စံးထီၣ်ပတြၢၤ 38
1 ယွၤဧၢ, သိၣ်ဃီၣ်ယၤလၢ
နတၢ်သးထီၣ်အပူၤန့ၣ်တဂ့ၤ.
ဒီးသိၣ်က့ၤသီက့ၤယၤလၢနတၢ်သးဒိၣ်အပူၤန့ၣ်တဂ့ၤ.
2 နပျၢ်တဖၣ်ဆဲးဘၣ်ယၤ
ဒီးနစုဒူၣ်မၤလီၤဃံၤတ့ၢ်လံယၤလံ.
3 လၢနတၢ်သးထီၣ်အဃိ,
ယအိၣ်လၢတၢ်ဆါနးနးကလဲာ်အပူၤ,
ယနီၢ်ကစၢ်ဒီတဂၤညါအိၣ်ဒီးတၢ်ဆူးတၢ်ဆါလၢ
ယတၢ်ဒဲးဘးတဖၣ်အဃိန့ၣ်လီၤ.
4 ယတၢ်ဒဲးဘးလုၣ်ဘၢကွံာ်ယၤ
ဒီးမ့ၢ်တၢ်ဝံတၢ်ယိးလၢအဃၢကဲၣ်ဆိးလၢ
5 ယပူၤလီၢ်တဖၣ်နၢအုၣ်ဒီးဒၢဖံဝဲလၢ
ယတၢ်တသ့ၣ်ညါယွၤအဃိန့ၣ်လီၤ.
6 ယသကူးလီၤယသးလၢာ်လၢာ်ဆ့ဆ့
ဒီးယထိၣ်လီၤပှီၤယသး,
ယအိၣ်လၢတၢ်မိၣ်တၢ်မးအပူၤသ့သ့တနံၤလီၤ.
7 ယယီၢ်ဒ့ကိၢ်အူလၢတၢ်ဆါအဃိ
ဒီးယအိၣ်လၢတၢ်ဆါနးနးကလဲာ်အပူၤလီၤ.
8 ယဂံၢ်ယဘါလၢာ်ကွံာ်ဒီးယဘၣ်တၢ်ဆီၣ်တံၢ်သနံးယၤ,
ယကအုကစွါယဲလၢ
ယသးဘၣ်တၢ်ကိၢ်တၢ်ဂီၤအဃိလီၤ.
9 ယွၤဧၢ, နသ့ၣ်ညါယတၢ်ဆၢန့ၢ်ဘၣ်ခဲလၢာ်,
ဒီးနနၢ်ဟူယတၢ်ကအုကစွါခဲလၢာ်န့ၣ်လီၤ.
10 ယသူၣ်စံၣ်ယသးစံၣ်, ယဂံၢ်ယဘါလၢာ်ကွံာ်
ဒီးယမဲာ်ချံအတၢ်ကပီၤစ့ၢ်ကီး
လီၤမၢ်ကွံာ်န့ၢ်ယၤလံ.
11 ယတံၤသကိးတဖၣ်ဒီးပှၤအိၣ်လၢယဃၢၤတဖၣ်
အိၣ်ယံၤဒီးယၤ
မ့ၢ်လၢယပူၤလီၢ်တဖၣ်အဃိ,
ယဟံၣ်ဖိဃီဖိသ့ၣ်တဖၣ်ဒၣ်လဲာ်
အိၣ်ယံၤဒီးယၤလီၤ.
12 ပှၤလၢအအဲၣ်ဒိးမၤသံယၤပာ်လီၤပျံၤသကွီၤလၢယဂီၢ်,
ပှၤလၢအအဲၣ်ဒိးမၤဆါယၤကတိၤပျံၤကတိၤဖုးတၢ်လၢကမၤဟး ဂီၤယၤလီၤ.
အဝဲသ့ၣ်ကူၣ်တၢ်အၢထီဒါယၤသ့သ့တနံၤလီၤ.
13 ဒီးယလီၤဂာ်ဒီးပှၤနၢ်တအၢတဂၤ,
ယတနၢ်ဟူတၢ်ဘၣ်.
ယလီၤဂာ်ဒီးပှၤတအုၣ်တဂၤလၢ
အတအဲးထီၣ်အထးခိၣ်ဘၣ်န့ၣ်လီၤ.
14 မ့ၢ်လီၤ. ယလီၤဂာ်ဒီးပှၤလၢအတနၢ်ဟူတၢ်
ဒီးတကတိၤဆၢတၢ်အၢလၢ
15 ဘၣ်ဆၣ်ယွၤဧၢ, ယမုၢ်လၢ်တၢ်လၢနၤလီၤ.
ဒီးနဲဒၣ်ယွၤယကစၢ်ယွၤဧၢ,
နကစံးဆၢတၢ်လၢယဂီၢ်လီၤ.
16 အဂ့ၢ်ဒ်အံၤ, ယဃ့တ့ၢ်ယဲ,
“တဘၣ်ပျဲအဝဲသ့ၣ်သးခုလၢယဖီခိၣ်တဂ့ၤ,
တုၤယခီၣ်လီၤတလံာ်ဒီး
တဘၣ်ပျဲအဝဲသ့ၣ်ပာ်ကဖၢလၢအသးလၢယဖီခိၣ်တဂ့ၤ.”
17 အဂ့ၢ်ဒ်အံၤ, ဘူးလၢယကလီၤဃံၤ,
ဒီးယတၢ်ဆူးတၢ်ဆါန့ၣ်အိၣ်ဒီးယၤတထံၣ်ဃီလီၤ.
18 ယတဲလီၤကျဲၤလီၤယတၢ်ကမၣ်,
ဒီးယသးအုးလၢယတၢ်ဒဲးဘးအဃိလီၤ.
19 ယဒုၣ်ယဒါသ့ၣ်တဖၣ်အိၣ်ဆူၣ်အိၣ်ချ့
ဒီးအဂံၢ်ဆူၣ်ဘါဆူၣ်ဝဲ
ဒီးလၢတၢ်ဂ့ၢ်တအိၣ်နီတမံၤဘၣ်အပူၤန့ၣ်,
ပှၤလၢအသးဟ့ယၤအိၣ်အါဂၤလီၤ.
20 ပှၤလၢအဟ့ၣ်ဆၢက့ၤယၤ
တၢ်အၢလၢတၢ်ဂ့ၤအဂီၢ်တဖၣ်န့ၣ်
ထီဒါယၤ, မ့ၢ်လၢယဂုာ်ကျဲးစၢးမၤတၢ်ဂ့ၤအဃိလီၤ.
21 ယွၤဧၢ, ညိကွံာ်ယၤတဂ့ၤ.
အိၣ်ယံၤဒီးယၤတဂ့ၤယကစၢ်ယွၤဧၢ.
22 မၤချ့ချ့လၢနကဟဲမၤစၢၤယၤအဂီၢ်တက့ၢ်.
တၢ်အုၣ်က့ၤခီၣ်က့ၤယၤယကစၢ်ဧၢ.