16
1 အဝဲသ့ၣ်လဲၤစိာ်တၢ်အၢၣ်လီၤအီလီၤအတလါစီဆှံဆူဒဲလၢစီၤ ဒၤဝံးကတဲာ်ကတီၤတ့ၢ်ဝဲဒီးပာ်ဝဲလၢအပူၤန့ၣ်လီၤ. ဒီးအဝဲသ့ၣ်လုၢ်ထီၣ်တၢ်လုၢ်မ့ၣ်အူတဖၣ်ဒီးတၢ်လုၢ်မၤဃူမၤ ဖိးတဖၣ်ဆူကစၢ်ယွၤအအိၣ်န့ၣ်လီၤ.
2 တုၤစီၤဒၤဝံးမၤဝံၤတၢ်လုၢ်ထီၣ်ပာ်ထီၣ်တဖၣ်အလီၢ်ခံန့ၣ်, အဝဲဆိၣ်ဂ့ၤပှၤဂီၢ်မုၢ်လၢယွၤအမံၤအပူၤ,
3 ဒီးနီၤဟ့ၣ်လီၤတၢ်အီၣ်တၢ်အီဆူအဝဲသ့ၣ်ခဲလၢာ်အအိၣ်န့ၣ်လီၤ. အဝဲဟ့ၣ်စ့ၢ်ကီးအံၣ်စရ့လးအပှၤပိာ်ခွါဒီးပိာ်မုၣ်တဂၤစုာ် စုာ်လၢကိၣ်တဂၤတလိၣ်, တၢ်ညၣ်အဟၢမံတဂၤတလိၣ်ဒီးစပံးသၣ်အဃ့တနီၤန့ၣ်လီၤ.
4 စီၤဒၤဝံးဃုထၢပာ်ပှၤလ့ၤဝံဖိတနီၤလၢကဆှၢတၢ်ဘူၣ်ထီၣ်ဘါ ထီၣ်ယွၤ, အံၣ်စရ့လးအကစၢ်ယွၤလၢတၢ်အၢၣ်လီၤအီလီၤအတလါစီဆှံအမဲာ် ညါ, ခီဖျိတၢ်သးဝံၣ်ဒီးတၢ်စံးထီၣ်ပတြၢၤအီၤန့ၣ်လီၤ.
5 စီၤအၤစာ်မ့ၢ်ပှၤလၢအဘၣ်တၢ်ဃုထၢပာ်လီၤအီၤလၢပှၤအခိၣ်အိၣ် ဒီးစီၤစကၤရယၤဒ်ပှၤလၢကမၤစၢၤအီၤအသိးန့ၣ်လီၤ. စီၤယံၤအ့လး, စီၤၡမံၤရမိး, စီၤယဃံအ့လး, စီၤမးတံးသယၤ, စီၤအလံအာ်, စီၤဧိၤဘ့းအ့ဒိၣ်ဒီးစီၤယံၤအ့လးတဖၣ်မ့ၢ်ပှၤ ဘၣ်ဒ့သီတူၢ်တဖၣ်န့ၣ်လီၤ.
6 စီၤအၤစာ်ဘၣ်မၤသီၣ်စှၢၢ်စှံးတဖၣ်ဒီးပှၤလုၢ်တၢ်အခိၣ်ခံဂၤ လၢအမ့ၢ်, စီၤဘနါယၤဒီးစီၤယၤဃစအ့လးဘၣ်အူကွဲၤလၢတၢ်အၢၣ်လီၤအီ လီၤအတလါစီဆှံအမဲာ်ညါဘၣ်ဆၢဘၣ်ကတီၢ်န့ၣ်လီၤ.
7 တၢ်န့ၣ်မ့ၢ်တၢ်ဆၢကတီၢ်အဆိကတၢၢ်လၢစီၤဒၤဝံးစးထီၣ်ဟ့ၣ်စီၤ အၤစာ်ဒီးအပှၤလ့ၤဝံဖိကဒဲကဒဲတဖၣ်အမူအဒါလၢတၢ်သးဝံၣ်စံး ထီၣ်ပတြၢၤယွၤအဂီၢ်န့ၣ်လီၤ.
