စံးထီၣ်ပတြၢၤ 111
1 စံးထီၣ်ပတြၢၤယွၤတက့ၢ်.
ယကစံးဘျုးယွၤလၢယသးဒီဖျၢၣ်ညါ
လၢအပှၤဂီၢ်မုၢ်အတၢ်အိၣ်ဖှိၣ်အပူၤန့ၣ်လီၤ.
2 တၢ်လၢယွၤမၤတဖၣ်န့ၣ်လီၤလးဆံးဒိၣ်လဲၣ်.
ကယဲၢ်ပှၤလၢအဘၣ်သူၣ်ဘၣ်သးလၢ
တၢ်သ့ၣ်တဖၣ်န့ၣ်ဆၢနၢ်ပၢၢ်ဝဲဒၣ်န့ၣ်လီၤ.
3 ကယဲၢ်တၢ်လၢအမၤဝဲတဖၣ်န့ၣ်လၢပှဲၤဝဲဒီးတၢ်လၤတၢ်ကပီၤ ဒီးတၢ်ကဟုကညီၢ်န့ၣ်လီၤ.
အတၢ်တီတၢ်လိၤန့ၣ်မ့ၢ်တၢ်လီၤစိၤလီၤထီလီၤ.
4 ယွၤတပျဲပသးပ့ၤနီၣ်အတၢ်မၤလီၤလးတဖၣ်န့ၣ်ဘၣ်.
အဝဲဒၣ်န့ၣ်သးကညီၤတၢ်ဒီးသးအိၣ်တၢ်လီၤ.
5 အဝဲဒၣ်ဟ့ၣ်လီၤဝဲတၢ်အီၣ်တၢ်အီလၢ
ပှၤလၢအမၤလၤကပီၤအီၤအဂီၢ်န့ၣ်လီၤ.
တသးပ့ၤနီၣ်အတၢ်အၢၣ်လီၤအီလီၤနီတဘျီဘၣ်.
6 အဝဲပာ်ဖျါတ့ၢ်လံအစိအကမီၤဆူ
အပှၤဂီၢ်မုၢ် ခီဖျိအဟ့ၣ်လီၤအဝဲသ့ၣ်
လၢပှၤတခီဘီမုၢ်ဖိတဖၣ်အထံဧိၤကီၢ်ဧိၤန့ၣ်လီၤ.
7 လၢအတၢ်မၤခဲလၢာ်အပူၤအဝဲအိၣ်ဒီး
တၢ်သူၣ်တီသးလိၤဒီးတၢ်မ့ၢ်တၢ်တီန့ၣ်လီၤ.
ကယဲၢ်အတၢ်မၤလိာ်ခဲလၢာ်တဖၣ်န့ၣ်
ဘၣ်တၢ်နာ်န့ၢ်အီၤသ့ဝဲဒၣ်န့ၣ်လီၤ.
8 အိၣ်ဂၢၢ်ဆိးကျၢၤလီၤထူလီၤယိာ်
ဒီးဘၣ်တၢ်ဟ့ၣ်လီၤတ့ၢ်လံ
တၢ်မ့ၢ်တၢ်တီဒီးတၢ်တီတၢ်လိၤလၢအပူၤန့ၣ်လီၤ.
9 အဝဲမၤထူၣ်ဖျဲးအပှၤဂီၢ်မုၢ်,
ဒီးမၤတၢ်အၢၣ်လီၤအီလီၤအထူအယိာ်တမံၤဒီး
အဝဲသ့ၣ်န့ၣ်လီၤ.
အမံၤန့ၣ်မ့ၢ်ဝဲတၢ်စီဆှံ
ဒီးတၢ်လီၤပျံၤအလီၢ်န့ၣ်လီၤ.
10 တၢ်ကူၣ်သ့အခီၣ်ထံးန့ၣ် မ့ၢ်တၢ်ပျံၤယွၤလီၤ.
ကယဲၢ်ပှၤလၢအတိၢ်န့ၢ်ဝဲခဲလၢာ်န့ၣ်
အိၣ်ဒီးအသးလၢအနၢ်ပၢၢ်တၢ်ဂ့ၤဂ့ၤလီၤ.
အတၢ်စံးထီၣ်ပတြၢၤန့ၣ် အိၣ်ဂၢၢ်ဆိးကျၢၤ လီၤစိၤလီၤထီလီၤ.