စံးထီၣ်ပတြၢၤ 109
1 ကစၢ်ယွၤလၢ ယစံးထီၣ်ပတြၢၤအီၤဧၢ,
အိၣ်ဘှီၣ်ကလာ်တဂ့ၤ.
2 အဂ့ၢ်ဒ်အံၤ, ပှၤတတီတလိၤဒီးပှၤလီတၢ်
အထးခိၣ်တဖၣ်အဲၣ်ဒိးထီဒါယၤ,
ကတိၤထီဒါယၤလၢ
အပျ့ၤကဘျံးကဘျၣ်တဖၣ်န့ၣ်လီၤ.
3 အဝဲသ့ၣ်ကတိၤအၢကတိၤသီတၢ်လၢ
ယဂ့ၢ်ယကျိၤ
ဒီးထီဒါယၤလၢ တၢ်ဂ့ၢ်တအိၣ်နီတမံၤဘၣ်အပူၤန့ၣ်လီၤ.
4 ယအဲၣ်အဝဲသ့ၣ်ဒီးယထုကဖၣ်တ့ၢ်လၢအဝဲသ့ၣ်အဂီၢ်
ဒၣ်လဲာ်အဝဲသ့ၣ်ထီဒါယၤလီၤ.
5 အဝဲသ့ၣ်ဟ့ၣ်ဆၢက့ၤယၤတၢ်အၢလၢတၢ်ဂ့ၤအဂီၢ်
ဒီးတၢ်သးဟ့လၢတၢ်အဲၣ်အဂီၢ်လီၤ.
6 ဃုထၢစံၣ်ညီၣ်ကွီၢ်တတီအလိၤတနီၤလၢ
ကသမံသမိးယဒုၣ်ယဒါဒီး
မ်အဝဲဒၣ်အဒုၣ်အဒါတဖၣ်အကျါတဂၤလိာ်ဘၢလိာ်ကွီၢ်တက့ၢ်.
7 မ်တၢ်သမံသမိးဒီး ထံၣ်န့ၢ်အတၢ်ကမၣ်တက့ၢ်.
မ်အတၢ်ထုကဖၣ်ဒၣ်လဲာ်ဘၣ်
တၢ်ပာ်အီၤဒ် တၢ်ကမၣ်အသိးတက့ၢ်.
8 တယံာ်လၢၤဘၣ်ဒီး မ်အတၢ်အိၣ်မူကတၢၢ်ကွံာ်တက့ၢ်.
မ်ပှၤအဂၤတဂၤဟံးန့ၢ်ကွံာ်အတၢ်မၤတက့ၢ်.
9 မ်အဖိတဖၣ်ကဲထီၣ်ပှၤဖိၣ်ဃဲတဖၣ်,
ဒီးအမါကဲထီၣ်ပှၤမုၣ်ကမဲတက့ၢ်.
10 မ်အဖိတဖၣ်ဟးဝ့ၤဝီၤဒီးဃ့အီၣ်တၢ်,
မ်အဘၣ်တၢ်ဟီထီၣ်ကွံာ်အီၤလၢတၢ်ဟးဂီၤအလီၢ်တဖၣ်လၢအအိၣ် ဝဲဆိးဝဲန့ၣ်တက့ၢ်.
11 မ်ဒ့ၣ်ကမၢ်ကစၢ်တဖၣ်ဟံးန့ၢ်တၢ်အိၣ်ဒီးအီၤခဲလၢာ်,
မ်ပှၤတခီဘီမုၢ်ဖိဂုာ်န့ၢ်အတၢ်ဖံးတၢ်မၤ
အတၤသၣ်တဖၣ်န့ၣ်တက့ၢ်.
12 မ်ပှၤသုတသးကညီၤအီၤမ့ၢ်ဂ့ၤ, ကဟုကယာ်အဖိဖိၣ်ဃဲလၢ
အအိၣ်တ့ၢ်မ့ၢ်ဂ့ၤ နီတဂၤတဂ့ၤ.
13 မ်အစၢၤအသွဲၣ်ဘၣ်တၢ်ဒီၣ်တဲာ်ကွံာ်အီၤ,
မ်အမံၤဘၣ်တၢ်တြူာ်ကွံာ်အီၤလၢ
ပှၤလၢခံတစိၤအကျါန့ၣ်တက့ၢ်.
14 မ်ယွၤသ့ၣ်နီၣ်ထီၣ်က့ၤ
အပၢ်လၢပျၢၤတဖၣ်အတၢ်အၢ,
ဒီးအမိၢ်တဖၣ်အတၢ်ဒဲးဘး
သုတဘၣ်တၢ်ပျၢ်ကွံာ်အီၤနီတစုတဂ့ၤ.
15 မ်ယွၤသ့ၣ်နီၣ်ထီၣ်က့ၤအဝဲသ့ၣ်အတၢ်ဒဲးဘးတဖၣ်
ထီဘိန့ၣ်တက့ၢ်.
ဘၣ်ဆၣ်,အဝဲသ့ၣ်အနီၢ်ကစၢ်ဒၣ်ဝဲန့ၣ်
မ်အဘၣ်တၢ်သးပ့ၤနီၣ်ကွံာ်အီၤ
16 အဂ့ၢ်ဒ်အံၤ, အဝဲတဆိကမိၣ်ထီၣ်
တၢ်မၤဂ့ၤအဂ့ၢ်နီတစုဘၣ်.
အဝဲမၤအၢမၤနးဒီးမၤသံပှၤဖှီၣ်ဖိယာ်ဖိ,
ပှၤလိၣ်ဘၣ်တၢ်မၤစၢၤဒီးပှၤလၢတၢ်မၤစၢၤအီၤ
တအိၣ်ဘၣ်န့ၣ်လီၤ.
