စံးထီၣ်ပတြၢၤ 115
1 ထဲဒၣ်နၤတဂၤဧိၤ, ယွၤဧၢ, ထဲဒၣ်နၤတဂၤဧိၤ
မ်တၢ်ဟ့ၣ်နၤလၢတၢ်လၤကပီၤ
ဒီးတမ့ၢ်ဘၣ်ဆူပှၤဘၣ်.
အဂ့ၢ်ဒ်အံၤ, မ့ၢ်လၢနတၢ်အဲၣ်ဂၢၢ်ကျၢၤ
ဒီးနတၢ်သူၣ်တီသးလိၤအဃိန့ၣ်လီၤ.
2 ဘၣ်မနုၤလၢပှၤကလုာ်တဖၣ်စံးဝဲ
“အကစၢ်ယွၤအိၣ်ဖဲလဲၣ်” န့ၣ်လဲၣ်.
3 ပကစၢ်အိၣ်လၢမူခိၣ်န့ၣ်လီၤ.
ဒီးဖဲဒၣ်အသးန့ၣ်မၤဝဲဒၣ်လီၤ.
4 အဝဲသ့ၣ်အတၢ်ဂီၤတၢ်ဖီၣ်တဖၣ်န့ၣ်
ဘၣ်တၢ်မၤအီၤလၢစ့ဒီးထူဒီး
မ့ၢ်ပှၤကညီအတၢ်မၤလၢအစုတဖၣ်န့ၣ်လီၤ.
5 အဝဲသ့ၣ်အိၣ်ဒီးအထးခိၣ်,
ဘၣ်ဆၣ်ကတိၤတၢ်တသ့ဘၣ်.
အိၣ်ဒီးအမဲာ်ချံတဖၣ်
ဘၣ်ဆၣ်ထံၣ်တၢ်တသ့ဘၣ်.
6 အဝဲသ့ၣ်အိၣ်ဒီးအနၢ်တဖၣ်,
ဘၣ်ဆၣ်နၢ်ဟူတၢ်တသ့ဘၣ်.
အိၣ်ဒီးအနါဒ့တဖၣ်
ဘၣ်ဆၣ်နၢကွၢ်တၢ်တသ့ဘၣ်.
7 အဝဲသ့ၣ်အိၣ်ဒီးအစုတဖၣ်,
ဘၣ်ဆၣ်ကလၢၢ်ကွၢ်တၢ်တသ့ဘၣ်.
အိၣ်ဒီးအခီၣ်တဖၣ်
ဘၣ်ဆၣ်ဟးဝဲတသ့ဘၣ်.
အဝဲသ့ၣ်မၤသီၣ်တၢ်အကလုၢ်တသ့ဘၣ်.
8 မ်ကယဲၢ်ပှၤလၢအတ့အဝဲသ့ၣ်ဒီးနာ်တၢ်လၢအပူၤန့ၣ်
ကဲထီၣ်လီၤဂာ်ဒီးတၢ်ဂီၤတဖၣ်လၢ
အဝဲသ့ၣ်တ့တ့ၢ်ဝဲန့ၣ်တက့ၢ်.
9 သုဝဲအံၣ်စရ့လးအပှၤဂီၢ်မုၢ်သ့ၣ်ဧၢ,
သန့ၤသုသးလၢယွၤတက့ၢ်.
အဝဲဒၣ်မၤစၢၤသုဒီးကဟုဘံၣ်ကယာ်ဘၢသုလီၤ.
10 သုဝဲကစၢ်ယွၤအပှၤလုၢ်တၢ်အခိၣ်သ့ၣ်ဧၢ,
သန့ၤသုသးလၢယွၤတက့ၢ်.
အဝဲဒၣ်မၤစၢၤသုဒီးကဟုဘံၣ်ကယာ်ဘၢသုလီၤ.
11 ပှၤလၢအဘူၣ်ထီၣ်ဘါထီၣ်ယွၤခဲလၢာ်သ့ၣ်ဧၢ,
သန့ၤသုသးလၢယွၤတက့ၢ်.
အဝဲဒၣ်မၤစၢၤသုဒီးကဟုဘံၣ်ကယာ်ဘၢသုလီၤ.
12 ယွၤသ့ၣ်နီၣ်ထီၣ်က့ၤပှၤဒီးကဆိၣ်ဂ့ၤပှၤလီၤ.
အဝဲကဆိၣ်ဂ့ၤအံၣ်စရ့လးအပှၤဂီၢ်မုၢ်
ဒီးအပှၤလုၢ်တၢ်အခိၣ်ခဲလၢာ်န့ၣ်လီၤ.
13 အဝဲကဆိၣ်ဂ့ၤပှၤကိးဂၤဒဲးလၢအမၤလၤကပီၤအီၤ,
ပှၤအဒိၣ်ဒီးပှၤအဆံးဒ်သိးသိးန့ၣ်လီၤ.
14 မ်ယွၤဟ့ၣ်သုလၢဖိတဖၣ်
သုဝဲဒီးသုစၢၤသုသွဲၣ်တဖၣ်တက့ၢ်.
15 မ်သုဘၣ်ဆိၣ်ဂ့ၤလၢယွၤ,
လၢအတ့လီၤမူခိၣ်ဒီးဟီၣ်ခိၣ်န့ၣ်တက့ၢ်.
16 မူခိၣ်န့ၣ်ဘၣ်ဃးဒၣ်ဒီးယွၤတဂၤဧိၤန့ၣ်လီၤ.
မ့မ့ၢ်ဟီၣ်ခိၣ်န့ၣ်ဟ့ၣ်လီၤဝဲဆူပှၤကညီလီၤ.
17 ယွၤတဘၣ်တၢ်စံးထီၣ်ပတြၢၤအီၤလၢပှၤသံ,
ဒီးပှၤတဂၤလၢ်လၢ်လၢအလဲၤလီၤဆူ
တၢ်ဘှ့ၣ်တၢ်ဘှီၣ်အကီၢ်န့ၣ်ဘၣ်.
18 မ့မ့ၢ်ပဝဲ, ပှၤလၢအမူသ့ၣ်တဖၣ်,
ပကစံးဘျုးစံးဖှိၣ်အီၤ ခဲအံၤဒီးအစိၤစိၤအဃၣ်ဃၣ်လီၤ.
စံးထီၣ်ပတြၢၤယွၤတက့ၢ်.