စံးထီၣ်ပတြၢၤ 78
1 ယပှၤဂီၢ်မုၢ်သ့ၣ်ဧၢ, ကနၣ်ယတၢ်သိၣ်လိသီလိ,
ဒီးဒိကနၣ်ယထးခိၣ်အတၢ်ကတိၤန့ၣ်တက့ၢ်.
2 ယကအဲးထီၣ်ယထးခိၣ်လၢတၢ်ကူၣ်သ့အတၢ်ကတိၤ,
ဒီးယကစံၣ်တဲၤတဲလီၤတၢ်ကတိၤခူသူၣ်လၢပျၢၤတဖၣ်,
3 လၢတၢ်ဂ့ၢ်တဖၣ်လၢပသ့ၣ်ညါဒီးနၢ်ဟူတ့ၢ်,
လၢပပၢ်သ့ၣ်တဖၣ်တဲဘၣ်တ့ၢ်ပှၤန့ၣ်လီၤ.
4 ပတပာ်တဒၢတၢ်သ့ၣ်တဖၣ်န့ၣ်လၢပဖိတဖၣ်ဘၣ်.
ပကတဲဘၣ်ပှၤလၢခံတစိၤ
လၢယွၤအတၢ်မၤအဒိၣ်အမုၢ်တဖၣ် ဒီးအစိအကမီၤ,
ဒီးအတၢ်မၤလီၤလးတဖၣ်လၢအမၤတ့ၢ်ဝဲန့ၣ်လီၤ.
5 အဝဲဟ့ၣ်လီၤတၢ်သိၣ်တၢ်သီတဖၣ်ဆူ
အံၣ်စရ့လးအပှၤဂီၢ်မုၢ်
ဒီးတၢ်မၤလိာ်တဖၣ်ဆူ
ယၤကိာ်အစၢၤအသွဲၣ်န့ၣ်လီၤ.
အဝဲသိၣ်လိတ့ၢ်လံပပၢ်သ့ၣ်တဖၣ်လၢ
ကသိၣ်လိယွၤအတၢ်သိၣ်တၢ်သီ
ဆူအဖိအလံၤတဖၣ်,
6 ဒ်သိးပှၤလၢခံတစိၤကမၤလိတၢ်သ့ၣ်တဖၣ်န့ၣ်,
ဒီးမၤကဒီးတဆီအဝဲသ့ၣ်ကတဲက့ၤ
အဖိအလံၤတဖၣ်န့ၣ်လီၤ.
7 လၢကျဲဒ်အံၤ,
အဝဲသ့ၣ်စ့ၢ်ကီးကသန့ၤအသးလၢကစၢ်ယွၤအပူၤ,
ဒီးတသးပ့ၤနီၣ်တၢ်လၢယွၤမၤတ့ၢ်ဝဲတဖၣ်န့ၣ်ဘၣ်.
မ့မ့ၢ်အဝဲသ့ၣ်ကစူၢ်ယွၤအတၢ်မၤလိာ်တဖၣ် ထီဘိန့ၣ်လီၤ.
8 အဝဲသ့ၣ်တမ့ၢ်ကလီၤဂာ်ဒီးအပၢ်သ့ၣ်တဖၣ်
လၢအပူထီၣ်တၢ်ဒီးအတၢ်ဒိကနၣ်တအိၣ်,
ပှၤတစိၤလၢအတၢ်နာ်ယွၤတဂၢၢ်တကျၢၤ,
ဒီးတအိၣ်လၢၤလၢတၢ်သးတီဒီးယွၤန့ၣ်ဘၣ်လီၤ.
9 ပှၤအ့ဖရဲၣ်ဖိလၢအအိၣ်ဒီးစုကဝဲၤ
လၢအမ့ၢ်ချံၣ်တဖၣ်ဒီးပျၢ်တဖၣ်န့ၣ်
ဃ့ၢ်ကွံာ်ဝဲလၢတၢ်ဒုးသုးအမုၢ်တနံၤန့ၣ်လီၤ.
10 အဝဲသ့ၣ်တတိၢ်န့ၢ်ကစၢ်ယွၤ အတၢ်အၢၣ်လီၤအီလီၤဘၣ်,
မ့မ့ၢ်သမၢဝဲလၢကလဲၤတၢ်ဒ်
ယွၤအတၢ်သိၣ်တၢ်သီအသိးန့ၣ်လီၤ.
