စံးထီၣ်ပတြၢၤ 97
1 ယွၤမ့ၢ်စီၤပၤ, မ်ဟီၣ်ခိၣ်သူၣ်ဖှံသးညီတက့ၢ်.
မ်ကီးတဖၣ်သူၣ်ခုသးခုတက့ၢ်.
2 တၢ်အၢၣ်တဖၣ်ဒီးတၢ်ခံးတၢ်နၤအိၣ်ဝးတရံးအီၤ,
အဝဲပၢတၢ်လၢတၢ်တီတၢ်လိၤဒီး
တၢ်စံၣ်ညီၣ်တီန့ၣ်လီၤ.
3 မ့ၣ်အူလဲၤတၢ်လၢအမဲာ်ညါ, ဒီးအီၣ်ဂီၤကွံာ်
အဒုၣ်အဒါအိၣ်ဝးတရံးအီၤတဖၣ်န့ၣ်လီၤ.
4 အလီဝၢ်ဒံးတဖၣ်မၤကပီၤထီၣ်ဟီၣ်ခိၣ်,
ဟီၣ်ခိၣ်ထံၣ်ဝဲဒီးဆှဲးဆှိးဝဲလီၤ.
5 ကစၢၢ်ကလိပှံၢ်လီၤဝဲဒ်ဃိးအသိးလၢယွၤအမဲာ်ညါ,
လၢဟီၣ်ခိၣ်ဒီဘ့ၣ်ညါအကစၢ်အမဲာ်ညါလီၤ.
6 မူခိၣ်ဒုးနဲၣ်အတၢ်တီတၢ်လိၤ,
ဒီးပှၤဂီၢ်မုၢ်ခဲလၢာ်ထံၣ်ဘၣ်အလၤအကပီၤလီၤ.
7 ကယဲၢ်ပှၤလၢအဘူၣ်ထီၣ်ဘါထီၣ်တၢ်ဂီၤတၢ်ဖီၣ်တဖၣ်,
ကဘၣ်တၢ်မၤမဲာ်ဆှးအီၤလီၤ.
ကယဲၢ်ကစၢ်ခဲလၢာ်
ကချံးခီၣ်တီၤလီၤလၢယွၤအမဲာ်ညါလီၤ.
8 စံယိၣ်အပှၤဂီၢ်မုၢ်သူၣ်ခုသးခုဒီး
ကီၢ်ယူဒၤအဝ့ၢ်တဖၣ်သူၣ်ဖှံသးညီ,
မ့ၢ်ဒၣ်လၢနတၢ်စံၣ်ညီၣ်တဖၣ်အဃိလီၤ, ယွၤဧၢ
9 တၢ်စိဒိၣ်ကမီၤထီယွၤဧၢ,
နမ့ၢ်ပှၤပၢဟီၣ်ခိၣ်ဒီဘ့ၣ်ညါ
ဒီးနဒိၣ်န့ၢ်ဒံးကယဲၢ်ကစၢ်ခဲလၢာ်န့ၣ်လီၤ.
10 ယွၤအဲၣ်ပှၤလၢအသးဟ့တၢ်အၢ,
အဝဲဒီဒၣ်အိၣ်ပှိၤအပှၤဂီၢ်မုၢ်အသးသမူ,
ဒီးမၤပူၤဖျဲးအဝဲသ့ၣ်လၢ
ပှၤအၢပှၤသီအတၢ်စိတၢ်ကမီၤအပူၤန့ၣ်လီၤ.
11 တၢ်ကပီၤကပီၤထီၣ်ဝဲလၢပှၤတီပှၤလိၤအဂီၢ်,
ဒီးတၢ်သူၣ်ခုသးခုလၢ
ပှၤလၢအသူၣ်တီသးလိၤအဂီၢ်န့ၣ်လီၤ.
12 သုဝဲပှၤတီပှၤလိၤသ့ၣ်ဧၢ, သူၣ်ခုသးခုလၢ
တၢ်လၢယွၤမၤတ့ၢ်အဃိန့ၣ်တက့ၢ်.
သ့ၣ်နီၣ်ထီၣ်က့ၤတၢ်လၢကစၢ်ယွၤစီဆှံမၤတ့ၢ်ဝဲ,
ဒီးစံးထီၣ်ပတြၢၤအီၤန့ၣ်တက့ၢ်.