စံးထီၣ်ပတြၢၤ 107
1 “အိ, ဟ့ၣ်တၢ်စံးဘျုးစံးဖှိၣ်ဆူယွၤတက့ၢ်.
အဂ့ၢ်ဒ်အံၤ, ယွၤန့ၣ်ဂ့ၤဝဲလီၤ.
အဂ့ၢ်ဒ်အံၤ, အတၢ်အဲၣ်ဂၢၢ်ကျၢၤ
အိၣ်ဝဲလီၤထူလီၤယိာ်လီၤ.
2 မ်ပှၤလၢယွၤပှ့ၤက့ၤအီၤ,
ပှၤလၢအဝဲဒၣ်မၤပူၤဖျဲးအီၤလၢ အဒုၣ်အဒါတဖၣ်,
3 ပှၤတဖၣ်လၢအဝဲကိးဖှိၣ်က့ၤအီၤလၢ ထံကီၢ်တဖၣ်
လၢမုၢ်ထီၣ်ဒီးလၢမုၢ်နုာ်, လၢကလံၤစိး
ဒီးလၢကလံၤထံး, စံးတၢ်ဒ်အံၤတက့ၢ်.
4 ပှၤတနီၤလဲၤဝ့ၤဝီၤတၢ်လၢပှၢ်မုၢ်ကနၢ,
လၢတၢ်လီၢ်အိၣ်သယုၢ်အပူၤ,
ဒီးတထံၣ်န့ၢ်ကျဲဆူ
ဝ့ၢ်လၢကအိၣ်ဝဲဆိးဝဲလၢအပူၤအဂီၢ်န့ၣ်ဘၣ်.
5 အဝဲသ့ၣ်တၢ်သၣ်ဝံၤသၣ်စ့ၤအသး
ဒီးတၢ်သူအသးလၢထံ
ဒီးအသးလီၤဘှါဝဲလၢအပူၤလီၤ.
6 အန့ၣ်ဒီးအဝဲသ့ၣ်ကိးထီၣ်ယွၤလၢ အတၢ်ကီတၢ်ခဲအပူၤ
ဒီးအဝဲမၤပူၤဖျဲးအဝဲသ့ၣ်လၢ
အတၢ်ကိၢ်တၢ်ဂီၤန့ၣ်လီၤ.
7 အဝဲဆှၢအီၤလၢကျဲလၢအလိၤအဘျၢတုၤ
အဝဲသ့ၣ်လဲၤတုၤဆူဝ့ၢ်
လၢကအိၣ်ဝဲဆိးဝဲလၢအပူၤန့ၣ်လီၤ.
8 မ်အဝဲသ့ၣ်စံးဘျုးစံးဖှိၣ်ယွၤလၢ
အတၢ်အဲၣ်ဂၢၢ်ကျၢၤအဃိ,
ဒီးလၢအတၢ်မၤလီၤလးတဖၣ်လၢ
ပှၤကညီဖိခဲလၢာ်အဂီၢ်န့ၣ်တက့ၢ်.
9 အဂ့ၢ်ဒ်အံၤ
ပှၤလၢတၢ်သူအသးလၢထံန့ၣ်ဒုးဘျဲးအီအီၤ,
ဒီးပှၤလၢတၢ်သၣ်ဝံၤအသးန့ၣ်
ဒုးဘျဲးအီၣ်အီၤလၢတၢ်အဂ့ၤလီၤ.
10 ပှၤတနီၤဆ့ၣ်နီၤဝဲလၢတၢ်ခံးတၢ်နၤ
ဒီးတၢ်သူၣ်အုးသးအုးအပူၤ,
ဒီးပှၤလၢတၢ်စၢဃာ်အီၤတဖၣ်
တူၢ်ဘၣ်တၢ်နးတၢ်ဖှီၣ်လၢထးဧိၤတြၤဧိၤလီၤ.
11 အဂ့ၢ်ဒ်အံၤအဝဲသ့ၣ်ပူထီၣ်ကစၢ်ယွၤအကလုၢ်ကထါ,
ဒီးညိကွံာ်တၢ်ထီကတၢၢ်တဂၤ
အတၢ်ဟ့ၣ်ကူၣ်န့ၣ်လီၤ.
