အဒိၣ်အမုၢ်ဒီးတၢ်လီၤလးတဖၣ်လၢနမၤလၢအဝဲသ့ၣ်အဂီၢ်န့ၣ်ရၤ လီၤနတၢ်မံၤဟူသၣ်ဖျါလၢဟီၣ်ခိၣ်ချၢန့ၣ်လီၤ. နမၤပူၤမၤဖျဲးနပှၤဂီၢ်မုၢ်လၢကီၢ်အဲၤကူပတူးဒီးဟီထီၣ်ဆိ ကွံာ်န့ၢ်အီၤပှၤကလုာ်အဂၤတဖၣ်ဖဲနပှၤဂီၢ်မုၢ်လဲၤထီၣ်ဝဲန့ၣ်လီၤ.
22 နဒုးကဲထီၣ်တ့ၢ်အံၣ်စရ့လးလၢနပှၤဂီၢ်မုၢ်ဒၣ်နဲလီၤထူလီၤ ယိာ်, ဒီးနၤ, ယွၤဧၢ, နကဲထီၣ်အဝဲသ့ၣ်အကစၢ်ယွၤန့ၣ်လီၤ.
23 ဒီးခဲအံၤ, ယွၤ, ကစၢ်ယွၤဧၢ, မၤလၢပှဲၤနတၢ်အၢၣ်လီၤကိးဆၢ ကတီၢ်ဒဲးလၢနမၤတ့ၢ်လၢယၤဒီးယစၢၤယသွဲၣ်တဖၣ်အဂီၢ်, ဒီးမၤတၢ်လၢနစံးလၢနကမၤန့ၣ်တက့ၢ်.
24 နတၢ်မံၤဟူသၣ်ဖျါကဒိၣ်ဝဲ, ဒီးပှၤဂီၢ်မုၢ်ကစံးဝဲထီဘိလၢ, သ့တၢ်လၢာ်ယွၤအံၤမ့ၢ်ကစၢ်ယွၤလၢအံၣ်စရ့လးအဖီခိၣ်န့ၣ်လီၤ. ဒီးနကပာ်ကီၤယလီၢ်ပစိာ်ကိးဆၢကတီၢ်ဒဲးလီၤ.
25 ယကစၢ်ယွၤဧၢ, ယအိၣ်ဒီးတၢ်သးဒူလၢယကဃ့ထုကဖၣ်တၢ်ထုကဖၣ်အံၤ ဆူနၤ, မ့ၢ်လၢနလီၣ်ဖျါထီၣ်တ့ၢ်တၢ်ခဲလၢာ်အံၤလၢယၤ, နခ့နပှၤ, ဒီးနတဲဘၣ်တ့ၢ်ယၤလၢနကဒုးကဲထီၣ်ယစၢၤယသွဲၣ်တဖၣ် လၢစီၤပၤတဖၣ်အဃိန့ၣ်လီၤ.
26 နဲဒၣ်ယွၤဧၢ, နမ့ၢ်ကစၢ်ယွၤဒီးနမၤတ့ၢ်တၢ်အၢၣ်လီၤ, လီၤလးအံၤဒီးယၤန့ၣ်လီၤ.
27 ယဃ့နၤလၢနကဆိၣ်ဂ့ၤယစၢၤယသွဲၣ်တဖၣ်, ဒ်သိးအဝဲသ့ၣ်ကသးခုထွဲဘၣ်လၢနတၢ်ကွၢ်မဲာ်အပူၤန့ၣ်လီၤ. နၤ, ယွၤဧၢ, နဆိၣ်ဂ့ၤတ့ၢ်အဝဲသ့ၣ်ဒီးနတၢ်ဆိၣ်ဂ့ၤကအိၣ်ဒီး အဝဲသ့ၣ်လီၤစိၤလီၤထီန့ၣ်လီၤ.”