15
1 စီၤဒၤဝံးမၤဟံၣ်တဖၣ်လၢကသူဝဲလၢအဂီၢ်ဒၣ်ဝဲလၢစီၤဒၤဝံး အဝ့ၢ်ပူၤန့ၣ်လီၤ. အဝဲကတဲာ်ကတီၤစ့ၢ်ကီးတၢ်လီၢ်တတီၤလၢကစၢ်ယွၤအတၢ်အၢၣ်လီၤအီ လီၤအတလါအဂီၢ်ဒီးမၤထီၣ်ဝဲဒဲတဖျၢၣ်လၢတလါအဂီၢ်န့ၣ်လီၤ.
2 အန့ၣ်ဒီးအဝဲစံးဝဲဒၣ်, “ထဲပှၤလ့ၤဝံဖိတဖၣ်ဧိၤ, ကြၢးစိာ်တၢ်အၢၣ်လီၤအီလီၤအတလါမ့ၢ်လၢ, အဝဲသ့ၣ်, မ့ၢ်ပှၤတဖုလၢယွၤဃုထၢတ့ၢ်အီၤလၢကစိာ်တလါအဂီၢ်ဒီးမၤအတၢ် မၤလီၤစိၤလီၤဃၣ်န့ၣ်လီၤ.”
3 လၢတၢ်န့ၣ်အဃိစီၤဒၤဝံးဒုးအိၣ်ဖှိၣ်ရိဖှိၣ်ပှၤအံၣ်စရ့လး ဖိခဲလၢာ်လၢဝ့ၢ်ယရူၤၡလ့ၣ်ဒ်သိးအကဟဲစိာ်တၢ်အၢၣ်လီၤအီလီၤ အတလါဆူတၢ်လီၢ်လၢအကတဲာ်ကတီၤဝဲန့ၣ်လီၤ.
4 မၤကဒီး, အဝဲမၤလိာ်စီၤအၤဟရိၣ်အစၢၤအသွဲၣ်တဖၣ်ဒီးပှၤလ့ၤ ဝံဖိသ့ၣ်တဖၣ်န့ၣ်လီၤ.
5 လၢပှၤကဃးဖိလၢပှၤလ့ၤဝံအဒူၣ်ထၢပူၤန့ၣ်, ပှၤအခိၣ်စီၤအူရံၤအ့လးဟဲဝဲဒီးအပှၤ တကယၤခံဆံ ဂၤ,
6 လၢပှၤမၤရၤရံအဒူၣ်ထၢပူၤန့ၣ်, ပှၤအခိၣ်စီၤဧစံယၤဟဲဝဲ ဒီးအပှၤ ခံကယၤခံဆံ ဂၤ,
7 လၢပှၤက့ရၡိၣ်အဒူၣ်ထၢပူၤန့ၣ်ပှၤအခိၣ်စီၤယိၤအ့လးဟဲဝဲ ဒီးအပှၤတကယၤသၢဆံ ဂၤ,
8 လၢပှၤအလံစၤဖၣ်အဒူၣ်ထၢပူၤန့ၣ်ပှၤအခိၣ်စီၤၡမါယၤဟဲဝဲဒီး အပှၤခံကယၤ ဂၤ,
9 လၢပှၤဃ့ဘြိၣ်အဒူၣ်ထၢပူၤန့ၣ်, ပှၤအခိၣ်စီၤအလံၤအ့လးဟဲဝဲ ဒီးအပှၤဃိးဆံ ဂၤ,
10 ဒီးလၢပှၤဧူးစံၤအ့လးအဒူၣ်ထၢပူၤန့ၣ်, ပှၤအခိၣ်စီၤဧးမံၤ နဒးဟဲဝဲဒီးအပှၤ တကယၤတဆံခံ ဂၤန့ၣ်လီၤ.
11 စီၤဒၤဝံးကိးန့ၢ်ပှၤလုၢ်တၢ်အခိၣ်တဖၣ်လၢအမ့ၢ်ဝဲစီၤစၤဒိး ဒီးစီၤအ့ဘယၤသၣ်, ဒီးပှၤလ့ၤဝံဖိဃုဂၤလၢအမ့ၢ်ဝဲ, စီၤအူရံၤအ့လး, စီၤဧစံယၤ, စီၤယိၤအ့လး, စီၤၡမါယၤ, စီၤအလံၤအ့လးဒီးစီၤဧးမံၤနဒးသ့ၣ်တဖၣ်န့ၣ်လီၤ.
12 အဝဲစံးဘၣ်ပှၤလ့ၤဝံဖိသ့ၣ်တဖၣ်, “သုမ့ၢ်ခိၣ်နၢ်တဖၣ်လၢပှၤလ့ၤဝံဖိအဒူၣ်ထၢတဖၣ်အပူၤန့ၣ် လီၤ. မၤကဆှီသုသးဒီးမၤကဆှီသုပှၤလ့ၤဝံဖိကဒဲကဒဲတဖၣ်ဒ်သိး သုဟဲစိာ်ယွၤ, အံၣ်စရ့လးအကစၢ်ယွၤအတၢ်အၢၣ်လီၤအီလီၤအတလါဆူတၢ်လီၢ်လၢ ယကတဲာ်ကတီၤပာ်လၢအဂီၢ်န့ၣ်ကသ့ဝဲတက့ၢ်.
