စံးထီၣ်ပတြၢၤ 45
1 တၢ်ကတိၤဃံလၤတဖၣ်မၤပှဲၤယတၢ်ဆိကမိၣ်
ဖဲယကွဲးတၢ်သးဝံၣ်အံၤလၢစီၤပၤအဂီၢ်န့ၣ်လီၤ.
ဒ်ပှၤကွဲးလံာ်သ့အထိၣ်ဒံးအသိး
ယပျ့ၤချ့လၢထါအဂီၢ်န့ၣ်လီၤ.
2 လၢပှၤပိာ်ခွါတဖၣ်အကျါနမ့ၢ်ပှၤလၢအဃံလၤကတၢၢ်,
နမ့ၢ်ပှၤစံးကတိၤတၢ်သ့န့ၣ်လီၤ.
ကစၢ်ယွၤဆိၣ်ဂ့ၤတ့ၢ်နၤထီဘိန့ၣ်လီၤ.
3 စီၤပၤလၢအစိကမီၤဒိၣ်ဧၢ, သိးထီၣ်နနး,
နမ့ၢ်ပှၤလၢအအိၣ်ဒီးနတၢ်လၤတၢ်ကပီၤ
4 ဒိးထီၣ်နကသ့ၣ်လၢ တၢ်ကဟုကညီၢ်အပူၤ
ဆူတၢ်မၤနၢၤ, လၢတၢ်ဒီသဒၢတၢ်
မ့ၢ်တၢ်တီဒီးတၢ်စံၣ်ညီၣ်တီအဂီၢ်တက့ၢ်.
ပျဲနစုထွဲဒုးနဲၣ်နၤ
တၢ်ဖံးတၢ်မၤလီၤလးတဖၣ်န့ၣ်တက့ၢ်.
5 နပျၢ်တဖၣ်လၢအကနၣ်အ့ၣ်န့ၣ်ဆဲးဖျိ
စီၤပၤအဒုၣ်အဒါတဖၣ်အသးကံၢ်ပူၤ,
ဒီးပှၤကလုာ်တဖၣ်လီၤဃံၤလၢနခီၣ်ဖီလာ်န့ၣ်လီၤ.
6 ဘီမုၢ်လၢကစၢ်ယွၤဟ့ၣ်တ့ၢ်နၤအံၤ
ကအိၣ်ဝဲအစိၤစိၤအဃၣ်ဃၣ်န့ၣ်လီၤ.
နပၢနပှၤဂီၢ်မုၢ်လၢတၢ်တီတၢ်လိၤအပူၤ,
7 နအဲၣ်တၢ်လၢအမ့ၢ်ဝဲတီဝဲ
ဒီးသးဟ့တၢ်အၢတၢ်သီန့ၣ်လီၤ.
လၢတၢ်န့ၣ်အဃိကစၢ်ယွၤ, နကစၢ်ယွၤ, ဃုထၢတ့ၢ်နၤ
ဒီးလူလီၤတၢ်သးဖှံလၢနလိၤ
အါန့ၢ်စီၤပၤအဂၤတက့ၢ်န့ၣ်လီၤ.
8 နကူနသိးတဖၣ်နၢမူဝဲဒီးမူရၣ်,
အကၠီၣ်ဒီးကဒါနါန့ၣ်လီၤ.
သီတူၢ်တနၢ်တဖၣ်မၤသးခုနၤလၢ
နီကဆီမဲအပူၤန့ၣ်လီၤ.
9 လၢပိာ်မုၣ်တဖၣ်လၢ အအိၣ်လၢနနီပူၤအကျါန့ၣ်
စီၤပၤအဖိမုၣ်တဖၣ်အိၣ်ဝဲ
ဒီးနီၢ်ပၤမုၣ်ဆၢထၢၣ်လၢနလီၢ်ပစိာ်စုထွဲတကပၤ,
သိးဝဲတၢ်ကယၢကယဲတဖၣ်လၢ တၢ်မၤအီၤဒီး
10 ဖိမုၣ်ဧၢ, ဒိကနၣ်, ဆိကမိၣ်ဒီးဒိးနနၢ်,
သးပ့ၤနီၣ်နပှၤဂီၢ်မုၢ်ဒီးနပၢ်အဟံၣ်တက့ၢ်.
11 စီၤပၤကအဲၣ်ဘၣ်နၤ
လၢနတၢ်ဃံတၢ်လၤအဃိန့ၣ်လီၤ.
အဝဲမ့ၢ်နကစၢ်, ဒီးနကဘၣ်ဒိကနၣ်အီၤလီၤ.
12 ပှၤထါယၢၣ်ဖိတဖၣ်ကဟဲစိာ်န့ၢ်နၤတၢ်ဟ့ၣ်တဖၣ်,
ဒီးပှၤထူးပှၤတီၤသ့ၣ်တဖၣ်ကဂုာ်ကျဲးစၢးလၢ
ကဒိးန့ၢ်ဘၣ်နတၢ်ဘၣ်သူၣ်ဘၣ်သးန့ၣ်လီၤ.
13 စီၤပၤအဖိမုၣ်အိၣ်လၢနီပူၤန့ၣ်, ဃံလၤဝဲဆံးဒိၣ်လဲၣ်.
အဆ့ကၤဘၣ်တၢ်မၤအီၤလၢလုၣ်ထူန့ၣ်လီၤ.
14 အဝဲဘၣ်တၢ်လဲၤကိးအီၤဆူ စီၤပၤအအိၣ်,
ကူသိးဝဲဒီး အဆ့ကၤအိၣ်ဒီး အလွဲၢ်ဃံလၤတဖၣ်
ဒီးမုၣ်လိၣ်ဘိလၢအထီၣ်ဆှၢအီၤသ့ၣ်တဖၣ်
ပိာ်ထီၣ်အခံန့ၣ်လီၤ.
ဒီးအဝဲသ့ၣ်စ့ၢ်ကီးဘၣ်တၢ်လဲၤကိးအီၤဆူစီၤပၤ
အအိၣ်န့ၣ်လီၤ.
15 အဝဲသ့ၣ်ဟဲနုာ်ဆူစီၤပၤအနီပူၤအိၣ်ဒီး
တၢ်သူၣ်ခုသးခုဒီးတၢ်သူၣ်ဖှံသးညီန့ၣ်လီၤ.
16 နဲဒၣ်ယစီၤပၤဧၢ, နကအိၣ်ဒီးဖိခွါအါဂၤ
လၢကထီၣ်က့ၤနပၢ်လၢပျၢၤတဖၣ်အလီၢ်
ဒ်စီၤပၤတဖၣ်အသိး, ဒီးနကဒုးကဲထီၣ်အဝဲသ့ၣ်လၢ ပှၤတဖၣ်လၢအပၢဘၣ်ဟီၣ်ခိၣ်ဒီဘ့ၣ်ညါန့ၣ်လီၤ.
17 ယကပၢၤဃာ်နမံၤဒ်သိးကဘၣ်တၢ်သ့ၣ်နီၣ်
မၤလၤကပီၤအီၤလၢစိၤခဲလၢာ်အပူၤန့ၣ်လီၤ.
မၤသးဒ်န့ၣ်ဒီးပှၤဂီၢ်မုၢ်ကစံးထီၣ်ပတြၢၤနၤ
အစိၤစိၤအဃၣ်ဃၣ်လီၤ.