12
1 စီၤဒၤဝံးအိၣ်ဝဲဆိးဝဲလၢဝ့ၢ်စံကလးအပူၤဖဲအဃ့ၢ်ပူၤဖျဲး တ့ၢ်အသးလၢစီၤပၤစီၤစီလူးအအိၣ်န့ၣ်လီၤ. ဒီးဖဲန့ၣ်ပှၤသုးဖိတဖၣ်လၢအအိၣ်ဒီးအတၢ်လဲၤခီဖျိဒီးဘၣ် တၢ်နာ်န့ၢ်အီၤသ့ဟဲပာ်ဖှိၣ်အသးဒီးအီၤ,
2 ပှၤတဖၣ်လၢအမ့ၢ်ပှၤဘံၣ်ယၤမံၣ်ဖိအဒူၣ်လၢစီၤစီလူးဘၣ်ထွဲဝဲ န့ၣ်လီၤ. အဝဲသ့ၣ်မ့ၢ်ပှၤတဖၣ်လၢအခးပျၢ်တဖၣ်ဒီးကွံာ်လၢၢ်တဖၣ်, လၢစုထွဲမ့ၢ်ဂ့ၤ, စုစ့ၣ်မ့ၢ်ဂ့ၤသ့ဝဲန့ၣ်လီၤ.
3 အဝဲသ့ၣ်ဘၣ်တၢ်ကဲခိၣ်ကဲနၢ်အီၤလၢပှၤကံဘဧးဖိစီၤၡၤမၤအဖိ ခွါစီၤအဃံၤဧ့စ့ၢ်ဒီးစီၤယိၤအၣ်န့ၣ်လီၤ. အအံၤမ့ၢ်ပှၤသုးဖိတဖၣ်န့ၣ်လီၤ. စီၤဧၤစမၤဝ့းအဖိခွါစီၤယံးစအ့လးဒီးစီၤပ့လး, ပှၤဧၤနသိးဖိစီၤဘရၤကၤဒီးစီၤယၤဟူ,
4 ပှၤကံးဘိၣ်ဖိစီၤယံးၡမၤယၤ, ပှၤသုးဖိလၢအမံၤဟူသၣ်ဖျါ တဂၤဒီးခိၣ်နၢ်လၢပှၤအဂၤသၢဆံအကျါတဂၤ, ပှၤကဒ့ရၤသးဖိစီၤယံးရမံယၤ, စီၤယၤဃစအ့လး, စီၤယိဃၤနၣ်ဒီးစီၤယိၤစၤဘး,
5 ပှၤဃရူဖးဖိစီၤအလူစဲၤ, စီၤယရံမိး, စီၤဘလံယၤ, စီၤၡမၤရယၤ, ဒီးစီၤၡဖးတယၤ,
6 ပှၤကိၤရးအဒူၣ်ထၢဖိစီၤအ့လကါနၤ, စီၤယၡံယၤ, စီၤဧၤစရးလး, စီၤယိၤဧ့စ့ၢ်ဒီးစီၤယၤၡဘၣ်.
7 ပှၤကဒိၢ်ဖိစီၤယရိဃၣ်အဖိခွါစီၤယိၤဧ့လးဒီးစီၤစဘၤဒံ ယၤန့ၣ်လီၤ.
8 အအံၤမ့ၢ်ပှၤသုးဖိလၢအမံၤဟူသၣ်ဖျါဒီးအိၣ်ဒီးအတၢ်လဲၤခီ ဖျိသ့ၣ်တဖၣ်လၢပှၤကးအဒူၣ်ဖိအကျါလၢအပာ်ဖှိၣ်အသးဒီးစီၤဒၤဝံး အသုးမုၢ်ဖဲအဝဲအိၣ်ဝဲဆိးဝဲလၢတိာ်လၢပှၢ်လၢ်ကျါန့ၣ်လီၤ. အဝဲသ့ၣ်မ့ၢ်ပှၤသ့ပှၤဘၣ်လၢကတီၤဒီးဘီသ့ၣ်တဖၣ်, ဒီးမ့ၢ်ပှၤတဖၣ်လၢအမဲာ်အိၣ်ဖျါလီၤပျံၤဒ်ခ့ယုၢ်တဖၣ်အသိးပှၤ လဲၤတၢ်ချ့ဒ်တၤဟိစဘံလၢကစၢၢ်လိၤအသိးန့ၣ်လီၤ.