(စံး.၁၀၅း၁-၁၅; ၉၆း၁-၁၃; ၁၀၆း၁, ၄၇-၄၈)
8 ဟ့ၣ်ယွၤလၢတၢ်စံးဘျုးစံးဖှိၣ်, ဒုးဟူထီၣ်သါလီၤအတၢ်ဒိၣ်တၢ်မုၢ်,
တဲဘၣ်ပှၤကလုာ်တဖၣ်တၢ်လၢ အဝဲမၤတ့ၢ်ဝဲန့ၣ်တက့ၢ်.
9 သးဝံၣ်စံးထီၣ်ပတြၢၤယွၤ,
တဲတၢ်လီၤလးတဖၣ်လၢအဝဲမၤတ့ၢ်ဝဲန့ၣ်တက့ၢ်.
10 သးခုလၢပဘၣ်ဃးဒီးအီၤ
မ်ပှၤခဲလၢာ်လၢအဘူၣ်ထီၣ်ဘါထီၣ်အီၤသူၣ်ဖှံသးညီတက့ၢ်.
11 လဲၤဆူယွၤအအိၣ်လၢတၢ်မၤစၢၤအဂီၢ်,
ဒီးဘူၣ်ထီၣ်ဘါထီၣ်အီၤတပယူာ်ဃီတက့ၢ်.
12 သ့ၣ်နီၣ်ထီၣ်က့ၤတၢ်မၤလီၤလးတဖၣ်လၢကစၢ်ယွၤမၤတ့ၢ်ဝဲ ဒီးတၢ်စံၣ်ညီၣ်တဖၣ်လၢအဟ့ၣ်ဝဲ,
13 သုဝဲပှၤလီၤစၢၤလီၤသွဲၣ်လၢကစၢ်ယွၤအခ့အပှၤစီၤအံၣ်စရ့လး, ပှၤလၢကစၢ်ယွၤဃုထၢဝဲတဂၤ, စီၤယၤကိာ်အဖိအလံၤသ့ၣ်ဧၢ,
14 ယွၤမ့ၢ်ပကစၢ်ယွၤ,
အတၢ်မၤလိာ်တဖၣ်မ့ၢ်လၢပှၤဟီၣ်ခိၣ်ဖိခဲလၢာ်အဂီၢ်န့ၣ်လီၤ.
15 ကစၢ်ယွၤအတၢ်အၢၣ်လီၤအီလီၤလၢအမၤဝဲအထူအယိာ်န့ၣ်သးပ့ၤနီၣ် အီၤနီတစုတဂ့ၤ.
16 တၢ်အၢၣ်လီၤအီလီၤန့ၣ်မ့ၢ်တၢ်လၢကစၢ်ယွၤမၤဝဲဒီးစီၤအၤဘြၣ်ဟၣ်
ဒီးမ့ၢ်တၢ်အၢၣ်လီၤလၢအမၤဝဲဒီးစီၤအံၤစဲးန့ၣ်လီၤ.
17 ယွၤမၤတၢ်အၢၣ်လီၤအီလီၤတမံၤဒီးစီၤယၤကိာ်, တၢ်တမံၤလၢကအိၣ်လီၤထူလီၤယိာ်န့ၣ်လီၤ.
18 အဝဲစံးဝဲ, “ယကဟ့ၣ်လီၤနၤလၢကီၢ်ကနၤဧၣ်,
ဒီးတၢ်န့ၣ်ကမ့ၢ်နတၢ်န့ၢ်သါဒၣ်နဲန့ၣ်လီၤ.”
