11
(၁ မူၤ.၅:၁-၁၀)
1 အံၣ်စရ့လးအပှၤဂီၢ်မုၢ်ခဲလၢာ်လဲၤဆူစီၤဒၤဝံးအအိၣ်ဖဲဃ့ဘြိၣ်ဒီးစံးဘၣ်အီၤ, “ပမ့ၢ်နညၣ်ဒီးနသွံၣ်နထံဒၣ်နဲန့ၣ်လီၤ.
2 လၢအပူၤကွံာ်, ဖဲစီၤစီလူးမ့ၢ်ဒံးပစီၤပၤအခါဒၣ်လဲာ်န့ၣ် နဆှၢတ့ၢ်အံၣ်စရ့လးအပှၤဂီၢ်မုၢ်လၢတၢ်ဒုးတၢ်ယၤအပူၤ, ဒီးနယွၤ, ကစၢ်ယွၤအၢၣ်လီၤနၤလၢနကမ့ၢ်ပှၤဆှၢအပှၤဂီၢ်မုၢ် ဒီးကဲထီၣ်ပှၤပၢဘၣ်အဝဲသ့ၣ်န့ၣ်လီၤ.”
3 လၢတၢ်န့ၣ်အဃိ, အံၣ်စရ့လးအပှၤခိၣ်ပှၤနၢ်ခဲလၢာ်, ဟဲဆူစီၤပၤဒၤဝံးအအိၣ်ဖဲဃ့ဘြိၣ်န့ၣ်လီၤ. အဝဲမၤတၢ်အၢၣ်လီၤစီဆှံဒီးအဝဲသ့ၣ်, ဒီးအဝဲသ့ၣ်ဖှူအီၤလၢ စီၤပၤဒီးအဝဲကဲထီၣ်အံၣ်စရ့လးအစီၤပၤဒ်ယွၤအၢၣ်လီၤတ့ၢ် တၢ်, ခီဖျိစီၤၡမူၤအ့လးအသိးန့ၣ်လီၤ.
4 စီၤပၤဒၤဝံးဒီးကယဲၢ်ပှၤအံၣ်စရ့လးဖိခဲလၢာ်လဲၤဒီးဒုး ဝ့ၢ်ယရူၤၡလ့ၣ်န့ၣ်လီၤ. ဖဲန့ၣ်အခါဝ့ၢ်ယရူၤၡလ့ၣ်ဘၣ်တၢ်သ့ၣ်ညါအီၤဒ်ဝ့ၢ်ယဘူၣ်ဒီးပှၤ ယဘူၣ်ဖိတဖၣ်လၢအမ့ၢ်ပှၤအိၣ်ဝဲ ဆိးဝဲအဆိကတၢၢ်ဖဲကီၢ်န့ၣ်အပူၤအိၣ်ဆိးဝဲဒံးဖဲန့ၣ်လီၤ.
5 ပှၤယဘူၣ်ဖိတဖၣ်တဲဘၣ်စီၤဒၤဝံးလၢတမ့ၢ်ကနုာ်လီၤဘၣ်ဆူဝ့ၢ် ယရူၤၡလ့ၣ်အပူၤနီတဘျီဘၣ်န့ၣ်လီၤ. ဘၣ်ဆၣ်စီၤဒၤဝံးမၤန့ၢ်ဝ့ၢ်စံယိၣ်အတိာ်ဒီးဝ့ၢ်န့ၣ်ကဲထီၣ် တၢ်လီၢ်လၢအဘၣ်တၢ်သ့ၣ်ညါအီၤဒ် “စီၤဒၤဝံးအဝ့ၢ်” န့ၣ်လီၤ.