9-13 အဝဲသ့ၣ်အလီၢ်အလၤအတီၤတဂၤဘၣ်တဂၤမ့ၢ်ဒ်လာ်အံၤလီၤ. စီၤဧ့စ့ၢ်, စီၤဧိၤဘါဒယၤ, စီၤအလံအာ်, စီၤမံးၡမနၤ, စီၤယံးရမံယၤ, စီၤဧၤတဲ, စီၤအလံၤအ့လး, စီၤယိဃၤနၣ်, စီၤအ့လစၤဘး, စီၤယံးရမံယၤ, ဒီးစီၤမၤကဘၤနဲသ့ၣ်တဖၣ်န့ၣ်လီၤ.
14 ပှၤတနီၤလၢပှၤကးအဒူၣ်တဖၣ်အံၤမ့ၢ်ပှၤသုးမုၢ်အခိၣ်အဒိၣ်လၢပှၤ တကထိဂၤအဖီခိၣ်, ဒီးသုးမုၢ်အခိၣ်အဆံးလၢပှၤတကယၤဂၤအဖီခိၣ်န့ၣ်လီၤ.
15 လၢလါအခီၣ်ထံးတလါဖဲထံကျိယၢ်ဒ့ၣ်အထံဒိၣ်ထီၣ်ဒီးလုၣ်ဘၢ ထံကၢၢ်ခိၣ်တဖၣ်အကတီၢ်န့ၣ်, အဝဲသ့ၣ်ခီဂာ်ထံကျိဒီးမၤလီၤပြံလီၤပြါကွံာ်ပှၤဂီၢ်မုၢ် လၢအအိၣ်ဝဲဆိးဝဲလၢကစၢၢ်ကဆူးဖဲထံကျိအမုၢ်ထီၣ်ဒီးထံကျိ အမုၢ်နုာ်ခံကပၤလိာ်န့ၣ်လီၤ.
16 ဘၣ်တဘျီပှၤတဖုလၢဘံၣ်ယၤမံၣ်အဒူၣ်ဒီးယူဒၤအဒူၣ်အကျါလဲၤဆူ စီၤဒၤဝံးအအိၣ်, ဖဲအဝဲအိၣ်ဝဲဆိးဝဲလၢတိာ်ပူၤအခါန့ၣ်လီၤ.
17 စီၤဒၤဝံးလဲၤထီၣ်သဂၢၢ်အဝဲသ့ၣ်ဒီးစံးဝဲ, “သုမ့ၢ်ဟဲဒ်တံၤသကိးတဖၣ်လၢကမၤစၢၤယၤအဂီၢ်န့ၣ်ဒီးယတူၢ် လိာ်မုာ်သုဖဲအံၤလီၤ. အိၣ်သကိးဒီးပှၤတက့ၢ်. ဘၣ်ဆၣ်သုမ့ၢ်ဟဲဒ်သုကဟ့ၣ်လီၤယၤဆူယဒုၣ်ယဒါတဖၣ်အစုပူၤန့ၣ် ဒီးယမ့ၢ်တကျဲးစၢးမၤဆါသုဒၣ်လဲာ်န့ၣ်, ပမိၢ်ပၢ်ဖံဖုလၢပျၢၤတဖၣ်အကစၢ်ယွၤကသ့ၣ်ညါဝဲဒီးကစံၣ်ညီၣ် သုန့ၣ်လီၤ.”
18 ကစၢ်ယွၤအသးဟဲလီၤဘၣ်လၢပှၤလၢအဝဲသ့ၣ်အကျါတဂၤ, စီၤဧၤမၤစဲအလိၤလီၤ. ပှၤအံၤလၢခံကဲထီၣ်ပှၤသၢဆံအသုး ခိၣ်, ဒီးအဝဲဒၣ်ကိးထီၣ်ဝဲ,
“စီၤယံးၡဲအဖိခွါစီၤဒၤဝံးဧၢ, ပမ့ၢ်နပှၤတဖၣ်လီၤ.
မ်နၤဒီးပှၤလၢအမၤစၢၤနၤတဖၣ်မၤန့ၢ်မၤနၢၤတၢ်တက့ၢ်. ကစၢ်ယွၤအိၣ်လၢနအိၣ်တခီလီၤ.” စီၤဒၤဝံးတူၢ်လိာ်မုာ်အဝဲသ့ၣ်ဒီးဒုးကဲထီၣ်အဝဲသ့ၣ်လၢသုး ခိၣ်တဖၣ်လၢအသုးမုၢ်အပူၤန့ၣ်လီၤ.