11 အဝဲသ့ၣ်သးပ့ၤနီၣ်တၢ်လၢယွၤမၤတ့ၢ်ဝဲ
ဒီးတၢ်လီၤလးတဖၣ်လၢ
အဒုးနဲၣ်တ့ၢ်အဝဲသ့ၣ်န့ၣ်လီၤ.
12 လၢအပၢ်တဖၣ်အမဲာ်ညါန့ၣ်, ကစၢ်ယွၤမၤတၢ်လီၤလးတဖၣ်
လၢကီၢ်အဲၤကူပတူးအပူၤ,
ဒီးစိၤဧၣ်အပျီပူၤန့ၣ်လီၤ.
13 အဝဲဒၣ်မၤသ့ၣ်ဖးပီၣ်လဲၣ်, ဒီးဒုးလဲၤခီဂာ်အဝဲသ့ၣ်,
ဒီးပာ်ဆၢထၢၣ်ထံဒ်တၢ်ဒူၣ်အသိးန့ၣ်လီၤ.
14 လၢမုၢ်ဆါယွၤဆှၢအဝဲသ့ၣ်လၢတၢ်အၢၣ်,
ဒီးသီတနၤကျၢၤလၢမ့ၣ်အူအတၢ်ကပီၤန့ၣ်လီၤ.
15 အဝဲဒၣ်မၤသ့ၣ်ဖးလၢၢ်တဖၣ်လၢပှၢ်မုၢ်ကနၢ
ဒီးဒုးအီအဝဲသ့ၣ်လၢထံလၢလၢပှဲၤပှဲၤ
ဒ်လၢထံယိာ်ပူၤအသိးန့ၣ်လီၤ.
16 ဒီးအဝဲဒၣ်ဒုးဟဲထီၣ်ထံထီၣ်ပၢၢ်လၢလၢၢ်ပူၤ,
ဒီးဒုးယွၤလီၤထံဒ်ထံကျိတကျိအသိးန့ၣ်လီၤ.
17 ဘၣ်ဆၣ်အဝဲသ့ၣ်မၤကမၣ်တၢ်ထီဒါကစၢ်ယွၤအါထီၣ်
ဒီးပူထီၣ်တၢ်ထီကတၢၢ်တဂၤလၢ
မဲးမုၢ်ခိၣ်အပူၤန့ၣ်လီၤ.
18 အဝဲသ့ၣ်မၤကွၢ်ကစၢ်ယွၤလၢအသးကံၢ်ပူၤ
ခီဖျိဃ့တၢ်အီၣ်လၢအသးကွံဝဲဒၣ်န့ၣ်လီၤ.
19 အဝဲသ့ၣ်ကတိၤတၢ်ထီဒါကစၢ်ယွၤ, ဒီးစံးဝဲ,
“ကစၢ်ယွၤကတဲာ်ကတီၤစီၢ်နီၤခိၣ်လၢ
ပှၢ်မုၢ်ကနၢဘၣ်ကသ့ဧါ,
20 အဝဲတီၢ်လၢၢ်တဖျၢၣ်,
ဒီးထံဖျိးထီၣ်ဒီးယွၤလီၤလုၣ်ဘၢတၢ်လံ.
ဘၣ်ဆၣ်ဟ့ၣ်လီၤကိၣ်မ့တမ့ၢ်,
ကတဲာ်ကတီၤတၢ်ညၣ်လၢအပှၤဂီၢ်မုၢ်အဂီၢ်
21 လၢတၢ်န့ၣ်အဃိ,
တုၤကစၢ်ယွၤနၢ်ဟူဝဲဒၣ်န့ၣ်ဒီးအဝဲပှဲၤဒီးတၢ်သးထီၣ်,
ထီဒါယၤကိာ်ဒ် မ့ၣ်အူအီၣ်တၢ်အသိး
ဒီးအသးကဲၤထီၣ်ထီဒါအံၣ်စရ့လးလီၤ.
22 အဂ့ၢ်ဒ်အံၤ,
အဝဲသ့ၣ်တအိၣ်ဒီးတၢ်နာ်လၢယွၤအပူၤနီတစဲးဘၣ်,
ဒီးတနာ်ယွၤအတၢ်အုၣ်က့ၤခီၣ်က့ၤ
အစိအကမီၤန့ၣ်ဘၣ်.
