စံးထီၣ်ပတြၢၤ 34
1 ယကစံးထီၣ်ပတြၢၤယွၤကိးဆၢကိးကတီၢ်ဒဲး,
ယတဆိကတီၢ်လၢယတၢ်စံးထီၣ်ပတြၢၤအီၤဘၣ်.
2 ယကစံးထီၣ်ပတြၢၤအီၤလၢတၢ်လၢအမၤတ့ၢ်ဝဲအဃိ,
မ်ပှၤလၢအဘၣ်တၢ်မၤနးမၤဖှီၣ်အီၤခဲလၢာ်
ဒိကနၣ်ဒီးသးခုတက့ၢ်.
3 တဲဖျါယွၤအတၢ်ဒိၣ်တၢ်မုၢ်ဃုာ်ဒီးယၤ,
မ်ပစံးထီၣ်ပတြၢၤသကိးအမံၤတက့ၢ်.
4 ယဃုယွၤဒီးအဝဲဒၣ်စံးဆၢယၤ,
ဒီးမၤပူၤဖျဲးယၤလၢကယဲၢ်
ယတၢ်ဘၣ်ယိၣ်ခဲလၢာ်န့ၣ်လီၤ.
5 ကွၢ်ထီၣ်အီၤ, ဒီးကပီၤထီၣ်,
အန့ၣ်ဒီးနမဲာ်တဆှးဘၣ်နီတဘျီဘၣ်.
6 ပှၤဖှီၣ်ယာ်တဂၤအံၤကိးထီၣ်ဝဲ, ဒီးယွၤနၢ်ဟူအီၤ,
ဒီးမၤပူၤဖျဲးအီၤလၢ
အတၢ်ကိၢ်တၢ်ဂီၤခဲလၢာ်န့ၣ်လီၤ.
7 ယွၤအကလူးသူၣ်ဒဲဝးတရံးပှၤလၢအပျံၤအီၤ
8 လ့ၣ်ကွၢ်ဒီးထံၣ်လၢယွၤမ့ၢ်တၢ်ဂ့ၤန့ၣ်တက့ၢ်.
ပှၤလၢအသန့ၤအသးလၢအီၤန့ၣ်,
ဘၣ်ဆိၣ်ဂ့ၤဝဲလီၤ.
9 ပျံၤယွၤအပှၤစီဆှံသ့ၣ်ဧၢ, ပှၤလၢအပျံၤအီၤန့ၣ်
မိၢ်န့ၢ်သးလီတၢ်အလီၢ်တအိၣ်နီတမံၤလၢၤဘၣ်.
10 ခ့ယုၢ်ဖိတဖၣ်တၢ်သၣ်ဝံၤအသးလၢ
တၢ်အီၣ်တအိၣ်ဘၣ်အဃိလီၤ.
မ့မ့ၢ်ပှၤလၢအဃုယွၤတဖၣ်န့ၣ်,
တၢ်အဂ့ၤလၢအတဒိးန့ၢ်ဘၣ်ဝဲ
11 ဟဲ, ဖိသ့ၣ်လံၤသ့ၣ်ဧၢ, ဒိကနၣ်ယကလုၢ်တက့ၢ်.
ယကသိၣ်လိသုလၢတၢ်ပျံၤယွၤန့ၣ်လီၤ.
12 မ့ၢ်နအဲၣ်ဒိးမုာ်လၤသးခုလၢတၢ်အိၣ်မူအပူၤန့ၣ်ဧါ.
မ့ၢ်နဆၢဒိးန့ၢ်ဘၣ်တၢ်အိၣ်ကၢအိၣ်ခိး
ဒီးတၢ်သူၣ်ခုသးခုန့ၣ်ဧါ.
13 ဟးဆှဲးတၢ်ကတိၤအအၢအသီ
ဒီးတၢ်လီတၢ်ဝ့ၤအတၢ်ကတိၤန့ၣ်တက့ၢ်.
14 ဟးဆှဲးတၢ်မၤတၢ်အၢတၢ်သီဒီးမၤတၢ်ဂ့ၤတက့ၢ်.
ဃုတၢ်ဃူတၢ်ဖိးဒီးလူၤပိာ်ထွဲအခံတက့ၢ်.
15 ယွၤကွၢ်လီၤပှၤတီပှၤလိၤဒီး
ဒိကနၣ်အတၢ်ကိးထီၣ်အီၤန့ၣ်လီၤ.
16 ဘၣ်ဆၣ်, ယွၤထီဒါပှၤလၢအမၤတၢ်အၢ,
ဒ်သိးအဝဲသ့ၣ်ကဘၣ်တၢ်သးပ့ၤနီၣ်ကွံာ်အီၤလၢ
ဟီၣ်ခိၣ်ချၢအဂီၢ်န့ၣ်လီၤ.
17 ဖဲပှၤတီပှၤလိၤကိးထီၣ်ယွၤလၢတၢ်မၤစၢၤအဂီၢ်န့ၣ်
ဒီးယွၤဒိကနၣ်အီၤလီၤ.
ယွၤမၤပူၤဖျဲးအီၤလၢ
အတၢ်ကိၢ်တၢ်ဂီၤခဲလၢာ်န့ၣ်လီၤ.
18 ယွၤအိၣ်ဘူးဒီးပှၤလၢအသူၣ်ကၢ်အသးလီၤ
ဒီးမၤပူၤဖျဲးပှၤလၢအတၢ်မုၢ်လၢ်လီၤမၢ်ကွံာ်
19 ပှၤတီပှၤလိၤတူၢ်ဘၣ်တၢ်ကိၢ်တၢ်ဂီၤအါမံၤ,
ဘၣ်ဆၣ်ယွၤမၤပူၤဖျဲးအီၤလၢ
တၢ်အံၤခဲလၢာ်အပူၤန့ၣ်လီၤ.
20 ယွၤအံးထွဲကွၢ်ထွဲအီၤလၢလၢပှဲၤပှဲၤ,
အဃံတဘိဒၣ်လဲာ်တကၢ်ဘၣ်ဝဲဘၣ်.
21 တၢ်အၢကမၤသံကွံာ်ပှၤတတီတလိၤလီၤ.
ဒီးပှၤလၢအသးဟ့ပှၤတီပှၤလိၤန့ၣ်,
22 ယွၤပှ့ၤက့ၤအခ့အပှၤတဖၣ်အသးသမူလီၤ.
ဒီးပှၤလၢအသန့ၤအသးလၢအီၤန့ၣ်,
တဘၣ်ဘၣ်တၢ်စံၣ်ညီၣ်နီတဂၤဘၣ်.