18
(၂ မူၤ.၈:၁-၁၈)
1 တယံာ်အါအါဘၣ်အလီၢ်ခံန့ၣ်စီၤပၤဒၤဝံးဒုးကဒီးတၢ်ဒီးပှၤ ဖလ့ၡသးဖိတဖၣ်ဒီးမၤနၢၤကွံာ်အဝဲသ့ၣ်န့ၣ်လီၤ. အဝဲဟံးန့ၢ်ကွံာ်ဝ့ၢ်ကၤသးဒီးသဝီအိၣ်ဝးတရံးအီၤတဖၣ်လၢ အဝဲသ့ၣ်အတၢ်ပၢၤဃာ်အပူၤန့ၣ်လီၤ.
2 အဝဲမၤနၢၤကွံာ်စ့ၢ်ကီးပှၤမိၤအးဖိတဖၣ်လၢအကဲထီၣ်ပှၤတဖၣ် လၢအပၢဘၣ်ဝဲ, ဒီးအဝဲသ့ၣ်ဘၣ်ဟ့ၣ်အီၤတၢ်ခိတၢ်သွဲတဖၣ်န့ၣ်လီၤ.
3 မၤကဒီးစီၤဒၤဝံးဒုးကီၢ်စူၤရံအကီၢ်ဆၣ်စိဘၤအစီၤပၤဟး ဒၢ်ဧ့စ့ၢ်, ဘူးဒီးဝ့ၢ်ဃမါသး, မ့ၢ်လၢစီၤပၤဟးဒၢ်ဧ့စ့ၢ်ဂုာ်ကျဲးစၢး လၢကမၤန့ၢ်တၢ်လီၢ်ဖဲထံကျိဖရၤသးအထးခီလၢကပၢဘၣ်ဝဲအဂီၢ် အဃိန့ၣ်လီၤ.
4 စီၤဒၤဝံးဖီၣ်န့ၢ်တ့ၢ်အလ့ၣ်ကဟၣ်အဆိ တကထိ, ပှၤသုးဖိလၢအဒိးကသ့ၣ် နွံကထိဂၤ, ပှၤသုးဖိလၢအဟးလၢအခီၣ် ခံကလး ဂၤန့ၣ်လီၤ. စီၤဒၤဝံးပာ်ဃးကသ့ၣ်လၢကလၢဝဲလၢလ့ၣ် ကဟၣ်တကယၤ အဂီၢ်, ဒီးကသ့ၣ်အိၣ်လီၤတဲာ်တဖၣ်န့ၣ်ပဲာ်တဲာ်ကွံာ်ဝဲ အခီၣ်ထူၣ်ခဲလၢာ်န့ၣ်လီၤ.
5 ဖဲပှၤစူၤရံဖိတဖၣ်လၢဝ့ၢ်ဒၤမ့ၤစ့းဆှၢလီၤသုးမုၢ်တဖုလၢ ကမၤစၢၤစီၤပၤဟးဒၢ်ဧ့စ့ၢ်န့ၣ်, စီၤဒၤဝံးဒုးအီၤမၤသံကွံာ်ပှၤ ခံကလးခံကထိဂၤန့ၣ်လီၤ.
6 အန့ၣ်ဒီးအဝဲပာ်လီၤသုးမုၢ်သူၣ်ဒဲအလီၢ်တဖၣ်လၢအဝဲသ့ၣ်အလီၢ် ကဝီၤပူၤ, ဒီးအဝဲသ့ၣ်ကဲထီၣ်ပှၤတဖၣ်လၢစီၤဒၤဝံးပၢဘၣ်အီၤဒီးအဝဲ သ့ၣ်ဘၣ်ဟ့ၣ်တၢ်ခိတၢ်သွဲတဖၣ်ဆူအီၤန့ၣ်လီၤ. ယွၤဟ့ၣ်စီၤဒၤဝံးလၢတၢ်မၤနၢၤလၢတၢ်လီၢ်ကိးပူၤဒဲးန့ၣ်လီၤ.
7 စီၤဒၤဝံးဂုာ်မၤန့ၢ်ကတီၤထူတဖၣ်လၢစီၤပၤဟးဒၢ်ဧ့စ့ၢ် အပဒိၣ်တဖၣ်စိာ်ဝဲဒီးက့ၤစိာ်ဝဲဆူဝ့ၢ်ယရူၤၡလ့ၣ်န့ၣ်လီၤ.
8 အဝဲဟံးန့ၢ်ကွံာ်စ့ၢ်ကီးတိၢ်ဘီအါအါကလဲာ်လၢဝ့ၢ်တံးဘဃး ဒီးဝ့ၢ်ကူၣ်တဖၣ်လၢစီၤပၤဟးဒၢ်ဧ့စ့ၢ်ပၢဘၣ်ဝဲအပူၤန့ၣ် လီၤ. (လၢခံက့ၤစီၤၡလိၤမိၤသူကွံာ်တိၢ်ဘီတဖၣ်အံၤလၢကမၤထံဒၢ ဖးဒိၣ်, ထူၣ်တဖၣ်ဒီးတၢ်အဃၢၤအဃိၢ်တိၢ်ဘီတဖၣ်လၢတၢ်လုၢ်ဟံၣ်အဂီၢ်န့ၣ် လီၤ.)
