စံးထီၣ်ပတြၢၤ 44
1 ကစၢ်ယွၤဧၢ, ပနၢ်ဟူတ့ၢ်လၢပနၢ်,
ပပၢ်သ့ၣ်တဖၣ်တဲတ့ၢ်ပှၤ
တၢ်ဖံးတၢ်မၤလၢနမၤတ့ၢ်လၢအမုၢ်နံၤတဖၣ်,
မုၢ်နံၤလၢပျၢၤန့ၣ်လီၤ.
2 လၢနစုဒၣ်နဲနနီၣ်ဟးထီၣ်ကွံာ်ပှၤတဘူၣ် ထီၣ်ဘါထီၣ်နၤသ့ၣ်တဖၣ်,
ဒီးပာ်လီၤနပှၤဂီၢ်မုၢ်လၢ အဝဲသ့ၣ်အကီၢ်ပူၤဒ်လဲၣ်,
နစံၣ်ညီၣ်ဃၣ်ပှၤကလုာ်ဂၤတဖၣ်
ဒီးဒုးဘီၣ်ထီၣ်ညီထီၣ်နပှၤဂီၢ်မုၢ်ဒၣ်နဲဒ်လဲၣ်န့ၣ်လီၤ.
3 တမ့ၢ်လၢအနးဒၣ်ဝဲအဃိဒီးအဝဲသ့ၣ်မၤန့ၢ်ထံကီၢ်,
တမ့ၢ်လၢအစုဒုၣ်စုတီၤဟ့ၣ်အီၤတၢ်မၤနၢၤန့ၣ်ဘၣ်.
မ့ၢ်ဒၣ်လၢနစုထွဲဒီးနစုဒုၣ်စုတီၤ,
ဒီးနမဲာ်အတၢ်ကပီၤအဃိန့ၣ်လီၤ.
အဂ့ၢ်ဒ်အံၤနဘၣ်သူၣ်ဘၣ်သးလၢအဝဲသ့ၣ်န့ၣ်လီၤ.
4 နမ့ၢ်ယစီၤပၤဒီးယကစၢ်ယွၤ,
နဟ့ၣ်တၢ်မၤနၢၤလၢ
နအပှၤဂီၢ်မုၢ်အဂီၢ်န့ၣ်လီၤ.
5 ဒီးလၢနတၢ်စိတၢ်ကမီၤန့ၣ်,
ပမၤနၢၤပဒုၣ်ပဒါတဖၣ်န့ၣ်လီၤ.
6 ယတနာ်န့ၢ်ယချံၣ် မ့တမ့ၢ်ယနးလၢ
ကမၤပူၤဖျဲးယၤန့ၣ်ဘၣ်.
7 ဘၣ်ဆၣ်နမၤပူၤဖျဲးတ့ၢ်ပှၤလၢပဒုၣ်ပဒါသ့ၣ်တဖၣ်
ဒီးမၤနၢၤတ့ၢ်ပှၤလၢအသးဟ့ပှၤန့ၣ်လီၤ.
8 ပကစံးထီၣ်ပတြၢၤနၤထီဘိ
ဒီးစံးဘျုးစံးဖှိၣ်နၤလီၤစိၤလီၤထီန့ၣ်လီၤ. စ့လၤ
9 ဘၣ်ဆၣ်ခဲအံၤနညိကွံာ်ပှၤဒီး
ပျဲပဘၣ်တၢ်မၤနၢၤတ့ၢ်ပှၤန့ၣ်လီၤ.
နတလဲၤတၢ်ဒီးပပှၤသုးမုၢ်သံၣ်ဘိ
သ့ၣ်တဖၣ်န့ၣ်လၢၤဘၣ်.
10 နဒုးဃ့ၢ်ကွံာ်ပှၤလၢပဒုၣ်ပဒါသ့ၣ်တဖၣ်အမဲာ်ညါ
ဒီးတၢ်လၢအမ့ၢ်ပတၢ်သ့ၣ်တဖၣ်န့ၣ်
အဝဲသ့ၣ်ဟံးန့ၢ်ကွံာ်လၢအဂီၢ်န့ၣ်လီၤ.
11 နပျဲတၢ်မၤသံအီၣ်ပှၤဒ်သိတဖၣ်အသိး,
ဒီးမၤလီၤပြံလီၤပြါတ့ၢ်ပှၤလၢ
ပှၤကလုာ်သ့ၣ်တဖၣ်အကျါန့ၣ်လီၤ.
12 နဆါကွံာ်နပှၤဂီၢ်မုၢ်ဒ်
တၢ်အလုၢ်အပှ့ၤတအိၣ်ဘၣ်အသိး,
နတဃ့တၢ်အပှ့ၤထဲတစဲးဧိၤလၢအဂီၢ်ဘၣ်.