17 အဝဲဘၣ်အသးလၢကဆိၣ်အၢတၢ်လီၤ.
မ်တၢ်ဆိၣ်အၢဘၣ်ကဒါက့ၤအီၤတက့ၢ်.
အဝဲတဘၣ်သူၣ်ဘၣ်သးတၢ်ဆိၣ်ဂ့ၤဘၣ်.
မ်တၢ်ဆိၣ်ဂ့ၤအိၣ်ယံၤဒီးအီၤတက့ၢ်.
18 အဝဲဆိၣ်အၢတၢ်ဒ်သိးဒၣ်ညီနုၢ်
သိးထီၣ်ဆ့ကၤန့ၣ်လီၤ.
မ်အတၢ်ဆိၣ်အၢဒၣ်ဝဲတဖၣ် နုာ်ဆူအနီၢ်ခိအပူၤဒ်ထံအသိး
ဒီးဆူအဃံအကွဲတဖၣ်အပူၤဒ်သိအသိးန့ၣ်တက့ၢ်.
19 မ်အကျၢၢ်ဘၢအီၤဒ် တၢ်ကူတၢ်သိးတဖၣ်ဒီး
ကံာ်တူာ်အယီၢ်ဒ့ဒ်
20 ယွၤဧၢ, စံၣ်ညီၣ်ယဒုၣ်ယဒါတဖၣ်လၢကျဲဒ်န့ၣ်,
ပှၤတဖၣ်လၢအစံးအၢထီဒါယၤ
ဒ်သိးန့ၣ်တက့ၢ်.
21 ဘၣ်ဆၣ်နဲဒၣ်ယယွၤ, စီၤပၤဖးဒိၣ်ဧၢ,
မၤစၢၤယၤဒ်နအၢၣ်လီၤတ့ၢ်နဲအသိး
ဒီးမၤပူၤဖျဲးယၤလၢ နတၢ်အဲၣ်အတၢ်ဂ့ၤတၢ်ဝါ
အဃိန့ၣ်တက့ၢ်.
22 အဂ့ၢ်ဒ်အံၤ, ယဲဒၣ်အံၤယမ့ၢ်ပှၤဖှီၣ်ဖိယာ်ဖိ
ဒီးပှၤလိၣ်ဘၣ်တၢ်မၤစၢၤ
ဒီးယသးဘၣ်ဒိတုၤလၢယသးအကံၢ်အလဲအပူၤလီၤ.
23 ဘူးလၢယကလီၤမၢ်ကွံာ်ဒ်မုၢ်ဟါအတၢ်ကဒုအသိး,
ဒီးယဘၣ်တၢ်အူဒံကွံာ်ယၤဒ်
ဒွဲၣ်အၢ်ဘၤအသိးန့ၣ်လီၤ.
24 ယခီၣ်လ့ၢ်ခိၣ်တဖၣ်အဂံၢ်အဘါစၢ်လီၤဝဲလၢ
တၢ်အီၣ်တအိၣ်ဘၣ်အဃိ,
ဒီးယဖှံၣ်လီၤယဲၤလီၤကွံာ်လီၤ.
25 ယကဲထီၣ်တၢ်ဒုၣ်ဒွဲၣ်အလီၢ်လၢပှၤထီဒါယၤတဖၣ်အဂီၢ်ဒီး တုၤအဝဲသ့ၣ်ထံၣ်ယၤန့ၣ်,
အဝဲသ့ၣ်ကျၢၢ်ကျာ်အခိၣ်တဖၣ်လီၤ.
26 ယွၤ, ယကစၢ်ယွၤဧၢ, မၤစၢၤယၤတက့ၢ်.
အုၣ်က့ၤခီၣ်က့ၤယၤဒ်
နတၢ်အဲၣ်ဂၢၢ်ကျၢၤအသိးန့ၣ်တက့ၢ်.
27 ဒုးသ့ၣ်ညါယဒုၣ်ယဒါတဖၣ်လၢနမ့ၢ်ပှၤတဂၤလၢ
အအုၣ်ခီၣ်က့ၤယၤန့ၣ်တက့ၢ်.
28 အဝဲသ့ၣ်ကဆိၣ်အၢယၤ,
ဘၣ်ဆၣ်နကဆိၣ်ဂ့ၤယၤလီၤ.
မ်ပှၤမၤအၢမၤနးယၤတဖၣ်
ဘၣ်တၢ်မၤနၢၤအီၤတက့ၢ်.
ဒီးမ်ယၤ, နခ့နပှၤသးခုဘၣ်န့ၣ်တက့ၢ်.
29 မ်ယဒုၣ်ယဒါတဖၣ်ဘၣ်တၢ်ကျၢၢ်ဘၢအီၤလၢ
တၢ်မၤမဲာ်ဆှးန့ၣ်တက့ၢ်.
မ်အဝဲသ့ၣ်ကသိးထီၣ်အတၢ်မဲာ်ဆှး
လီၤဂာ်ဒ်ဆ့ကၤတဘ့ၣ်အသိးန့ၣ်တက့ၢ်.
30 ယကစံးဘျုးယွၤလၢယကလုၢ်ဖးဒိၣ်လီၤ.
ယကစံးထီၣ်ပတြၢၤအီၤလၢပှၤအါဂၤအကျါလီၤ.
31 အဂ့ၢ်ဒ်အံၤ, အဝဲဂဲၤဆၢထၢၣ်လၢ
ပှၤလိၣ်ဘၣ်တၢ်မၤစၢၤအစုထွဲ
ဒ်သိးကအုၣ်က့ၤခီၣ်က့ၤအီၤလၢ
ပှၤလၢအစံၣ်ညီၣ်အီၤဆူတၢ်သံအဂီၢ်န့ၣ်လီၤ.