စံးထီၣ်ပတြၢၤ 9
1 ယကစံးထီၣ်ပတြၢၤယွၤလၢယသးဒီဖျၢၣ်ညါ,
ယကစံးဘၣ်တဲဘၣ်ယဲ
နတၢ်မၤလီၤလးခဲလၢာ်လၢနမၤတ့ၢ်နဲလီၤ.
2 ယကသူၣ်ခုသးခုဒီးသူၣ်ဖှံသးညီလၢနပူၤ,
ယကသးဝံၣ်စံးထီၣ်ပတြၢၤနမံၤ,
3 တုၤနလီၣ်ဖျါထီၣ်နသးဒီးယဒုၣ်ယဒါတဖၣ်ဃၣ်ကဒါက့ၤအသးဒီး
အဝဲသ့ၣ်လီၤဃံၤဒီးသံဝဲလၢနမဲာ်ညါလီၤ.
4 အဂ့ၢ်ဒ်အံၤ, နစံၣ်ညီၣ်တီန့ၢ်တၢ်လၢယဂီၢ်လံ.
နဆ့ၣ်နီၤလၢနလီၢ်ပစိာ်အဖီခိၣ်ဒီး
စံၣ်ညီၣ်တၢ်တီတီလိၤလိၤလီၤ.
5 နသိၣ်ဃီၣ်ပှၤလၢတဘူၣ်ထီၣ်ဘါထီၣ်နၤတဖၣ်,
နမၤဟးဂီၤပှၤတတီတလိၤလံ.
နတြူာ်ကွံာ်အမံၤလီၤစိၤလီၤထီလံ.
6 ပဒုၣ်ပဒါတဖၣ်ဘၣ်တၢ်မၤဟးဂီၤကွံာ်အီၤ
လၢာ်လၢာ်ဆ့ဆ့,
ဒီးနမၤဟးဂီၤကွံာ်အဝ့ၢ်တဖၣ်
ဒီးအဝဲသ့ၣ်ဘၣ်တၢ်သးပ့ၤနီၣ်ကွံာ်အီၤလံ.
7 မ့မ့ၢ်, ယွၤမ့ၢ်စီၤပၤလီၤစိၤလီၤထီလီၤ.
ပာ်လီၤဝဲအလီၢ်ပစိာ်လၢတၢ်စံၣ်ညီၣ်အဂီၢ်လံ.
8 အဝဲပၢပှၤဟီၣ်ခိၣ်ဖိလၢတၢ်တီတၢ်လိၤ,
စံၣ်ညီၣ်ပှၤကလုာ်တဖၣ်လၢတၢ်စံၣ်ညီၣ်တီအပူၤ
9 ယွၤမ့ၢ်တိာ်တဖျၢၣ်လၢ
ပှၤဘၣ်တၢ်မၤအၢမၤနးအီၤအဂီၢ်,
ဒီးတၢ်ပူၤဖျဲးအလီၢ်လၢ
တၢ်မၤကိၢ်မၤဂီၤအကတီၢ်န့ၣ်လီၤ.
10 ဒီးပှၤလၢအသ့ၣ်ညါနမံၤန့ၣ်ကသန့ၤအသးလၢနၤလီၤ.
အဂ့ၢ်ဒ်အံၤ, ယွၤဧၢ,
နတစူးကွံာ်ညိကွံာ်ပှၤလၢအဃုနၤန့ၣ်ဘၣ်.
11 သးဝံၣ်ထီၣ်ယွၤလၢအပၢတၢ်လၢစံယိၣ်,
စံးဘၣ်တဲဘၣ်ပှၤကလုာ်ခဲလၢာ်
တၢ်လၢအမၤတ့ၢ်ဝဲန့ၣ်တက့ၢ်.
