စံးထီၣ်ပတြၢၤ 35
1 ယွၤဧၢ, ထီဒါပှၤလၢအထီဒါယၤ,
ဒီးဒုးပှၤလၢအဒုးထီဒါယၤတက့ၢ်.
2 ဟံးထီၣ်နကတီၤဖိဒီးကတီၤဖးဒိၣ်ဒီး
ဂဲၤဆၢထၢၣ်လၢတၢ်မၤစၢၤယၤအဂီၢ်န့ၣ်တက့ၢ်.
3 စိာ်ထီၣ်နဘီဒီးနနးဒီးထီဒါပှၤလၢ
အလူၤယၤန့ၣ်တက့ၢ်.
4 ပှၤလၢအဂုာ်ကျဲးစၢးမၤသံယၤန့ၣ်,
မ်အဘၣ်တၢ်မၤနၢၤအီၤဒီး
ဘၣ်တၢ်မၤမဲာ်ဆှးအီၤတက့ၢ်.
ပှၤလၢအကူၣ်တၢ်အၢထီဒါယၤန့ၣ်,
မ်အဘၣ်တၢ်ဃၣ်ကဒါက့ၤအီၤဒီး
မၤကတုၤအသးန့ၣ်တက့ၢ်.
5 မ်အဝဲသ့ၣ်လီၤဂာ်ဒီးဖ့လၢကလံၤအူဒံကွံာ်အီၤ,
ဒ်ယွၤအကလူးလူၤနီၣ်ကွံာ်အီၤအသိးန့ၣ်တက့ၢ်.
6 မ်အကျဲခံး ဒီးဒုးလီၤတလံာ်တၢ်,
ဒီးမ်ယွၤအကလူးလူၤအီၤတက့ၢ်.
7 အဂ့ၢ်ဒ်အံၤ, လၢတၢ်ဂ့ၢ်တအိၣ်ဘၣ်နီတမံၤအပူၤန့ၣ်အဝဲသ့ၣ်ပာ်လီၤခူသူၣ် ပျံၤသကွီၤလၢယဂီၢ်,
ဒီးခူၣ်တၢ်ပူၤယိာ်လၢယဂီၢ်လီၤ.
8 ဘၣ်ဆၣ်, လၢအတပာ်သူၣ်ပာ်သးဘၣ်အပူၤ
တၢ်ဟးဂီၤကတုၤအိၣ်အဝဲသ့ၣ်,
ဒီးပျံၤသကွီၤလၢအပာ်ခူသူၣ်ဝဲန့ၣ်ကဖီၣ်န့ၢ်က့ၤအီၤ
ဒီးကလီၤနုာ်ဆူအတၢ်ဟးဂီၤဒၣ်ဝဲအပူၤန့ၣ်လီၤ.
9 တုၤနုၤတစုယကသူၣ်ခုသးခုလၢယွၤအပူၤ
ဒီးယကသူၣ်ဖှံသးညီလၢအမၤပူၤဖျဲးယၤအဃိလီၤ.
10 ယကစံးလၢယသးဒီဖျၢၣ်ညါ, “ယွၤဧၢ,
ပှၤလၢအလီၤဂာ်ဒီးနၤတအိၣ်နီတဂၤဘၣ်.
နမၤပူၤဖျဲးပှၤဂံၢ်စၢ်ဘါစၢ်လၢ
ပှၤဂံၢ်ဆူၣ်ဘါဆူၣ်အစုပူၤ,
ပှၤဖှီၣ်ဖိယာ်ဖိလၢပှၤလၢ
အဂုာ်န့ၢ်တၢ်လၢအီၤအစုပူၤန့ၣ်လီၤ.”
11 ပှၤအုၣ်အသးကဘျံးကဘျၣ်ဂဲၤဆၢထၢၣ်ထီဒါယၤ
ဒီးပာ်တၢ်ကမၣ်လၢယလိၤလၢတၢ်လၢ
ယတသ့ၣ်ညါအဂ့ၢ်နီတမံၤဘၣ်န့ၣ်လီၤ.
