စံးထီၣ်ပတြၢၤ 30
1 ယွၤဧၢ, ယပာ်ထီၣ်ထီနၤ, မ့ၢ်လၢနမၤပူၤဖျဲးယၤ,
ဒီးတပျဲယဒုၣ်ယဒါသးခုလၢ
ယဖီခိၣ်အဃိန့ၣ်လီၤ.
2 ယွၤ, ယကစၢ်ယွၤဧၢ, ယကိးထီၣ်နၤလၢတၢ်မၤစၢၤအဂီၢ်,
ဒီးနမၤဘျါက့ၤလံယၤလံ.
3 ယွၤဧၢ, နထုးထီၣ်လံယသးသမူလၢတၢ်သံအကီၢ်,
နဒုးမူဒံးယၤလၢ ယသုတလဲၤလီၤဘၣ်ဆူ
တၢ်သံအကီၢ်ပူၤတဂ့ၤန့ၣ်လံ.
4 သးဝံၣ်စံးထီၣ်ပတြၢၤယွၤ, ကယဲၢ်အပှၤဂီၢ်မုၢ်လၢ အသူၣ်တီသးလိၤသ့ၣ်ဧၢ သ့ၣ်နီၣ်ထီၣ်တၢ်လၢ ကစၢ်
ယွၤမၤဝဲ, ဒီးစံးဘျုးအီၤတက့ၢ်. ယွၤအပှၤစီဆှံသ့ၣ်ဧၢ,
သးဝံၣ်စံးထီၣ်ပတြၢၤယွၤ,
ကယဲၢ်အပှၤဂီၢ်မုၢ်လၢ အသူၣ်တီသးလိၤဧၢ သ့ၣ်နီၣ်ထီၣ်အမံၤစီဆှံ
ဒီးစံးထီၣ်ပတြၢၤအီၤတက့ၢ်.
5 အဂ့ၢ်ဒ်အံၤ, အတၢ်သးထီၣ်အိၣ်တစိၢ်ဖိ
ဒီးအဘျုးအဖှိၣ်န့ၣ်အိၣ်တစိၤသးလီၤ.
မဲာ်ထံမဲာ်နိမ့ၢ်ယွၤလီၤဝဲလၢမုၢ်နၤ, ဘၣ်ဆၣ်,
လၢမုၢ်ဂီၤန့ၣ်တၢ်သူၣ်ခုသးခုဟဲဝဲလီၤ.
6 ဖဲယဘၣ်မုာ်ဘၣ်ခုၣ်အခါယစံးလီၤယသး,
“ယတဘၣ်တၢ်မၤနၢၤမၤဃၣ်ယၤ
နီတဘျီလၢၤဘၣ်.”
7 ယွၤဧၢ, နဘျုးနဖှိၣ်ဒုးအိၣ်ဂၢၢ်ဆိးကျၢၤယၤ
ဒ်ကစၢၢ်လၢအတဟူးတဝးဘၣ်အသိးန့ၣ်လီၤ.
ဘၣ်ဆၣ်ဖဲနပာ်သဒၢနမဲာ်လၢယၤ
ဒီးတၢ်သူၣ်ပျံၤသးဖုးလီၤဘၣ်ယၤလီၤ.
8 ယွၤဧၢ, ယကိးထီၣ်နၤ,
ယဃ့တၢ်မၤစၢၤလၢယွၤလီၤ.
9 “ယမ့ၢ်လဲၤလီၤဆူတၢ်သံအကီၢ်ပူၤဒီး
လၢယတၢ်သံအဃိန့ၣ်
နကဒိးန့ၢ်ဘၣ်
တၢ်ဘျုးမနုၤတမံၤလဲၣ်.
ဟီၣ်ခိၣ်အကမူၣ်
ကစံးထီၣ်ပတြၢၤနၤစ့ၢ်ကီးဧါ.
ကတဲဖျါထီၣ်နတၢ်သးတီစ့ၢ်ကီးဧါ.
10 ယွၤဧၢ, ဒိကနၣ်ဒီး
သူၣ်ကညီၤသးကညီၤလၢ်ယၤတက့ၢ်.
ယွၤဧၢ, ကဲထီၣ်နဲယတၢ်မၤစၢၤတက့ၢ်.”
11 ယတၢ်မိၣ်တၢ်မးန့ၣ်နဒုးကဲထီၣ်အီၤဆူ
တၢ်ဂဲၤကလံၣ်လၢယဂီၢ်,
နဟံးထီၣ်ကွံာ်ယတၢ်သူၣ်အုးသးအုး
ဒီးဘိၣ်ဘံယၤလၢတၢ်သူၣ်ခုသးခု,
12 ဒ်သိးယသးအသုတအိၣ်ဘှီၣ်တဂ့ၤ
ဒီးကစံးထီၣ်ပတြၢၤနၤအဂီၢ်လီၤ.
ယွၤ, ယကစၢ်ယွၤဧၢ,
ယကစံးထီၣ်ပတြၢၤနၤလီၤထူလီၤယိာ်လီၤ.