12 ကစၢ်ယွၤသ့ၣ်နီၣ်ပှၤလၢအဘၣ်တၢ်နးတၢ်ဖှီၣ်,
တသးပ့ၤနီၣ်အဝဲသ့ၣ်အတၢ်ကိးထီၣ်အီၤဘၣ်,
ဒီးစံၣ်ညီၣ်ပှၤလၢအမၤကမၣ်အဝဲသ့ၣ်လီၤ.
13 သူၣ်ကညီၤသးကညီၤယၤယွၤဧၢ,
ကွၢ်ယတၢ်နးတၢ်ဖှီၣ်လၢ
ယဒုၣ်ယဒါမၤဘၣ်ယၤန့ၣ်တက့ၢ်.
ယွၤဧၢ, ဒုးပူၤဖျဲးယၤလၢတၢ်သံ,
14 ဒ်သိးယကဆၢထၢၣ်ဘၣ်ယဲလၢ
ဝ့ၢ်ယရူၤၡလ့ၣ်အပှၤဂီၢ်မုၢ်အမဲာ်ညါ
ဒီးစံးဘၣ်အဝဲသ့ၣ်ခဲလၢာ်လၢ ယဘၣ်စံးထီၣ်ပတြၢၤ
နၤအဂ့ၢ်န့ၣ်တက့ၢ်.
ယကသူၣ်ဖှံသးညီလၢနအုၣ်က့ၤခီၣ်က့ၤယၤအဃိလီၤ.
15 ပှၤတဘူၣ်ထီၣ်ဘါထီၣ်ယွၤတဖၣ်လီၤတဲာ်နုာ်ဆူ
တၢ်ပူၤလၢအခူၣ်ဝဲလီၤ.
အခီၣ်ဘၣ်ဘျးလံလၢပှာ်ဧိၤစၤဧိၤလၢ
အပာ်လီၤခူသူၣ်ဒၣ်ဝဲန့ၣ်လီၤ.
16 ယွၤဒုးနဲၣ်အသးခီဖျိအတၢ်စံၣ်ညီၣ်အတီအလိၤတဖၣ်,
ဒီးပှၤတတီတလိၤတဖၣ်န့ၣ်,
ဘၣ်ဘျးလၢပျံၤသကွီၤလၢ
အမၤဝဲလၢအစုဒၣ်ဝဲလီၤ. ဟံၣ်ကယိၣ်စ့လၤ
17 ကယဲၢ်ပှၤကလုာ်တဖၣ်လၢအသးပ့ၤနီၣ်ကစၢ်ယွၤခဲလၢာ်,
ပှၤတတီတလိၤန့ၣ်ကဘၣ်က့ၤဆူပျုၤပူၤလီၤ.
18 အဂ့ၢ်ဒ်အံၤ, ပှၤအဖှီၣ်အယာ်န့ၣ်
တၢ်တသးပ့ၤနီၣ်အီၤတဘိယူၢ်ဃီဘၣ်.
ဒီးပှၤဖှီၣ်ဖိယာ်ဖိအတၢ်မုၢ်လၢ်န့ၣ်
တဘၣ်တၢ်မၤဟးဂီၤအီၤလီၤစိၤလီၤထီဘၣ်.
19 ယွၤဧၢ, ဂဲၤဆၢထၢၣ်တက့ၢ်.
မ်ပှၤကညီအသုတခီၣ်ဆၢနၤတဂ့ၤ.
မ်ပှၤတဘူၣ်ထီၣ်ဘါထီၣ်နၤတဖၣ်
ဘၣ်တၢ်စံၣ်ညီၣ်အီၤလၢနမဲာ်ညါတက့ၢ်.
20 ယွၤဧၢ, ပာ်တၢ်ပျံၤတၢ်ဖုးလၢအလိၤ,
မ်ပှၤကလုာ်တဖၣ်သ့ၣ်ညါလၢ
အမ့ၢ်ဒၣ်ပှၤကညီလၢအသံသ့န့ၣ်တက့ၢ်. စ့လၤ