စံးထီၣ်ပတြၢၤ 139
1 ယွၤဧၢ, နဃုကွၢ်ထံယၤဒီးနသ့ၣ်ညါယၤလီၤ.
2 ယဆ့ၣ်နီၤဒီးယဆၢထၢၣ်န့ၣ်နသ့ၣ်ညါလီၤ.
နနၢ်ပၢၢ်ယတၢ်ဆိကမိၣ်တဖၣ်လၢအယံၤလီၤ.
3 နထံၣ်တ့ၢ်လံယကျဲဒီးယတၢ်မံလီၤ.
ဒီးနသ့ၣ်ညါယကျဲဧိၤကပူၤဧိၤခဲလၢာ်န့ၣ်လီၤ.
4 တချုးလၢယကတိၤတၢ်ဒံးဘၣ်န့ၣ်,
နသ့ၣ်ညါတ့ၢ်လံတၢ်လၢယကစံးကတိၤန့ၣ်လီၤ.
5 နအိၣ်ဝးတရံးယၤကိးကပၤဒဲး,
နကဟုဘံၣ်ကယာ်ဘၢယၤလၢ
နတၢ်စိတၢ်ကမီၤန့ၣ်လီၤ.
6 နတၢ်သ့ၣ်ညါဒ်အံၤလီၤလးကဲၣ်ဆိးလၢယဂီၢ်,
အိၣ်ထီၣ်ထီဝဲ, ယနၢ်ပၢၢ်ယဲတသ့ဘၣ်.
7 ယကလဲၤပူၤကွံာ်လၢနသးဆူလဲၣ်.
မ့တမ့ၢ်ယကဃ့ၢ်ကွံာ်လၢနမဲာ်ညါဆူလဲၣ်.
8 ယမ့ၢ်လဲၤထီၣ်ဆူမူခိၣ်ဒီးနအိၣ်ဖဲန့ၣ်,
ယမ့ၢ်ဒါလီၤယလီၢ်မံလၢပျုၤပူၤဒီး
နအိၣ်ဖဲန့ၣ်လီၤ.
9 ယမ့ၢ်ဟံးန့ၢ်မုၢ်ဂီၤအဒံးဆ့,
ဒီးအိၣ်လၢပီၣ်လဲၣ်အကတၢၢ်န့ၣ်ဒီး,
10 ဖဲန့ၣ်ဒၣ်လဲာ်နစုကဆှၢယၤ,
ဒီးနစုထွဲကဖီၣ်ဃာ်ယၤလီၤ.
11 ယမ့ၢ်စံး, “မ်တၢ်ခံးမၤဘံၣ်မၤဘၢယၤ,
ဒီးတၢ်ကပီၤအိၣ်ဝးတရံးယၤ
ကဲထီၣ်မုၢ်နၤတက့ၢ်.” ဒၣ်လဲာ်,
12 တၢ်ခံးတၢ်နၤန့ၣ်တခံးဘၣ်ဝဲလၢနဂီၢ်ဘၣ်.
မုၢ်နၤကပီၤဝဲဒ်မုၢ်ဆါအသိး,
အဂ့ၢ်ဒ်အံၤ, တၢ်ခံးမၤသးဒီးနၤဒ်
13 အဂ့ၢ်ဒ်အံၤ, နမၤတၢ်အက့ၢ်အဂီၤလၢယပူၤတဖၣ်,
နဒုးကဲထီၣ်ယၤလၢယမိၢ်အဟၢဖၢပူၤလီၤ.
14 ယစံးထီၣ်ပတြၢၤနၤ, အဂ့ၢ်ဒ်အံၤ
နမ့ၢ်တၢ်လီၤပျံၤအလီၢ်
နတၢ်မၤတဖၣ်န့ၣ် မ့ၢ်တၢ်လီၤကမၢကမၣ်ဒီး တၢ်လီၤလးလီၤ.
နသ့ၣ်ညါလၢလၢပှဲၤပှဲၤန့ၣ်လီၤ.
