14
(၂ မူၤ.၅:၁၁-၁၆)
1 ထါယၢၣ်အစီၤပၤဃံရၣ်ဆှၢလီၤပှၤကူၣ်တၢ်ကၤတၢ်တဖုဆူစီၤဒၤ ဝံးအအိၣ်, ဒီးဟ့ၣ်လီၤအီၤလၢသ့ၣ်ဆှိအ့ရ့းအကျီၣ်တဖၣ်ဃုာ်ဒီးပှၤမၤတၢ် လၢလၢၢ်သ့ၣ်တဖၣ်, ဒီးပှၤမၤတၢ်လၢသ့ၣ်သ့တဖၣ်လၢကသူၣ်ထီၣ်နီတဖျၢၣ်အဂီၢ်န့ၣ်လီၤ.
2 ဒီးလၢတၢ်န့ၣ်အဃိစီၤဒၤဝံးသ့ၣ်ညါဘၣ်ဝဲလၢယွၤပာ်ဂၢၢ်ပာ် ကျၢၤအီၤဒ်လၢကီၢ်အံၣ်စရ့လးအစီၤပၤအသိးဒီးဒုးဘီၣ်ထီၣ်ညီ ထီၣ်အဘီအမုၢ်, လၢအပှၤဂီၢ်မုၢ်အဂီၢ်န့ၣ်လီၤ.
3 ဖဲန့ၣ်, လၢဝ့ၢ်ယရူၤၡလ့ၣ်အပူၤန့ၣ်စီၤဒၤဝံးဟံးန့ၢ်အါထီၣ် အမါတဖၣ်ဒီးမၤန့ၢ်အါထီၣ်အဖိခွါတဖၣ်ဒီးဖိမုၣ်တဖၣ်န့ၣ် လီၤ.
4 ဖိလၢလာ်တဖၣ်အံၤအိၣ်ဖျဲၣ်ထီၣ်လၢအဂီၢ်လၢဝ့ၢ်ယရူၤၡလ့ၣ်ပူၤ န့ၣ်လီၤ. စီၤၡးမၤ, စီၤၡိဘာ်, စီၤနၤသၣ်, စီၤၡလိၤမိၤ,
5 စီၤယံးဘဃၢ်, စီၤအလံၡူ, စီၤအ့လပၤလ့း,
6-7 စီၤနိကၤ, စီၤန့ၤဖ့း, စီၤယၤဖံ, စီၤအလံၡမၤ, စီၤဘဧ့ၤလယၤဒၤဒီးစီၤအလံဖလ့းလီၤ.
(၂ မူၤ.၅:၁၇-၂၅)
8 ဒီးတုၤပှၤဖလ့ၡသးဖိတဖၣ်နၢ်ဟူတ့ၢ်ဝဲလၢစီၤဒၤဝံးဘၣ်တၢ် ဖှူတ့ၢ်လံအီၤလၢစီၤပၤလၢအံၣ်စရ့လးဒီဘ့ၣ်ညါအဖီခိၣ်န့ၣ် အဝဲသ့ၣ်အသုးမုၢ်ဟးထီၣ်လၢကဖီၣ်န့ၢ်အီၤအဂီၢ်လီၤ. လၢတၢ်န့ၣ်အဃိစီၤဒၤဝံးဟးထီၣ်ဝဲဒ်သိးကထံၣ်လိာ်အသးဒီးအဝဲ သ့ၣ်န့ၣ်လီၤ.
9 ပှၤဖလ့ၡသးဖိတဖၣ်ဟဲတုၤဝဲဖဲကစၢၢ်ကဆူးရဖံဒံၣ်ဒီးစးထီၣ် ဂုာ်ဆူၣ်ပျီဆူၣ်တၢ်န့ၣ်လီၤ.
10 စီၤဒၤဝံးသံကွၢ်ကစၢ်ယွၤ, “မ့ၢ်ယဘၣ်ဒုးပှၤဖလ့ၡသးဖိတဖၣ် န့ၣ်ဧါ. ဒီးမ့ၢ်နကဟ့ၣ်ယၤတၢ်မၤနၢၤန့ၣ်ဧါ.”
