စံးထီၣ်ပတြၢၤ 145
1 ယကစၢ်ယွၤဒီးယစီၤပၤဧၢ,
ယကပာ်ထီၣ်ထီနၤဒီးစံးထီၣ်ပတြၢၤနမံၤ လီၤစိၤလီၤထီန့ၣ်လီၤ.
2 ယကစံးထီၣ်ပတြၢၤနၤကိးမုၢ်နံၤ
ဒီးစံးထီၣ်ပတြၢၤနမံၤလီၤစိၤလီၤထီန့ၣ်လီၤ.
3 ယွၤန့ၣ်ဒိၣ်ဝဲ, ဒီးကဘၣ်တၢ်စံးထီၣ်ပတြၢၤအီၤ
အါအါကလဲာ်လီၤ.
ဒီးမ့ၢ်အဒိၣ်ဝဲဆံးဒိၣ်လဲၣ်န့ၣ်ပနၢ်ပၢၢ်တတုာ်ဘၣ်.
4 ပှၤတစိၤကစံးထီၣ်ပတြၢၤနတၢ်မၤလၢပှၤတစိၤဒၣ်,
ဒီးနကဒုးနဲၣ်နတၢ်မၤအဒိၣ်တဖၣ်လီၤ.
5 အဝဲသ့ၣ်ကကတိၤတၢ်လၢ နလၤကပီၤဒီး
နတၢ်ကဟုကညီၢ်အဂ့ၢ်, ဒီးယကဆိကမိၣ်တၢ်ယိာ်လၢ
နတၢ်မၤလီၤလးတဖၣ်အဂ့ၢ်န့ၣ်လီၤ.
6 ပှၤကကတိၤနတၢ်မၤလီၤလးတဖၣ်အစိအကမီၤ,
ဒီးယကတဲဖျါနတၢ်ဒိၣ်တၢ်ထီန့ၣ်လီၤ.
7 \q3 အဝဲသ့ၣ်ကစံးကကတိၤဝဲလၢနတၢ်မၤဂ့ၤအါအါကလဲာ်အဂ့ၢ်
ဒီးကသးဝံၣ်ထီၣ်တၢ်ဘၣ်ဃးဒီး
နတၢ်သးကညီၤအဂ့ၢ်န့ၣ်လီၤ.
8 ယွၤသူၣ်ကညီၤသးကညီၤတၢ်,
ဒီးသူၣ်အိၣ်သးအိၣ်တၢ်, ဒီးအသးထီၣ်ကီ,
ဒီးအဘျုးအဖှိၣ်အိၣ်ဒိၣ်နီၢ်မးလီၤ.
9 ယွၤန့ၣ်ဂ့ၤဝဲလၢပှၤခဲလၢာ်အဂီၢ်,
ဒီးအတၢ်သးကညီၤန့ၣ်အိၣ်ဝဲလၢကယဲၢ်တၢ်လၢ
အတ့လီၤဝဲခဲလၢာ်အဂီၢ်န့ၣ်လီၤ.
10 ယွၤဧၢ, နတၢ်မၤခဲလၢာ်ကစံးထီၣ်ပတြၢၤနၤ,
ဒီးနပှၤစီဆှံခဲလၢာ်ကစံးထီၣ်ပတြၢၤနၤလီၤ.
11 အဝဲသ့ၣ်ကကတိၤနဘီနမုၢ်
အလၤကပီၤအဂ့ၢ်အကျိၤ,
ဒီးကစံးဘၣ်တဲဘၣ်နစိနကမီၤအဂ့ၢ်အကျိၤ,
12 ဒ်သိးပှၤကိးဂၤဒဲးကသ့ၣ်ညါနတၢ်မၤဖးဒိၣ်တဖၣ်
ဒီးနဘီနမုၢ်အတၢ်ကဟုကညီၢ်
အလၤကပီၤန့ၣ်လီၤ.
13 နတၢ်ပၢတၢ်ပြးန့ၣ်အိၣ်ဝဲလီၤထူလီၤယိာ်
ဒီးနမ့ၢ်စီၤပၤအစိၤစိၤအဃၣ်ဃၣ်န့ၣ်လီၤ.
ယွၤန့ၣ်တီဒီးအတၢ်အၢၣ်လီၤတဖၣ်,
အဝဲအိၣ်ဒီးတၢ်သးကညီၤလၢ
အတၢ်မၤခဲလၢာ်အပူၤလီၤ.
14 အဝဲမၤစၢၤပှၤလၢအအိၣ်လၢတၢ်ကိၢ်တၢ်ဂီၤအပူၤ
ဒီးအဝဲဝံၢ်ထီၣ်ပှၤလၢအလီၤဃံၤတဖၣ်လီၤ.
15 ကယဲၢ်တၢ်အိၣ်ဒီးအသးသမူခဲလၢာ်
ကွၢ်ထီၣ်နၤလၢတၢ်မုၢ်လၢ်အပူၤ,
ဒီးနဟ့ၣ်အဝဲသ့ၣ်လၢတၢ်အီၣ်ဖဲ
အဝဲသ့ၣ်လိၣ်ဘၣ်ဝဲဒၣ်န့ၣ်လီၤ.
16 နဟ့ၣ်အဝဲသ့ၣ်လၢလၢပှဲၤပှဲၤ
ဒီးဒုးသူၣ်မံသးမံအတၢ်လိၣ်ခဲလၢာ်န့ၣ်လီၤ.
17 ယွၤန့ၣ်တီဝဲလိၤဝဲလၢအတၢ်မၤခဲလၢာ်အပူၤ
ဒီးအိၣ်ဒီးတၢ်သးကညီၤလၢ
အတၢ်မၤခဲလၢာ်အပူၤလီၤ.
18 ကယဲၢ်ပှၤလၢအကိးထီၣ်အီၤ,
ပှၤလၢအကိးထီၣ်အီၤလၢတၢ်မ့ၢ်တၢ်တီအပူၤန့ၣ်
အဝဲအိၣ်ဘူးဒီးအီၤလီၤ.
19 အဝဲမၤလၢပှဲၤပှၤလၢအမၤလၤကပီၤအီၤတဖၣ်
အတၢ်လိၣ်,
အဝဲနၢ်ဟူအဝဲသ့ၣ်အတၢ်ကိးထီၣ်ဒီး
အုၣ်က့ၤခီၣ်က့ၤအဝဲသ့ၣ်လီၤ.
20 ယွၤပာ်မူပှၤလၢအအဲၣ်အီၤခဲလၢာ်,
မ့မ့ၢ်အဝဲကမၤဟးဂီၤ
ပှၤတတီတလိၤခဲလၢာ်န့ၣ်လီၤ.
21 ယထးခိၣ်ကကတိၤတၢ်စံးထီၣ်ပတြၢၤယွၤ,
ဒီးကယဲၢ်တၢ်ဖံးတၢ်ညၣ်ခဲလၢာ် ကစံးထီၣ်ပတြၢၤ
အမံၤစီဆှံအစိၤစိၤအဃၣ်ဃၣ်လီၤ.