6 စီၤဒၤဝံးစံးဝဲ, “ပှၤအဆိကတၢၢ်တဂၤလၢအမၤသံဘၣ်ပှၤယဘူၣ် ဖိအဆိကတၢၢ်တဂၤန့ၣ်ကကဲထီၣ်သုးမုၢ်အခိၣ်ဖးဒိၣ်န့ၣ်လီၤ.” နီၢ်စရူၤယၤအဖိခွါစီၤယိၤအာ်မ့ၢ်ပှၤအဆိ ကတၢၢ်တဂၤလၢအတီခိၣ်ရိၣ်မဲလၢတၢ်ဒုးအပူၤ, ဒီးအဝဲကဲထီၣ်သုးခိၣ်ဖးဒိၣ်န့ၣ်လီၤ.
7 မ့ၢ်လၢစီၤဒၤဝံးလဲၤအိၣ်ဝဲဆိးဝဲဖဲတိာ်န့ၣ်အပူၤအဃိဘၣ် တၢ်ကိးလၢ “စီၤဒၤဝံးအဝ့ၢ်” န့ၣ်လီၤ.
8 အဝဲသူၣ်ထီၣ်ဝ့ၢ်အခိၣ်ဒူဝးတရံး, စးထီၣ်လၢကစၢၢ်ကလိ အမုၢ်ထီၣ်မံးလိၤ, ဖဲစီၤယိၤအာ်တခီဘှီဂ့ၤက့ၤတၢ်အိၣ်လီၤ တဲာ်လၢဝ့ၢ်ပူၤအဂၤတဖၣ်န့ၣ်လီၤ.
9 စီၤဒၤဝံးအဂံၢ်အဘါဒံးယံာ်ဒံးဆူၣ်ထီၣ်မ့ၢ်လၢယွၤသ့တၢ်လၢာ် အိၣ်ဒီးအီၤအဃိန့ၣ်လီၤ.
(၂ မူၤ.၂၃:၈-၃၉)
10 အအံၤမ့ၢ်တၢ်ကွဲးနီၣ်ကွဲးဃါဘၣ်ထွဲဒီးစီၤဒၤဝံးအပှၤသုး ဖိအမံၤဟူသၣ်ဖျါတဖၣ်န့ၣ်လီၤ. အဝဲသ့ၣ်တဖၣ်ဃုာ်ဒီးပှၤအံၣ်စရ့လးဖိအိၣ်လီၤတဲာ်တဖၣ်န့ၣ်, မၤစၢၤသကိးစီၤဒၤဝံးဒ်သိးကကဲထီၣ်ဘၣ်စီၤပၤအဂီၢ်ဒ်ယွၤ အၢၣ်လီၤတ့ၢ်အသိးဒီးအဝဲသ့ၣ်ပၢၤဃာ်အဘီအမုၢ်ဒ်သိးကအိၣ်ဂၢၢ် အိၣ်ကျၢၤန့ၣ်လီၤ.
11 ပှၤအဆိကတၢၢ်တဂၤန့ၣ်မ့ၢ်ဝဲစီၤယၤၡဘၣ်လၢပှၤဃၤကမိၣ်ဖိ အဒူၣ်ထၢပူၤ, ပှၤအခိၣ်လၢပှၤသၢဂၤအကျါန့ၣ်လီၤ. အဝဲဒုးတၢ်ဒီးအဘီထီဒါပှၤသၢကယၤဂၤဒီးမၤသံကွံာ်အဝဲသ့ၣ် ခဲလၢာ်လၢတၢ်ဒုးတဘျီအပူၤန့ၣ်လီၤ.
12 ပှၤလၢခံတဂၤလၢပှၤမံၤဟူသၣ်ဖျါသၢဂၤအကျါမ့ၢ်ဝဲ စီၤဒိဒိၤအဖိခွါစီၤအလၤဧစၢ်လၢပှၤအဃိဃးဖိအဒူၣ်ထၢပူၤ န့ၣ်လီၤ.
