လံာ်ထါစံးထီၣ်ပတြၢၤ
PSALMS
လံာ်ထါစံးထီၣ်ပတြၢၤမ့ၢ်လံာ်တၢ်သးဝံၣ်စံးထီၣ်ပတြၢၤဒီး လံာ်တၢ်ထုကဖၣ်လၢလံာ်စီဆှံအပူၤန့ၣ်လီၤ. လံာ်ထါစံးထီၣ်ပတြၢၤအံၤဘၣ်တၢ်ကွဲးထုးထီၣ်အီၤလၢပှၤအါဂၤလၢ ဆၢကတီၢ်ဖးယံာ်အကတီၢ်န့ၣ်လီၤ. လံာ်တၢ်သးဝံၣ်စံးထီၣ်ပတြၢၤဒီးတၢ်ထုကဖၣ်တဖၣ်အံၤ ဘၣ်တၢ်ပာ်ဖှိၣ်ဒီးသူတ့ၢ်အီၤလၢပှၤအံၣ်စရ့လးဖိသ့ၣ် တဖၣ်ဖဲလၢအဘူၣ်ထီၣ်ဘါထီၣ်ကစၢ်ယွၤအခါန့ၣ်လီၤ. ဒီးလံာ်တဖၣ်အံၤဘၣ်တၢ်တ့ၢ်နုာ်အီၤလၢအဝဲသ့ၣ် အလံာ်တၢ်ကွဲးစီဆှံသ့ၣ်တဖၣ်အပူၤန့ၣ်လီၤ.
လံာ်ထါတၢ်ဘူၣ်တၢ်ဘါသ့ၣ်တဖၣ်အံၤအိၣ်ဝဲဒၣ်အါကလုာ် ဒ်အမ့ၢ်ဝဲလံာ်ထါသးဝံၣ်စံးထီၣ်ပတြၢၤကစၢ်ယွၤဒီးတၢ်ဘူၣ် ထီၣ်ဘါထီၣ်ကစၢ်ယွၤ, တၢ်ဃ့ဘါထုကဖၣ်လၢတၢ်မၤစၢၤအဂီၢ်, တၢ်တြီဃာ်တၢ်အၢအဂီၢ်ဒီးတၢ်အုၣ်က့ၤခီၣ်က့ၤအဂီၢ်, တၢ်ဃ့ကညးလၢတၢ်ပျၢ်တၢ်ဒဲးဘးအဂီၢ်, တၢ်စံးဘျုးစံးဖှိၣ်ကစၢ်ယွၤအတၢ်ဆိၣ်ဂ့ၤသ့ၣ်တဖၣ်အဂီၢ်, ဒီးတၢ်ဃ့သကွံၢ်ကညးယွၤလၢ အသိၣ်ဃီၣ်ဒုၣ်ဒါသ့ၣ်တဖၣ်အဂီၢ်န့ၣ်လီၤ. တၢ်ထုကဖၣ်တဖၣ်အံၤမ့ၢ်ဝဲနီၢ်တဂၤဘၣ်တဂၤအတၢ်ထုကဖၣ်, ဒီးပှၤဒီကလုာ်အတၢ်ထုကဖၣ်န့ၣ်လီၤ. တနီၤလီၣ်ဖျါထီၣ်ပှၤတဂၤအသးအတၢ်ကလၢၢ်ဘၣ်သ့ၣ် တဖၣ်န့ၣ်လီၤ.
ထါစံးထီၣ်ပတြၢၤတဖၣ်အံၤဘၣ်တၢ်သူအီၤလၢယ့ၣ်ၡူး, ဘၣ်တၢ်ယၢၤထီၣ်အီၤလၢလံာ်တၢ်အၢၣ်လီၤအီလီၤအသီ တကတြူၢ်အပှၤကွဲးလံာ်တဖၣ်ဒီးကဲထီၣ်တ့ၢ်လံာ်လုၢ်ဒိၣ် ပှ့ၤဒိၣ်လၢပှၤခရံာ်ဖိအတၢ်အိၣ်ဖှိၣ်အတၢ်ဘူၣ်တၢ်ဘါအပူၤ စးထီၣ်လၢအခီၣ်ထံးလံၤလံၤန့ၣ်လီၤ.
ထါစံးထီၣ်ပတြၢၤအယုၢ် ၁၅၀ အံၤ, ဘၣ်တၢ်ပာ်ဖှိၣ်အီၤဒ်တၢ်ကွဲးယဲၢ်ကလုာ်မ့တမ့ၢ်လံာ်ယဲၢ် ဘ့ၣ်ဒ်လၢလာ်အံၤအသိးန့ၣ်လီၤ.
စံးထီၣ်ပတြၢၤ 1
လံာ်တၢတဘ့ၣ်
1 ပှၤလၢအတတူၢ်လိာ်ပှၤတတီတလိၤသ့ၣ်တဖၣ်
အတၢ်ဟ့ၣ်ကူၣ်ဟ့ၣ်ဖး,
ပှၤလၢအတလူၤပိာ်ထွဲပှၤတၢ်ဒဲးဘးဖိသ့ၣ်တဖၣ်
အတၢ်သိၣ်လိသီလိအခံ,
ဒီးပှၤလၢအတမၤဘၣ်ထွဲလိာ်အသးဒီး
ပှၤလၢအဒုၣ်ဒွဲၣ်ကစၢ်ယွၤတဖၣ်န့ၣ်,
မ့ၢ်ပှၤဘၣ်ဆိၣ်ဂ့ၤနီၢ်နီၢ်လီၤ.
2 မုာ်လၤဝဲလၢတၢ်ဒိကနၣ်ယွၤအတၢ်သိၣ်တၢ်သီအပူၤ,
ဒီးဆိကမိၣ်ဝဲယွၤအတၢ်သိၣ်တၢ်သီ,
မုၢ်ဆါဆဲးလၢမုၢ်နၤန့ၣ်လီၤ.
3 ဒီးကလီၤဂာ်ဒ်သ့ၣ်သူၣ်လီၤအသးလၢ ထံဖိကျိအနံၤ,
လၢအသၣ်ထီၣ်လၢအကတီၢ်ဒၣ်ဝဲ,
ဒီးအလၣ်တလီၤညွံးဘၣ်အသိးန့ၣ်လီၤ.
တၢ်မၤတမံၤလၢ်လၢ်လၢအမၤဝဲန့ၣ်
4 ပှၤတတီတလိၤတဖၣ်န့ၣ်တဒ်န့ၣ်အသိးဘၣ်.
အဝဲသ့ၣ်လီၤဂာ်ဒ်ဖ့လၢကလံၤအူဒံကွံာ်ဝဲ
အသိးန့ၣ်လီၤ.
5 ပှၤတၢ်ဒဲးဘးဖိတဖၣ်ကဘၣ်တၢ်စံၣ်ညီၣ်အီၤလၢကစၢ်ယွၤ,
ဒီးကဘၣ်တၢ်ထုးဖးကွံာ်အီၤလၢ
ကစၢ်ယွၤအပှၤဂီၢ်မုၢ်ဒၣ်ဝဲန့ၣ်လီၤ.
6 ပှၤအတီအလိၤအကျဲန့ၣ်ဘၣ်တၢ်ဆှၢအီၤဒီး
ကဟုကယာ်အီၤလၢယွၤန့ၣ်လီၤ.
မ့မ့ၢ်ပှၤတတီတလိၤအကျဲန့ၣ်
ဆှၢအီၤဆူတၢ်ဟးဂူာ်ဟးဂီၤန့ၣ်လီၤ.