စံးထီၣ်ပတြၢၤ 18
(၂မူၤ.၂၂း၁-၅၁)
1 ယွၤဧၢ, ယအဲၣ်နၤဆံးဒိၣ်လဲၣ်,
2 ယွၤမ့ၢ်ယလၢၢ်, ဒီးယတိာ်, ဒီးယတၢ်ပူၤဖျဲးအလီၢ်,
ယကစၢ်, ယွၤမ့ၢ်ယလၢၢ်, မ့ၢ်ယတၢ်အိၣ်တဒၢအလီၢ်,
ယကတီၤတဘ့ၣ်, ဒီးယတၢ်အုၣ်က့ၤခီၣ်က့ၤအနၢၤ,
ယတိာ်ဧိၤတာ်ဧိၤန့ၣ်လီၤ.
3 ယကိးထီၣ်ယွၤ ဒီးအဝဲဒၣ်မၤပူၤဖျဲးယၤလၢ
ယဒုၣ်ယဒါတဖၣ်န့ၣ်လီၤ.
4 တၢ်သံအတၢ်လီၤပျံၤလီၤဖုးအံၤအိၣ်ဝးတရံးယၤ,
တၢ်မၤဟးဂီၤအလပီတဖၣ်လုၣ်ဘၢယၤလီၤ.
5 တၢ်သံအပျံၤတဖၣ်ဘံဘူယၤ
ဒီးတၢ်သွၣ်ခိၣ်ပာ်လီၤပျံၤသကွီၤလၢယဂီၢ်လီၤ.
6 လၢယဘၣ်တၢ်ကိၢ်တၢ်ဂီၤအပူၤန့ၣ်ယကိးထီၣ်ယွၤ,
ယကိးထီၣ်ယကစၢ်ယွၤလၢတၢ်မၤစၢၤအဂီၢ်လီၤ.
လၢအတၢ်လုၢ်ဟံၣ်အပူၤအဝဲနၢ်ဟူယကလုၢ်,
အဝဲဒိကနၣ်ယတၢ်ကိးထီၣ်လၢ
7 တုၤနုၤတစုဟီၣ်ခိၣ်ဟူးဝးဒီးဆှဲးဆှိးဝဲ,
ကစၢၢ်တဖၣ်အခီၣ်ထံးသုးအသးဒီးဟူးဝးဝဲ,
မ့ၢ်လၢကစၢ်ယွၤသးဒိၣ်ထီၣ်အဃိန့ၣ်လီၤ.
8 မ့ၣ်အူခုၣ်ဟဲထီၣ်လၢအနါဒ့အပူၤ,
မ့ၣ်အူလၣ်ဒီးမ့ၣ်အူကဖးဟဲထီၣ်လၢအထးခိၣ်လီၤ.
9 အဝဲမၤသကူးလီၤမူခိၣ်ဒီးဟဲလီၤဝဲ,
တၢ်ခံးသူအိၣ်လၢအခီၣ်ဖီလာ်လီၤ.
10 အဝဲဒိးခ့ရူာ်ဒီးယူၤဝဲ,
ဟဲဝဲချ့သဒံးလၢကလံၤအဒံးဆ့အဖီခိၣ်လီၤ.
11 အဝဲမၤဘၢအသးလၢတၢ်ခံးတၢ်နၤ,
တၢ်အၢၣ်ခံးသူလၢအပှဲၤဒီးထံအိၣ်ဝးတရံးအီၤလီၤ.
12 သူၣ်ဒီးမ့ၣ်အူကဖး ဟဲထီၣ်လၢ
လီဝၢ်ဒံးအပူၤလၢအမဲာ်ညါ
ဒီးတိဖျိကွံာ်တၢ်အၢၣ်ခံးသူန့ၣ်လီၤ.
13 ဒီးယွၤဒုးသီၣ်ထီၣ်တၢ်ဒ်လီသီၣ်အသိးလၢမူခိၣ်,
ဒီးတၢ်ထီကတၢၢ်မၤသီၣ်ထီၣ်အကလုၢ်လီၤ.
14 အဝဲခးအပျၢ်တဖၣ်ဒီးမၤလီၤပြံလီၤပြါ
အဒုၣ်အဒါတဖၣ်,
ဒုးဃ့ၢ်ကွံာ်အဝဲသ့ၣ်လၢ
အတၢ်မၤကပြ့ၢ်ထီၣ်လီဝၢ်ဒံးန့ၣ်လီၤ.
