စံးထီၣ်ပတြၢၤ 39
1 ယစံး, “ယကပလီၢ်ပဒီယသးလၢတၢ်လၢယမၤ
ဒီးယသုတမၤတၢ်ဒဲးဘးလၢ
ယပျ့ၤအဃိန့ၣ်တဂ့ၤ.
ယကကးတံာ်ယထးခိၣ်
ဖဲပှၤတတီတလိၤတဖၣ်အိၣ်ဘူးဒီးယၤန့ၣ်လီၤ.”
2 ယအိၣ်တအုၣ်, ယတကတိၤတၢ်နီတဘီဘၣ်.
ယအိၣ်ဘှီၣ်ကလာ်ဘၣ်ဆၣ်အဘျုးတအိၣ်ဘၣ်.
ယတၢ်နးတၢ်ဖှီၣ်ဒိၣ်ထီၣ်အါထီၣ်တခီန့ၣ်လီၤ.
3 မ့ၣ်အူကဲၤကဖးလၢယသးပူၤ,
ဒီးဖဲယဆိကမိၣ်ထီၣ်တၢ်ဒီး
မ့ၣ်အူကဲၤကပျီၤထီၣ်ဝဲန့ၣ်လီၤ.
တုၤနုၤတစုယကတိၤထီၣ်ဖျဲးတၢ်လီၤ.
4 “ယွၤဧၢ, ဒုးသ့ၣ်ညါယၤ, ယကအိၣ်မူဆံးယံာ်လဲၣ်.
ယကသံအခါဖဲလဲၣ်.
ဒီးယတၢ်အိၣ်မူကကတၢၢ်အခါဖဲလဲၣ်.”
5 ကွၢ်ကွၢ်, နဟ့ၣ်တ့ၢ်ယၤတၢ်အိၣ်မူဖုၣ်ကိာ်
ဒီးလၢနမဲာ်ညါန့ၣ်,
ယတၢ်အိၣ်မူအကတီၢ်တမ့ၢ်တၢ်နီတမံၤဘၣ်.
ပှၤကိးဂၤဒဲးအတၢ်အိၣ်မူန့ၣ်
မ့ၢ်ဒၣ်တၢ်သါတဘီဧိၤန့ၣ်လီၤ. စ့လၤ
6 ပှၤကညီလဲၤဝ့ၤဝီၤတၢ်ဒ်တၢ်ကဒုအသိးလီၤ.
မၤတံာ်တာ်အသးလၢတၢ်ကလီကလီအဃိလီၤ.
ပှၤကညီပာ်ဖှိၣ်တၢ်ထူးတၢ်တီၤဒီးမတၤ ကမၤန့ၢ်အီၤလဲၣ်န့ၣ်တသ့ၣ်ညါဝဲဘၣ်. စ့လၤ
7 ကစၢ်ဧၢ, ခဲကနံၣ်အံၤယမုၢ်လၢ်တၢ်မနုၤသ့လဲၣ်.
ယတၢ်မုၢ်လၢ်အိၣ်လၢနပူၤလီၤ.
8 မၤပူၤဖျဲးယၤလၢယတၢ်ကမၣ်ခဲလၢာ်န့ၣ်တက့ၢ်.
တဘၣ်ပျဲပှၤဟးဂီၤဖိဒုၣ်ဒွဲၣ်ယၤတဂ့ၤ.
9 ယအိၣ်တအုၣ်လီၤ. ယတအဲးထီၣ်ယထးခိၣ်ဘၣ်.
အဂ့ၢ်ဒ်အံၤ, တၢ်အံၤမ့ၢ်တၢ်လၢနမၤတ့ၢ်နဲလီၤ.
10 တဘၣ်စံၣ်ညီၣ်လၢၤယၤတဂ့ၤ.
ယကသံတ့ၢ်မးလၢနတီၢ်ယၤအဃိန့ၣ်လီၤ.
11 နသိၣ်ဃီၣ်ပှၤကညီအတၢ်ဒဲးဘးတဖၣ်လၢ
နတၢ်သိၣ်က့ၤသီက့ၤ
ဒီးတၢ်လၢအဝဲသ့ၣ်အဲၣ်ဝဲတဖၣ်န့ၣ်,
နမၤဟးဂီၤကွံာ်ဒ်
တၢ်အဃၢ်မၤဟးဂီၤတၢ်အသိးန့ၣ်လီၤ.
ပှၤကိးဂၤဒဲးအတၢ်အိၣ်မူန့ၣ်,
မ့ၢ်ဒၣ်တၢ်သါတဘီဧိၤန့ၣ်လီၤ. စ့လၤ
12 ကနၣ်ယတၢ်ထုကဖၣ်တက့ၢ်. ယွၤဧၢ,
ဒိကနၣ်ယတၢ်ကိးထီၣ်လၢ
တၢ်မၤစၢၤအဂီၢ်န့ၣ်တက့ၢ်.
ဖဲလၢယအိၣ်ဒီးတၢ်မဲာ်ထံမဲာ်နိန့ၣ်,
အိၣ်ဘှီၣ်နဲတဂ့ၤ.
အဂ့ၢ်ဒ်အံၤ, ယမ့ၢ်ဒၣ်နပှၤသမှံၤလၢ
အအိၣ်တစိၢ်တလီၢ်ဖိ,
ဒ်ယမိၢ်ပၢ်ဖံဖုလၢပျၢၤတဖၣ်အသိးန့ၣ်လီၤ.
13 တချုးယသးဟးထီၣ်ကွံာ်ဒီးတအိၣ်လၢၤဘၣ်န့ၣ်,
ပျဲယၤလၢယကအိၣ်ဘၣ်ဒီး တၢ်သးခုတစဲးတက့ၢ်.