23 အန့ၣ်ဒၣ်လဲာ်ယွၤမၤလိာ်တၢ်အၢၣ်တဖၣ်လၢထးခီ
ဒီးအိးထီၣ်မူခိၣ်အတြဲၤ,
24 ဒီးဒုးဟဲစူၤမၤနၤလၢအဖီခိၣ်လၢကအီၣ်ဝဲ,
ဒီးဟ့ၣ်လီၤအဝဲသ့ၣ်မူခိၣ်အဘုအဟုတဖၣ်လီၤ.
25 ဒီးအဝဲသ့ၣ်
အီၣ်ကလူးတဖၣ်အတၢ်အီၣ်,
ဒီးကစၢ်ယွၤဟ့ၣ်လီၤအဝဲသ့ၣ်တၢ်အီၣ်
လၢလၢပှဲၤပှဲၤန့ၣ်လီၤ.
26 အဝဲဒုးအူကလံၤမုၢ်ထီၣ်လၢမူခိၣ်
ဒီးလၢအစိအကမီၤန့ၣ်
ဒုးအူထီၣ်ကလံၤလၢကလံၤထံးန့ၣ်လီၤ.
27 အဝဲဒုးဟဲစူၤလီၤတၢ်ညၣ်လၢအဝဲသ့ၣ်အဖီခိၣ်
ဒ်ဟီၣ်ခိၣ်အကမူၣ်အသိး,
ဒီးထိၣ်အိၣ်ဒီးအဒံးဆ့,
ဒ်ပီၣ်လဲၣ်အမဲးအသိးန့ၣ်လီၤ.
28 အဝဲဒုးဟဲလီၤတၢ်သ့ၣ်တဖၣ်န့ၣ်
လၢအသူၣ်ဒဲအလီၢ်အသးကံၢ်ပူၤ,
ဝးတရံးအဝဲသ့ၣ်
အတၢ်အိၣ်တၢ်ဆိးအလီၢ်န့ၣ်လီၤ.
29 အဝဲသ့ၣ်အီၣ်ဝဲ, ဒီးအီဝဲဘျဲးအီၣ်ဘျဲးအီန့ၣ်လီၤ.
အဂ့ၢ်ဒ်အံၤကစၢ်ယွၤဟ့ၣ်လီၤအဝဲသ့ၣ်လၢ
တၢ်လၢအသးကွံဝဲဒၣ်န့ၣ်လီၤ.
30 ဘၣ်ဆၣ်အဝဲသ့ၣ်အသးတမံဒံးဘၣ်
လၢအတၢ်သးကွံအဃိအီၣ်ဒံးဝဲ,
31 ဒီးတုၤကစၢ်ယွၤအသးထီၣ်အဝဲသ့ၣ်န့ၣ်
ဒီးမၤသံကွံာ်အပှၤဆူၣ်ကတၢၢ်တဖၣ်,
အံၣ်စရ့လးအပှၤသးစၢ်လၢ
32 လၢတၢ်အံၤတဖၣ်ခဲလၢာ်အဃိဒၣ်လဲာ်
အဝဲသ့ၣ်မၤဒံးတၢ်ဒဲးဘး,
ဒီးလၢယွၤမၤလီၤလးတဖၣ်အဃိဒၣ်လဲာ်
အဝဲသ့ၣ်တနာ်ဘၣ်အီၤဘၣ်.
33 မၤသးဒ်န့ၣ်ဒီး,
အဝဲမၤလၢာ်ကွံာ်အဝဲသ့ၣ်အမုၢ်နံၤတဖၣ်
လၢတၢ်ကလီကလီအပူၤ,
ဒီးအနံၣ်အလါတဖၣ်လၢတၢ်ကိၢ်တၢ်ဂီၤအပူၤလီၤ.
34 တုၤယွၤမၤသံအဝဲသ့ၣ်တနီၤဒီးအဝဲသ့ၣ်ဃုအီၤ,
ဒီးပီၢ်ယၢ်လီၤက့ၤအသးဒီးဃုယွၤလၢ
တၢ်သူၣ်ဆူၣ်သးဆူၣ်အပူၤလီၤ.
35 ဒီးအဝဲသ့ၣ်, သ့ၣ်နီၣ်ထီၣ်က့ၤလၢကစၢ်ယွၤမ့ၢ်အလၢၢ်,
ဒီးတၢ်ထီကတၢၢ်ကစၢ်တဂၤန့ၣ်မ့ၢ် ကစၢ်လၢအပှ့ၤက့ၤအီၤန့ၣ်လီၤ.