15 ယွၤဧၢ, ဖဲနသိၣ်နသီနဒုၣ်နဒါတဖၣ်,
ဒီးနသါသဖှိထီၣ်တၢ်ဆူၣ်ဆူၣ်ကလဲာ် လၢတၢ်သးထီၣ်န့ၣ်,
ပီၣ်လဲၣ်အခံဒးဖျါထီၣ်ဝဲ
ဒီးဟီၣ်ခိၣ်အခီၣ်ထံးတဖၣ်
ဘၣ်တၢ်မၤဖျါထီၣ်အီၤန့ၣ်လီၤ.
16 ယွၤယူာ်ဃီၤအစုလၢထးဒီးဟံးဃာ်ယၤလီၤ.
အဝဲထုးထီၣ်ယၤလၢထံယိာ်တဖၣ်အပူၤလီၤ.
17 အဝဲမၤပူၤဖျဲးယၤလၢယဒုၣ်ယဒါလၢအဆူၣ်တဖၣ်,
ဒီးပှၤလၢအသးဟ့ယၤခဲလၢာ်အစုပူၤ,
အဂ့ၢ်မ့ၢ်လၢအဝဲသ့ၣ်မ့ၢ်
ပှၤဆူၣ်ကဲၣ်ဆိးလၢယဂီၢ်အဃိန့ၣ်လီၤ.
18 ဖဲယအိၣ်လၢတၢ်ကိၢ်တၢ်ဂီၤအပူၤန့ၣ်,
အဝဲသ့ၣ်ထီဒါယၤလီၤ.
ဘၣ်ဆၣ်ယွၤမ့ၢ်ယတၢ်သန့ၤယသးအလီၢ်လီၤ.
19 အဝဲထုးထီၣ်ယၤလၢတၢ်ဘၣ်ယိၣ်ဘၣ်ဘီအလီၢ်,
အဝဲမၤပူၤဖျဲးယၤမ့ၢ်လၢ
အဝဲဘၣ်သူၣ်ဘၣ်သးယၤအဃိန့ၣ်လီၤ.
20 ယွၤဟ့ၣ်ဘျုးက့ၤယၤဒ်ယတၢ်တီတၢ်လိၤအသိး,
အဝဲဆိၣ်ဂ့ၤယၤမ့ၢ်လၢ
ယတၢ်ဒဲးဘးတအိၣ်ဘၣ်အဃိန့ၣ်လီၤ.
21 ယစူၢ်ယွၤအတၢ်သိၣ်တၢ်သီ,
ယတဟးဖးဒီးယကစၢ်ယွၤဘၣ်.
22 ယတိၢ်န့ၢ်အတၢ်သိၣ်တၢ်သီခဲလၢာ်,
ယတလုၢ်သ့ၣ်ခါပတာ်
အတၢ်မၤလိာ်တဖၣ်န့ၣ်ဘၣ်.
23 အဝဲသ့ၣ်ညါဝဲလၢယတၢ်ကမၣ်တအိၣ်ဘၣ်
ဒီးယဟးဆှဲးတ့ၢ်တၢ်မၤကမၣ်တၢ်န့ၣ်လီၤ.
24 ယွၤဟ့ၣ်ဘျုးက့ၤယၤဒ်ယတၢ်တီတၢ်လိၤအသိး,
အဝဲဆိၣ်ဂ့ၤယၤမ့ၢ်လၢ
ယတၢ်ဒဲးဘးတအိၣ်ဘၣ်အဃိန့ၣ်လီၤ.
25 ယွၤဧၢ, နတီဒီးပှၤလၢအတီဒီးနၤ,
နလၢပှဲၤနဲလၢပှၤလၢအလၢပှဲၤတဖၣ်အဂီၢ်န့ၣ်လီၤ.
26 နကဆှီဝဲလၢပှၤလၢအကဆှီတဖၣ်အဂီၢ်,
ဘၣ်ဆၣ်နထီဒုၣ်ဒါပှၤအၢပှၤသီတဖၣ်န့ၣ်လီၤ.