19 ကစၢ်ယွၤအပှၤဂီၢ်မုၢ်အနီၣ်ဂံၢ်စှၤဝဲဒီးမ့ၢ်ပှၤအိၣ်တမှံၤတဖၣ် လၢကီၢ်ကနၤဧၣ်အပူၤန့ၣ်လီၤ.
20 အဝဲသ့ၣ်ဟးဝ့ၤဝီၤလၢကီၢ်တဘ့ၣ်ဘၣ်တဘ့ၣ်
ဒီးလၢဘီမုၢ်တဘ့ၣ်ဆူအဂၤတဘ့ၣ်န့ၣ်လီၤ.
21 ဘၣ်ဆၣ်ကစၢ်ယွၤတပျဲပှၤနီတဂၤကမၤနၢၤမၤပ့ၤအဝဲ သ့ၣ်ဘၣ်.
လၢတၢ်ဒီဒၣ်အိၣ်ပှိၤအဝဲသ့ၣ်အဂီၢ်, အဝဲဟ့ၣ်ပလီၢ်တ့ၢ်စီၤပၤတ ဖၣ်,
22 မၤဆူးမၤဆါယခ့ယပှၤလၢယဃုထၢအီၤတဖၣ်တဂ့ၤ. ထိးဘူးယဝံတဖၣ်တဂ့ၤ.
23 ပှၤဟီၣ်ခိၣ်ဖိခဲလၢာ်သ့ၣ်ဧၢ, သးဝံၣ်ထီၣ်ယွၤတက့ၢ်.
ဒုးဟူထီသါလီၤတၢ်ကစီၣ်အဂ့ၤလၢအဝဲအုၣ်က့ၤခီၣ်က့ၤပှၤအဂ့ၢ် န့ၣ်ကိးနံၤဒဲးတက့ၢ်.
24 ဒုးဟူထီသါလီၤအဝဲအလၤကပီၤဆူပှၤကလုာ်တဖၣ်,
အတၢ်မၤအဒိၣ်အမုၢ်တဖၣ်ဆူကယဲၢ်ပှၤဂီၢ်မုၢ်ခဲလၢာ်န့ၣ်တက့ၢ်.
25 ယွၤန့ၣ်ဒိၣ်ဝဲ, ဒီးကြၢးဘၣ်တၢ်စံးထီၣ်ပတြၢၤအီၤဒိၣ်ဒိၣ် ကလဲာ်န့ၣ်လီၤ.
အဝဲကြၢးဒိးဘၣ်တၢ်လၤကပီၤဒိၣ်န့ၢ်ဒံးကစၢ်အဂၤတဖၣ်ခဲလၢာ် လီၤ.
26 ပှၤကလုာ်ဂၤအကစၢ်တဖၣ်န့ၣ်မ့ၢ်ဒၣ်တၢ်ဂီၤတၢ်ဖီၣ်တဖၣ်လီၤ.
မ့မ့ၢ်ယွၤတ့လီၤပာ်လီၤမူခိၣ်န့ၣ်လီၤ.
27 တၢ်လၤကပီၤဒီးတၢ်ကဟုကညီၢ်အိၣ်ဝးတရံးအီၤ,
တၢ်စိကမီၤဒီးတၢ်သူၣ်ခုသးခုမၤပှဲၤအတၢ်လုၢ်ဟံၣ် န့ၣ်လီၤ.
28 ကယဲၢ်ပှၤဂီၢ်မုၢ်လၢဟီၣ်ခိၣ်ချၢခဲလၢာ်သ့ၣ်ဧၢ, စံးထီၣ်ပတြၢၤယွၤတက့ၢ်.
စံးထီၣ်ပတြၢၤအလၤကပီၤဒီးအတၢ်ဒိၣ်တၢ်မုၢ်တက့ၢ်.
29 စံးထီၣ်ပတြၢၤယွၤအမံၤစီဆှံ,
ဟဲစိာ်တၢ်မၤဘူၣ်တမံၤဒီးဟဲနုာ် ဆူအတၢ်လုၢ်ဟံၣ်တက့ၢ်.
