စံးထီၣ်ပတြၢၤ 24
1 ဟီၣ်ခိၣ်ဒီးတၢ်လၢအအိၣ်လၢအပူၤ
ခဲလၢာ်အံၤ မ့ၢ်ယွၤအတၢ်လီၤ.
ဟီၣ်ခိၣ်ဒီးပှၤလၢအအိၣ်ဝဲဆိးဝဲလၢအပူၤ
ခဲလၢာ်အံၤ မ့ၢ်အတၢ်လီၤ.
2 အဂ့ၢ်ဒ်အံၤ, ပာ်လီၤဝဲအခီၣ်ထံးလၢထံယိာ်ပူၤလၢဟီၣ်ခိၣ် အဖီလာ်,
ဒီးဒုးအိၣ်ဂၢၢ်ဆိးကျၢၤအီၤလၢ
ပီၣ်လဲၣ်အတၢ်ဃိာ်အပူၤန့ၣ်လီၤ.
3 မ့ၢ်မတၤကလဲၤထီၣ်ဆူယွၤအကစၢၢ်တဂၤန့ၣ်လဲၣ်.
မ့ၢ်မတၤကဆၢထၢၣ်လၢ
အလီၢ်စီဆှံအပူၤတဂၤန့ၣ်လဲၣ်.
4 မ့ၢ်ဒၣ်ပှၤလၢအစုစီဆှံဝဲဒီးအသးကဆှီဝဲ,
ပှၤလၢအတဘါထီၣ်ဘၣ်
တၢ်ဂီၤတၢ်ဖီၣ်တဖၣ်
ဒီးတဆိၣ်ဘၣ်တၢ်လၢ
တၢ်လီတၢ်ဝ့ၤအပူၤဘၣ်န့ၣ်လီၤ.
5 ယွၤကဆိၣ်ဂ့ၤအီၤဒီးကမၤပူၤဖျဲးအီၤ,
ဒီးကစၢ်ယွၤကစံးလၢအတၢ်ဒဲးဘး တအိၣ်ဘၣ်န့ၣ်လီၤ.
6 ပှၤဒ်သိးအံၤတဖၣ်မ့ၢ်ပှၤလၢအဟဲဆူကစၢ်ယွၤအအိၣ်,
မ့ၢ်ပှၤလၢအဟဲဆူ
စီၤယၤကိာ်အကစၢ်ယွၤအမဲာ်ညါန့ၣ်လီၤ. စ့လၤ
7 တြဲၤသ့ၣ်ဧၢ, အိးထီၣ်သုသးလဲၢ်လဲၢ်
ပဲတြီလၢပျၢၤသ့ၣ်ဧၢ, အိးထီၣ်သုသး
ဒ်သိးစီၤပၤလၢအအိၣ်ဒီးအလၤကပီၤ
ကဟဲနုာ်ဘၣ်အဂီၢ်န့ၣ်တက့ၢ်.
8 စီၤပၤဖးဒိၣ်တဂၤအံၤမ့ၢ်မတၤလဲၣ်.
အဝဲမ့ၢ်ယွၤလၢအဂံၢ်ဆူၣ်ဘါဆူၣ်ဒီးအိၣ်ဒီးအစိကမီၤ,
ယွၤလၢအမၤနၢၤတၢ်လၢတၢ်ဒုးအပူၤန့ၣ်လီၤ.
9 တြဲၤသ့ၣ်ဧၢ, အိးထီၣ်သုသးလဲၢ်လဲၢ်,
ပဲတြီလၢပျၢၤသ့ၣ်ဧၢ, အိးထီၣ်သုသး,
ဒ်သိးစီၤပၤလၢအအိၣ်ဒီးအလၤကပီၤ
ကဟဲနုာ်ဘၣ်အဂီၢ်န့ၣ်တက့ၢ်.
10 စီၤပၤဖးဒိၣ်တဂၤအံၤမ့ၢ်မတၤလဲၣ်.
ယွၤလၢအမၤနၢၤတၢ်, အဝဲမ့ၢ်စီၤပၤဖးဒိၣ်န့ၣ်လီၤ. စ့လၤ