စံးထီၣ်ပတြၢၤ 46
1 ကစၢ်ယွၤမ့ၢ်ပတၢ်ပူၤဖျဲးအလီၢ်ဒီးပဂံၢ်ပဘါလီၤ.
လၢတၢ်ကိၢ်တၢ်ဂီၤအကတီၢ်န့ၣ်
အဝဲအိၣ်ကတဲာ်ကတီၤအသးထီဘိလၢ
ကမၤစၢၤပှၤန့ၣ်လီၤ.
2 မၤသးဒ်န့ၣ်ဒီးဟီၣ်ခိၣ်မ့ၢ်လဲလိာ်အသးဘၣ်ဆၣ်,
ကစၢၢ်ကလိတဖၣ်မ့ၢ်ဟူးဝးဝဲလၢ
ပီၣ်လဲၣ်အသးကံၢ်ပူၤဘၣ်ဆၣ်,
3 ထံတဖၣ်မ့ၢ်သီၣ်ထီၣ်ဒီးအသဘှဲထီၣ်ဘၣ်ဆၣ်,
ကစၢၢ်ကလိတဖၣ်မ့ၢ်ဟူးဝးဝဲလၢအတၢ်သီၣ်ဘၣ်ဆၣ် ပတပျံၤဘၣ်တၢ်ဘၣ်. စ့လၤ
4 ထံကျိလၢအအိၣ်ဒီးအထံဖးဒ့ဖိသ့ၣ်တဖၣ်န့ၣ်
မၤသးခုကစၢ်ယွၤအဝ့ၢ်,
တၢ်ထီကတၢၢ်တဂၤ
အတၢ်အိၣ်တၢ်ဆိးအလီၢ်စီဆှံန့ၣ်လီၤ.
5 ကစၢ်ယွၤအိၣ်လၢအသးကံၢ်ပူၤ,
ဒီးတဘၣ်တၢ်သုးကွံာ်အီၤဘၣ်.
ကစၢ်ယွၤကမၤစၢၤအီၤဖဲမုၢ်ဆ့ၣ်ဝါထီၣ် အကတီၢ်န့ၣ်လီၤ.
6 ပှၤကလုာ်တဖၣ်သီၣ်ထီၣ်ရုၢ်ရုၢ်,
ဒီးဘီမုၢ်တဖၣ်ဟူးဝးဝဲလီၤ.
ကစၢ်ယွၤထုထီၣ်ကလုာ်,
7 ယွၤသ့တၢ်လၢာ်ကစၢ်အိၣ်ဒီးပှၤလီၤ.
စီၤယၤကိာ်အကစၢ်ယွၤအံၤ
မ့ၢ်ပတၢ်ပူၤဖျဲးအလီၢ်လီၤ. စ့လၤ
8 ဟဲဒီးကွၢ်တၢ်လၢယွၤမၤတဖၣ်န့ၣ်တက့ၢ်.
ကွၢ်တၢ်လီၤလးသ့ၣ်တဖၣ်လၢအမၤတ့ၢ်ဝဲလၢ
ဟီၣ်ခိၣ်ချၢန့ၣ်တက့ၢ်.
9 အဝဲဆိကတီၢ်တၢ်ဒုးတၢ်ယၤသ့ၣ်တဖၣ်လၢ
ဟီၣ်ခိၣ်ချၢ,
ဘိးကၢ်ကွံာ်ပျၢ်သ့ၣ်တဖၣ်,
မၤဟးဂီၤကွံာ်ဘီသ့ၣ်တဖၣ်ဒီးဒွဲၣ်အူထီၣ်ကွံာ်
လ့ၣ်ကဟၣ်သ့ၣ်တဖၣ်လၢမ့ၣ်အူန့ၣ်လီၤ.
10 အဝဲစံးဝဲ, “ဆိကတီၢ်တၢ်ဒုးတၢ်ယၤ,
ဒီးသ့ၣ်ညါလၢယမ့ၢ်ကစၢ်ယွၤ,
တၢ်စိတၢ်ကမီၤအဒိၣ်ကတၢၢ်
လၢပှၤကလုာ်တဖၣ်အကျါ,
တၢ်စိတၢ်ကမီၤအဒိၣ်ကတၢၢ်လၢ
ဟီၣ်ခိၣ်ချၢန့ၣ်တက့ၢ်.”
11 ယွၤသ့တၢ်လၢာ်ကစၢ်အိၣ်ဒီးပှၤလီၤ.
စီၤယၤကိာ်အကစၢ်ယွၤအံၤ
မ့ၢ်ပတၢ်ပူၤဖျဲးအလီၢ်လီၤ. စ့လၤ