စံးထီၣ်ပတြၢၤ 110
1 ယွၤစံးဘၣ်ယကစၢ်စီၤပၤ, “ဆ့ၣ်နီၤလၢယစုထွဲ
တုၤယပာ်နဒုၣ်နဒါတဖၣ်လၢ
နခီၣ်ယီၢ်လီၢ်န့ၣ်တက့ၢ်.
2 ယွၤကမၤလဲၢ်ထီၣ်နစီၤပၤအစိကမီၤ စးထီၣ်လၢစံယိၣ်န့ၣ်လီၤ.
အဝဲစံးဝဲ, “ပၢတၢ်လၢနဒုၣ်နဒါတဖၣ်အဖီခိၣ်တက့ၢ်.”
3 မုၢ်တနံၤလၢနဒုးနဒုၣ်နဒါတဖၣ်န့ၣ်,
နပှၤဂီၢ်မုၢ်ကဟ့ၣ်လီၤအသးလၢ တၢ်သးအိၣ်အပူၤလီၤ.
ဒ်မုၢ်ဂီၤအပစီၤထံအသိး
နပှၤသးစၢ်တဖၣ်ကဟဲဆူနအိၣ်လၢ
ကစၢၢ်စီဆှံတဖၣ်အလိၤလီၤ.
4 ယွၤမၤတၢ်အၢၣ်လီၤသမှံၤသပှၢ်တမံၤဒီး တထုးက့ၤဘၣ်ဝဲဘၣ်.
“နကမ့ၢ်ပှၤလုၢ်တၢ်အခိၣ်တဂၤလီၤထူလီၤယိာ်,
လၢစီၤမၤလကံစဒ့းအပှၤလုၢ်တၢ်အခိၣ်အလုၢ်အလၢ်အပူၤန့ၣ်လီၤ.”
5 ယွၤအိၣ်လၢနစုထွဲတခီလီၤ.
လၢအသးထီၣ်အမုၢ်နံၤန့ၣ်အဝဲကမၤဟးဂီၤကွံာ်
စီၤပၤတဖၣ်န့ၣ်လီၤ.
6 အဝဲကဟ့ၣ်လီၤတၢ်စံၣ်ညီၣ်လၢ
ပှၤကလုာ်တဖၣ်အလိၤ
ဒီးမၤပှဲၤတၢ်ဒုးပျီလၢတၢ်သံစိၣ်တဖၣ်,
ဒီးကမၤနၢၤစီၤပၤတဖၣ်လၢအအိၣ်လၢ
ဟီၣ်ခိၣ်ခဲလၢာ်န့ၣ်လီၤ.
7 စီၤပၤကအိတၢ်လၢထံကျိလၢကျဲကပၤ
ဒီးအဂံၢ်အဘါကဆူၣ်ထီၣ်က့ၤဝဲ,
ဒီးအဝဲကဂဲၤဆၢထၢၣ်လၢတၢ်မၤနၢၤန့ၣ်လီၤ.