36 ဘၣ်ဆၣ်ဒီးအဝဲသ့ၣ်လီန့ၢ်အီၤလၢအထးခိၣ်,
ဒီးကတိၤကဘျံးကဘျၣ်တၢ်ဒီးအီၤလၢအပျ့ၤန့ၣ်လီၤ.
37 အဝဲသ့ၣ်အသးတအိၣ်ဂၢၢ်ကျၢၤဘၣ်ဒီးအီၤဘၣ်,
ဒီးတတီဒီးအတၢ်အၢၣ်လီၤဒီးယွၤန့ၣ်ဘၣ်.
38 ဘၣ်ဆၣ်ကစၢ်ယွၤသူၣ်ကညီၤသးကညီၤအပှၤဂီၢ်မုၢ်လီၤ.
အဝဲပျၢ်ကွံာ်အဝဲသ့ၣ်အတၢ်ဒဲးဘး
ဒီးအဝဲဘိးဃၣ်ကွံာ်အတၢ်သးထီၣ်အါစုအါဘျီ
ဒီးဘိးဃၣ်ကွံာ်အတၢ်သးဒိၣ်လီၤ.
ဒီးတထိၣ်ဂဲၤထီၣ်အတၢ်သးကဲၤထီၣ်ဘၣ်.
39 အဝဲသ့ၣ်နီၣ်ထီၣ်က့ၤဝဲလၢ
အဝဲသ့ၣ်တဖၣ်န့ၣ်မ့ၢ်တၢ်ဖံးတၢ်ညၣ်,
လီၤဂာ်ဒီးကလံၤလၢအလဲၤပူၤကွံာ်ဒီး
40 အဝဲသ့ၣ်တဖၣ်န့ၣ်ပူထီၣ်အီၤ
ဒီးမၤဆါအသးလၢပှၢ်မုၢ်ကနၢအပူၤပှဲၤဘျီလဲၣ်.
41 အဝဲသ့ၣ်လ့ပစီကစၢ်ယွၤတဘျီဝံၤတဘျီဒီး
မၤသးဒိၣ်ထီၣ်အံၣ်စရ့လးအကစၢ်ယွၤစီဆှံ တဂၤန့ၣ်လီၤ.
42 အဝဲသ့ၣ်သးပ့ၤနီၣ်ကွံာ်အတၢ်စိတၢ်ကမီၤ,
ဒီးမုၢ်တနံၤလၢအဝဲဒၣ်အုၣ်က့ၤခီၣ်က့ၤအဝဲသ့ၣ်
လၢအဒုၣ်အဒါတဖၣ်အစုပူၤ,
43 ဒီးအမၤတၢ်အဒိၣ်ဒီးတၢ်ပနီၣ်လီၤလးတဖၣ်
လၢကီၢ်အဲၤကူပတူးအပူၤဒီး
လၢစိၤဧၣ်အပျီပူၤန့ၣ်လီၤ.
44 အဝဲဒုးကဲထီၣ်ကဒါထံကျိတဖၣ်ဆူတၢ်သွံၣ်
ဒီးပှၤအဲၣ်ကူပတူးဖိတဖၣ်
တအိၣ်ဒီးထံလၢကအီဝဲနီတစဲးဘၣ်.
45 အဝဲဆှၢလီၤသၣ်ဘုလါတဖၣ်လၢ အဝဲသ့ၣ်အကျါဒ်သိးကမၤဆါဒီး မၤနးမၤဖှီၣ်အီၤ
ဒီးဒ့ၣ်တဖၣ်လၢ
အမၤဟးဂီၤကွံာ်အဝဲသ့ၣ်အထံအကီၢ်န့ၣ်လီၤ.
46 အဝဲဆှၢလီၤဒွဲၣ်တဖၣ်လၢ ကအီၣ်ကွံာ်အတၢ်မုၢ်
တၢ်ဘိတဖၣ်ဒီး မၤဟးဂီၤအစံၣ်ပျီတဖၣ်န့ၣ်လီၤ.
47 အဝဲမၤသံကွံာ်အဝဲသ့ၣ်အစပံးမုၢ်တဖၣ်လၢသူၣ်
ဒီးအချၢၣ်ဒၢတဖၣ်လၢ နါဝာ်န့ၣ်လီၤ.
48 အဝဲမၤသံကွံာ်အဝဲသ့ၣ်အဂီၤဘုၣ်ဂီၤဖံးလၢသူၣ်ဒီး
အသိအဖုအဂီၢ်တဖၣ်လၢ လီဝၢ်ဒံးန့ၣ်လီၤ.
