စံးထီၣ်ပတြၢၤ 99
1 ယွၤပၢတၢ်, မ်ပှၤကလုာ်တဖၣ်ကနိးကစုာ်တက့ၢ်.
အဝဲဆ့ၣ်နီၤပၢတၢ်လၢခ့ရူာ်တဖၣ်အဖီခိၣ်,
မ်ဟီၣ်ခိၣ်ဟူးဝးတက့ၢ်.
2 ယွၤန့ၣ်ဒိၣ်ဝဲလၢစံယိၣ်အပူၤ,
အဝဲဘၣ်တၢ်ပာ်ထီၣ်ထီအီၤလၢ
ပှၤကလုာ်ခဲလၢာ်အဖီခိၣ်လီၤ.
3 မ်ပှၤကိးဂၤစံးထီၣ်ပတြၢၤအမံၤလၢအမ့ၢ်တၢ်အဒိၣ်
ဒီးတၢ်လီၤပျံၤန့ၣ်တက့ၢ်.
4 စီၤပၤလၢအဂံၢ်ဆူၣ်ဘါဆူၣ်ဧၢ,
နအဲၣ်တၢ်လၢအတီလီၤ
နဒုးအိၣ်ထီၣ်တၢ်စံၣ်ညီၣ်တီလၢ
ကီၢ်အံၣ်စရ့လးအပူၤ,
နဟဲစိာ်တၢ်တီတၢ်လိၤဒီး တၢ်အဂ့ၤအဘၣ်လီၤ.
5 စံးထီၣ်ပတြၢၤယွၤပကစၢ်ယွၤ,
ဘူၣ်ထီၣ်ဘါထီၣ်အီၤလၢ အလီၢ်ပစိာ်အမဲာ်ညါတက့ၢ်.
6 စီၤမိၤၡ့ဒီး စီၤအၤဟရိၣ်မ့ၢ်
အပှၤလုၢ်တၢ်အခိၣ်တဖၣ်,
ဒီးစီၤၡမူၤအ့လးမ့ၢ် ပှၤတဂၤလၢ
အဘါထုကဖၣ်တၢ်ဆူအီၤလီၤ.
အဝဲသ့ၣ်ကိးထီၣ်ယွၤဒီး
အဝဲဒၣ်စံးဆၢအဝဲသ့ၣ်န့ၣ်လီၤ.
7 အဝဲဒၣ်ကတိၤတၢ်ဒီးအဝဲသ့ၣ်လၢ
တၢ်အၢၣ်အထူၣ်ပူၤန့ၣ်လီၤ.
အဝဲသ့ၣ်စူၢ်တၢ်သိၣ်တၢ်သီတဖၣ်
ဒီးတၢ်မၤလိာ်တဖၣ်လၢအဟ့ၣ်တ့ၢ်ဝဲန့ၣ်လီၤ.
8 ယွၤပကစၢ်ဧၢ, နစံးဆၢနပှၤဂီၢ်မုၢ်,
နဒုးနဲၣ်အဝဲသ့ၣ်လၢ နမ့ၢ်ကစၢ်ယွၤတဂၤလၢ
အပျၢ်တၢ်ကမၣ်
ဖဲနစံၣ်ညီၣ်အဝဲသ့ၣ်လၢ
အတၢ်ဒဲးဘးတဖၣ်အဃိဒၣ်လဲာ်န့ၣ်လီၤ.
9 စံးထီၣ်ပတြၢၤယွၤ, ပကစၢ်ယွၤ,
ဒီးဘူၣ်တၢ်ဘါတၢ်လၢအကစၢၢ်စီဆှံန့ၣ်တက့ၢ်.
အဂ့ၢ်ဒ်အံၤယွၤပကစၢ်ယွၤန့ၣ်စီဝဲဆှံဝဲလီၤ.