စံးထီၣ်ပတြၢၤ 2
1 ဘၣ်မနုၤလၢပှၤကလုာ်တဖၣ်
ကူၣ်ထီၣ်ဖးလီၤတၢ်ပူထီၣ်လီထီၣ်.
ဒီးပှၤဂီၢ်မုၢ်တဖၣ်ကူၣ်ထီၣ်ဖးလီၤ
တၢ်ကလီကလီဘၣ်မနုၤန့ၣ်လဲၣ်.
2 အစီၤပၤတဖၣ်ပူထီၣ်တၢ်, အပဒိၣ်ပပှၢ်တဖၣ်
ကူၣ်ထီၣ်ဖးလီၤသကိးတၢ်ထီဒါယွၤ ဒီး
စီၤပၤလၢယွၤဃုထၢတ့ၢ်အီၤန့ၣ်လီၤ.
3 အဝဲသ့ၣ်စံးဝဲ, “မ်ပကမၤထူၣ်ဖျဲးသကိးပသးလၢ
အတၢ်စၢဃာ်ပှၤ,
ဒီးကွံာ်တ့ၢ်ကွံာ်အတၢ်စၢဃာ်တၢ်တက့ၢ်.”
4 ယွၤအိၣ်လၢအလီၢ်ပစိာ်လၢမူခိၣ်န့ၣ်နံၤဝဲ
ဒီးဒုၣ်ဒွဲၣ်အဝဲသ့ၣ်အတၢ်ကူၣ်ထီၣ်ဖးလီၤလၢ
အတဂိာ်တသီၣ်တဖၣ်န့ၣ်လီၤ.
5 တုၤနုၤတစု, ယွၤကတိၤတၢ်ဒီးအဝဲသ့ၣ်လၢ
တၢ်သးထီၣ်
ဒီးမၤပျံၤမၤဖုးအဝဲသ့ၣ်လၢအတၢ်သးဒိၣ်န့ၣ်လီၤ.
6 အဝဲစံးဝဲ, “ယပာ်ထီၣ်ယစီၤပၤလၢ
ယကစၢၢ်စီဆှံစံယိၣ်အလိၤလံ.”
7 စီၤပၤစံးဝဲ, “ယကစံးကတိၤ
ယွၤအတၢ်မၤလိာ်န့ၣ်လီၤ.
အဝဲစံးဘၣ်ယၤ, နဲဒၣ်အံၤနမ့ၢ်ယဖိခွါ,
မုၢ်မဆါတနံၤအံၤယကဲထီၣ်နပၢ်လံ.
8 ဃ့တၢ်လၢယၤတက့ၢ်, ဒီးယကဟ့ၣ်နၤလၢ
ပှၤကလုာ်ခဲလၢာ်လီၤ.
ဟီၣ်ခိၣ်ဒီဘ့ၣ်ကမ့ၢ်နတၢ်လီၤ.
9 နကတီၢ်ကၢ်အဝဲသ့ၣ်လၢနီၣ်တီၢ်ထး,
နကမၤသ့ၣ်ဖးအဝဲသ့ၣ်ဒ်
သပၢၤဟီၣ်ခိၣ်အက့အခီအသိးန့ၣ်လီၤ.”
10 ဒီးခဲကနံၣ်အံၤ, သုဝဲစီၤပၤသ့ၣ်ဧၢ,
အိၣ်ဒီးတၢ်ကူၣ်သ့တက့ၢ်.
သုဝဲပဒိၣ်ပပှၢ်သ့ၣ်ဧၢ,
ဒိကနၣ်တၢ်ဟ့ၣ်ပလီၢ်အံၤတက့ၢ်.
11 မၤယွၤအတၢ်ဒီးတၢ်ပျံၤယွၤ,
အိၣ်ဒီးတၢ်ကနိးကစုာ်
12 ဒီးဆီၣ်လီၤသုသးလၢအဖီလာ်တက့ၢ်.
မ့တမ့ၢ်ဘၣ်ဒီးအတၢ်သးထီၣ်ကထီၣ်ဝဲချ့သဒံး,
ဒီးသုကသံသတူၢ်ကလာ်လီၤ.
ပှၤလၢအအိၣ်ကဒုလၢယွၤအပူၤခဲလၢာ်န့ၣ်
ဘၣ်ဆိၣ်ဂ့ၤဝဲနီၢ်နီၢ်လီၤ.