ဒီးယွၤစံးဆၢဝဲ, “မ့ၢ်, ဒုးတၢ်တက့ၢ်. ယကဟ့ၣ်နၤတၢ်မၤနၢၤန့ၣ်လီၤ.”
11 လၢတၢ်န့ၣ်အဃိစီၤဒၤဝံးဒုးအဝဲသ့ၣ်ဖဲဘဧၤလးပရၤစံၣ်ဒီး မၤနၢၤကွံာ်အဝဲသ့ၣ်န့ၣ်လီၤ. စီၤဒၤဝံးစံးဝဲ, “ကစၢ်ယွၤသူတ့ၢ်လံယၤဒ်သိးယကလဲၤနုာ်ဆူၣ်ဆူဒုၣ်ဒါအသုး မုၢ်ပူၤဒ်ထံဒိၣ်လုၣ်ဘၢတၢ်အသိးန့ၣ်လီၤ.” လၢတၢ်န့ၣ်အဃိတၢ်လီၢ်န့ၣ်ဘၣ်တၢ်ကိးအီၤလၢဘဧၤလးပရၤစံၣ် န့ၣ်လီၤ.
12 တုၤပှၤဖလ့ၡသးဖိတဖၣ်ထွးထီၣ်ဃ့ၢ်ကွံာ်ဝဲန့ၣ်အဝဲသ့ၣ်ပာ်တီၢ် တ့ၢ်အတၢ်ဂီၤတၢ်ဖီၣ်သ့ၣ်တဖၣ်, ဒီးစီၤဒၤဝံးဟ့ၣ်လီၤအကလုၢ်လၢကဘၣ်တၢ်ဒွဲၣ်ကွံာ်အီၤန့ၣ်လီၤ.
13 တယံာ်ဘၣ်န့ၣ်ပှၤဖလ့ၡသးဖိတဖၣ်ဟဲက့ၤကဒါက့ၤကဒီးဝဲဆူကစၢၢ် ကဆူးလၢကစးထီၣ်ဂုာ်ဆူၣ်ပျီဆူၣ်တၢ်ကဒီးအဂီၢ်န့ၣ်လီၤ.
14 မၤကဒီးတစုစီၤဒၤဝံးကူၣ်လိာ်တၢ်ဒီးကစၢ်ယွၤ, ဒီးကစၢ်ယွၤစံးဆၢအီၤ “လဲၤထီၣ်ဒုးတၢ်ဒီးအဝဲသ့ၣ်ဖဲအံၤတဂ့ၤ. မ့မ့ၢ်လဲၤတရံးဒီးကဝီၤဃာ်အဝဲသ့ၣ်ဒီးကတဲာ်ကတီၤတၢ်ဒုးလၢ အဂၤတကပၤဘူးဒီးသ့ၣ်ပံၢ်သလိဘကၤတဖၣ်န့ၣ်တက့ၢ်.
15 တုၤနနၢ်ဟူပှၤဟဲထီၣ်အသီၣ်လၢသ့ၣ်တဖၣ်အခံအလိၤန့ၣ်ဒီး, ဒုးတၢ်တက့ၢ်. အဂ့ၢ်ဒ်အံၤ, ယကလဲၤထီၣ်ဆိလၢနမဲာ်ညါလၢတၢ်မၤ နၢၤပှၤဖလ့ၡသးဖိအသုးမုၢ်အဂီၢ်န့ၣ်လီၤ.”
16 စီၤဒၤဝံးမၤတၢ်ဒ်ကစၢ်ယွၤမၤလိာ်တ့ၢ်အီၤအသိး, အဃိဒီးအဝဲဟီက့ၤကွံာ်ပှၤဖလ့ၡသးဖိတဖၣ်လၢဝ့ၢ်ကံးဘိၣ်ပၢၢ် ဆူဝ့ၢ်က့ၤစ့ၢ်န့ၣ်လီၤ.
17 စီၤဒၤဝံးအတၢ်မံၤဟူထီၣ်သါလီၤဆူတၢ်လီၢ်သကုၤဆးဒး, ဒီးယွၤဒုးပျံၤပှၤကိးကလုာ်ဒဲးလၢအီၤန့ၣ်လီၤ.