19 ပှၤသုးဖိတနီၤလၢမနၤၡ့ၤအဒူၣ်ပူၤလဲၤနုာ်ပာ်ဖှိၣ်အသးဆူ စီၤဒၤဝံးအအိၣ်တခီဖဲအဝဲလဲၤထီၣ်သကိးဒီးပှၤဖလ့ၡသးဖိ တဖၣ်လၢကဒုးစီၤပၤစီၤစီလူးအဂီၢ်န့ၣ်လီၤ. နီၢ်နီၢ်တခီအဝဲတမၤစၢၤပှၤဖလ့ၡသးဖိတဖၣ်န့ၣ်ဘၣ်. အဂ့ၢ်ဒ်အံၤ, အဝဲသ့ၣ်အစီၤပၤတဖၣ်ပျံၤတၢ်လၢအဝဲကဟ့ၣ်လီၤဘၣ် ဖုးအဝဲသ့ၣ်ဆူစီၤစီလူးလၢအမ့ၢ်အဝဲအကစၢ်လၢညါအစုပူၤန့ၣ်လီၤ. လၢတၢ်န့ၣ်အဃိအဝဲသ့ၣ်ဆှၢကဒါက့ၤအီၤဆူဝ့ၢ်စံကလးန့ၣ်လီၤ.
20 အအံၤမ့ၢ်ပှၤသုးဖိတဖၣ်လၢမနၤၡ့ၤအဒူၣ်ပူၤလၢအလဲၤနုာ်ပာ် ဖှိၣ်အသးဒီးစီၤဒၤဝံးဖဲအဝဲဟဲက့ၤကဒါက့ၤအခါန့ၣ်လီၤ. ပှၤသ့ၣ်တဖၣ်န့ၣ်မ့ၢ်ဝဲ, စီၤဧၤဒနၤ, စီၤယိၤစၤဘး, စီၤယဒံၤဧ့လး, စီၤမံၤက့လး, စီၤယိၤစဘး, စီၤအလံဟူၤဒီးစီၤစံးလသဲန့ၣ် လီၤ. လၢမနၤၡ့ၤအဒူၣ်ပူၤန့ၣ်အဝဲသ့ၣ်ခဲလၢာ်မ့ၢ်ပှၤတကထိဂၤအခိၣ် တဖၣ်န့ၣ်လီၤ.
21 အဝဲသ့ၣ်မၤစၢၤစီၤဒၤဝံးဒ်သုးခိၣ်တဖၣ်အသိးလၢသုးမုၢ်အပူၤ န့ၣ်လီၤ. အဂ့ၢ်ဒ်အံၤ, အဝဲသ့ၣ်ခဲလၢာ်မ့ၢ်ပှၤသုးဖိစဲၣ်နီၤသ့ၣ်တဖၣ်န့ၣ် လီၤ. လၢခံအဝဲသ့ၣ်ကဲထီၣ်သုးခိၣ်တဖၣ်လၢအံၣ်စရ့လးအသုးမုၢ်အပူၤ န့ၣ်လီၤ.
22 ကိးမုၢ်နံၤဒဲးဃၣ်ဃၣ်န့ၣ်, ပှၤအသီတဖၣ်ဟဲပာ်ဖှိၣ်အသးလၢစီၤ ဒၤဝံးအသုးမုၢ်တဖၣ်အပူၤ, တုၤဒၣ်လဲာ်အသုးမုၢ်ကဲထီၣ်ဒ်သုးမုၢ်လၢအဒိၣ်ဝဲဒီးဆူၣ်ဝဲ န့ၣ်လီၤ.
23 ဖဲစီၤဒၤဝံးအိၣ်ဝဲဖဲဝ့ၢ်ဃ့ဘြိၣ်န့ၣ်, ပှၤသုးဖိလၢအသ့ အဘၣ်အါဂၤဟဲပာ်ဖှိၣ်အသးဒီးအဝဲအသုးမုၢ်လၢကမၤစၢၤတၢ်လၢအ ဝဲကကဲထီၣ်စီၤပၤလၢစီၤပၤစီၤစီလူးအလီၢ်အဂီၢ်ဒ်ယွၤအၢၣ်လီၤ တ့ၢ်ဝဲအသိးန့ၣ်လီၤ. အဝဲသ့ၣ်အတၢ်ဂံၢ်တဖၣ်မ့ၢ်ဒ်လၢလာ်အံၤအသိးလီၤ.