13 အဝဲဒုးတၢ်လၢစီၤဒၤဝံးအဂီၢ်ထီဒါပှၤဖလ့ၡသးဖိတဖၣ်ဖဲ တၢ်ဒုးလၢပၤစဒၤမံၣ်န့ၣ်လီၤ. ဖဲပှၤအံၣ်စရ့လးဖိစးထီၣ်ဃ့ၢ်ထီၣ်ကွံာ်ဝဲန့ၣ်အဝဲအိၣ်ဝဲဖဲ ဘုမုယီၤအပျီတဘ့ၣ်အပူၤ,
14 ဒီးအဝဲဒီးအပှၤတဖၣ်ထၢၣ်ဂၢၢ်ဝဲဖဲပျီခၢၣ်သးဒီးဒုးပှၤဖလ့ ၡသးဖိတဖၣ်န့ၣ်လီၤ. ဒီးယွၤဟ့ၣ်လီၤအီၤတၢ်မၤနၢၤဖးဒိၣ်န့ၣ်လီၤ.
15 ဘၣ်တနံၤန့ၣ်ပှၤသၢဂၤလၢပှၤသုးဖိစဲၣ်နီၤသၢဆံအကျါ, လဲၤလီၤဆူစီၤဒၤဝံးအအိၣ်ဖဲလၢၢ်လၢအဝဲအိၣ်ဆိးဝဲဘူးဒီး လၢၢ်ကအိဧၤဒူးလၣ်, ဖဲပှၤဖလ့ၡသးဖိတဖုသူၣ်အဒဲဖဲ ကစၢၢ်ကဆူးရၤဖၤအခါန့ၣ်လီၤ.
16 ဖဲအကတီၢ်အံၤန့ၣ်စီၤဒၤဝံးအိၣ်ဝဲလၢတိာ်ပူၤဒီးဖလ့ၡသးဖိ အသုးဖိတဖုမၤန့ၢ်ဒီးအိၣ်ဆိးဝဲဖဲဝ့ၢ်ဘ့ၤသလ့ဃ့ၣ်န့ၣ်လီၤ.
17 စီၤဒၤဝံးသးသယုၢ်အဟံၣ်ဒီးစံးဝဲ, “ယအဲၣ်ဒိးမးလၢပှၤတဂၤ ဂၤကဟဲစိာ်န့ၢ်ယၤထံအီတခွးလၢထံပူၤလၢအအိၣ်ဖဲ ဝ့ၢ်ဘ့ၤသလ့ဃ့ၣ်အတြဲၤကပၤန့ၣ်လီၤ.”
18 ဒီးပှၤသုးဖိစဲၣ်နီၤသၢဂၤလဲၤခီဂာ်ဆူၣ်ပှၤဖလ့ၡသးဖိသူၣ် ဒဲအလီၢ်ဒီးဒၢၣ်န့ၢ်ထံတနီၤလၢထံပူၤ, ဒီးဟဲက့ၤစိာ်န့ၢ်စီၤ ဒၤဝံးန့ၣ်လီၤ. ဘၣ်ဆၣ်အဝဲတအီဝဲဒၣ်ဘၣ်. မ့မ့ၢ်လူလီၤကွံာ်ဝဲဒ်တၢ်လုၢ်ထီၣ်လၢယွၤအဂီၢ်အသိး,
19 ဒီးစံးဝဲ, “ယအီထံအံၤတလီၤဘၣ်. တၢ်အံၤကလီၤဂာ်ဒီးတၢ်အီပှၤတဖၣ်လၢအညိကွံာ်အသးလၢတၢ်သံခ့ သံပှၤအတၢ်မၤအဂီၢ်အသွံၣ်န့ၣ်လီၤ.” လၢတၢ်န့ၣ်အဃိအဝဲဂ့ၢ်လိာ်လၢကအီထံန့ၣ်လီၤ. အအံၤမ့ၢ်တၢ်မၤအဒူအဃိၤလၢပှၤသုးဖိစဲၣ်နီၤသၢဂၤမၤဝဲန့ၣ်လီၤ.
20 စီၤယိၤအာ်အဒီပုၢ်ဝဲခွါစီၤအဘံၡဲၤမ့ၢ်ပှၤအခိၣ်လၢပှၤမံၤ ဟူသၣ်ဖျါသၢဆံအကျါန့ၣ်လီၤ. အဝဲဒုးတၢ်ဒီးအဘီထီဒါပှၤသၢကယၤဂၤဒီးမၤသံကွံာ်ဝဲ, ဒီးကဲထီၣ်ပှၤမံၤဟူသၣ်ဖျါလၢပှၤသၢဆံအကျါန့ၣ်လီၤ.
