စံးထီၣ်ပတြၢၤ 19
1 မူခိၣ်လီၣ်ဖျါထီၣ်ကစၢ်ယွၤအလၤကပီၤ,
ဒီးမူကပိာ်လိၤပာ်ဖျါ
အစုအတၢ်ဖံးတၢ်မၤန့ၣ်လီၤ.
2 မုၢ်တနံၤစံးဘၣ်မုၢ်တနံၤဒၣ် ဒီးမုၢ်တနၤ
ဒုးနဲၣ်တၢ်သ့ၣ်ညါလၢမုၢ်တနၤဒၣ်န့ၣ်လီၤ.
3 တၢ်စံးတၢ်ကတိၤတအိၣ်, တၢ်အကလုၢ်တအိၣ်,
တၢ်အသီၣ်တဘၣ်တၢ်နၢ်ဟူအီၤဘၣ်,
4 နာ်သက့အတၢ်ကစီၣ်လဲၤသကုၤဟီၣ်ခိၣ်,
ဒီးအကလုၢ်ကထါတဖၣ်
လဲၤတုၤဟီၣ်ခိၣ်အကတၢၢ်လီၤ.
ကစၢ်ယွၤသူၣ်ထီၣ်တၢ်အိၣ်တၢ်ဆိးအလီၢ်လၢမူခိၣ်
လၢမုၢ်အဂီၢ်,
5 လၢအဟဲထီၣ်လၢမုၢ်ဂီၤလီၤဂာ်ဒ်
တလးမူးပိာ်ခွါလၢအဟဲထီၣ်လၢအဒၢးပူၤအသိး,
အသူၣ်ခုသးခုဝဲဒ်ပှၤအဂံၢ်ဆူၣ်ဘါဆူၣ်လၢ
အကဃ့ၢ်သတြီၤတၢ်တဂၤအသိး,
6 ဟဲထီၣ်ဝဲလၢမူခိၣ်အကတၢၢ်တကပၤ
ဒီးလဲၤခီဖျိဝဲတုၤလၢအတကပၤအကတၢၢ်န့ၣ်လီၤ.
တၢ်အိၣ်တဒၢလၢမုၢ်အတၢ်ကိၢ်
တအိၣ်နီတမံၤဘၣ်.
7 ယွၤအတၢ်သိၣ်တၢ်သီလၢဝဲပှဲၤဝဲ
ဒီးမၤကျၢၤထီၣ်က့ၤပသးလီၤ.
ယွၤအတၢ်အုၣ်အသးန့ၣ်မ့ၢ်ဝဲတီဝဲ,
ဒီးဒုးကူၣ်သ့ပှၤလၢအတမၤလိဘၣ်တၢ်ဘၣ်လီၤ.
8 ယွၤအကလုၢ်ကထါန့ၣ်တီဝဲလိၤဝဲ,
ဒီးမၤခုထီၣ်က့ၤပသးလီၤ.
ယွၤအတၢ်မၤလိာ်န့ၣ်ကဆှီဝဲ
ဒီးမၤကပီၤထီၣ်က့ၤပမဲာ်လီၤ.
9 တၢ်ပျံၤယွၤန့ၣ်စီဝဲဆှံဝဲ,
ဒီးအိၣ်ဝဲအစိၤစိၤအဃၣ်ဃၣ်လီၤ.
ယွၤအတၢ်စံၣ်ညီၣ်တဖၣ်န့ၣ်မ့ၢ်အမ့ၢ်အတီ
ဒီးလိၤဝဲတီဝဲခဲလၢာ်လီၤ.
10 ပဆၢဒိးန့ၢ်ဘၣ်အီၤအလီၢ်အိၣ်ဒိၣ်န့ၢ်ထူ,
ဒီးဒိၣ်န့ၢ်ထူအစီလၢအအါတက့ၢ်န့ၣ်လီၤ.
မ့ၢ်အဆၢန့ၢ်ကနဲစီ, ဒီးကနဲစီလၢအလီၤစီၤလၢ
ကနဲအခိၣ်ထံအလိၤတက့ၢ်န့ၣ်လီၤ.
11 နခ့နပှၤဒိးတၢ်ဒုးပလီၢ်အသးစ့ၢ်ကီးလၢအီၤ,
ပှၤလၢအတိၢ်န့ၢ်အီၤန့ၣ်
ဒိးန့ၢ်အဘျုးဖးဒိၣ်လီၤ.
12 ပှၤထံၣ်သ့ၣ်ညါအတၢ်ကမၣ်ဒၣ်ဝဲ
တသ့နီတဂၤဘၣ်.
ယွၤဧၢ, မၤကဆှီယၤလၢ
တၢ်ကမၣ်ခူသူၣ်တဖၣ်န့ၣ်တက့ၢ်.
13 တြီဃာ်စ့ၢ်ကီးနခ့နပှၤလၢတၢ်ဒဲးဘးအဒူတက့ၢ်.
မ်အသုတပၢယၤတဂ့ၤ, မ့မ့ၢ်ဒ်န့ၣ်ဒီး,
တၢ်ပာ်တၢ်ကမၣ်လၢယလိၤအလီၢ်တအိၣ်ဘၣ်ဒီး
ယကပူၤဖျဲးဒီးတၢ်ကမၣ်အဒိၣ်အယိာ်န့ၣ်လီၤ.
14 မ်ယထးခိၣ်အတၢ်ကတိၤ
ဒီးယသးအတၢ်ဆိကမိၣ်န့ၣ်
ဘၣ်နသးတက့ၢ်.
ယလၢၢ်ဒီးတၢ်ပှ့ၤက့ၤယၤ, ယွၤဧၢ.