စံးထီၣ်ပတြၢၤ 108
(စံး.၈၇:၇-၁၁, ၆၀:၅-၁၂)
1 ကစၢ်ယွၤဧၢ,
ယအိၣ်ဒီးတၢ်နာ်န့ၢ်နၤလၢာ်လၢာ်ဆ့ဆ့လီၤ.
ယကသးဝံၣ်တၢ်ဒီးစံးထီၣ်ပတြၢၤနၤလီၤ.
ယသးဧၢ, ဂဲၤထၢၣ်တက့ၢ်.
2 ဂဲၤထၢၣ်, ယသီတူၢ်ဒီးတနၢ်သ့ၣ်ဧၢ,
ယကထိၣ်ဂဲၤထီၣ်မုၢ်န့ၣ်လီၤ.
3 ယွၤဧၢ, လၢပှၤကလုာ်တဖၣ်အကျါန့ၣ်
ယကစံးဘျုးစံးဖှိၣ်နၤ,
လၢပှၤဂီၢ်မုၢ်တဖၣ်အကျါ န့ၣ်ယကစံးထီၣ်ပတြၢၤနၤလီၤ.
4 အဂ့ၢ်ဒ်အံၤ,
နတၢ်အဲၣ်ဂၢၢ်ကျၢၤဒိၣ်ဝဲလၢမူခိၣ်အဖီခိၣ်,
နတၢ်သူၣ်တီသးလိၤ
ပၢၢ်တုၤလၢတၢ်အၢၣ်တဖၣ်န့ၣ်လီၤ.
5 ယွၤဧၢ, မ်နဘၣ်တၢ်ပာ်ထီၣ်ထီနၤလၢမူခိၣ်အဖီခိၣ်,
မ်နတၢ်လၤတၢ်ကပီၤအိၣ်လၢ
ဟီၣ်ခိၣ်ဒီဘ့ၣ်ညါအလိၤန့ၣ်တက့ၢ်.
6 ဒ်သိးပှၤလၢနအဲၣ်အီၤကပူၤဖျဲးအဂီၢ်န့ၣ်,
ဟ့ၣ်လီၤတၢ်မၤစၢၤလၢနစုထွဲ, ဒီးစံးဆၢယၤတက့ၢ်.
7 ကစၢ်ယွၤအၢၣ်လီၤတ့ၢ်လံတၢ်လၢအတၢ်လီၢ်စီဆှံ အပူၤစံးဝဲ,
လၢတၢ်မၤနၢၤအပူၤယကနီၤဖးၡက့ၣ်,
ဒီးဟ့ၣ်လီၤစူးကိၤသးအတၢ်ပၢၤခိၣ်
ဆူယပှၤဂီၢ်မုၢ်လီၤ.
8 ကံးလဧးမ့ၢ်ယတၢ်, ဒီးမနၤၡ့ၤမ့ၢ်ယတၢ်စ့ၢ်ကီးလီၤ.
အ့ဖရဲၣ်မ့ၢ်ယခိၣ်သလုးထး,
ယူဒၤမ့ၢ်ယစီၤပၤအနီၣ်ထိးဘိလီၤ.
9 မိၤအးမ့ၢ်ယသ့စီတၢ်အသရာ်တဖျၢၣ်,
ယကွံာ်ယခီၣ်ဖံးလၢယကကိးထီၣ်တၢ်မၤနၢၤလၢ အဒိၣ်အဖီခိၣ် ဒ်တၢ်ပနီၣ်တမံၤလၢ ယမၤနၢၤအီၤအသိးန့ၣ်လီၤ.
ယကကိးထီၣ်လၢ တၢ်မၤနၢၤအပူၤလၢ ဖလ့ၡသးအဖီခိၣ်လီၤ.
10 ကစၢ်ယွၤဧၢ, မ့ၢ်မတၤတဂၤကဒုးလဲၤယၤဆူ
ဝ့ၢ်အိၣ်ဒီးအခိၣ်ဒူန့ၣ်လဲၣ်.
မ့ၢ်မတၤကဆှၢယၤဆူအဒိၣ်တဂၤလဲၣ်.
11 မ့ၢ်နညိကွံာ်တ့ၢ်လံပှၤနီၢ်နီၢ်ဧါ.
မ့ၢ်နတဟးထီၣ်ဒီး လဲၤဒုးတၢ်ဒီး ပသုးမုၢ်တဖၣ်န့ၣ်ဘၣ်ဧါ.
12 မၤစၢၤပှၤလၢပတၢ်ထီဒါပဒုၣ်ပဒါန့ၣ်တက့ၢ်.
ပှၤကညီအတၢ်မၤစၢၤန့ၣ်,
မ့ၢ်တၢ်တဂိာ်တသီၣ်ဘၣ်တၢ်လီၤ.
13 ပကမၤတၢ်ဒီး တၢ်ဂံၢ်ဆူၣ်ဘါဆူၣ်လၢ ယွၤလီၤ.
အဂ့ၢ်ဒ်အံၤ, အဝဲဒၣ်န့ၣ် ကယီၢ်တံၢ်လီၤ
ပဒုၣ်ပဒါလီၤ.