စံးထီၣ်ပတြၢၤ 29
1 မူခိၣ်ဖိသ့ၣ်ဧၢ, စံးထီၣ်ပတြၢၤယွၤတက့ၢ်.
စံးထီၣ်ပတြၢၤယွၤအလၤကပီၤ
ဒီးအစိကမီၤန့ၣ်တက့ၢ်.
2 ဟ့ၣ်ယွၤလၢတၢ်လၤတၢ်ကပီၤကြၢးဒီးအမံၤ,
ဘါထီၣ်ယွၤလၢတၢ်စီဆှံအဃံအလၤန့ၣ်တက့ၢ်.
3 ယွၤအကလုၢ်ဘၣ်တၢ်နၢ်ဟူအီၤလၢပီၣ်လဲၣ်အဖီခိၣ်,
တၢ်လၤကပီၤအကစၢ်မၤသီၣ်ထီၣ်အကလုၢ်ဒ်
လီသီၣ်အသိး ဒီးအကလုၢ်သီၣ်ကဒါက့ၤလၢ
ပီၣ်လဲၣ်မိၢ်ပှၢ်အဖီခိၣ်န့ၣ်လီၤ.
4 ယွၤအကလုၢ်အံၤအိၣ်ဒီးအစိအကမီၤ,
ယွၤအကလုၢ်အံၤပှဲၤဝဲဒီးတၢ်ကဟုကညီၢ်န့ၣ်လီၤ.
5 ယွၤအကလုၢ်မၤကၢ်လီၤသ့ၣ်ဆှိအ့ရ့း,
ယွၤမၤကၢ်လီၤလဘၤနိၣ်အသ့ၣ်ဆှိအ့ရ့းန့ၣ်လီၤ.
6 အဝဲဒုးစံၣ်လဘၤနိၣ်အကစၢၢ်ဒ်ဂီၤဖံးဖိအသိး
ဒီးကစၢၢ်ဃ့ရမိၣ်ဒ်ဂီၤဖံးဖါလၢအရၢတဒုအသိးန့ၣ်လီၤ.
7 ယွၤအကလုၢ်ဒုးကပြ့ၢ်ထီၣ်လီဝၢ်ဒံး,
8 ယွၤအကလုၢ်မၤဟူးဝးပှၢ်မုၢ်ကနၢ,
ယွၤမၤဟူးဝးကၤဒ့ၣ်အပှၢ်မုၢ်ကနၢန့ၣ်လီၤ.
9 ယွၤအကလုၢ်ဒုးဖှံလီၤတၤဟိမိၢ်တဖၣ်
ဒီးမၤလီၤဆှုကွံာ်သ့ၣ်လၣ်ခဲလၢာ်လၢပှၢ်လၢ်ကျါ,
ဒီးပှၤအိၣ်လၢအတၢ်လုၢ်ဟံၣ်အပူၤခဲလၢာ်
ကိးထီၣ် “တၢ်လၤကပီၤမ်အဘၣ်ကစၢ်ယွၤ” န့ၣ်လီၤ.
10 ယွၤဆ့ၣ်နီၤပၢတၢ်လၢထံလုၣ်ဘၢတၢ်အဖီခိၣ်,
ယွၤ, စီၤပၤလီၤထူလီၤယိာ်ဆ့ၣ်နီၤပၢတၢ်လီၤ.
11 ယွၤဟ့ၣ်ဂံၢ်ဟ့ၣ်ဘါအပှၤဂီၢ်မုၢ်,
ယွၤဆိၣ်ဂ့ၤအပှၤဂီၢ်မုၢ်လၢ
တၢ်ဃူတၢ်ဖိးန့ၣ်လီၤ.