12 အဝဲသ့ၣ်ဟ့ၣ်ဆၢက့ၤယၤတၢ်အၢလၢတၢ်ဂ့ၤအဂီၢ်
ဒီးယသးဘၣ်နးဘၣ်ဖှီၣ်လီၤ.
13 ဘၣ်ဆၣ်ယဲဒၣ်ယၤအံၤ,
ဖဲအဝဲသ့ၣ်ဘၣ်တၢ်ဆူးတၢ်ဆါန့ၣ်ဒီး
ယကူထီၣ်ကၤထီၣ်
တၢ်သူၣ်အုးသးအုးအဆ့ကၤ,
ယတူၢ်ဖှီၣ်ယသးလၢတၢ်ဒုၣ်တၢ်အီၣ်န့ၣ်လီၤ.
ယဘါထုကဖၣ်လၢတၢ်ဆုးလီၤယခိၣ်အပူၤ,
14 ဒ်ယသူၣ်အုးသးအုးလၢယတံၤသကိး
မ့တမ့ၢ်ယဒီပုၢ်ဝဲၢ်အဂီၢ်အသိး,
ယလဲၤတ့ၢ်တၢ်ဒ်ပှၤလၢအဟီၣ်အယၢၤ
လၢအမိၢ်အဂီၢ်အသိး,
ယဆုးလီၤယခိၣ်ဒီးသူၣ်အုးသးအုးယဲန့ၣ်လီၤ.
15 မ့မ့ၢ်ဖဲယအိၣ်လၢတၢ်ကိၢ်တၢ်ဂီၤအပူၤန့ၣ်ဒီး
အဝဲသ့ၣ်ခဲလၢာ်သးခုဝဲ,
ပာ်ဖှိၣ်ထီၣ်အသးလၢကနံၤဘၣ်ဖၣ်လဲယၤအဂီၢ်,
ဒီးပှၤလၢယတသ့ၣ်ညါအီၤတဖၣ်န့ၣ်
ဖှီတဲာ်ယၤတကတၢၢ်နီတဘျီဘၣ်န့ၣ်လီၤ.
16 လၢတၢ်တယူးယီၣ်ပာ်ကဲဘၣ်တၢ်အပူၤ
အဝဲသ့ၣ်မၤတရီတပါယၤအါထီၣ်ဒီး
17 ယွၤဧၢ, မ့ၢ်နကကွၢ်ဒၣ်တၢ်ဒ်အံၤဆံးယံာ်လဲၣ်.
မၤပူၤမၤဖျဲးယၤလၢအဝဲသ့ၣ်အတၢ်
မၤဟးဂူာ်ဟးဂီၤတၢ်တဖၣ်
ဒီးယသးသမူလၢခ့ယုၢ်တဖၣ်န့ၣ်တက့ၢ်.
18 အန့ၣ်ဒီးယကစံးဘျုးစံးဖှိၣ်နၤလၢ
ပှၤဂီၢ်မုၢ်ဖးဒိၣ်အမဲာ်ညါ,
ယကစံးထီၣ်ပတြၢၤနၤလၢ
ပှၤဂီၢ်မုၢ်ဂီၢ်ပၤအမဲာ်ညါန့ၣ်လီၤ.
19 တဘၣ်ပျဲယဒုၣ်ယဒါလၢအလီတၢ်သ့ၣ်တဖၣ်
သူၣ်ခုသးခုလၢ
ယဘၣ်တၢ်မၤနၢၤယၤအဃိန့ၣ်တဂ့ၤ.
တဘၣ်ပျဲပှၤလၢအသးဟ့ယၤကွၢ်တကျ့ယၤလၢ
တၢ်ဂ့ၢ်တအိၣ်ဘၣ်နီတမံၤအပူၤန့ၣ်တဂ့ၤ.