တီၤလီၤလၢတၢ်စီဆှံတဂၤအမဲာ်ညါ ဖဲအဝဲအိၣ်ဖျါထီၣ်ဝဲန့ၣ်,
30 ကနိးကစုာ်လၢအမဲာ်ညါ, ကယဲၢ်ပှၤဟီၣ်ခိၣ်ဖိခဲလၢာ်သ့ၣ်ဧၢ,
ဟီၣ်ခိၣ်န့ၣ်ဘၣ်တၢ်ပာ်လီၤအီၤဂၢၢ်ဂၢၢ်ကျၢၤကျၢၤလၢအလီၢ်ဒၣ်ဝဲ ဒီးတၢ်မၤဟူးမၤဝးအီၤတသ့ဘၣ်.
31 ဟီၣ်ခိၣ်ဒီးမူကပိာ်လိၤဧၢ, သူၣ်ဖှံသးညီတက့ၢ်.
တဲဘၣ်ပှၤကလုာ်တဖၣ်လၢယွၤမ့ၢ်စီၤပၤတက့ၢ်.
32 ပီၣ်လဲၣ်ဒီးတၢ်ဘၣ်တ့လၢအအိၣ်လၢအပူၤတဖၣ်ဧၢ, သီၣ်ထီၣ်ရူၢ်ရူၢ်တက့ၢ်.
ပျီတဖၣ်ဒီးတၢ်အိၣ်လၢအပူၤခဲလၢာ်သ့ၣ်ဧၢ, သူၣ်ဖှံသးညီတက့ၢ်.
33 တုၤယွၤဟဲလၢကပၢဟီၣ်ခိၣ်န့ၣ်သ့ၣ်လၢပှၢ်လၢ်ကျါတဖၣ်ကကိးထီၣ် လၢတၢ်သးခုန့ၣ်လီၤ.
34 ဟ့ၣ်ယွၤလၢတၢ်စံးဘျုးစံးဖှိၣ်တက့ၢ်. အဂ့ၢ်ဒ်အံၤယွၤန့ၣ်ဂ့ၤဝဲ
ဒီးအတၢ်အဲၣ်အိၣ်ဝဲလီၤထူလီၤယိာ်လီၤ.
35 စံးဘၣ်အီၤ, အုၣ်က့ၤခီၣ်က့ၤပှၤတက့ၢ်, ကစၢ်ယွၤ, ပတၢ်အုၣ်က့ၤခီၣ်က့ၤကစၢ်ဧၢ.
ပာ်ဖှိၣ်ပှၤတပူၤဃီ, မၤပူၤမၤဖျဲးပှၤလၢပှၤကလုာ်တဖၣ်,
ဒ်သိးပကစံးဘျုးနၤဒီးစံးထီၣ်ပတြၢၤနမံၤစီဆှံန့ၣ်တ က့ၢ်.
36 စံးထီၣ်ပတြၢၤယွၤ, အံၣ်စရ့လးအကစၢ်ယွၤန့ၣ်တက့ၢ်.
စံးထီၣ်ပတြၢၤအီၤခဲအံၤဒီးလီၤစိၤလီၤထီန့ၣ်တက့ၢ်.
ဒီးပှၤဂီၢ်မုၢ်ခဲလၢာ်စံးဝဲ, “အၤမ့ၣ်” ဒီးစံးထီၣ်ပတြၢၤယွၤလီၤ.
37 စီၤပၤဒၤဝံးပာ်စီၤအၤစာ်ဒီးပှၤလ့ၤဝံဖိကဒဲကဒဲတဖၣ်ဒ်ပှၤ အခိၣ်အဂၢၢ်အကျၢၤအသိးလၢတၢ်ဘူၣ်ထီၣ်ဘါထီၣ်ယွၤလၢအဘၣ်တၢ်မၤ အီၤဖဲတၢ်အၢၣ်လီၤအီလီၤအတလါစီဆှံဘၣ်တၢ်ပာ်အီၤအလီၢ်န့ၣ်လီၤ. အဝဲသ့ၣ်ဘၣ်မၤအမူအဒါတဖၣ်ဖဲန့ၣ်တနံၤဘၣ်တနံၤန့ၣ်လီၤ.