27 နမၤပူၤဖျဲးပှၤလၢအဆီၣ်လီၤအသး, ဘၣ်ဆၣ်
နဆီၣ်လီၤပှၤလၢအပာ်ထီၣ်ထီအသးန့ၣ်လီၤ.
28 မ့ၢ်လီၤ. နမၤကပီၤထီၣ်ယမ့ၣ်အူဒၢ,
ယွၤယကစၢ်မၤကပီၤထီၣ်ယတၢ်ခံးန့ၣ်လီၤ.
29 ခီဖျိနၤန့ၣ်ယမၤဟးဂီၤကွံာ်သုးမုၢ်သံၣ်ဘိတဖၣ်သ့ဝဲ,
ဒီးခီဖျိယကစၢ်န့ၣ်ယစံၣ်ဖျိကွံာ်တၢ်ဒူၣ်သ့ဝဲလီၤ.
30 ကစၢ်ယွၤလၢယဘါအီၤအံၤအကျဲလၢပှဲၤဝဲ,
ယွၤအတၢ်စံးပာ်န့ၣ်ဘၣ်တၢ်မၤကွၢ်
ဒီးထံၣ်န့ၢ်အီၤလၢအတီဝဲလီၤ.
အဝဲမ့ၢ်ကတီၤတဘ့ၣ်လၢပှၤလၢအ
အိၣ်တဒၢလၢအပူၤခဲလၢာ်အဂီၢ်န့ၣ်လီၤ.
31 အဂ့ၢ်ဒ်အံၤ, ယွၤမ့ၢ်ကစၢ်ယွၤထဲတဂၤဧိၤ,
ကစၢ်ယွၤထဲတဂၤဧိၤ
မ့ၢ်ပှၤတြီဆၢတၢ်အၢလၢပဂီၢ်န့ၣ်လီၤ.
32 အဝဲမ့ၢ်ကစၢ်ယွၤလၢအမၤဆူၣ်ထီၣ်ယဂံၢ်ယဘါ,
ဒီးမၤလိၤယကျဲန့ၣ်လီၤ.
33 အဝဲမၤကျၢၤယခီၣ်ဒ်တၤဟိအခီၣ်အသိး,
ဒီးဒုးဆၢထၢၣ်ယၤလၢတၢ်လီၢ်ထီၣ်ထီန့ၣ်လီၤ.
34 အဝဲသိၣ်လိယၤလၢယကဒုးတၢ်အဂီၢ်,
ဒ်သိးယဖ့ၣ်ထီၣ်ချံၣ်တိၢ်ဘီကသ့အဂီၢ်န့ၣ်လီၤ.
35 ယွၤဧၢ, နဟ့ၣ်ယၤလၢနတၢ်အုၣ်က့ၤခီၣ်က့ၤအကတီၤ,
နစုထွဲဒုးအိၣ်ဂၢၢ်ဆိးကျၢၤယၤ,
ဒီးနတၢ်မၤစၢၤဒုးမ့ၢ်ယၤလၢပှၤအဒိၣ်လီၤ.
36 နမၤလဲၢ်ထီၣ်ယခီၣ်ထွဲတၢ်အလီၢ်,
ဒီးယခီၣ်တလီၤတလံာ်နီတဘျီဘၣ်.
37 ယလူၤယဒုၣ်ယဒါတဖၣ်ဒီးချုးန့ၢ်အီၤ,
ယတချုးမၤဟးဂီၤကွံာ်အီၤခဲလၢာ်ဒံးဘၣ်ဒီး
ယတဟဲက့ၤကဒါက့ၤဘၣ်.
38 ယကျီကွံာ်အဝဲသ့ၣ်ဒီးဂဲၤဆၢထၢၣ်က့ၤတန့ၢ်ဘၣ်.
အဝဲသ့ၣ်လီၤဃံၤဝဲလၢယခီၣ်အဖီလာ်လီၤ.
39 နဟ့ၣ်ယၤဂံၢ်ဘါလၢတၢ်ဒုးအဂီၢ်,
ဒီးတၢ်မၤနၢၤလၢယဒုၣ်ယဒါတဖၣ်အဖီခိၣ်လီၤ.