12 အဝဲသ့ၣ်အသးလီၤဘှါဝဲလၢတၢ်မၤအကိၢ်အဂီၤ,
လီၤဃံၤဝဲဒီးပှၤမၤစၢၤအီၤတအိၣ်နီတဂၤဘၣ်.
13 အန့ၣ်ဒီးအဝဲသ့ၣ်ကိးထီၣ်ယွၤလၢ
အတၢ်ကိၢ်တၢ်ဂီၤအပူၤ,
ဒီးယွၤမၤပူၤဖျဲးအဝဲသ့ၣ်လၢ
အတၢ်နးတၢ်ဖှီၣ်န့ၣ်လီၤ.
14 အဝဲဒၣ်စိာ်ထီၣ်ကွံာ်အဝဲသ့ၣ်လၢတၢ်ခံးတၢ်နၤ
ဒီးတၢ်သူၣ်အုးသးအုးအဒိၣ်အဃိာ်အပူၤ, ဒီးမၤတဲာ်ကွံာ်
အဝဲသ့ၣ်အထးသွဲတဖၣ်န့ၣ်လီး.
15 မ်အဝဲသ့ၣ်စံးဘျုးစံးဖှိၣ်ယွၤလၢ
အတၢ်အဲၣ်ဂၢၢ်ကျၢၤအဃိ
ဒီးလၢအတၢ်မၤလီၤလးတဖၣ်လၢ
ပှၤကညီဖိခဲလၢာ်အဂီၢ်အဃိန့ၣ်တက့ၢ်.
16 အဂ့ၢ်ဒ်အံၤ, မၤကၢ်ကွံာ်တြဲၤတိၢ်ဘီတဖၣ်,
ဒီးဒီၣ်တဲာ်ကွံာ်နီၣ်ဘိထးတဖၣ်န့ၣ်လီၤ.
17 ပှၤတနီၤမ့ၢ်ပှၤဟးဂီၤဖိလၢအတူၢ်ဘၣ်တၢ်
မ့ၢ်လၢတၢ်ဒဲးဘးအဃိ,
ဒီးမ့ၢ်လၢအတၢ်အၢတၢ်သီအဃိန့ၣ်လီၤ.,
18 အဝဲသ့ၣ်သးဘၣ်အၢတၢ်အီၣ်ခဲလၢာ်
ဒီးအဝဲသ့ၣ်သုးဘူးအသးဆူ
တၢ်သံအတြဲၤတဖၣ်န့ၣ်လီၤ.
19 အန့ၣ်ဒီး
အဝဲသ့ၣ်ကိးထီၣ်ယွၤလၢအတၢ်ကိၢ်တၢ်ဂီၤအပူၤ,
ဒီးယွၤမၤပူၤဖျဲးအဝဲသ့ၣ်လၢ
အတၢ်နးတၢ်ဖှီၣ်န့ၣ်လီၤ.
20 အဝဲမၤဘျါက့ၤအဝဲသ့ၣ်လၢအကလုၢ်
ဒီးမၤပူၤဖျဲးအဝဲသ့ၣ်လၢတၢ်ဟးဂီၤန့ၣ်လီၤ.
21 မ်အဝဲသ့ၣ်စံးဘျုးစံးဖှိၣ်ယွၤလၢ
အတၢ်အဲၣ်ဂၢၢ်ကျၢၤအဃိ,
ဒီးလၢအတၢ်မၤလီၤလးတဖၣ်လၢ
ပှၤကညီဖိခဲလၢာ်အဂီၢ်အဃိန့ၣ်တက့ၢ်.
22 ဒီးမ်သုဝဲသ့ၣ်လုၢ်ထီၣ်တၢ်လုၢ်စံးဘျုးစံးဖှိၣ်တဖၣ်,
ဒီးစံးဘၣ်တဲဘၣ်အတၢ်မၤတဖၣ်လၢ
တၢ်သူၣ်ခုသးခုအတၢ်သးဝံၣ်တဖၣ်
23 ပှၤတနီၤလဲၤတၢ်လၢကဘီတဖၣ်လၢပီၣ်လဲၣ်မိၢ်ပှၢ်အပူၤ
ဒီးလုၢ်အီၣ်အသးသမူလၢ
ပီၣ်လဲၣ်တဖၣ်အပူၤန့ၣ်လီၤ.