49 အဝဲဒုးလီၤဘၣ်တၢ်ကိၢ်တၢ်ဂီၤဖးဒိၣ်လၢ
အဝဲသ့ၣ်အလိၤခီဖျိလူလီၤအတၢ်သးဒိၣ်ဒီး
အတၢ်သးကဲၤထီၣ်လၢ အဟဲဒ်တၢ်သံအကလူးတဖၣ်အသိးန့ၣ်လီၤ.
50 အဝဲတြီဃာ်အတၢ်သးဒိၣ်
ဒီးတပျၢ်ဖျဲးအဝဲသ့ၣ်အသးသမူဘၣ်
မ့မ့ၢ်မၤသံအဝဲသ့ၣ်လၢတၢ်သံသတြိာ်န့ၣ်လီၤ.
51 အဝဲမၤသံကယဲၢ်ဖိခွါဝဲၢ်ကိတဖၣ်လၢ
ကီၢ်အဲၤကူပတူးအဟံၣ်ဖိဃီဖိအကျါန့ၣ်လီၤ.
52 အန့ၣ်ဒီး အဝဲဆှၢထီၣ်အပှၤဂီၢ်မုၢ် ဒ်ပှၤကွၢ်သိတဂၤအသိး
ဒီးဆှၢခီဖျိအီၤလၢ ပှၢ်မုၢ်ကနၢန့ၣ်လီၤ.
53 အဝဲဆှၢအဝဲသ့ၣ်လၢတၢ်ပူၤဖျဲးအပူၤဒ်သိး
အသုတပျံၤတၢ်တဂ့ၤ, အဂီၢ်န့ၣ်လီၤ.
မ့မ့ၢ်အဒုၣ်အဒါတဖၣ်န့ၣ်
ပီၣ်လဲၣ်လုၣ်ဘၢကွံာ်အီၤလီၤ.
54 ဒီးအဝဲဒုးဟဲအဝဲသ့ၣ်ဆူအလီၢ်စီဆှံ,
ဆူကစၢၢ်တဖၣ်လၢအစုထွဲမၤနၢၤတ့ၢ်တၢ်န့ၣ်လီၤ.
55 အဝဲဟီထီၣ်ကွံာ်ပှၤကလုာ်တဖၣ်လၢအပှၤဂီၢ်မုၢ် အမဲာ်ညါ
ဒီးနီၤလီၤအထံအကီၢ်ဆူ အပှၤဂီၢ်မုၢ်ဒ် တၢ်န့ၢ်သါအသိးလၢအဝဲသ့ၣ်အဂီၢ်,
ဒီးဒုးအိၣ်ဒုးဆိးအံၣ်စရ့လးအဒူၣ်တဖၣ်
လၢအဝဲသ့ၣ်အဟံၣ်ပူၤန့ၣ်လီၤ.
56 နာ်သက့အဝဲသ့ၣ်လ့ပစီ
ဒီးပူထီၣ်တၢ်ထီကတၢၢ်ကစၢ်ယွၤ,
ဒီးတတိၢ်န့ၢ်အတၢ်မၤလိာ်ဘၣ်.
57 မ့မ့ၢ်အဝဲသ့ၣ်ပူထီၣ်လီထီၣ်တၢ်ဒီး အသးတတီဘၣ်ဒ်
အမိၢ်ပၢ်ဖံဖုလၢပျၢၤတဖၣ်အသိးဒီး
တၢ်နာ်န့ၢ်အီၤတသ့ဘၣ်ဒ်သိးဒၣ်ပျၢ်လၢ အက့ၣ်အဘိန့ၣ်လီၤ.
58 အဂ့ၢ်ဒ်အံၤ,
အဝဲသ့ၣ်မၤသးထီၣ်ယွၤလၢပှၤတဘူၣ်ထီၣ်ဘါထီၣ် ယွၤအတၢ်လီၢ်ထီၣ်ထီ
ယွၤအတၢ်ဘူၣ်တၢ်ဘါအလီၢ်တဖၣ်,
ဒီးထိၣ်ဂဲၤအတၢ်သးဒိၣ်လၢ အတၢ်ဂီၤတၢ်ဖီၣ်တဖၣ်န့ၣ်လီၤ.
59 ကစၢ်ယွၤအသးထီၣ်ဝဲဖဲအထံၣ်တၢ်အံၤန့ၣ်လီၤ.