24 ပှၤယူဒၤဖိလၢအစိာ်ကတီၤဒီးဘီအိၣ်ဝဲ ဃုကထိဃိးကယၤ ဂၤ, လၢအအိၣ်ကတဲာ်ကတီၤအသးလၢဒုးသုးအဂီၢ်လီၤ.
25 လၢပှၤစူၤမ့းအိၣ်ဖိအကျါန့ၣ်ပှၤသုးဖိလၢအသ့အဘၣ်န့ၣ် နွံကထိတကယၤဂၤန့ၣ်လီၤ.
26 လၢပှၤလ့ၤဝံဖိအကျါန့ၣ်ပှၤ လွံၢ်ကထိဃုကယၤဂၤ,
27 လၢစီၤအၤဟရိၣ်အဟံၣ်ဒူၣ်ဖိလၢစီၤယဟိၤယဒါကဲခိၣ်ကဲနၢ်အီၤ အကျါန့ၣ်, ပှၤသၢကထိနွံကယၤဂၤ,
28 ပှၤသးစၢ်အဒူလၢအဒုးတၢ်သ့စီၤစၤဒိးဒီးအဘူးအတံၢ်တဖၣ်, ပှၤသ့ကဲခိၣ်ကဲနၢ် ခံဆံခံဂၤ,
29 လၢပှၤဘံၣ်ယၤမံၣ်အဒူၣ် (လၢအမ့ၢ်စီၤစီလူးအဒူၣ်ဒၣ်ဝဲ) အကျါန့ၣ်ပှၤ သၢကထိဂၤ (ပှၤဘံၣ်ယၤမံၣ်အဒူၣ်ဖိအါဒၣ်တၢ်တက့ၢ် မ့ၢ်ပှၤတဖၣ်လၢအသးတီတ့ၢ်ဒီးစီၤစီလူးတဖၣ်လီၤ.)
30 လၢပှၤအ့ဖရဲၣ်ဖိအဒူၣ်ပူၤပှၤ ခံကလးဃိးကထိဂၤ, ပှၤမံၤဟူသၣ်ဖျါလၢအဒူၣ်ထၢဒၣ်ဝဲအပူၤန့ၣ်လီၤ.
31 လၢမုၢ်နုာ်မနၤၡ့ၤအဒူၣ်ပူၤန့ၣ်ပှၤ တကလးဃိးကထိဂၤ, ဘၣ်တၢ်ဃုထၢအီၤဒ်သိးကလဲၤပာ်ထီၣ်စီၤဒၤဝံးလၢစီၤပၤန့ၣ် လီၤ.
32 လၢပှၤယံးစၣ်ကၢ်ဖိအဒူၣ်ပူၤန့ၣ်, ပှၤအခိၣ်အနၢ်ခံကယၤဂၤ, ဃုာ်ဒီးပှၤတဖၣ်လၢအအိၣ်လၢအဝဲသ့ၣ်အတၢ်ပၢအဖီလာ်န့ၣ်လီၤ. (ပှၤခိၣ်ပှၤနၢ်တဖၣ်အံၤသ့ၣ်ညါတ့ၢ်တၢ်လၢပှၤအံၣ်စရ့လးဖိ ကြၢးမၤဝဲဒီးတၢ်ဆၢကတီၢ်အဂ့ၤကတၢၢ်လၢကဘၣ်မၤဝဲ န့ၣ်လီၤ.)
33 လၢပှၤစဘူလိၣ်ဖိအဒူၣ်ပူၤန့ၣ်, ပှၤလၢအသးတီဒီးတၢ်နာ်န့ၢ်အီၤသ့အိၣ်ယဲၢ်ကလးန့ၣ်လီၤ. အဝဲသ့ၣ်မ့ၢ်ပှၤအိၣ်ကတဲာ်ကတီၤအသးလၢကဒုးတၢ်ဒီးဘၣ်တၢ်သိၣ်လိ တ့ၢ်အီၤလၢကသူတၢ်စုတၢ်ကဝဲၤကိးကလုာ်ဒဲးန့ၣ်လီၤ.