24 အဝဲသ့ၣ်ထံၣ်တၢ်လၢယွၤမၤသ့
ဒီးအတၢ်မၤလီၤလးတဖၣ်လၢပီၣ်လဲၣ်ပူၤန့ၣ်လီၤ.
25 အဂ့ၢ်ဒ်အံၤ, ယွၤဟ့ၣ်လီၤအကလုၢ်,
ဒီးဒုးအူထီၣ်ကလံၤမုၢ်တွၤလၢ
အမၤဒိၣ်ထီၣ်ပီၣ်လဲၣ်အလပီတဖၣ်လီၤ.
26 ကဘီတဖၣ်ဘၣ်တၢ်စိာ်ထီၣ်ထီအီၤလၢကလံၤကျါ
ဒီးဘၣ်တၢ်ဆီၣ်လီၤအီၤဆူတၢ်ယိာ်ပူၤလီၤ.
လၢတၢ်ဘၣ်ယိၣ်ဒ်အံၤအပူၤ န့ၣ်ပှၤကညီတဖၣ်
အတၢ်သူၣ်ဒူသးဒူလီၤမၢ်ကွံာ်ဝဲလီၤ.
27 လဲၤကပံၢ်ကပၢ်ဝ့ၤဝီၤတၢ်ဒီးလဲၤကနူၤကပၤ
ဒ်ပှၤအီမူၤသံးအသိးန့ၣ်,
ဒီးအတၢ်ကူၣ်သ့လၢာ်ကွံာ်ဝဲခဲလၢာ်လီၤ.
28 အန့ၣ်ဒီးအဝဲသ့ၣ်ကိးထီၣ်ယွၤလၢ
အတၢ်ကိၢ်တၢ်ဂီၤအပူၤ,
ဒီးယွၤမၤပူၤဖျဲးအဝဲသ့ၣ်လၢ
အတၢ်နးတၢ်ဖှီၣ်န့ၣ်လီၤ.
29 အဝဲမၤဂၢၢ်က့ၤကလံၤမုၢ်
ဒီးပီၣ်လဲၣ်အလပီတဖၣ်အိၣ်ဂၢၢ်ဝဲဒၣ်န့ၣ်လီၤ.
30 အန့ၣ်ဒီးအဝဲသ့ၣ်အသူၣ်ခုအသးခုမ့ၢ်လၢ
တၢ်ဂၢၢ်ထီၣ်က့ၤ, ဒီးဆှၢအဝဲသ့ၣ်ဆူ
ကဘီသန့လၢအဆၢတုၤဝဲဒၣ်အဃိန့ၣ်လီၤ.
31 မ်အဝဲသ့ၣ်စံးဘျုးစံးဖှိၣ်ယွၤလၢ
အတၢ်အဲၣ်ဂၢၢ်ကျၢၤအဃိ,
ဒီးလၢအတၢ်မၤလီၤလးတဖၣ်လၢ
ပှၤကညီဖိခဲလၢာ်အဂီၢ်အဃိန့ၣ်တက့ၢ်
32 မ်အဝဲသ့ၣ်ပာ်ထီၣ်ထီအီၤလၢ
အပှၤဂီၢ်မုၢ်အတၢ်အိၣ်ဖှိၣ်အပူၤ,
ဒီးစံးထီၣ်ပတြၢၤအီၤလၢပှၤသူၣ်က့သးပှၢ်တဖၣ်
အတၢ်အိၣ်ဖှိၣ်အပူၤန့ၣ်တက့ၢ်.
33 ယွၤဒုးဃ့ထီၣ်ကွံာ်ထံကျိတဖၣ်လၢာ်လၢာ်ဆ့ဆ့
ဒီးဆိကတီၢ်ကွံာ်
ထံထီၣ်ပၢၢ်အတၢ်ယွၤလီၤန့ၣ်လီၤ.