20 အဂ့ၢ်ဒ်အံၤ, အဝဲသ့ၣ်တဃုတၢ်ဃူတၢ်ဖိးဘၣ်.
မ့မ့ၢ်ထီဒါပှၤလၢအအဲၣ်တၢ်ဃူတၢ်ဖိးလၢကီၢ်ပူၤ,
ဒီးဆိကမိၣ်တၢ်ကတိၤလီန့ၢ်တၢ်တဖၣ်လီၤ.
21 အဝဲသ့ၣ်အဲးထီၣ်အထးခိၣ်ဖးလဲၢ်ဒီးကတိၤထီဒါယၤ,
“အၣ်ဟါ, အၣ်ဟါ, ပထံၣ်တၢ်လၢနမၤတ့ၢ်လီၤ.”
22 နထံၣ်ဘၣ်တ့ၢ်လံယွၤဧၢ,
အိၣ်ဘှီၣ်ကလာ်တဂ့ၤ. ယွၤဧၢ,
အိၣ်ယံၤဒီးယၤတဂ့ၤ.
23 ထိၣ်ဂဲၤထီၣ်နသး, ဒီးဖုသံနီၣ်ထီၣ်လၢနကဒီဒၣ်ယၤ
ဒီးကတိၤပူၤဖျဲးန့ၢ်တၢ်လၢယကွီၢ်အဂီၢ်တက့ၢ်.
ယွၤယကစၢ်ယွၤဧၢ,
24 ယယွၤ, ယကစၢ်ယွၤဧၢ,
ဒ်နတၢ်တီတၢ်လိၤအိၣ်ဝဲအသိးန့ၣ်,
စံၣ်ညီၣ်ယၤတက့ၢ်.
ဒီးဒုးသူၣ်ခုသးခုယဒုၣ်ယဒါလၢယဖီခိၣ်န့ၣ်တဂ့ၤ.
25 တဘၣ်ပျဲအဝဲသ့ၣ်စံးလီၤအသးဒၣ်ဝဲလၢ,
“အၣ်ဟါ, ပတၢ်အလိၣ်လၢပှဲၤလံ.”
မ်အသုတစံးပယူၢ်လီၤကွံာ်လံအီၤလံန့ၣ်တဂ့ၤ.
26 ပှၤလၢအသူၣ်ခုသးခုဝဲလၢယတၢ်နးတၢ်ဖှီၣ်အဃိန့ၣ်,
မ်ကဘၣ်တၢ်မၤမဲာ်ဆှးဒီးတၢ်မၤနၢၤကွံာ်အီၤ
လၢာ်လၢာ်ဆ့ဆ့န့ၣ်တက့ၢ်.
ပှၤလၢအပာ်ဒိၣ်အသးထီဒါယၤတဖၣ်န့ၣ်,
မ်အဘၣ်တၢ်ဒုးကူဒုးသိးအီၤလၢတၢ်မဲာ်ဆှးဒီး
တၢ်မၤဟးဂီၤအလၤကပီၤန့ၣ်တက့ၢ်.
27 မ်ပှၤလၢအဆၢထံၣ်ဘၣ်ယၤလၢ
တၢ်ပာ်တၢ်ကမၣ်အလီၢ်တအိၣ်ဘၣ်န့ၣ်
ကိးထီၣ်လၢတၢ်သးခုအဂီၢ်ဒီးစံးထီဘိ,
“ယွၤန့ၣ်ဒိၣ်ဝဲလီၤ.”
အဝဲဘၣ်သူၣ်ဘၣ်သးလၢ
အခ့အပှၤအတၢ်ကဲထီၣ်လိၣ်ထီၣ်န့ၣ်လီၤ.
28 အန့ၣ်ဒီးယကတဲဖျါနတၢ်တီတၢ်လိၤ,
ဒီးယကစံးထီၣ်ပတြၢၤနၤသ့သ့တနံၤလီၤ.