13 အဂ့ၢ်ဒ်အံၤ, လၢအခီၣ်ထံးကတၢၢ်တဘျီန့ၣ်, သုတအိၣ်ဘၣ်ဖဲန့ၣ်လၢ သုကစိာ်အီၤအဃိ, ယွၤ, ပကစၢ်ယွၤစံၣ်ညီၣ်တ့ၢ်ပှၤ, လၢပတဘူၣ်ထီၣ်ဘါထီၣ်ဘၣ်အီၤဒ်ပကြၢးမၤတ့ၢ်အီၤအသိးဘၣ်အဃိ န့ၣ်လီၤ.”
14 ဒီးပှၤလုၢ်တၢ်အခိၣ်တဖၣ်, ဒီးပှၤလ့ၤဝံဖိသ့ၣ်တဖၣ်မၤကဆှီ ထီၣ်အသးလၢကသုးယွၤ, အံၣ်စရ့လးအကစၢ်ယွၤအတၢ်အၢၣ်လီၤအီၤလီၤအတလါအဂီၢ်န့ၣ်လီၤ.
15 ပှၤလ့ၤဝံဖိတဖၣ်ယိးတလါန့ၣ်လၢနီၣ်ယိးဘိအလိၤလၢအဖံဘၣ် ခိၣ်ဒ်ယွၤမၤလိာ်တ့ၢ်ဝဲခီဖျိစီၤမိၤၡ့အသိးန့ၣ်လီၤ.
16 စီၤဒၤဝံးမၤလိာ်ပှၤလ့ၤဝံဖိအခိၣ်အနၢ်တဖၣ်လၢကဟ့ၣ်မူဟ့ၣ် ဒါပှၤလ့ၤဝံဖိတဖၣ်ဒ်သိးကသးဝံၣ်တၢ်အိၣ်ဒီးတၢ်ဒ့တၢ်အူ အပီးအလီ အကလုာ်ကလုာ်လၢအမ့ၢ်သီတူၢ်တဖၣ်တနၢ်တဖၣ်ဒီးစှၢၢ်စှံး တဖၣ်န့ၣ်လီၤ.
17-21 လၢပှၤသးဝံၣ်တၢ်ဖိအဒူၣ်ထၢတဖၣ်အပူၤန့ၣ်အဝဲသ့ၣ်ဃုထၢပှၤလၢ ကမၤသီၣ်စှၢၢ်စှံးတိၢ်ဘီတဖၣ်လၢပှၤမရၤရံၤအဒူၣ်ထၢပူၤလၢ အမ့ၢ်ဝဲစီၤယိၤအ့လးအဖိခွါစီၤဟ့မၣ်, ဒီးအဘူးအတံၢ်စီၤဘရ့ကံယၤအဖိခွါစီၤအၤစာ်, ဒီးစီၤကူၤၡါယၤအဖိခွါစီၤအ့သၣ်န့ၣ်လီၤ. ပှၤလၢတၢ်ကမၤစၢၤအဝဲသ့ၣ်အဂီၢ်ပှၤလ့ၤဝံ ဖိတဖၣ်လၢအဘၣ်တၢ်ဃုထၢအီၤလၢကဒ့တနၢ်သီတူၢ်လၢအဃဲ တဖၣ်မ့ၢ်ဝဲ, စီၤစကၤရယၤ, စီၤယၤစ့အ့လး, စီၤၡမံၤရမိး, စီၤယဃံ အ့လး, စီၤဧူးနံၤ, စီၤအလံအာ်, စီၤမၤစ့ယၤဒီးစီၤဘနါယၤ တဖၣ်န့ၣ်လီၤ.
လၢတၢ်ဒ့သီတူၢ်လၢအကပၢၤတဖၣ်အဂီၢ်န့ၣ်ပှၤလ့ၤဝံဖိလၢအမ့ၢ် ဝဲစီၤမးတံးသယၤ, စီၤအလံဖလ့, စီၤမံးကန့ယၤ, စီၤဧၤစါစယၤတဖၣ်ဘၣ်တၢ်ဃုထၢအီၤဒီးစီၤ ဧိၤဘ့းအ့ဒိၣ်ဒီးစီၤယံၤအ့လးတဖၣ်ဘၣ်တၢ်ဃုထၢအီၤဒ်ပှၤ ပၢၤတၢ်လုၢ်ဟံၣ်န့ၣ်လီၤ.
