စံးထီၣ်ပတြၢၤ 77
1 ယကိးပသူထီၣ်တၢ်ဆူကစၢ်ယွၤအအိၣ်,
ယကိးပသူထီၣ်ဒီးအဝဲဒၣ်ဒိကနၣ်ယၤလီၤ.
2 လၢယတၢ်ကိၢ်တၢ်ဂီၤအမုၢ်နံၤန့ၣ်, ယဃုယွၤ,
ယစုယူာ်ထီၣ်အသးလၢမုၢ်နၤ
လၢတၢ်တလီၤဘှံးလီၤတီၤဘၣ်အပူၤ,
ဘၣ်ဆၣ်တၢ်မၤမုာ်ထီၣ်က့ၤယၤတသ့ဘၣ်.
3 တုၤယဆိကမိၣ်ထီၣ်ကစၢ်ယွၤန့ၣ်ဒီး, ယဟီၣ်ယယၢၤယဲ,
4 နဟံးဃာ်ယမဲာ်ဖံးလၢတၢ်ဆိးသီအပူၤလီၤ.
ယကိၢ်ယဂီၤတၢ်ဒိၣ်မးတုၤဒၣ်လဲာ်
ယကတိၤတၢ်တသ့လၢၤဘၣ်န့ၣ်လီၤ.
5 ယဆိကမိၣ်တၢ်လၢမုၢ်နံၤလၢပျၢၤတဖၣ်,
ယသ့ၣ်နီၣ်ထီၣ်က့ၤနံၣ်ဧိၤလါဧိၤလၢပျၢၤန့ၣ်လီၤ.
6 ယသ့ၣ်နီၣ်ထီၣ်က့ၤယတၢ်သးဝံၣ်လၢမုၢ်နၤလၢယသး,
ယဆိကမိၣ်ထီၣ်တၢ်ဒီး တၢ်အံၤမ့ၢ်တၢ်လၢ
ယသံကွၢ်လီၤက့ၤယသး,
7 “မ့ၢ်ယွၤကညိကွံာ်ပှၤထီဘိဧါ.
မ့ၢ်အဝဲတဘၣ်သူၣ်ဘၣ်သးက့ၤလၢၤပှၤ
နီတဘျီဘၣ်န့ၣ်ဧါ.
8 ဆိကတီၢ်တ့ၢ်လံအတၢ်အဲၣ်ပှၤန့ၣ်ဧါ.
မ့ၢ်အတၢ်အၢၣ်လီၤတဖၣ်တအိၣ်နီတဘျီ
လၢၤဘၣ်န့ၣ်ဧါ.
9 မ့ၢ်ကစၢ်ယွၤသးပ့ၤနီၣ်တ့ၢ်လံလၢကသးကညီၤတၢ်န့ၣ်ဧါ.
မ့ၢ်အတၢ်သးထီၣ်ဟံးန့ၢ်
အတၢ်သးကညီၤအလီၢ်န့ၣ်လံဧါ. စ့လၤ
10 အန့ၣ်ဒီးယစံး, “တၢ်လၢအမၤဘၣ်ဒိဆါယၤအဒိၣ်ကတၢၢ် မ့ၢ်ဝဲ,
ကစၢ်ယွၤအစိကမီၤတအိၣ်
လၢၤဘၣ်န့ၣ်လီၤ.”
11 ကစၢ်ယွၤဧၢ, ယကသ့ၣ်နီၣ်ထီၣ်က့ၤနတၢ်မၤဖးဒိၣ်တဖၣ်
ဒီးယကစံးဘၣ်တဲဘၣ်တၢ်မၤလီၤလးတဖၣ်လၢ
နမၤတ့ၢ်လၢအပူၤကွံာ်န့ၣ်လီၤ.
12 ယကဆိကမိၣ်ထီၣ်က့ၤကယဲၢ်တၢ်လၢနမၤတ့ၢ်ခဲလၢာ်
ဒီးနစိနကမီၤအတၢ်ဖံးတၢ်မၤတဖၣ်န့ၣ်လီၤ.
13 ကစၢ်ယွၤဧၢ, နကျဲခဲလၢာ်န့ၣ်စီဆှံဝဲလီၤ.
မ့ၢ်ကစၢ်လၢအဒိၣ်ဝဲဒ်ပကစၢ်အသိးန့ၣ်အိၣ်ဝဲဧါ.
14 နမ့ၢ်ကစၢ်ယွၤလၢအမၤတၢ်လီၤလးတဖၣ်,
ဒီးဒုးနဲၣ်ဖျါနစိနကမီၤလၢ ပှၤကလုာ်တဖၣ်အကျါန့ၣ်လီၤ.
15 လၢနစိနကမီၤန့ၣ်နအုၣ်က့ၤခီၣ်က့ၤနပှၤဂီၢ်မုၢ်,
စီၤယၤကိာ်ဒီးစီၤယိၤသးအစၢၤအသွဲၣ်တဖၣ်လီၤ. စ့လၤ
16 ကစၢ်ယွၤဧၢ, တုၤမ့ၢ်ထံတဖၣ်ထံၣ်နၤဒီးအဝဲသ့ၣ်ပျံၤတၢ်
ဒီးပီၣ်လဲၣ်အတၢ်ယိာ်တဖၣ်ဟူးဝးဝဲလီၤ.
17 တၢ်အၢၣ်တဖၣ်လူလီၤထံ, မူကပိာ်လိၤဒုးသီၣ်လီ
ဒီးလီဝၢ်ဒံးကပြ့ၢ်ထီၣ်လၢ တၢ်လီၢ်ကိးကပၤဒဲးလီၤ.
18 နလီသီၣ်အိၣ်ဝဲလၢကလံၤသဝံးအပူၤ,
လီဝၢ်ဒံးန့ၣ်မၤကပီၤထီၣ်ဟီၣ်ခိၣ်
ဒီးဟီၣ်ခိၣ်ဆှဲးဆှိးဒီးဟူးဝးဝဲလီၤ.
19 နလဲၤခီဂာ်လပီတဖၣ်
ဒီးနခီဂာ်ပီၣ်လဲၣ်လၢအယိာ်ဝဲ,
ဘၣ်ဆၣ်နခီၣ်လီၢ်တဖၣ်တၢ်ထံၣ်န့ၢ်အီၤတသ့ဘၣ်.
20 နဆှၢနပှၤဂီၢ်မုၢ်ဒ်သိတဖုအသိး
လၢစီၤမိၤၡ့ဒီးစီၤအၤဟရိၣ်အစုန့ၣ်လီၤ.