စံးထီၣ်ပတြၢၤ 25
1 ယွၤဧၢ, ယဆှၢထီၣ်ယသးဆူနအိၣ်လီၤ.
2 ယကစၢ်ယွၤဧၢ, ယနာ်နၤလီၤ.
မ်ယသုတဘၣ်တၢ်မၤမဲာ်ဆှးယၤတဂ့ၤ.
မ်ယဒုၣ်ယဒါအသုတသးခုလၢယဖီခိၣ်တဂ့ၤ.
3 ပှၤလၢအနာ်နၤသ့ၣ်တဖၣ်တဘၣ်တၢ်မၤနၢၤအီၤဘၣ်.
မ့မ့ၢ်ဘၣ်ဒၣ်ထဲပှၤလၢအချ့ဝဲလၢ
တၢ်ပူထီၣ်နၤအပူၤတဖၣ်န့ၣ်လီၤ.
4 ယွၤဧၢ, သိၣ်လိယၤလၢနကျဲတဖၣ်
ဒီးဒုးသ့ၣ်ညါယၤလၢနကျဲတဖၣ်န့ၣ်တက့ၢ်.
5 သိၣ်လိယၤလၢယကအိၣ်မူဒ်နတၢ်မ့ၢ်တၢ်တီအသိး,
အဂ့ၢ်ဒ်အံၤ, နမ့ၢ်ယကစၢ်ယွၤလၢအမၤပူၤဖျဲးယၤလီၤ.
6 ယွၤဧၢ, သ့ၣ်နီၣ်ထီၣ်က့ၤနတၢ်သူၣ်ကညီၤသးကညီၤဒီးနတၢ် အဲၣ်ဂၢၢ်ကျၢၤ
လၢနပာ်ဖျါတ့ၢ်အီၤလၢပျၢၤန့ၣ်တက့ၢ်.
7 ယသးစၢ်အတၢ်ဒဲးဘးဒီးအတၢ်ကမၣ်သ့ၣ်တဖၣ်န့ၣ်ပျၢ်လၢ်ဘၣ်တက့ၢ်.
ယွၤဧၢ, လၢနတၢ်အဲၣ်ဂၢၢ်ကျၢၤဒီး
နတၢ်ဂ့ၤတၢ်ဝါအပူၤန့ၣ်,
8 အဂ့ၢ်ဒ်အံၤ, ယွၤန့ၣ်တီဝဲလိၤဝဲဒီးဂ့ၤဝဲ,
ဒုးနဲၣ်ပှၤတၢ်ဒဲးဘးဖိသ့ၣ်တဖၣ်လၢကျဲန့ၣ်လီၤ.
9 အဝဲဆှၢပှၤဆီၣ်လီၤအသးတဖၣ်လၢကျဲမ့ၢ်ကျဲတီအပူၤ
ဒီးဒုးနဲၣ်အဝဲသ့ၣ်လၢအတၢ်ဘၣ်အသးန့ၣ်လီၤ.
10 ပှၤလၢအပၢၤဃာ်ယွၤအတၢ်အၢၣ်လီၤဒီး
ဒိကနၣ်အတၢ်မၤလိာ်တဖၣ်န့ၣ်,
အဝဲဆှၢဝဲလၢတၢ်သးတီဒီးတၢ်အဲၣ်အပူၤန့ၣ်လီၤ.
11 ဟံးဃာ်နတၢ်အၢၣ်လီၤ, ယွၤဧၢ,
ဒီးပျၢ်လၢ်ဘၣ်ယတၢ်ဒဲးဘးတဖၣ်န့ၣ်တက့ၢ်.
ယအိၣ်ဒီးတၢ်ဒဲးဘးအါမးလီၤ.
12 ပှၤလၢအစူၢ်ယွၤန့ၣ်, ကမၤလိန့ၢ်တၢ်လၢအီၤဘၣ်ဃး
ကျဲလၢအဝဲသ့ၣ်ကြၢးပိာ်ထွဲဝဲဒၣ်န့ၣ်လီၤ.
13 အဝဲသ့ၣ်ကဘီၣ်ထီၣ်ညီထီၣ်ထီဘိ
ဒီးအဖိတဖၣ်ကဒိးန့ၢ်ဘၣ်ထံဧိၤကီၢ်ဧိၤန့ၣ်လီၤ.
14 ယွၤမ့ၢ်ပှၤလၢအစူၢ်အီၤတဖၣ်အတံၤသကိး
ဒီးမၤဂၢၢ်မၤကျၢၤ
အတၢ်အၢၣ်လီၤအီလီၤဒီးအဝဲသ့ၣ်န့ၣ်လီၤ.
15 ယကွၢ်ထီၣ်တၢ်ဆူယွၤအအိၣ်လၢတၢ်မၤစၢၤအဂီၢ်ကိးဆၢကိး ကတီၢ်ဒဲးန့ၣ်လီၤ.
ဒီးအဝဲဒၣ်မၤပူၤမၤဖျဲးယၤလၢ
တၢ်လီၤပျံၤလီၤဖုးအလီၢ်န့ၣ်လီၤ.
16 ယွၤဧၢ, ဃၣ်နသးဆူယအိၣ်ဒီး
သူၣ်ကညီၤသးကညီၤလၢ်ယၤတက့ၢ်.
မ့ၢ်လၢယအိၣ်ထဲတဂၤဧိၤဒီး
ယဂံၢ်ယဘါစၢ်အဃိန့ၣ်လီၤ.
17 မၤမုာ်ထီၣ်ယသးလၢအတၢ်ကိၢ်တၢ်ဂီၤတဖၣ်
ဒီးထုးထီၣ်ကွံာ်ယၤလၢ
ယတၢ်ကီတၢ်ခဲတဖၣ်အပူၤန့ၣ်တက့ၢ်.
18 ကွၢ်ဆိကမိၣ်ယတၢ်ကီတၢ်ခဲဒီးယတၢ်နးတၢ်ဖှီၣ်
ဒီးပျၢ်လၢ်ဘၣ်ယတၢ်ဒဲးဘးခဲလၢာ်န့ၣ်တက့ၢ်.
19 ကွၢ်တက့ၢ်. ယဒုၣ်ယဒါသ့ၣ်တဖၣ်အိၣ်ပှံၤဂၤလဲၣ်,
ဒီးကွၢ်အဝဲသ့ၣ်သးဟ့ယၤထဲလဲၣ်န့ၣ်တက့ၢ်.
20 ကဟုဘံၣ်ကယာ်ဘၢယၤဒီးမၤပူၤဖျဲးယၤ,
ဒီးဒုးမၤနၢၤယၤလၢယဒုၣ်ယဒါတဖၣ်န့ၣ်တက့ၢ်.
အဂ့ၢ်ဒ်အံၤ, ယသန့ၤယသးလၢနၤလီၤ.
21 မ်ယတၢ်ဂ့ၤတၢ်ဝါဒီးယတၢ်သူၣ်တီသးလိၤ
ပာ်မူယၤတက့ၢ်.
22 ကစၢ်ယွၤဧၢ, မၤပူၤဖျဲးနပှၤဂီၢ်မုၢ်အံၣ်စရ့လး
လၢအတၢ်ကိၢ်တၢ်ဂီၤခဲလၢာ်အပူၤန့ၣ်တက့ၢ်.