38 စီၤယဒူသူၣ်အဖိခွါစီၤဧိၤဘ့းအ့ဒိၣ်ဒီးပှၤဃုဆံဃိးဂၤ လၢအဒူၣ်ထၢပူၤဘၣ်မၤစၢၤအဝဲသ့ၣ်လီၤ. စီၤဃိစၤဒီးစီၤဧိၤဘ့းအ့ဒိၣ်မ့ၢ်ပှၤပၢၤတြဲၤတဖၣ်အခိၣ် န့ၣ်လီၤ.
39 ပှၤလုၢ်တၢ်အခိၣ်စီၤစၤဒိးဒီးပှၤလုၢ်တၢ်အခိၣ်သကိးသကိးဒီး အီၤတဖၣ်မ့ၢ်ပှၤအခိၣ်လၢတၢ်ဘူၣ်ထီၣ်ဘါထီၣ်ယွၤဖဲဝ့ၢ်ကံးဘိၣ် န့ၣ်လီၤ.
40 ကိးမုၢ်ဂီၤဒီးကိးမုၢ်ဟါဒဲးန့ၣ်, အဝဲသ့ၣ်ဘၣ်ဆိၣ်ကဲၤထီၣ် တၢ်လုၢ်တၢ်ပာ်တဖၣ်လၢတၢ်လုၢ်လီၢ်အဖီခိၣ်, တလီၤတူာ်လီၤကာ်ဘၣ်, ဒ်တၢ်ကွဲးလီၤပာ်အီၤလၢတၢ်သိၣ်တၢ်သီလၢယွၤဟ့ၣ်ပှၤအံၣ်စရ့ လးဖိတဖၣ်အပူၤအသိးန့ၣ်လီၤ.
41 ဖဲန့ၣ်စီၤဟ့မၣ်ဒီးစီၤယဒူသူၣ်ဒီးပှၤအဂၤတဖၣ်လၢအဘၣ်တၢ်ဃု ထၢလီၤဆီအီၤလၢကသးဝံၣ်တၢ်စံးထီၣ်ပတြၢၤယွၤလၢအတၢ်အဲၣ် လီၤထူလီၤယိာ်အဃိန့ၣ်, အိၣ်ဝဲဒၣ်န့ၣ်လီၤ.
42 စီၤဟ့မၣ်ဒီးစီၤယဒူသူၣ်မ့ၢ်စ့ၢ်ကီးပှၤအခိၣ်တဖၣ်လၢကွဲၤတ ဖၣ်, စှၢၢ်စှံးတဖၣ်, ဒီးတၢ်ဒ့တၢ်အူအပီးအလီအဂၤအဂီၢ်လၢအဘၣ်တၢ် ဒ့အီၤဖဲတၢ်သးဝံၣ်စံးထီၣ်ပတြၢၤဘၣ်တၢ်သးဝံၣ်အီၤအခါန့ၣ်လီၤ. စီၤယဒူသူၣ်အဒူၣ်ထၢဖိတဖၣ်န့ၣ်မ့ၢ်ပှၤအခိၣ်လၢတၢ်ပၢၤတြဲၤ တဖၣ်အဂီၢ်န့ၣ်လီၤ.
43 အန့ၣ်ဝံၤဒီးပှၤကိးဂၤဒဲးက့ၤက့ၤဝဲဆူအဟံၣ်ဒၣ်ဝဲ, ဒီးစီၤဒၤဝံးက့ၤဆူအဟံၣ်လၢကအိၣ်သကိးဒီးအဟံၣ်ဖိဃီဖိ တစိၢ်တလီၢ်န့ၣ်လီၤ.