စံးထီၣ်ပတြၢၤ 147
1 စံးထီၣ်ပတြၢၤယွၤတက့ၢ်.
အဂ့ၢ်ဒ်အံၤ, တၢ်သးဝံၣ်စံးထီၣ်ပတြၢၤ
ပကစၢ်ယွၤန့ၣ်မ့ၢ်တၢ်ဂ့ၤလီၤ.
တၢ်စံးထီၣ်ပတြၢၤအီၤန့ၣ်
မ့ၢ်တၢ်မုာ်သူၣ်မုာ်သးဒီး
တၢ်ကြၢးဝဲဘၣ်ဝဲလီၤ.
2 ယွၤသူၣ်ထီၣ်ဝ့ၢ်ယရူၤၡလ့ၣ်,
အဝဲပာ်ဖှိၣ်က့ၤအံၣ်စရ့လး
အပှၤဘၣ်တၢ်စိာ်မၢကဲကုၢ်အီၤန့ၣ်လီၤ.
3 အဝဲဒၣ်မၤဘျါက့ၤပှၤလၢအသူၣ်ကၢ်အသးလီၤ,
ဒီးဘိၣ်ထီၣ်အဝဲသ့ၣ်အပူၤလီၢ်တဖၣ်လီၤ.
4 အဝဲစံၣ်ညီၣ်တဲာ်ဆၣ်ဧိၤဖီဧိၤအတၢ်ဂံၢ်,
ဒီးကိးဝဲအမံၤခဲလၢာ်လီၤ.
5 ပယွၤန့ၣ်ဒိၣ်ဝဲ, ဒီးအစိအကမီၤအိၣ်အါမးလီၤ.
အတၢ်ကူၣ်သ့ကူၣ်ဘၣ်န့ၣ်တၢ်ထိၣ်အီၤတဲာ်အီၤ တသ့ဘၣ်.
6 ပှၤလၢအဆီၣ်လီၤအသးန့ၣ်ယွၤဝံၢ်ဆၢထၢၣ်အီၤလီၤ.
မ့မ့ၢ်ပှၤတတီတလိၤန့ၣ်
ဆီၣ်လီၤဝဲလၢဟီၣ်ခိၣ်လိၤလီၤ.
7 သးဝံၣ်ထီၣ်ယွၤလၢတၢ်စံးထီၣ်ပတြၢၤတက့ၢ်.
သးဝံၣ်ထီၣ်ပကစၢ် ယွၤအိၣ်ဒီးတနၢ်တက့ၢ်.
8 အဝဲဒၣ်မၤဘၢမူခိၣ်လၢတၢ်အၢၣ်,
ကတဲာ်ကတီၤတၢ်စူၤလၢဟီၣ်ခိၣ်အဂီၢ်,
ဒီးဒုးမဲထီၣ်နီၣ်ဧိၤမံၤဧိၤလၢ
ကစၢၢ်ကလိအလိၤန့ၣ်လီၤ.
9 အဝဲဟ့ၣ်လီၤတၢ်အီၣ်လၢဆၣ်ဖိကီၢ်ဖိအဂီၢ်,
ဒီးဘုၣ်အီၣ်စိးဝၣ်ဃးဖိလၢအကိးထီၣ်န့ၣ်လီၤ.
10 အတၢ်မုာ်လၤန့ၣ်တအိၣ်လၢ
ကသ့ၣ်လၢအဂံၢ်ဆူၣ်တဖၣ်အပူၤ
ဒီးအတၢ်သူၣ်ခုသးခုန့ၣ်တအိၣ်ဘၣ်လၢပှၤသုးဖိလၢ
အဒူအဃိၤတဖၣ်အပူၤန့ၣ်ဘၣ်.
11 မ့မ့ၢ်ယွၤမုာ်လၤဝဲလၢပှၤလၢအပျံၤအီၤ,
ပှၤလၢအမုၢ်လၢ်တၢ်လၢ
အတၢ်အဲၣ်ဂၢၢ်ကျၢၤအပူၤန့ၣ်လီၤ.
12 ယရူၤၡလ့ၣ်ဧၢ, စံးထီၣ်ပတြၢၤယွၤတက့ၢ်.
စံယိၣ်ဧၢ, စံးထီၣ်ပတြၢၤနကစၢ်ယွၤတက့ၢ်.
13 အဂ့ၢ်ဒ်အံၤ, အဝဲမၤကျၢၤလံနတြဲၤအနီၣ်ဘိ,
အဝဲဆိၣ်ဂ့ၤဆိၣ်ဝါနဖိနလံၤအိၣ်လၢနပူၤလီၤ.
14 အဝဲပာ်လီၤတၢ်ဃူတၢ်ဖိးလၢနကီၢ်အဃၢၤ,
အဝဲဒုးဘျဲးအီၣ်ဘျဲးအီနၤလၢ
ဘုဧိၤဟုဧိၤလၢအဂ့ၤကတၢၢ်လီၤ.
15 အဝဲဟ့ၣ်လီၤအတၢ်မၤလိာ်ဆူဟီၣ်ခိၣ်
ဒီးတၢ်လၢအစံးဝဲန့ၣ်ဝံၤဝဲချ့သဒံးန့ၣ်လီၤ.
16 အဝဲဟ့ၣ်လီၤမူခိၣ်ဖီဒ်သိအဆူၣ်အသိး,
မၤလီၤပြံလီၤပြါနါဝာ်ဒ်ဖၣ်ဆါအသိးန့ၣ်လီၤ.
17 အဝဲဒုးဟဲစူၤလီၤသူၣ်ဒ်မဲးဧိၤဟီၣ်ဧိၤအသိး
ဒီးပှၤတူၢ်တၢ်ခုၣ်လၢအဆှၢလီၤဝဲန့ၣ်
တသ့နီတဂၤဘၣ်.
18 အဝဲဟ့ၣ်လီၤအကလုၢ်ဒီးထံလီၤသကၤပှံၢ်လီၤဝဲ
အဝဲဒုးအူထီၣ်ကလံၤဒီးထံတဖၣ်ယွၤလီၤဝဲလီၤ.
19 အဝဲဟ့ၣ်လီၤအပှၤဂီၢ်မုၢ်လၢ အတၢ်ကစီၣ်,
အတၢ်မၤလိာ်ဒီးအတၢ်သိၣ်တၢ်သီတဖၣ်
ဆူအံၣ်စရ့လးန့ၣ်လီၤ.
20 အဝဲတမၤတ့ၢ်တၢ်ဒ်အံၤလၢ
ပှၤကလုာ်အဂၤတဖၣ်န့ၣ်ဘၣ်.
အဝဲသ့ၣ်တသ့ၣ်ညါ
အတၢ်သိၣ်တၢ်သီတဖၣ်န့ၣ်ဘၣ်.
စံးထီၣ်ပတြၢၤယွၤတက့ၢ်.