13 ပှၤအိၣ်လၢပဃၢၤတဖၣ်ထံၣ်ဝဲတၢ်လၢနမၤတ့ၢ်ပှၤ,
ဒီးအဝဲသ့ၣ်ဒုၣ်ဒွဲၣ်ပှၤဒီးနံၤဘၣ်ဖၣ်လဲပှၤန့ၣ်လီၤ.
14 နဒုးကဲထီၣ်ပှၤလၢတၢ်လီၤသးဘၣ်အၢ
လၢပှၤကလုာ်တဖၣ်အကျါ,
အဝဲသ့ၣ်ကျၢၢ်ကျာ်အခိၣ်လၢ
တၢ်တပာ်ကဲဘၣ်ပှၤအပူၤန့ၣ်လီၤ.
15 ထီဘိယအိၣ်ယဲလၢတၢ်မဲာ်ဆှးအပူၤ,
ယဘၣ်တၢ်လုၣ်ဘၢယၤလၢတၢ်မဲာ်ဆှး,
16 မ့ၢ်လၢယနၢ်ဟူဘၣ်ယဒုၣ်ယဒါ
ဒီးပှၤလၢအသးဟ့ယၤသ့ၣ်တဖၣ်
အတၢ်ကတိၤဒုၣ်ဒွဲၣ်ယၤဒီးမၤတရီတပါယၤ အဃိန့ၣ်လီၤ.
17 ကယဲၢ်တၢ်ခဲလၢာ်ဟဲဘၣ်ပှၤ
ဖဲပတသးပ့ၤနီၣ်နၤအခါဒၣ်လဲာ်,
မ့တမ့ၢ်ဖဲပတမၤဟးဂီၤဘၣ်
တၢ်အၢၣ်လီၤအီလီၤလၢ
နမၤတ့ၢ်ဒီးပှၤဒၣ်လဲာ်န့ၣ်လီၤ.
18 ပသးတဂုၤက့ၤဆူအလီၢ်ခံ
ဒီးပခီၣ်ထွဲတၢ်တဖၣ်တဟးဖးဖျိးကွံာ် လၢနကျဲဘၣ်,
19 ဒ်သိးနကမၤဟးဂီၤကွံာ်ပှၤလၢ
ထွံၣ်ဟီၣ်ခိၣ်တဖၣ်အလီၢ်ပူၤ,
ဒီးလုၣ်ဘၢတ့ၢ်ပှၤလၢတၢ်သံအတၢ်ခံးယိာ်န့ၣ်ဘၣ်.
20 ပမ့ၢ်ဆိကတီၢ်တ့ၢ်ပတၢ်ဘူၣ်ထီၣ်ဘါထီၣ်ကစၢ်ယွၤ
ဒီးထုကဖၣ်ထီၣ်တၢ်ဆူပှၤတခီဘီမုၢ်အယွၤန့ၣ်ဒီး,
21 နကထံၣ်တ့ၢ်လံတၢ်အံၤသပှၢ်တၢၢ်,
မ့ၢ်လၢနသ့ၣ်ညါပတၢ်ဆိကမိၣ်ခူသူၣ်
သ့ၣ်တဖၣ်အဃိန့ၣ်လီၤ.
22 ဘၣ်ဆၣ်လၢနဃိပဘၣ်တၢ်မၤသံပှၤ
ကိးဆၢကိးကတီၢ်ဒဲး,
ဒီးပဘၣ်တၢ်ပာ်ပှၤဒ်သိလၢ
အကဘၣ်တၢ်မၤသံအီၤအသိးန့ၣ်လီၤ.
23 ယွၤဧၢ, ဖုသံနီၣ်ထီၣ်တက့ၢ်, ဘၣ်မနုၤလၢနမံန့ၣ်လဲၣ်.
ဂဲၤထၢၣ်တက့ၢ်. တဘၣ်စူးကွံာ်ပှၤထီဘိန့ၣ်တဂ့ၤ.
24 ဘၣ်မနုၤလၢနပာ်သဒၢနသးလၢပှၤန့ၣ်လဲၣ်.
တဘၣ်သးပ့ၤနီၣ်ပတၢ်နးတၢ်ဖှီၣ်ဒီး
25 ပလီၤဃံၤအီထီလာ်ဆူဟီၣ်ခိၣ်လိၤ,
ပမံနီၤလၢတၢ်မၤနၢၤတ့ၢ်ပှၤအပူၤ
လၢဖၣ်ဆါအကျါန့ၣ်လီၤ
26 ဟဲလၢနကမၤစၢၤပှၤအဂီၢ်,
ဒီးမၤပူၤမၤဖျဲးပှၤလၢနတၢ်အဲၣ်လၢ
အအိၣ်စံၣ်အိၣ်ကျၢၤအဃိန့ၣ်တက့ၢ်.