34 ဒီးလၢပှၤနးသၤလံဖိအဒူၣ်ပူၤန့ၣ်, ပှၤခိၣ်ပှၤနၢ်အဂၤတကထိ ဃုာ်ဒီးပှၤသၢကလးနွံကထိဂၤလၢအအိၣ်ဒီးကတီၤတဖၣ်ဒီးဘီ တဖၣ်န့ၣ်လီၤ.
35 လၢပှၤဒၣ်ဖိအဒူၣ်ပူၤန့ၣ်, ပှၤသ့ပှၤဘၣ်လၢတၢ်ဒုးအဂီၢ် ခံကလးဃိးကထိဃုကယၤဂၤလီၤ.
36 လၢပှၤအၤၡ့ၢ်ဖိအဒူၣ်ပူၤန့ၣ်, ပှၤသ့ပှၤဘၣ်လၢတၢ်ဒုးအဂီၢ်လွံၢ်ကလးဂၤန့ၣ်လီၤ.
37 လၢပှၤအဒူၣ်လၢထံကျိယၢ်ဒ့ၣ်အမုၢ်ထီၣ်တကပၤလၢအမ့ၢ်, ပှၤရူၤဘ့ၣ်ဖိ, ပှၤကးဖိ, ပှၤမနၤၡ့ၤဖိတခီဒူၣ်အကျါပှၤလၢ အဘၣ်တၢ်သိၣ်လိတ့ၢ်အီၤလၢကသူတၢ်စုကဝဲၤကိးကလုာ်ဒဲး တကလီၢ်ခံကလး ဂၤန့ၣ်လီၤ.
38 ကယဲၢ်ပှၤသုးဖိခဲလၢာ်လၢအကတဲာ်ကတီၤအသးလၢတၢ်ဒုးအဂီၢ်အံၤ လဲၤဝဲဆူဝ့ၢ်ဃ့ဘြိၣ်ဒီးပာ်လီၤအသးလၢကဒုးကဲထီၣ်စီၤဒၤ ဝံးလၢစီၤပၤလၢအံၣ်စရ့လးခဲလၢာ်အဖီခိၣ်န့ၣ်လီၤ. အံၣ်စရ့လးအပှၤဂီၢ်မုၢ်လၢအအိၣ်လီၤတဲာ်ခဲလၢာ်ပာ်စ့ၢ်ကီးအသး တဖျၢၣ်ဃီလၢတၢ်ဂ့ၢ်တမံၤအံၤအဖီခိၣ်န့ၣ်လီၤ.
39 အဝဲသ့ၣ်အိၣ်သကိးဒီးစီၤဒၤဝံးဖဲန့ၣ်သၢသီ, ဒီးအိၣ်ဒီးတၢ်အီၣ်သကိးအီသကိးအမူးလၢအဘၣ်တၢ်ကတဲာ်ကတီၤအီၤ လၢအဝဲသ့ၣ်အဂီၢ်လၢအထံဖိကီၢ်ဖိကဒဲကဒဲန့ၣ်လီၤ.
40 ပှၤကလံၤစိးအဒူၣ်တဖၣ်လၢအအိၣ်ယံၤယံၤကလဲာ်ဒ်အမ့ၢ်ပှၤယံးစၣ် ကၢ်, ပှၤစဘူလိၣ်, ဒီးပှၤနၤသးလံဖိအပှၤဂီၢ်မုၢ်တဖၣ်ဒၣ်လဲာ်ဟဲဝဲ ဒီးကသ့ၣ်ယီၤတဖၣ်, ကီၤလၤအူးတဖၣ်, ကသ့ၣ်လၤတဖၣ်, ဂီၤဖံးတဖၣ်လၢအပဒၢးဝဲဒီးတၢ်အီၣ်လၢအမ့ၢ်, ကိၣ်ကမူၣ်, ချၢၣ်ဒၢသၣ်, စပံးသၣ်အဃ့, စပံးထံဒီးသ့ၣ်စၤယံး အသိလီၤ. အဝဲသ့ၣ်ဟဲစိာ်စ့ၢ်ကီးဂီၤဘုၣ်ဂီၤဖံးဒီးသိတဖၣ်လၢကမၤသံ ဒီးအီၣ်ဝဲလီၤ. ကယဲၢ်တၢ်ခဲလၢာ်အံၤမ့ၢ်တၢ်ပာ်ဖျါထီၣ်တၢ်သူၣ်ခုသးခုတမံၤလၢ ထံကီၢ်ဒီတဘ့ၣ်ညါကလၢၢ်ဘၣ်ဝဲန့ၣ်လီၤ.