လၢတၢ်န့ၣ်အဃိအဝဲပာ်တ့ၢ်ကွံာ်
အပှၤဂီၢ်မုၢ်လၢာ်လၢာ်ဆ့ဆ့န့ၣ်လီၤ.
60 အဝဲလဲၤသဒၣ်ကွံာ်
အတၢ်အိၣ်တၢ်ဆိးအလီၢ်လၢၡံလိၤ,
ဒဲလၢအဝဲအိၣ်ဝဲလၢပှၤကညီအကျါန့ၣ်လီၤ.
61 အဝဲပျဲပဒုၣ်ပဒါစိာ်ကွံာ်တၢ်အၢၣ်လီၤအီလီၤ
အတလါစီဆှံ,
အစိကမီၤဒီးအလၤကပီၤအပနီၣ်န့ၣ်လီၤ.
62 အဝဲအသးထီၣ်အပှၤဂီၢ်မုၢ်ဒၣ်ဝဲ
ဒီးပျဲအဝဲသ့ၣ်ဘၣ်တၢ်မၤသံအီၤလၢ
အဒုၣ်အဒါတဖၣ်န့ၣ်လီၤ.
63 ပှၤဖိၣ်သၣ်ခွါတဖၣ်ဘၣ်တၢ်မၤသံကွံာ်အီၤ
လၢတၢ်ဒုးအပူၤ,
ဒီးပိာ်မုၣ်သးစၢ်သ့ၣ်တဖၣ်ကဖျီအသးဒီး
ပှၤတအိၣ်နီတဂၤလၢၤဘၣ်.
64 အပှၤလုၢ်တၢ်အခိၣ်တဖၣ်ဘၣ်တၢ်မၤသံအီၤလၢနး
ဒီးအမုၣ်ကမဲတဖၣ်, တၢ်တပျဲအဟီၣ်တၢ်ယၢၤတၢ်ဘၣ်.
65 အန့ၣ်ဒီးယွၤဖုသံနီၣ်ထီၣ်ဒ်ပှၤလၢအမံအသိး,
ဒီးဒ်ပှၤဂံၢ်ဆူၣ်ဘါဆူၣ်လၢအကိးပသူထီၣ်လၢ
စပံးထံအဃိအသိးန့ၣ်လီၤ.
66 အဝဲနီၣ်ကဒါက့ၤအဒုၣ်အဒါတဖၣ်
လၢတၢ်မဲာ်ဆှးအတၢ်ဃၣ်ကွံာ်လီၤထူလီၤယိာ်န့ၣ်လီၤ.
67 ဘၣ်ဆၣ်ဒီးအဝဲညိကွံာ်စီၤယိၤသးအစၢၤအသွဲၣ်တဖၣ်
ဒီးတဃုထၢဘၣ်အ့ဖရဲၣ်အဒူၣ်ဘၣ်.
68 အခိၣ်တလိာ်အဝဲဃုထၢဝဲယူဒၤအဒူၣ်,
ဒီးကစၢၢ်စံယိၣ်လၢအအဲၣ်ဝဲဒိၣ်မးန့ၣ်လီၤ.
69 ဖဲန့ၣ်အဝဲဘှီထီၣ်အတၢ်လုၢ်ဟံၣ်
ဒ်အဟံၣ်လၢမူခိၣ်အသိး,
မၤကျၢၤအီၤဒ်ဟီၣ်ခိၣ်လၢ အအိၣ်ဂၢၢ်ကျၢၤ အစိၤစိၤဃၣ်ဃၣ်န့ၣ်လီၤ.
70 အဝဲဃုထၢအခ့အပှၤစီၤဒၤဝံး,
ဒီးဟံးန့ၢ်အီၤလၢသိကရၢၢ်အပူၤ,
71 ဖဲအကွၢ်ထွဲအသိအဖုအဂီၢ်တဖၣ်
ဒီးဒုးကဲထီၣ်အီၤလၢ အံၣ်စရ့လးအစီၤပၤ,
ကစၢ်ယွၤအပှၤဂီၢ်မုၢ်အပှၤကွၢ်သိန့ၣ်လီၤ.
72 ဒီးစီၤဒၤဝံးကွၢ်ထွဲအဝဲသ့ၣ်လၢအသးဒီဖျၢၣ်ညါ
ဒီးဆှၢအဝဲသ့ၣ်လၢတၢ်ကူၣ်ဘၣ်ကူၣ်သ့အပူၤလီၤ.