စံးထီၣ်ပတြၢၤ 140
1 ယွၤဧၢ, မၤပူၤဖျဲးလၢ်ယၤလၢပှၤအအၢအသီ,
ပၢၤယၤလၢပှၤစုဆူၣ်ခီၣ်တကးအစုပူၤန့ၣ်တက့ၢ်.
2 အဝဲသ့ၣ်တဖၣ်န့ၣ်ကူၣ်ထီၣ်တၢ်အၢတၢ်သီလၢ
အသးကံၢ်ပူၤ ဒီးထိၣ်ဟူးထိၣ်ဂဲၤ
တၢ်အ့ၣ်လိာ်ဆိးက့လိာ်တဖၣ်တဘိယူၢ်ဃီန့ၣ်လီၤ.
3 အပျ့ၤသ့ၣ်တဖၣ်လီၤဂာ်ဒ်ဂုၢ်လၢအဖျးသံတၢ်,
ဒီးအတၢ်ကတိၤတဖၣ်လီၤဂာ်ဒ်
ဂုၢ်သီအစုၣ်အသိးန့ၣ်လီၤ. စ့လၤ
4 ယွၤဧၢ, ကဟုကယာ်ဒီးမၤပူၤယၤလၢ
ပှၤတတီတလိၤအစုပူၤ,
ပၢၤဃာ်ယၤလၢပှၤစုဆူၣ်ခီၣ်တကး
လၢအကူၣ်ထီၣ်တၢ်လီၤဃံၤလၢယဂီၢ်န့ၣ်တက့ၢ်.
5 ပှၤလၢအပာ်ထီၣ်ထီအသးတဖၣ်
ပာ်လီၤပျံၤသကွီၤခူသူၣ်လၢယဂီၢ်,
ဒီးဒါလီၤပှာ်ဧိၤစၤဧိၤလၢကျဲလိၤ,
အဝဲသ့ၣ်ဆဲထီၣ်ထုလၢယဂီၢ်လီၤ. စ့လၤ
6 ယစံးဘၣ်ယွၤ, “နမ့ၢ်ယကစၢ်ယွၤလီၤ. ယွၤဧၢ,”
ကနၣ်ယဃ့ကညးတၢ်အသီၣ်န့ၣ်တက့ၢ်.
7 ယယွၤ, ပၢဘၣ်တၢ်ခဲလၢာ်, ယတၢ်အုၣ်က့ၤခီၣ်က့ၤကစၢ်ဧၢ,
နကဟုကယာ်တ့ၢ်လံယၤလၢ
တၢ်ဒုးသုးအပူၤန့ၣ်လီၤ.
8 ယွၤဧၢ, ပှၤတတီတလိၤအတၢ်ဆၢန့ၢ်တဖၣ်န့ၣ်
ဟ့ၣ်လီၤအီၤတဂ့ၤ.
မ်အကူၣ်ထီၣ်တၢ်အၢန့ၣ်သုတကဲထီၣ်တၢ်တဂ့ၤ. စ့လၤ
9 ပျဲယဒုၣ်ယဒါတဖၣ် မၤနၢၤယၤတဂ့ၤ,
မ်အတၢ်ကတိၤမၤပျံၤမၤဖုးထီဒါယၤတဖၣ်န့ၣ်
လီၤဘၣ်ကဒါက့ၤလၢအလိၤတက့ၢ်.
10 မ်မ့ၣ်အူကဖးလၢဂီၤကဲၤလီၤတဲာ်လၢအလိၤ,
မ်အဘၣ်တၢ်တ့ၢ်လီၤကွံာ်အီၤဆူတၢ်ပူၤတပူၤ,
ဒီးအသုတဟဲက့ၤထီၣ်က့ၤနီတစုလၢၤတဂ့ၤ.
11 မ်ပှၤလၢအကတိၤခဲၣ်သူခဲၣ်ဂီၤတၢ်တဖၣ်,အသုတအိၣ်
ဂၢၢ်ဆိးကျၢၤဘၣ်လၢထံဧိၤကီၢ်ဧိၤပူၤန့ၣ်တဂ့ၤ.
မ်တၢ်တတၢးတနါမၤဒၢၣ်ကွံာ်
ပှၤမၤဆူၣ်မၤစိးတၢ်တဖၣ်န့ၣ်တက့ၢ်.
12 ယွၤဧၢ, ယသ့ၣ်ညါလၢ
နဒီဒၣ်အိၣ်ပှိၤပှၤဖှီၣ်ဖိယာ်ဖိ အတၢ်ဂ့ၢ်တၢ်ကျိၤ,
ဒီးပှၤလိၣ်ဘၣ်တၢ်မၤစၢၤ
အတၢ်ခွဲးတၢ်ယာ်တဖၣ်န့ၣ်လီၤ.
13 မ့ၢ်မးပှၤအတီအလိၤကစံးထီၣ်ပတြၢၤနမံၤ,
ပှၤအတီအလိၤကအိၣ်ဝဲဆိးဝဲလၢနမဲာ်ညါလီၤ.