စံးထီၣ်ပတြၢၤ 10
1 ယွၤဧၢ, နအိၣ်လၢအယံၤမ့ၢ်အဘၣ်မနုၤလဲၣ်.
ဘၣ်မနုၤလၢနပာ်တဒၢနသးဖဲလၢပအိၣ်လၢတၢ်ကိၢ်တၢ်ဂီၤအကတီၢ် န့ၣ်လဲၣ်.
2 ပှၤတတီတလိၤပာ်ကဖိအသးဒီး
မၤနးမၤဖှီၣ်ပှၤဖှီၣ်ဖိယာ်ဖိ,
ဒီးဖီၣ်န့ၢ်အီၤလၢအဝဲသ့ၣ်အတၢ်ကူၣ်အၢ
အပျံၤသကွီၤအပူၤန့ၣ်လီၤ.
3 အဂ့ၢ်ဒ်အံၤ, ပှၤတတီတလိၤန့ၣ်ပာ်ကဖိအသးလၢအသးအတၢ်ဆၢ န့ၢ်အအၢအသီတဖၣ်အဃိ,
ဒီးပှၤလၢအသူၣ်လီသးကွံတၢ်အါန့ၣ်,
ဆိၣ်အၢတၢ်ဒီးညိကွံာ်ယွၤလီၤ.
4 လၢအတၢ်ပာ်အသးထီၣ်ထီအပူၤန့ၣ်ပှၤတတီတလိၤ, အသးတအိၣ်ဃုယွၤဘၣ်.
လၢအတၢ်ဆိကမိၣ်ခဲလၢာ်အပူၤန့ၣ်,
5 အကျဲတဖၣ်ဘီၣ်ထီၣ်ညီထီၣ်ကိးဆၢကိးကတီၢ်ဒဲးလီၤ.
ကစၢ်ယွၤအတၢ်စံၣ်ညီၣ်တဖၣ်န့ၣ်
နၢ်ပၢၢ်ဝဲတသ့ဘၣ်,
ဒီးကတိၤဒုၣ်ဒွဲၣ်အဒုၣ်အဒါခဲလၢာ်န့ၣ်လီၤ.
6 အဝဲသ့ၣ်စံးဝဲလၢအသးကံၢ်ပူၤ, “ယတဟူးတဝးဘၣ်.
အစိၤစိၤအဃၣ်ဃၣ်န့ၣ်
ယတဘၣ်ဘၣ်တၢ်ကီတၢ်ခဲဘၣ်.”
7 အထးခိၣ်ပှဲၤဒီးတၢ်ဆိၣ်အၢ, တၢ်လီတၢ်ဝ့ၤဒီးတၢ်ကတိၤပျံၤကတိၤဖုးတၢ်လီၤ.
တၢ်ကတိၤမၤဟးဂီၤတၢ်ဒီးတၢ်ကတိၤအအၢအသီန့ၣ်
8 ဆ့ၣ်နီၤခိးခူသူၣ်တၢ်လၢသဝီတဖၣ်အပူၤဒီး
လၢတၢ်အိၣ်ခူသူၣ်အလီၢ်န့ၣ်, မၤသံပှၤလၢ
အတၢ်ကမၣ်တအိၣ်ဘၣ်တဖၣ်န့ၣ်လီၤ.
လၢတၢ်ခူသူၣ်ခူလံာ်အပူၤကွၢ်ဟုၣ်ကွၢ်စုာ်တၢ်ဒ်သိး ကဖီၣ်န့ၢ်ပှၤလၢ
ပှၤမၤစၢၤအီၤတအိၣ်ဘၣ်တဖၣ်,
9 အိၣ်ခိးဝဲလၢတၢ်ခူသူၣ်အပူၤဒ်
ခ့ယုၢ်လၢတပှီာ်အကျါအသိး,
အိၣ်ခိးဝဲဒ်သိးကဖီၣ်န့ၢ်ပှၤဖှီၣ်ဖိယာ်ဖိ
ဒီးဖီၣ်န့ၢ်အဝဲသ့ၣ်လၢအပျံၤသကွီၤအပူၤ ဒီးထုးတြူာ်ကွံာ်အီၤန့ၣ်လီၤ.