21 အဝဲမ့ၢ်ပှၤအမံၤဟူသၣ်ဖျါကတၢၢ်လၢပှၤသၢဆံ အကျါဒီးကဲထီၣ်အဝဲသ့ၣ်အခိၣ်န့ၣ်လီၤ. ဘၣ်ဆၣ်အဝဲအမံၤတဟူထဲသိးပှၤသၢဂၤအံၤန့ၣ်ဘၣ်.
22 ပှၤကၤဘစ့လးဖိစီၤယဟိၤယဒါအဖိခွါစီၤဘနါယၤန့ၣ်မ့ၢ်ပှၤ သုးဖိလၢအမံၤဟူသၣ်ဖျါတဂၤန့ၣ်လီၤ. အဝဲမၤတ့ၢ်တၢ်မၤအဒူအါမံၤ, လၢအအိၣ်ဃုာ်ဝဲဒီးတၢ်မၤသံပှၤမိၤအးသုးဖိဖးဒိၣ်ခံဂၤန့ၣ်လီၤ. တဘျီအဝဲလဲၤလီၤဆူတၢ်ပူၤတပူၤဖဲမူခိၣ်ဖီလီၤဝဲအနံၤတနံၤ ဒီးမၤသံကွံာ်ခ့ယုၢ်တဒုန့ၣ်လီၤ.
23 အဝဲမၤသံကွံာ်စ့ၢ်ကီးပှၤအဲၤကူပတူးဖိတဂၤ, ပှၤဖးဒိၣ်လၢအနီၢ်ထီယဲၢ်ပျၢ်ဒီးဖီၣ်ဃးအဘီဖးဒိၣ်လၢအစု ပူၤန့ၣ်လီၤ. ဘၣ်ဆၣ်စီၤဘနါယၤလဲၤလီၤဆူအအိၣ်ဒီးထီဒါအီၤဒီးနီၣ်တီၢ် တဘိ, ဂုာ်န့ၢ်ဘီလၢပှၤအဲၤကူပတူးဖိအစုပူၤဒီးမၤသံကွံာ်အီၤ လၢဘီအဝဲန့ၣ်လီၤ.
24 တၢ်သ့ၣ်တဖၣ်န့ၣ်မ့ၢ်တၢ်မၤအဒူတဖၣ်လၢစီၤဘနါယၤ, ပှၤတဂၤလၢပှၤသၢဆံအကျါမၤဝဲန့ၣ်လီၤ.
25 အဝဲမ့ၢ်ပှၤစဲၣ်နီၤလၢပှၤသၢဆံ အကျါ, ဘၣ်ဆၣ်အမံၤတဟူထဲသိးပှၤသၢဂၤန့ၣ်ဘၣ်. ဒီးစီၤဒၤဝံးပာ်အီၤလၢပှၤအခိၣ်လၢပှၤခိးအသးသမူတဖၣ်အကျါ န့ၣ်လီၤ.