40 နဒုးဃ့ၢ်ကွံာ်ယဒုၣ်ယဒါသ့ၣ်တဖၣ်လၢယမဲာ်ညါ,
ယမၤဟးဂီၤကွံာ်ပှၤလၢအသးဟ့ယၤတဖၣ်လီၤ.
41 အဝဲသ့ၣ်ကိးထီၣ်လၢတၢ်မၤစၢၤအဂီၢ်,
ဘၣ်ဆၣ်ပှၤလၢကမၤစၢၤအီၤတအိၣ်နီတဂၤဘၣ်.
အဝဲသ့ၣ်ကိးထီၣ်ဆူယွၤအအိၣ်ဘၣ်ဆၣ်
အဝဲတစံးဆၢဝဲဒၣ်ဘၣ်.
42 ယမၤသဘှံးအဝဲသ့ၣ်ဒီးကဲထီၣ်ဒ်ဖၣ်ကမူၣ်
လၢကလံၤအူဒံကွံာ်အီၤအသိး,
ယယီၢ်တံၢ်အဝဲသ့ၣ်ဒ်
ကပံာ်လၢကျဲအလိၤအသိးန့ၣ်လီၤ.
43 နမၤပူၤဖျဲးယၤလၢပှၤဂီၢ်မုၢ်လၢအပူထီၣ်တၢ်,
ဒီးဒုးကဲထီၣ်ယၤပှၤပၢတၢ် လၢပှၤကလုာ်တဖၣ်အဖီခိၣ်
ဒီးပှၤဂီၢ်မုၢ်လၢယတသ့ၣ်ညါတ့ၢ်ဘၣ်အီၤန့ၣ်
မၤယတၢ်လီၤ.
44 ပှၤတခီဘီမုၢ်ဖိတဖၣ်တီၤလီၤကဒွံကျိာ်လၢယမဲာ်ညါ
ဒီးဖဲအနၢ်ဟူယကလုၢ်န့ၣ်, ဒိကနၣ်ဝဲလီၤ.
45 အဝဲသ့ၣ်အသးလီၤစၢ်လီၤဘဲကွံာ်
ဒီးဟဲထီၣ်လၢအတိာ်တဖၣ်အပူၤ
အိၣ်ဒီးတၢ်ကနိးကစုာ်န့ၣ်လီၤ.
46 ယွၤမူဝဲ, မ်ယလၢၢ်ဘၣ်တၢ်စံးထီၣ်ပတြၢၤအီၤတက့ၢ်.
ဒီးယတၢ်အုၣ်က့ၤခီၣ်က့ၤအကစၢ်ယွၤန့ၣ်
မ်အဘၣ်တၢ်ပာ်ထီၣ်ထီအီၤတက့ၢ်.
47 အဝဲဟ့ၣ်ယၤတၢ်မၤနၢၤလၢယဒုၣ်ယဒါတဖၣ်အဖီခိၣ်,
အဝဲဆီၣ်လီၤပှၤကလုာ်တဖၣ်လၢယဖီလာ်,
48 ဒီးမၤပူၤဖျဲးယၤလၢယဒုၣ်ယဒါတဖၣ်န့ၣ်လီၤ.
ယွၤဧၢ, နဟ့ၣ်ယၤတၢ်မၤနၢၤလၢ
ယဒုၣ်ယဒါတဖၣ်အဖီခိၣ် ဒီးဒီဒၣ်ယၤလၢ
ပှၤစုဆူၣ်ခီၣ်တကးသ့ၣ်တဖၣ်န့ၣ်လီၤ.
49 လၢတၢ်အံၤအဃိ, ယကစံးထီၣ်ပတြၢၤနၤလၢ
ပှၤကလုာ်တဖၣ်အကျါ,
ဒီးသးဝံၣ်စံးထီၣ်ပတြၢၤနမံၤလီၤ.
50 ကစၢ်ယွၤဟ့ၣ်တၢ်မၤနၢၤဖးဒိၣ်တဖၣ်လၢအစီၤပၤ,
ပာ်ဖျါထီၣ်အတၢ်အဲၣ်ဂၢၢ်ကျၢၤဆူ
အပှၤဒိးဖှူအသး,
ဆူစီၤဒၤဝံးဒီးအစၢၤအသွဲၣ်တဖၣ်
ထီဘိတဘိယူၢ်ဃီန့ၣ်လီၤ.