10 ပှၤလၢပှၤမၤစၢၤအီၤတအိၣ်ဘၣ်န့ၣ်
ဘၣ်တၢ်မၤလီၤသဘှံးအီၤ,
ဒီးလီၤဃံၤဝဲလၢအဝဲအတၢ်ဂံၢ်ဆူၣ်အဖီလာ်န့ၣ်လီၤ.
11 အဝဲသ့ၣ်စံးဝဲလၢအသးကံၢ်ပူၤ, “ကစၢ်ယွၤသးပ့ၤနီၣ်လံတၢ်လံ.
ပာ်တဒၢလံအမဲာ်လံ. တထံၣ်ယၤနီတစုဘၣ်.”
12 ယွၤဧၢ, ဂဲၤဆၢထၢၣ်တက့ၢ်. ကစၢ်ယွၤဧၢ,
ယူာ်ထီၣ်နစုတက့ၢ်.
သးပ့ၤနီၣ်ပှၤလၢအဘၣ်တၢ်မၤနးမၤဖှီၣ်အီၤ
န့ၣ်တဂ့ၤ.
13 ဘၣ်မနုၤပှၤတတီတလိၤကတိၤတရီတပါကစၢ်ယွၤ,
ဒီးစံးဝဲလၢအသးကံၢ်ပူၤ,
“ကစၢ်ယွၤတစံၣ်ညီၣ်ယၤဘၣ်” န့ၣ်လဲၣ်.
14 ဘၣ်ဆၣ်နထံၣ်နဲလီၤ. နပာ်သူၣ်ပာ်သးလၢ
တၢ်ကီတၢ်ခဲဒီးတၢ်မၤကိၢ်မၤဂီၤ
ဒ်သိးနကဟ့ၣ်ကၣ်တၢ်လၢနစုအဂီၢ်န့ၣ်လီၤ.
ပှၤလၢပှၤမၤစၢၤအီၤတအိၣ်ဘၣ်န့ၣ်
ဟ့ၣ်လီၤအသးလၢနစုပူၤ,
နမ့ၢ်နဲပှၤမၤစၢၤပှၤလၢ
အလိၣ်ဘၣ်တၢ်မၤစၢၤထီဘိန့ၣ်လီၤ.
15 မၤကၢ်ပှၤတတီတလိၤဒီးပှၤမၤတၢ်အၢဖိတဖၣ်အစု,
စံၣ်ညီၣ်အဝဲသ့ၣ်လၢ တၢ်ကမၣ်လၢ
မၤတ့ၢ်ဝဲအဃိ, တုၤလၢအတမၤလၢၤဝဲနီတစုတက့ၢ်.
16 ယွၤမ့ၢ်စီၤပၤအစိၤစိၤအဃၣ်ဃၣ်လီၤ.
ပှၤလၢအဘူၣ်ထီၣ်ဘါထီၣ် ကစၢ်အဂၤတဖၣ်န့ၣ်
ကလီၤမၢ်ကွံာ်လၢအကီၢ်ပူၤလီၤ.
17 ယွၤဧၢ, နကဒိကနၣ်ပှၤလၢ
အဆီၣ်လီၤအသးအတၢ်ထုကဖၣ်န့ၣ်လီၤ.
နကမၤဆူၣ်ထီၣ်အသးအဂံၢ်အဘါလီၤ.
18 နကဒိကနၣ်ပှၤလၢအဘၣ်တၢ်ဆီၣ်ဘံၣ်ဆီၣ်ဘၢအီၤ,
ပှၤဖိၣ်ဃဲဖိသ့ၣ်တဖၣ်အတၢ်ကိးပသူထီၣ်လီၤ.
19 နကစံၣ်ညီၣ်တီတၢ်လၢအဝဲသ့ၣ်အဂီၢ်
ဒ်သိးပှၤဟီၣ်ခိၣ်ဖိအသုတမၤ
ကိၢ်မၤဂီၤလၢၤအီၤနီတစုတဂ့ၤအဂီၢ်န့ၣ်လီၤ.