22 မ့ၢ်လၢအဝဲအတၢ်သ့တၢ်ဘၣ်အိၣ်ဝဲလၢတၢ်သူၣ်ဝံၣ်သးဆၢအဂ့ၢ်အဃိ စီၤကံနၤနယၤဘၣ်တၢ်ဃုထၢအီၤလၢကကဲထီၣ်, ပှၤလ့ၤဝံဖိသးဝံၣ်တၢ်တဖၣ်အခိၣ်န့ၣ်လီၤ.
23 စီၤဘရံကံယၤဒီးစီၤအ့လကါနၤတဖၣ်ဃုာ်ဒီးစီၤဧိၤဘ့းအ့ ဒိၣ်ဒီးစီၤယဃံယၤတဖၣ်န့ၣ်ဘၣ်တၢ်ဃုထၢအီၤဒ်ပှၤပၢၤတၢ်အၢၣ် လီၤအီလီၤအတလါန့ၣ်လီၤ.
24 ပှၤလုၢ်တၢ်အခိၣ်တဖၣ်လၢအမ့ၢ်ဝဲစီၤၡဘၤနယၤ, စီၤယဟိၡၤဖး, စီၤနၤသန့လး, စီၤဧမၤစဲ, စီၤစကၤရယါ, စီၤဘနါယၤဒီးစီၤ အလၤဧစၢ်တဖၣ်ဘၣ်တၢ်ဃုထၢအီၤလၢကအူကွဲၤတဖၣ်လၢတၢ်အၢၣ်လီၤအီ လီၤအတလါအမဲာ်ညါန့ၣ်လီၤ.
(၂ မူၤ.၆:၁-၂၂)
25 လၢတၢ်န့ၣ်အဃိစီၤပၤဒၤဝံး, ပှၤအံၣ်စရ့လးဖိအခိၣ်အနၢ်တဖၣ် ဒီးပှၤသုးဖိအခိၣ်တဖၣ်လဲၤဝဲဆူစီၤဧိၤဘ့းအ့ဒိၣ်အဟံၣ်လၢ တၢ်ဟံးန့ၢ်က့ၤတၢ်အၢၣ်လီၤအီလီၤအတလါအဂီၢ်ဒီးအဝဲသ့ၣ်အိၣ် ဒီးတၢ်သူၣ်ဖှံသးညီအမူးဖးဒိၣ်တမူးလီၤ.
26 အဝဲသ့ၣ်လုၢ်ထီၣ်ပာ်ထီၣ်ဂီၤဖံးဖါနွံဒုဒီးသိနွံဒုဒ်သိး ကမၤလီၤတံၢ်ဝဲလၢကစၢ်ယွၤကမၤစၢၤပှၤလ့ၤဝံဖိတဖၣ်လၢအစိာ် တၢ်အၢၣ်လီၤအီလီၤအတလါန့ၣ်လီၤ.
27 စီၤဒၤဝံးသိးဆ့ကၤဖးထီတဘ့ၣ်လၢတၢ်ဆးအီၤလၢဖှီဝါကဆှၣ် အဂ့ၤကတၢၢ်, ဒီးပှၤသးဝံၣ်တၢ်ဖိတဖၣ်, ဒီးအဝဲသ့ၣ်အပှၤအခိၣ်စီၤကနၤနယၤဒီးပှၤလ့ၤဝံဖိတဖၣ်လၢအစိာ် တလါစီဆှံသိးစ့ၢ်ကီးဆ့ဒ်န့ၣ်တဖၣ်လီၤ. စီၤဒၤဝံးသိးစ့ၢ်ကီးဝဲအ့ဖိးဖှီဝါကဆှၣ်တဘ့ၣ်န့ၣ်လီၤ.
28 အန့ၣ်ဒီးကယဲၢ်ပှၤအံၣ်စရ့လးဖိခဲလၢာ်ပိာ်ထီၣ်တၢ်အၢၣ်လီၤအီ လီၤတလါစီဆှံအခံဆူဝ့ၢ်ယရူၤၡလ့ၣ်အိၣ်ဃုာ်ဒီးတၢ်သူၣ်ခု သးခုအကိးပသူအသီၣ်တဖၣ်, ကွဲၤတဖၣ်, တနွဲတဖၣ်, ဒီးစှၢၢ်စှံးတဖၣ်အသီၣ်ဒီးသီတူၢ်တဖၣ်အတၢ်သးဝံၣ်အသီၣ်န့ၣ်လီၤ.
29 ဖဲတလါစီဆှံဘၣ်တၢ်ဟဲစိာ်အီၤဆူဝ့ၢ်ပူၤန့ၣ်, စီၤစီလူးအဖိမုၣ်နီၢ်မံကၤလးကွၢ်လီၤတၢ်လၢပဲတြီဖိအပူၤ ဒီးထံၣ်ဘၣ်စီၤဒၤဝံးဂဲၤကလံာ်ပၢ်ကဝ့ၤလၢတၢ်သူၣ်ခုသးခု ပူၤအဃိ, အဝဲတပာ်လုၢ်ပာ်ပှ့ၤလၢၤအီၤလၢအသးကံၢ်ပူၤဘၣ်န့ၣ်လီၤ.