9 ဝ့ၢ်ဃမါသးအစီၤပၤစီၤတိဧူၤနၢ်ဟူဝဲလၢစီၤဒၤဝံးမၤနၢၤ ကွံာ်စီၤပၤဟးဒၢ်ဧ့စ့ၢ်အသုးမုၢ်ဒီတဖုန့ၣ်လီၤ.
10 လၢတၢ်န့ၣ်အဃိအဝဲဆှၢလီၤအဖိခွါစီၤဟဒိရၣ်လၢကလဲၤဆၢဂ့ၤ ဆၢဝါဒီးကတိၤဒိၣ်စီၤပၤဒၤဝံးလၢအတၢ်မၤနၢၤကွံာ်စီၤဟး ဒၢ်ဧ့စ့ၢ်အဃိန့ၣ်လီၤ. စီၤပၤတိဧူၤဒုးတ့ၢ်စီၤဟးဒၢ်ဧ့စ့ၢ်အါဘျီန့ၣ်လီၤ. စီၤဟဒိရၣ်ဟဲစိာ်န့ၢ်စီၤပၤဒၤဝံးလၢတၢ်ဟ့ၣ်ကနၢၤတဖၣ်လၢ အဘၣ်တၢ်မၤအီၤလၢထူစ့ဒီးတိၢ်ဘီန့ၣ်လီၤ.
11 စီၤပၤဒၤဝံးပာ်စီဆှံတၢ်သ့ၣ်တဖၣ်န့ၣ်လၢတၢ်ကသူအီၤလၢတၢ် ဘူၣ်တၢ်ဘါအပူၤအဂီၢ်ဃုာ်ဒီးကျိၣ်ဧိၤစ့ဧိၤ, ထူဧိၤလွဲဧိၤလၢအဟံးန့ၢ်တ့ၢ်ဝဲလၢပှၤကလုာ်လၢအမၤနၢၤကွံာ် ဝဲလၢအမ့ၢ်, ပှၤအဒိၣ်ဖိ, ပှၤမိၤအးဖိ, ပှၤဧၣ်မိၣ်ဖိ, ပှၤဖလ့ၡသးဖိဒီးပှၤဧမၤလ့းဖိတဖၣ်အအိၣ်န့ၣ်လီၤ.
12 နီၢ်စရူယၤအဖိခွါစီၤအဘံၡဲၤမၤနၢၤကွံာ်ပှၤအဒိၣ်ဖိတဖၣ် ဖဲကစၢၢ်ကဆူးအံသၣ်ဒီးမၤသံကွံာ်ပှၤ ၁၈၀၀၀ ဂၤန့ၣ်လီၤ.
13 အဝဲသူၣ်ထီၣ်ဝဲသုးမုၢ်သူၣ်ဒဲအလီၢ်တဖၣ်လၢကီၢ်အဒိၣ်ဒီ တကီၢ်ညါဒီးပှၤဂီၢ်မုၢ်အိၣ်ဖဲန့ၣ်ကဲထီၣ်ပှၤတဖၣ်လၢစီၤပၤဒၤဝံး ပၢဘၣ်အီၤန့ၣ်လီၤ. ယွၤဟ့ၣ်စီၤဒၤဝံးလၢတၢ်မၤနၢၤလၢတၢ်လီၢ်ကိးပူၤဒဲးန့ၣ်လီၤ.
14 စီၤဒၤဝံးပၢတ့ၢ်တၢ်လၢအံၣ်စရ့လးဒီကီၢ်ညါအဖီခိၣ်ဒီးမၤ လီၤတံၢ်ဝဲလၢအပှၤဂီၢ်မုၢ်တဖၣ်ဘၣ်တၢ်မၤအီၤဒ်အဂ့ၤဝဲဘၣ်ဝဲ ဒီးတီတီလိၤလိၤန့ၣ်လီၤ.
15 စီၤအဘံၡဲၤအဒီပုၢ်ဝဲၢ်ခွါစီၤယိၤအာ်မ့ၢ်သုးခိၣ်ကျၢၢ်လၢ သုးမုၢ်အပူၤဒီးစီၤအဃံလူးအဖိခွါစီၤယဟိၡၤဖးမ့ၢ်ပှၤ ပၢၤတၢ်ကွဲးနီၣ်တဖၣ်အခိၣ်,
16 စီၤအဃံတူာ်အဖိခွါစီၤစၤဒိးဒီးစီၤအ့ဘယၤသၢ်အဖိခွါစီၤ အဃံမ့လးမ့ၢ်ပှၤလုၢ်တၢ်အခိၣ်တဖၣ်, ဒီးစီၤၡၤဝၡၤမ့ၢ်ကွီၢ်ဘျီၣ် အပှၤကွဲးလံာ်ဒိၣ်လီၤ.
17 စီၤယဟိယဒါအဖိခွါစီၤဘနါယၤမ့ၢ်ပှၤအခိၣ်တဂၤလၢအခိးစီၤ ဒၤဝံးအသးသမူဒီးစီၤပၤဒၤဝံးအဖိခွါတဖၣ်ဒိးန့ၢ်တ့ၢ်လီၢ် ဒိၣ်လၤထီတဖၣ်လၢအဝဲအတၢ်မၤအပူၤန့ၣ်လီၤ.