စံးထီၣ်ပတြၢၤ 102
1 ယွၤဧၢ, ဒိကနၣ်ယတၢ်ထုကဖၣ်,
ဒီးမ်ယတၢ်ကိးထီၣ်လၢတၢ်မၤစၢၤအဂီၢ်
ဟဲထီၣ်ဆူနအိၣ်တက့ၢ်.
2 လၢယဘၣ်တၢ်ကိၢ်တၢ်ဂီၤအမုၢ်တနံၤန့ၣ်
ပာ်တဒၢနမဲာ်လၢယၤတဂ့ၤ. ဒိးနနၢ်လၢယၤ,
ဒီးမုၢ်တနံၤလၢယကိးထီၣ်နၤန့ၣ်
3 အဂ့ၢ်ဒ်အံၤ, ယမုၢ်နံၤဒံကွံာ်ဝဲမ့ၣ်အူခုၣ်အသိး,
ဒီးယဃံယကွဲတဖၣ် ကဲၤထီၣ်ဝဲဒ်
ဒ်မ့ၣ်အူကဖးအသိးန့ၣ်လီၤ.
4 ယဘၣ်တၢ်တီၢ်လီၤကွံာ်အီၤဒ်နီၣ်ဧိၤမံၤဧိၤလၢ
အဃ့ထီၣ်ကွံာ်အသိးန့ၣ်လီၤ.
ယသးပ့ၤနီၣ်လၢယကအီၣ်ယကိၣ်လီၤ.
5 လၢယတၢ်ကအုကစွါသီၣ်ဒိၣ်ဝဲအဃိ
ယဖှံၣ်လီၤဃဲၤလီၤကွံာ်လီၤ.
6 ယမၤယသးလီၤဂာ်ဒ်ထိၣ်ဝိၣ်ဘိၤလၢ
ပှၢ်လၢ်ကျါအသိး
ဒီးဒ်ဒိကအိလၢအအိၣ်လၢ
တၢ်လီၤပှီၢ်အကျါအသိးန့ၣ်လီၤ.
7 ယမံတန့ၢ်ဂဲၤတန့ၢ်, ဒီးယမၤသးဒ် ထိၣ်ဖှံးအိၣ်ထဲတဘ့ၣ်ဧိၤ
လၢဟံၣ်ခိၣ်အဖီခိၣ်အသိးန့ၣ်လီၤ.
8 ယဒုၣ်ယဒါတဖၣ်ကတိၤဆါယၤသ့တနံၤကျၢၤ,
ဒီးပှၤလၢအဒုၣ်ဒွဲၣ်ယၤတဖၣ်သူယမံၤလၢ
အတၢ်ဆိၣ်အၢအပူၤန့ၣ်လီၤ.
9 ယအီၣ်ဖၣ်ဆါဒ်ကိၣ်အသိး
ဒီးယမၤဃါဃုာ်ယတၢ်အီဒီးမဲာ်ထံလီၤ.
10 မ့ၢ်လၢနတၢ်သးဒိၣ်ထီၣ်ဒီး
သူၣ်ကဲၤသးကဲၤထီၣ်အဃိ,
ဒီးနဟံးထီၣ်ယၤဒီးစူးကွံာ်ယၤန့ၣ်လီၤ.
11 ယမုၢ်နံၤတဖၣ်လီၤဂာ်ဒ်မုၢ်ဟါအတၢ်ကဒုတဖၣ်အသိး
ဒီးယဃ့ထီၣ်ကွံာ်ဝဲဒ်နီၣ်ဧိၤမံၤဧိၤအသိးန့ၣ်လီၤ.
12 မ့မ့ၢ်နဲဒၣ်နၤ, ယွၤဧၢ, နပၢတၢ်လီၤစိၤလီၤထီ
ဒီးနတၢ်မံၤဟူသၣ်ဖျါန့ၣ် ကအိၣ်ဝဲဆိးဝဲလၢ ကယဲၢ်စိၤခဲလၢာ်အပူၤလီၤ.
13 နကဂဲၤဆၢထၢၣ်ဒီးသူၣ်ကညီၤသးကညီၤစံယိၣ်လီၤ.
အဂ့ၢ်ဒ်အံၤ, တၢ်ဆၢကတီၢ်လၢနသ့ၣ်ပာ်လၢ
နကသူၣ်ကညီၤသးကညီၤအီၤန့ၣ်ဘၣ်လံ.