15 ဖဲယဃံတဖၣ်အက့ၢ်အဂီၤဘၣ်တၢ်ဒုးကဲထီၣ်အီၤ,
ပာ်ဖှိၣ်အီၤလီၤတံၢ်လီၤဆဲးလၢ ယမိၢ်အဒၢလီၢ်ပူၤ,
ဖဲယဒိၣ်ထီၣ်လၢ တၢ်ခူသူၣ်အပူၤဖဲန့ၣ်န့ၣ်, နသ့ၣ်ညါလၢယအိၣ်ဖဲန့ၣ်,
16 နထံၣ်တ့ၢ်ယၤတချုးလၢယအိၣ်ဖျဲၣ်ထီၣ်,
မုၢ်နံၤတဖၣ်လၢအဘၣ်တၢ်ပာ်အီၤလၢယဂီၢ်န့ၣ်
အိၣ်ကွဲးတ့ၢ်လံအသးလၢနလံာ်ပူၤ,
တချုးလၢတၢ်သ့ၣ်တဖၣ်
အိၣ်ထီၣ်ဒံးဘၣ်ဒၣ်လဲာ်န့ၣ်လီၤ.
17 ကစၢ်ယွၤဧၢ, နတၢ်ဆိကမိၣ်တဖၣ်န့ၣ်
မ့ၢ်တၢ်လုၢ်ဒိၣ်ပှ့ၤဒိၣ်လၢယဂီၢ်ဆံးဒိၣ်လဲၣ်.
မ့ၢ်တၢ်လၢအဒိၣ်ဝဲမုၢ်ဝဲနးမးလဲၣ်.
18 ယမ့ၢ်ဘၣ်ဂံၢ်အီၤဒီး, အဝဲသ့ၣ်
အနီၣ်ဂံၢ်ကအါန့ၢ်ဒံး မဲးဧိၤဟီၣ်ဧိၤန့ၣ်လီၤ.
တုၤယဖုးသံနီၣ်ထီၣ်ဒီး ယအိၣ်ဒံးဒီးနၤလီၤ.
19 ကစၢ်ယွၤဧၢ, ယသးအိၣ်မးလၢ နကမၤသံပှၤ တတီတလိၤန့ၣ်လီၤ.
ယသးအိၣ်မးလၢ ပှၤမၤဆူၣ်မၤစိးတၢ်တဖၣ် ကဟးဖးဒီးယၤန့ၣ်လီၤ.
20 အဝဲသ့ၣ်စံးအၢစံးသီတၢ်လၢနဂ့ၢ်
ဒီးအဝဲသ့ၣ်စံးကတိၤတၢ်အၢတၢ်သီ
ထီဒါနမံၤန့ၣ်လီၤ.
21 ယွၤဧၢ, မ့ၢ်ယတသးဟ့ဘၣ်ပှၤလၢ
အသးဟ့နၤန့ၣ်ဘၣ်ဧါ,
ဒီးမ့ၢ်ယတသးဘၣ်အၢဘၣ်ပှၤလၢ
အဂဲၤထၢၣ်ထီဒါနၤန့ၣ်ဘၣ်ဧါ.
22 ယသးဟ့အဝဲသ့ၣ်လၢာ်လၢာ်ဆ့ဆ့,
ယပာ်အဝဲသ့ၣ်လၢယဒုၣ်ယဒါတဖၣ်န့ၣ်လီၤ.
23 ကစၢ်ယွၤဧၢ, ဃုကွၢ်ယၤ, ဒီးသ့ၣ်ညါယသးတက့ၢ်.
မၤကွၢ်ယၤ, ဒီးသ့ၣ်ညါ
ယတၢ်ဆိကမိၣ်တဖၣ်န့ၣ်တက့ၢ်.
24 ဒီးကျဲအအၢလၢယပူၤမ့ၢ်အိၣ်, တအိၣ်လဲၣ်န့ၣ်ကွၢ်,
ဒီးဆှၢယၤလၢကျဲအထူအယိာ်အပူၤတက့ၢ်.