26 အအံၤမ့ၢ်ပှၤသုးဖိစဲၣ်နီၤသ့ၣ်တဖၣ်န့ၣ်လီၤ. စီၤယိၤအာ်အဒီပုၢ်ဝဲၢ်ခွါစီၤဧစၤအ့လး, စီၤဒိဒိၤအဖိခွါစီၤအ့လဃၤနၤလၢဝ့ၢ်ဘ့ၤသလ့ဃ့ၣ်,
27 ပှၤဃရိးဖိစီၤၡးမၤ, ပှၤပလိၣ်ဖိစီၤဃ့လ့း,
28 ပှၤတကိၤဖိစီၤဧံးက့ၣ်အဖိခွါစီၤဧံရၤ, ပှၤဧၤနသိးဖိစီၤအဘံၤဧ့စၢ်,
29 ပှၤဃူၡသးဖိစီၤစံးဘကဲ, ပှၤအဃိဃးဖိစီၤဧံလဲၤ,
30 ပှၤနတိဖၤဖိစီၤမၤဟရဲ, ပှၤနတိဖၤဖိစီၤဘၤနါအဖိခွါစီၤဃ့လ့ာ်,
31 ပှၤကံဘဧၤဖိစီၤရံဘဲအဖိခွါစီၤအံသဲၤလၢပှၤဘံၣ်ယၤမံၣ်အ ဒူၣ်, ပှၤပံးရသိၣ်ဖိစီၤဘနါယၤ,
32 စီၤဃူရဲၤလၢကစၢၢ်ကဆူးတဖၣ်ဘူးဒီးထံကျိကၤဧၣ်, ပှၤဧၤရဘၤဖိစီၤအဘံၤအ့လး,
33 ပှၤဘၢ်ဃူၣ်ဖိစီၤဧၤစမၤဝ့း, ပှၤၡၤလဘိၣ်ဖိစီၤအ့လံယဘၤ,
34 ပှၤကံးစိာ်ဖိစီၤယၤၡ့ၣ်, ပှၤဟရၣ်ဖိစီၤၡၤက့အဖိခွါစီၤယိနၤသၣ်,
35 ပှၤဟရၣ်ဖိစီၤစၤကၢ်အဖိခွါစီၤအဃံအၣ်, စီၤအူၢ်အဖိခွါစီၤအလံဖၤလဲး,
36-37 ပှၤမက့ၤသးဖိစီၤဃ့ဖ့ၢ်, ပှၤပလိၣ်ဖိစီၤအဃံယၤ, ပှၤကၢ်မ့ၤလးဖိစီၤဃ့စရိၤ, စီၤအ့စဘၤအဖိခွါစီၤနၤရဲ,
38 စီၤနၤသၣ်အဒီပုၢ်ဝဲၢ်ခွါစီၤယိၤအ့လး, စီၤအကရံအဖိခွါစီၤမံးဘဃၢ်,
39 ပှၤဧၣ်မိၣ်ဖိစီၤစ့လ့း, ပှၤဘအ့ရိးဖိစီၤနၤဃရဲ, စီၤယိၤအာ်အပှၤစိာ်စုကဝဲၤ,
40-41 ပှၤယံသၢ်ဖိစီၤဧံရၤဒီးစီၤကၢ်ရ့း, ပှၤဃ့ၤသးဖိစီၤအူၤရံယၤ, စီၤအဃၤလဲအဖိခွါစီၤစၤဘး,
42 စီၤၡံစၤအဖိခွါစီၤဧဒံနၤ (ပှၤရူၤဘ့ၣ်အဒူၣ်အခိၣ်တဂၤလၢ အအိၣ်ဒီးအသုးဖိဒၣ်ဝဲအဂၤသၢဆံ),
43 စီၤမၤကၤအဖိခွါစီၤဃၤနၣ်, ပှၤမံၤသၣ်ဖိစီၤယဟိၡၤဖး,
44 ပှၤဧၤၡတြိးဖိစီၤဧူးစံယၤ, ပှၤဧရိၤဧ့ၢ်ဖိစီၤဃိသၣ်အဖိခွါစီၤၡးမၤဒီးစီၤယဧံၤအ့လး,
45-46 ပှၤတံစံၤဖိစီၤၡံးမရံၤအဖိခွါစီၤယဒံးဧ့လးဒီးစီၤယိဃၤ, ပှၤမၤဃဝးဖိစီၤအလံၤအ့လးစီၤအ့လနၣ်အဖိခွါစီၤယရံဘဲ ဒီးစီၤယိၡဝယၤ, ပှၤမိၤအးဖိစီၤယံးသမၤ
47 ပှၤမစိဘယၤဖိစီၤအလံၤအ့လး, စီၤဧိၤဘ့းဒီးစီၤယၤစံအ့ လးန့ၣ်လီၤ.