စံးထီၣ်ပတြၢၤ 116
1 ယအဲၣ်ယွၤကွံယွၤမ့ၢ်လၢ
အဝဲနၢ်ဟူတ့ၢ်လံယကလုၢ်
ဒီးယတၢ်ဃ့ကညးတဖၣ်အဃိန့ၣ်လီၤ.
2 အဂ့ၢ်ဒ်အံၤ, အဝဲဒိကနၣ်ယၤအဃိ,
ယကကိးထီၣ်အီၤတစိၤဒၣ်ယၤန့ၣ်လီၤ.
3 တၢ်သံအတၢ်ပျံၤတၢ်ဖုးအိၣ်ဝးတရံးယၤ,
တၢ်သွၣ်ခိၣ်အတၢ်လီၤပျံၤလီၤဖုး
အိၣ်ဘူးဒီးယၤန့ၣ်လီၤ.
ယပှဲၤလုာ်ကွံာ်ဒီးတၢ်ပျံၤတၢ်ဖုး
ဒီးတၢ်ဘၣ်ယိၣ်ဘၣ်ဘီန့ၣ်လီၤ.
4 အန့ၣ်ဒီးယကိးထီၣ်ယွၤ,
“ယွၤဧၢ, ယဃ့ကညးနၤလီၤ.
5 ယွၤမ့ၢ်တၢ်သးကညီၤဒီးတၢ်တီတၢ်လိၤန့ၣ်လီၤ.
ပကစၢ်ယွၤန့ၣ်မ့ၢ်တၢ်သးကညီၤလီၤ.
6 ယွၤကဟုဘံၣ်ကယာ်ဘၢပှၤလၢ
တၢ်မၤစၢၤအီၤတအိၣ်,
ဒီးဖဲယအိၣ်လၢတၢ်ပျံၤတၢ်ဖုးအလီၢ်န့ၣ်ဒီး
အဝဲအုၣ်က့ၤခီၣ်က့ၤယၤလီၤ.
7 ယသးဧၢ, သးဒ့ဒီတဂ့ၤ
အဂ့ၢ်ဒ်အံၤယွၤမၤဂ့ၤတ့ၢ်လံနၤလံ.
8 ယွၤမၤပူၤဖျဲးတ့ၢ်လံယၤလၢတၢ်သံ,
ဆိကတီၢ်ကွံာ်ယမဲာ်ထံမဲာ်နိတဖၣ်
ဒီးပၢၤဃာ်ယၤလၢတၢ်ဒိးဘၣ်တၢ်မၤနၢၤန့ၣ်လီၤ.
9 လၢတၢ်န့ၣ်အဃိ, ယလဲၤတၢ်လၢယွၤအမဲာ်ညါ,
လၢပှၤမူသ့ၣ်တဖၣ်အဟီၣ်ခိၣ်အပူၤန့ၣ်လီၤ.
10 ယနာ်ဒံးဒၣ်တၢ်,
ဖဲယစံးလၢ “ယဘၣ်တၢ်မၤနးမၤဖှီၣ်ယၤ
ဒိၣ်ဒိၣ်မုၢ်မုၢ်အခါဒၣ်လဲာ်,”
11 ဒီးဖဲယပျံၤတၢ်ဒီးစံး,
“ပနာ်န့ၢ်ပှၤတသ့နီတဂၤဘၣ်”
12 ယကဟ့ၣ်ကၣ်ယွၤလၢအမၤဂ့ၤယၤတဂၤလၢ
တၢ်ခဲလၢာ်အဃိန့ၣ်လၢမနုၤတမံၤလဲၣ်.
13 ယကဟံးန့ၢ်တၢ်အုၣ်က့ၤခီၣ်က့ၤအလီခီ
ဒီးကိးထီၣ်ယွၤအမံၤလီၤ.
14 ယကမၤဘူၣ်ယွၤလၢ တၢ်ဘၣ်ဃးဒီး
ယဆိၣ်တၢ်လၢ အပှၤဂီၢ်မုၢ်ခဲလၢာ်
15 အပှၤစီဆှံတဖၣ်အတၢ်သံန့ၣ်
မ့ၢ်တၢ်လုၢ်ဒိၣ်ပှ့ၤဒိၣ်လၢယွၤအမဲာ်ညါလီၤ.
16 ယွၤဧၢ, ယမ့ၢ်နခ့နပှၤလီၤ.
ယမၤနတၢ်မၤဒ်ယမိၢ်မၤတ့ၢ်ဝဲအသိးန့ၣ်လီၤ.
နအုၣ်က့ၤခီၣ်က့ၤတ့ၢ်လံယၤလၢတၢ်သံန့ၣ်လံ.
17 ယကဟ့ၣ်နၤလၢတၢ်စံးဘျုးစံးဖှိၣ်အတၢ်လုၢ်ထီၣ်
ဒီးကိးထီၣ်ယွၤအမံၤန့ၣ်လီၤ.
18 ယကဟ့ၣ်ယတၢ်အၢၣ်လီၤအီလီၤတဖၣ်
ဆူယွၤလၢအပှၤဂီၢ်မုၢ်ခဲလၢာ်အမဲာ်ညါ,
19 လၢယွၤအဟံၣ်အဂၢၤတဖၣ်အပူၤ,
လၢနပူၤ, ယရူၤၡလ့ၣ်ဧၢ, စံးထီၣ်ပတြၢၤယွၤတက့ၢ်.