စံးထီၣ်ပတြၢၤ 98
1 သးဝံၣ်ထီၣ်ယွၤလၢတၢ်သးဝံၣ်အသီတက့ၢ်.
အဂ့ၢ်ဒ်အံၤ, အဝဲမၤတ့ၢ်တၢ်လီၤလးတဖၣ်လီၤ.
အစုထွဲဒီးအစုဒုၣ်စီဆှံ
မၤတ့ၢ်တၢ်အုၣ်က့ၤခီၣ်က့ၤလၢအဂီၢ်လီၤ.
2 ယွၤဒုးသ့ၣ်ညါတ့ၢ်အတၢ်အုၣ်က့ၤခီၣ်က့ၤဒီး
လီၣ်ဖျါထီၣ်တ့ၢ်အတၢ်တီတၢ်လိၤ
ဆူပှၤကလုာ်တဖၣ်န့ၣ်လီၤ.
3 အဝဲသ့ၣ်နီၣ်ထီၣ်တ့ၢ်အတၢ်အဲၣ်ဂၢၢ်ကျၢၤ
ဒီးအတၢ်သးတီလၢ
အံၣ်စရ့လးအပှၤဟံၣ်ဖိအဂီၢ်န့ၣ်လီၤ.
ဟီၣ်ခိၣ်အကတၢၢ်ခဲလၢာ်ထံၣ်ဘၣ်တ့ၢ်လံ
ပကစၢ်ယွၤအတၢ်အုၣ်က့ၤခီၣ်က့ၤန့ၣ်လီၤ.
4 ပှၤဟီၣ်ခိၣ်ဖိခဲလၢာ်သ့ၣ်ဧၢ,
သးဝံၣ်ထီၣ်ယွၤလၢတၢ်သးခု,
စံးထီၣ်ပတြၢၤအီၤလၢတၢ်သးဝံၣ်
ဒီးကိးထီၣ်အီၤလၢတၢ်သူၣ်ဖှံသးညီန့ၣ်တက့ၢ်.
5 သးဝံၣ်စံးထီၣ်ပတြၢၤယွၤတက့ၢ်.
ဒီးဒ့တၢ်သးဝံၣ်အကလုၢ်လၢသီတူၢ်တဖၣ်တက့ၢ်.
6 အူထီၣ်ကွဲၤတဖၣ်ဒီး တနွဲတဖၣ်ဒီး
ကိးထီၣ်လၢတၢ်သးခုဆူ ယွၤ, ပစီၤပၤတက့ၢ်.
7 မ်ပီၣ်လဲၣ်ဒီး တၢ်ဘၣ်တ့လၢအပူၤတဖၣ်သီၣ်ထီၣ်,
ဟီၣ်ခိၣ်ဒီးပှၤအိၣ်ဝဲဆိးဝဲလၢအပူၤခဲလၢာ်
သးဝံၣ်တၢ်တက့ၢ်.
8 မ်ထံကျိတဖၣ်ဒဲအစုတက့ၢ်.
မ်ကစၢၢ်ကလိတဖၣ်သးဝံၣ်တၢ်လၢ
တၢ်သူၣ်ဖှံသးညီအပူၤ, လၢယွၤအမဲာ်ညါတက့ၢ်.
9 အဂ့ၢ်ဒ်အံၤ, အဝဲဟဲဒ်သိးကပၢဟီၣ်ခိၣ်န့ၣ်လီၤ.
အဝဲကပၢပှၤဂီၢ်မုၢ်လၢဟီၣ်ခိၣ်ချၢလၢ
တၢ်စံၣ်ညီၣ်တီဒီး
တၢ်တီတၢ်လိၤအပူၤန့ၣ်လီၤ.