14 မ့ၢ်ဘၣ်တၢ်မၤဟးဂီၤကွံာ်အီၤဒၣ်လဲာ်
နခ့နပှၤတဖၣ်အဲၣ်အီၤ,
မ့ၢ်အိၣ်လၢတၢ်ဟးဂီၤအပူၤဒၣ်လဲာ်
15 ဒီးပှၤကလုာ်တဖၣ်န့ၣ်ကပျံၤယွၤအမံၤ
ဒီးကယဲၢ်ဟီၣ်ခိၣ်အစီၤပၤခဲလၢာ်
ကပျံၤအလၤကပီၤလီၤ.
16 အဂ့ၢ်ဒ်အံၤ, ယွၤကသူၣ်ထီၣ်က့ၤစံယိၣ်,
ဒီးအဝဲကအိၣ်ဖျါထီၣ်လၢအလၤကပီၤအပူၤလီၤ.
17 အဝဲကဒိကနၣ်ပှၤဖှီၣ်ဖိယာ်ဖိအတၢ်ထုကဖၣ်
ဒီးတမၤတရီတပါဘၣ်အတၢ်ဃ့သကွံၢ်ကညးန့ၣ်ဘၣ်.
18 တၢ်လၢယွၤမၤတ့ၢ်ဝဲအံၤ, ကွဲးလီၤအီၤလၢ
ပှၤလၢခံတစိၤဂီၢ်,
ဒ်သိးပှၤလၢအတအိၣ်ဖျဲၣ်ထီၣ်ဒံးသ့ၣ်တဖၣ်
ကစံးထီၣ်ပတြၢၤယွၤန့ၣ်တက့ၢ်.
19 အဝဲကွၢ်လီၤတၢ်လၢအလီၢ်စီဆှံထီၣ်ထီ,
လၢမူခိၣ်န့ၣ်ယွၤကွၢ်လီၤတၢ်ဆူဟီၣ်ခိၣ်လီၤ.
20 အဝဲနၢ်ဟူပှၤဘၣ်တၢ်စၢဃာ်အတၢ်ကအုကစွါတဖၣ်,
ဒီးကမၤပူၤဖျဲးပှၤတဖၣ်လၢအဘၣ်တၢ်စံၣ်ညီၣ် သံအီၤန့ၣ်လီၤ.
21 လၢတၢ်အံၤအဃိ အဝဲအမံၤကဘၣ်တၢ်ကိးသတြီ
အီၤလၢစံယိၣ်အပူၤ,
ဒီးကဘၣ်တၢ်စံးထီၣ်ပတြၢၤအီၤလၢ ဝ့ၢ်ယရူၤၡလ့ၣ်အပူၤ,
22 ဖဲပှၤကလုာ်တဖၣ် ဒီးဘီမုၢ်တဖၣ်အိၣ်ဖှိၣ်တပူၤဃီဒီး
ဘူၣ်ထီၣ်ဘါထီၣ်ယွၤန့ၣ်လီၤ.
23 ယွၤမၤစၢ်လီၤဝဲယဂံၢ်ယဘါဖဲယသးစၢ်ဒံးအခါ
ဒီးမၤဖုၣ်လီၤယသးသမူန့ၣ်လီၤ.
24 ကစၢ်ယွၤဧၢ, တချုးလၢယသးပှၢ်ထီၣ်ဒံးဘၣ်န့ၣ်
ယွၤဧၢ, နမူဝဲလီၤစိၤလီၤထီလီၤ.
25 လၢပျၢၤန့ၣ်နတ့ဟီၣ်ခိၣ်ဒီးလၢနစုဒၣ်နဲန့ၣ်
နဒုးကဲထီၣ်မူခိၣ်လီၤ.
26 တၢ်တဖၣ်န့ၣ်ကလီၤမၢ်ကွံာ်ဝဲ,
မ့မ့ၢ်နဲဒၣ်အံၤနကအိၣ်ကဆိးဒံးနဲလီၤ.
အဝဲသ့ၣ်ကလီၢ်လံၤခဲလၢာ်ဒ်ဆ့ကၤတဖၣ်အသိး,
ဒီးနကစူးကွံာ်အီၤဒ် ဆ့ကၤတဖၣ်အသိး
ဒီးကဟါမၢ်ကွံာ်ဝဲလီၤ.
27 မ့မ့ၢ်နဲဒၣ်အံၤနမ့ၢ်တၢ်ဒ်လီၢ်လီၢ် ဒီးနနံၣ်နလါတဖၣ်
အကတၢၢ်တအိၣ်ဘၣ်န့ၣ်လီၤ.
28 နခ့နပှၤတဖၣ်အဖိအလံၤကအိၣ်ကဆိးလၢ
တၢ်ဘံၣ်တၢ်ဘၢအပူၤ, ဒီးအချံအသၣ်
ကအိၣ်ဂၢၢ်ဆိးကျၢၤလၢနမဲာ်ညါလီၤ.