34 အဝဲဒၣ်ဒုးကဲထီၣ်ကီၢ်လၢအသၣ်ထီၣ်တဘ့ၣ်ဆူ
အံသၣ်အလီၢ်,
မ့ၢ်လၢပှၤလၢအအိၣ်ဝဲဆိးဝဲတဖၣ်
အတၢ်အၢတၢ်သီအဃိန့ၣ်လီၤ.
35 အဝဲဒုးဆီတလဲက့ၤမဲးမုၢ်ခိၣ်ဆူနိၣ်တဖၣ်,
ဒီးဟီၣ်ခိၣ်လၢအဃ့ဆူထံထီၣ်ပၢၢ်တဖၣ်န့ၣ်လီၤ.
36 ဒီးပျဲပှၤတၢ်သၣ်ဝံၤအသးအိၣ်ဝဲဆိးဝဲဖဲန့ၣ်,
ဒီးအဝဲသ့ၣ်သူၣ်ထီၣ်ဝ့ၢ်တဖျၢၣ်လၢ
ကအိၣ်ဝဲဆိးဝဲလၢအပူၤန့ၣ်လီၤ.
37 အဝဲသ့ၣ်ဖှံတၢ်လၢစံာ်ပျီပူၤတဖၣ်,
ဒီးသူၣ်စပံးအလီၢ်ဒီးဒိးန့ၢ်ဘၣ်ဝဲတၢ်အါမးန့ၣ်လီၤ.
38 မ့ၢ်လၢအတၢ်ဆိၣ်ဂ့ၤဆိၣ်ဝါအဃိ,
အပှၤဂီၢ်မုၢ်အါထီၣ်ဂီၢ်ထီၣ်ဒိၣ်မး,
ဒီးအဝဲတပျဲအဝဲသ့ၣ်အဆၣ်ဖိကီၢ်ဖိ
39 တုၤကစၢ်ယွၤအပှၤဂီၢ်မုၢ်တဖၣ်ဘၣ်တၢ်မၤနၢၤအီၤ
ဒီးဘၣ်တၢ်ဆီၣ်ဘံၣ်ဆီၣ်ဘၢအီၤလၢ
တၢ်မၤနၢၤမၤဃၣ်နးနးကလဲာ်ဒီး
တၢ်တူၢ်ဘၣ်ခီၣ်ဘၣ်န့ၣ်,
40 အဝဲဒုးနဲၣ်အတၢ်သးဘၣ်အၢလၢ
ပှၤလၢအမၤအၢမၤနးအဝဲသ့ၣ်,
ဒီးဒုးလဲၤဝ့ၤဝီၤအဝဲသ့ၣ်လၢမဲးမုၢ်ခိၣ်
လၢကျဲတအိၣ်ဘၣ်အပူၤန့ၣ်လီၤ.
41 မ့မ့ၢ်ပှၤလၢအလိၣ်ဘၣ်တၢ်မၤစၢၤန့ၣ်
ပာ်ထီၣ်ထီဝဲလၢအတၢ်နးတၢ်ဖှီၣ်အပူၤ
ဒီးဒုးအါထီၣ်အဒူၣ်ဖိထၢဖိတဖၣ်
ဒ်သိအဖုတဖၣ်အသိးန့ၣ်လီၤ.
42 ပှၤအတီအလိၤထံၣ်တၢ်အံၤဒီးသးခုဝဲ,
မ့မ့ၢ်ပှၤအၢပှၤသီခဲလၢာ်ကျၢၢ်တံၢ်အထးခိၣ်လီၤ.
43 မ်ပှၤလၢအကူၣ်ဘၣ်ကူၣ်သ့
ဆိကမိၣ်တၢ်သ့ၣ်တဖၣ်အံၤ,
မ်အဝဲသ့ၣ်ဆိကမိၣ်ထီၣ်
ယွၤအတၢ်အဲၣ်ဂၢၢ်ကျၢၤန့ၣ်တက့ၢ်.