စံးထီၣ်ပတြၢၤ 53
(စံး.၁၄)
1 ပှၤဟးဂီၤဖိစံးလၢအသးကံၢ်ပူၤ
“ကစၢ်ယွၤတအိၣ်ဘၣ်န့ၣ်လီၤ.”
အဝဲသ့ၣ်ခဲလၢာ်ဟးဂီၤဝဲ
ဒီးမၤတ့ၢ်တၢ်လီၤပျံၤတဖၣ်ဒီး
ပှၤလၢအမၤတၢ်လၢအဘၣ်န့ၣ်တအိၣ်နီတဂၤဘၣ်.
2 ကစၢ်ယွၤကွၢ်လီၤတၢ်လၢမူခိၣ်လၢပှၤကညီဖိအဖီခိၣ်
ဒ်သိးအကထံၣ်ဝဲပှၤလၢအအိၣ်ဒီး
တၢ်ကူၣ်ဘၣ်ကူၣ်သ့,
ဒီးပှၤလၢအဃုယွၤအိၣ်တအိၣ်လဲၣ်န့ၣ်လီၤ.
3 ဘၣ်ဆၣ်အဝဲသ့ၣ်လဲၤကမၣ်လံခဲလၢာ်လံ.
အဝဲသ့ၣ်ဟးဂီၤလံတပူၤဃီလံ.
ပှၤလၢအမၤတၢ်ဂ့ၤတအိၣ်ဘၣ်လၢ အဝဲသ့ၣ်အကျါ နီတဂၤဘၣ်.
4 ကစၢ်ယွၤသံကွၢ်ဝဲ, “မ့ၢ်အဝဲသ့ၣ်တသ့ၣ်ညါဘၣ်ဧါ.
အဝဲသ့ၣ်အိၣ်မူလၢ တၢ်ဟုၣ်ယပှၤဂီၢ်မုၢ်အပူၤ,
ဒီးတဘါထုကဖၣ်
5 ဘၣ်ဆၣ်အဝဲသ့ၣ်အိၣ်လၢတၢ်ပျံၤဖးဒိၣ်
လၢအတမၤအသးဒ်အံၤနီတဘျီဘၣ်အပူၤန့ၣ်လီၤ.
အဂ့ၢ်ဒ်အံၤ, ကစၢ်ယွၤကမၤလီၤပြံလီၤပြါ
အပှၤဂီၢ်မုၢ်အဒုၣ်အဒါတဖၣ်အဃံအကွဲလီၤ.
အဝဲသ့ၣ်တဖၣ်ကဘၣ်တၢ်မၤမဲာ်ဆှးအီၤအဂ့ၢ်မ့ၢ်လၢ
ကစၢ်ယွၤညိကွံာ်တ့ၢ်လံအဝဲသ့ၣ်အဃိန့ၣ်လီၤ.
6 မ်တၢ်မၤပူၤဖျဲးအလီၢ်လၢအံၣ်စရ့လးအဂီၢ်အံၤ
ကဟဲလၢစံယိၣ်တက့ၢ်.
တုၤကစၢ်ယွၤဒုးဟဲက့ၤအပှၤဂီၢ်မုၢ်လၢ
တၢ်စိာ်မၢကဲကုၢ်အလီၢ်န့ၣ်ဒီး
ယၤကိာ်ကသူၣ်ဖှံသးညီဒီး
အံၣ်စရ့လးကသူၣ်ခုသးခုဝဲဒၣ်န့ၣ်လီၤ.